न꣡मो वाचे꣡ या꣡ चोदिता꣡ या꣡ चा꣡नूदिता त꣡स्यै वाचे꣡ न꣡मो न꣡मो वाचे꣡ न꣡मो वाच꣡स्-प꣡तये न꣡म ऋ꣡षिभ्यो मन्त्र-कृ꣡द्भ्यो म꣡न्त्र-पतिभ्यो मा꣡ मा꣡म् ऋ꣡षयो मन्त्र-कृ꣡तो मन्त्र-प꣡तयः प꣡रादुर् मा꣡ह꣡म् ऋ꣡षीन् मन्त्र-कृ꣡तो मन्त्र-पतीस् प꣡रादां वैश्वदेवीं꣡ वा꣡चम् उद्यास(ग्)ं शिवा꣡म् अ꣡दस्तां जु꣡ष्टां देवे꣡भ्यश् श꣡र्म मे द्यौ꣡श् श꣡र्म पृथिवी꣡ श꣡र्म वि꣡श्वम् इदं꣡ ज꣡गत्
námo vācé yā́ coditā́ yā́ cā́nūditā tásyai vācé námo námo vācé námo vācás-pátaye náma ŕ̥ṣibhyo mantra-kŕ̥dbhyo mántra-patibhyo mā́ mā́m ŕ̥ṣayo mantra-kŕ̥to mantra-pátayaḥ párādur mā́hám ŕ̥ṣīn mantra-kŕ̥to mantra-patīs párādāṃ vaiśvadevī́ṃ vā́cam udyāsa(g)ṃ śivā́m ádastāṃ júṣṭāṃ devébhyaś śárma me dyaúś śárma pr̥thivī́ śárma víśvam idáṃ jágat
Sanskrit only: no published translation is held for this verse.
भूतं꣡ वदिष्ये भु꣡वनं वदिष्ये ते꣡जो वदिष्ये य꣡शो वदिश्ये त꣡पो वदिष्ये ब्र꣡ह्म वदिष्ये सत्यं꣡ वदिष्ये त꣡स्मा अह꣡म् इद꣡म् उपस्त꣡रणम् उ꣡पस्तृण उपस्त꣡रणं मे प्रजा꣡यै पशूनां꣡ भूयाद् उपस्त꣡रणम् अहं꣡ प्रजा꣡यै पशूनां꣡ भूयासं प्रा꣡णापानौ मृत्यो꣡र् मा पातं प्रा꣡णापानौ मा꣡ मा हासिष्टं म꣡धु मनिष्ये म꣡धु जनिष्ये म꣡धु वक्ष्यामि म꣡धु वदिष्यामि म꣡धुमतीं देवे꣡भ्यो वा꣡चम् उद्यास(ग्)ं शु꣡श्रूषे꣡ण्यां मनुष्येभ्यस् तं꣡ मा देवा꣡ अवन्तु शोभा꣡यै पित꣡रो꣡ इ꣡नु मदन्तु ओं꣡ शा꣡न्तिश् शा꣡न्तिश् शा꣡न्तिः
bhūtáṃ vadiṣye bhúvanaṃ vadiṣye téjo vadiṣye yáśo vadiśye tápo vadiṣye bráhma vadiṣye satyáṃ vadiṣye tásmā ahám idám upastáraṇam úpastr̥ṇa upastáraṇaṃ me prajā́yai paśūnā́ṃ bhūyād upastáraṇam aháṃ prajā́yai paśūnā́ṃ bhūyāsaṃ prā́ṇāpānau mr̥tyór mā pātaṃ prā́ṇāpānau mā́ mā hāsiṣṭaṃ mádhu maniṣye mádhu janiṣye mádhu vakṣyāmi mádhu vadiṣyāmi mádhumatīṃ devébhyo vā́cam udyāsa(g)ṃ śúśrūṣéṇyāṃ manuṣyebhyas táṃ mā devā́ avantu śobhā́yai pitáró ínu madantu óṃ śā́ntiś śā́ntiś śā́ntiḥ
Sanskrit only: no published translation is held for this verse.