Varāha Purāṇa 156

अथ मथुराप्रादुर्भावः ।। श्रीवराह उवाच ।। वत्सक्रीडनकं नाम तीर्थं वक्ष्ये परं मम ।। तत्र रक्तशिलाबद्धं रक्तचन्दनभूषितम्

atha mathurāprādurbhāvaḥ || śrīvarāha uvāca || vatsakrīḍanakaṃ nāma tīrthaṃ vakṣye paraṃ mama || tatra raktaśilābaddhaṃ raktacandanabhūṣitam

Sanskrit only: no published translation is held for this verse.

स्नानमात्रेण तत्रैव वायुलोकं व्रजेन्नरः ।। तत्राऽथ मुञ्चते प्राणान्मम लोके महीयते

snānamātreṇa tatraiva vāyulokaṃ vrajennaraḥ || tatrā'tha muñcate prāṇānmama loke mahīyate

Sanskrit only: no published translation is held for this verse.

पुनरन्यत्प्रवक्ष्यामि तच्छृणुष्व वसुन्धरे ।। अस्ति भाण्डीरकं नाम यत्तीर्थं परमुत्तमम्

punaranyatpravakṣyāmi tacchṛṇuṣva vasundhare || asti bhāṇḍīrakaṃ nāma yattīrthaṃ paramuttamam

Sanskrit only: no published translation is held for this verse.

सालैस्तालैश्च तरुभिस्तमालैरर्ज्जुनैस्तथा ।। इङ्गुदैः पीलुकैश्चैव करीरैरक्तपुष्पकैः

sālaistālaiśca tarubhistamālairarjjunaistathā || iṅgudaiḥ pīlukaiścaiva karīrairaktapuṣpakaiḥ

Sanskrit only: no published translation is held for this verse.

तस्मिन्भाण्डीरके स्नातो नियतो नियताशनः ।। सर्वपापविनिर्मुक्तश्चेन्द्रलोकं स गच्छति

tasminbhāṇḍīrake snāto niyato niyatāśanaḥ || sarvapāpavinirmuktaścendralokaṃ sa gacchati

Sanskrit only: no published translation is held for this verse.

तत्राऽथ मुञ्चते प्राणान्मम लोकं च गच्छति ।। पुनरन्यत्प्रवक्ष्यामि क्षेत्रं वृन्दावनं मम

tatrā'tha muñcate prāṇānmama lokaṃ ca gacchati || punaranyatpravakṣyāmi kṣetraṃ vṛndāvanaṃ mama

Sanskrit only: no published translation is held for this verse.

तत्राहं क्रीडयिष्यामि गोभिर् गोपालकैः सह ।। रम्यं च सुप्रतीतं च देवदानवदुर्लभम्

tatrāhaṃ krīḍayiṣyāmi gobhir gopālakaiḥ saha || ramyaṃ ca supratītaṃ ca devadānavadurlabham

Sanskrit only: no published translation is held for this verse.

तत्र कुण्डे महाभागे बहुगुल्मलतावृते ।। तत्र स्नानं प्रकुर्वीत चैकरात्रोषितो नरः

tatra kuṇḍe mahābhāge bahugulmalatāvṛte || tatra snānaṃ prakurvīta caikarātroṣito naraḥ

Sanskrit only: no published translation is held for this verse.

गन्धर्वैरप्सरोभिश्च क्रीडमानः स मोदते ।। तत्राथ मुञ्चते प्राणान्मम लोकं च गच्छति

gandharvairapsarobhiśca krīḍamānaḥ sa modate || tatrātha muñcate prāṇānmama lokaṃ ca gacchati

Sanskrit only: no published translation is held for this verse.

पुनरन्यत्प्रवक्ष्यामि महापातकनाशनम् ।। तत्र वृन्दावने तीर्थे यत्र केशी निपातितः

punaranyatpravakṣyāmi mahāpātakanāśanam || tatra vṛndāvane tīrthe yatra keśī nipātitaḥ

Sanskrit only: no published translation is held for this verse.

तीर्थं शतगुणं पुण्यं यत्र केशी निपातितः ।। केश्यः शतगुणं पुण्यं यत्र विश्रमते हरिः

tīrthaṃ śataguṇaṃ puṇyaṃ yatra keśī nipātitaḥ || keśyaḥ śataguṇaṃ puṇyaṃ yatra viśramate hariḥ

Sanskrit only: no published translation is held for this verse.

तस्माच्छतगुणं पुण्यं नात्र कार्या विचारणा ।। तत्रापि च विशेषोऽस्ति केशीतीर्थे वसुन्धरे

tasmācchataguṇaṃ puṇyaṃ nātra kāryā vicāraṇā || tatrāpi ca viśeṣo'sti keśītīrthe vasundhare

Sanskrit only: no published translation is held for this verse.

तस्मिन्पिण्डप्रदानेन गयातुल्य फलं भवेत्।। स्नाने दाने तथा होमे अग्निष्टोमफलं भवेत्

tasminpiṇḍapradānena gayātulya phalaṃ bhavet|| snāne dāne tathā home agniṣṭomaphalaṃ bhavet

Sanskrit only: no published translation is held for this verse.

सूर्यतीर्थेषु वसुधे द्वादशादित्यसंज्ञिके ।। कालियो रमते तत्र कालिंद्याः सलिले शुभे

sūryatīrtheṣu vasudhe dvādaśādityasaṃjñike || kāliyo ramate tatra kāliṃdyāḥ salile śubhe

Sanskrit only: no published translation is held for this verse.

आदित्या ऊचुः ।। वरं ददासि नो देव वरार्हा यदि वा वयम् ।। अस्मिंस्तीर्थवरे स्नानमस्माकं संप्रदीयताम्

ādityā ūcuḥ || varaṃ dadāsi no deva varārhā yadi vā vayam || asmiṃstīrthavare snānamasmākaṃ saṃpradīyatām

Sanskrit only: no published translation is held for this verse.

आदित्यानां वचः श्रुत्वा क्रीडां कृत्वा वसुन्धरे ।। स्नानमात्रेण तत्रैव मुच्यते सर्वकिल्बिषैः

ādityānāṃ vacaḥ śrutvā krīḍāṃ kṛtvā vasundhare || snānamātreṇa tatraiva mucyate sarvakilbiṣaiḥ

Sanskrit only: no published translation is held for this verse.

अथात्र मुंचते प्राणान्मम लोकं स गच्छति ।। उत्तरे हरिदेवस्य दक्षिणे कालियस्य तु

athātra muṃcate prāṇānmama lokaṃ sa gacchati || uttare haridevasya dakṣiṇe kāliyasya tu

Sanskrit only: no published translation is held for this verse.

कालियो दमितस्तत्र आदित्याः स्थापिता मया ।। वरं वृणुध्वं भद्रं वो यद्वो मनसि वर्त्तते

kāliyo damitastatra ādityāḥ sthāpitā mayā || varaṃ vṛṇudhvaṃ bhadraṃ vo yadvo manasi varttate

Sanskrit only: no published translation is held for this verse.

इति श्रीवराहपुराणे मथुरामाहात्म्ये मथुराप्रादुर्भावो नाम षट्पंचाशदधिकशततमोऽध्यायः

iti śrīvarāhapurāṇe mathurāmāhātmye mathurāprādurbhāvo nāma ṣaṭpaṃcāśadadhikaśatatamo'dhyāyaḥ

Sanskrit only: no published translation is held for this verse.