Varāha Purāṇa 204

अथ दूतप्रेषणवर्णनम् ।। ऋषिरुवाच ।। इदं चैवापरं तस्य वदतो हि मया श्रुतम् ।। चित्रगुप्तस्य विप्रेन्द्रा वचनं लोकशासिनः

atha dūtapreṣaṇavarṇanam || ṛṣiruvāca || idaṃ caivāparaṃ tasya vadato hi mayā śrutam || citraguptasya viprendrā vacanaṃ lokaśāsinaḥ

Sanskrit only: no published translation is held for this verse.

दूरेऽसाविति किं कार्यं न क्षयोऽस्त्यस्य कर्मणः ।। किं कृपां कुरुते तस्मिन्गृहाण जहि मा व्यथः

dūre'sāviti kiṃ kāryaṃ na kṣayo'styasya karmaṇaḥ || kiṃ kṛpāṃ kurute tasmingṛhāṇa jahi mā vyathaḥ

Sanskrit only: no published translation is held for this verse.

व्रीडितः किम्भवाञ्ज्ञातं किं तिष्ठति पराङ्मुखः ।। किं न गच्छसि वेगेन किं त्वया सुचिरं कृतम्

vrīḍitaḥ kimbhavāñjñātaṃ kiṃ tiṣṭhati parāṅmukhaḥ || kiṃ na gacchasi vegena kiṃ tvayā suciraṃ kṛtam

Sanskrit only: no published translation is held for this verse.

गच्छ गच्छ पुनस्तत्र शीघ्रं चैनमिहानय ।। अशक्तोऽस्मीति किं रोषमर्हन्ते दर्पमीदृशम्

gaccha gaccha punastatra śīghraṃ cainamihānaya || aśakto'smīti kiṃ roṣamarhante darpamīdṛśam

Sanskrit only: no published translation is held for this verse.

किं त्वं वदसि दुर्बुद्धे विवाहस्तस्य वर्त्तते ।। ऊर्ध्वरेतास्तपस्वीति त्वं मां भाषयसे कथम्

kiṃ tvaṃ vadasi durbuddhe vivāhastasya varttate || ūrdhvaretāstapasvīti tvaṃ māṃ bhāṣayase katham

Sanskrit only: no published translation is held for this verse.

किं त्वं वदसि गर्ह्यं च मुहूर्त्तं परिपालय ।। रमते कान्तया सार्द्धमिति किं त्वं प्रभाषसे

kiṃ tvaṃ vadasi garhyaṃ ca muhūrttaṃ paripālaya || ramate kāntayā sārddhamiti kiṃ tvaṃ prabhāṣase

Sanskrit only: no published translation is held for this verse.

पतिव्रतेति साध्वीति रहस्यं भाषसे पुनः।। किं किं वदसि बालो हि निशि चैवागतो गृहम्

pativrateti sādhvīti rahasyaṃ bhāṣase punaḥ|| kiṃ kiṃ vadasi bālo hi niśi caivāgato gṛham

Sanskrit only: no published translation is held for this verse.

आनीयते कथं ज्ञात्वा भोक्तुकामं कथं हरे ।। जलशायिनं कथं चैव दातुकामं कथं हरे

ānīyate kathaṃ jñātvā bhoktukāmaṃ kathaṃ hare || jalaśāyinaṃ kathaṃ caiva dātukāmaṃ kathaṃ hare

Sanskrit only: no published translation is held for this verse.

धार्मिका यूयमेवात्र अहमेको नृशंसवत् ।। यात यात तथा दृष्ट्वा यथाकालोऽनतिक्रमेत्

dhārmikā yūyamevātra ahameko nṛśaṃsavat || yāta yāta tathā dṛṣṭvā yathākālo'natikramet

Sanskrit only: no published translation is held for this verse.

शीघ्रं त्वं भव सर्पो हि व्याघ्रस्त्वं च सरीसृपः ।। जले ग्राहो भव त्वं हि त्वं कृमिस्त्वं सरीसृपः

śīghraṃ tvaṃ bhava sarpo hi vyāghrastvaṃ ca sarīsṛpaḥ || jale grāho bhava tvaṃ hi tvaṃ kṛmistvaṃ sarīsṛpaḥ

Sanskrit only: no published translation is held for this verse.

नरकानुगतस्त्वं हि व्याधिभूतः समाश्रयः ।। अतीसारो भव त्वं हि त्वं छर्दिस्त्वं पुनर्भवः कर्णरोगो विषूची च नित्यरोगश्च सम्भवः ।। ज्वरो भव महाघोरो जले ग्राहो दुरासदः

narakānugatastvaṃ hi vyādhibhūtaḥ samāśrayaḥ || atīsāro bhava tvaṃ hi tvaṃ chardistvaṃ punarbhavaḥ karṇarogo viṣūcī ca nityarogaśca sambhavaḥ || jvaro bhava mahāghoro jale grāho durāsadaḥ

Sanskrit only: no published translation is held for this verse.

वातव्याधिस्तथा घोरस्तथैव त्वं जलोदरः।। अपस्मारस्त्वमुन्मादो वातरोगस्तथैव च

vātavyādhistathā ghorastathaiva tvaṃ jalodaraḥ|| apasmārastvamunmādo vātarogastathaiva ca

Sanskrit only: no published translation is held for this verse.

विभ्रमस्त्वं भवेच्छीघ्रं विष्टम्भश्च पुनर्भव ।। व्याधिर्भव महाघोरो ह्ययं तृष्णां तु विन्दतु

vibhramastvaṃ bhavecchīghraṃ viṣṭambhaśca punarbhava || vyādhirbhava mahāghoro hyayaṃ tṛṣṇāṃ tu vindatu

Sanskrit only: no published translation is held for this verse.

यथाकालं यथादृष्टं तावत्कालोऽत्र तिष्ठतु ।। कालसंहरणे वापि शुभस्यागमनेऽपि वा

yathākālaṃ yathādṛṣṭaṃ tāvatkālo'tra tiṣṭhatu || kālasaṃharaṇe vāpi śubhasyāgamane'pi vā

Sanskrit only: no published translation is held for this verse.

यूयं च कृतकर्माणस्ततो मोक्षमवाप्स्यथ ।। द्रुतं द्रवत वेगेन सर्वे गच्छत मा चिरम्

yūyaṃ ca kṛtakarmāṇastato mokṣamavāpsyatha || drutaṃ dravata vegena sarve gacchata mā ciram

Sanskrit only: no published translation is held for this verse.

वराज्ञा धर्मराजस्य या मया समुदाहृता ।। एकाहं क्षपयेस्तत्र द्विरात्रं तत्र मा चिरम्

varājñā dharmarājasya yā mayā samudāhṛtā || ekāhaṃ kṣapayestatra dvirātraṃ tatra mā ciram

Sanskrit only: no published translation is held for this verse.

त्रिरात्रं वै चतूरात्रं षड्रात्रं दशरात्रकम् ।। पक्षं वा मासमेकं वा बहून्मासांस्तथापि वा

trirātraṃ vai catūrātraṃ ṣaḍrātraṃ daśarātrakam || pakṣaṃ vā māsamekaṃ vā bahūnmāsāṃstathāpi vā

Sanskrit only: no published translation is held for this verse.

क्षपयित्वा यथाकालं ततो मोक्षमवाप्स्यथ ।। भूतात्मा मोहवांस्तत्र करुणः कष्टमेव च

kṣapayitvā yathākālaṃ tato mokṣamavāpsyatha || bhūtātmā mohavāṃstatra karuṇaḥ kaṣṭameva ca

Sanskrit only: no published translation is held for this verse.

यस्मिन्यस्मिंस्तु कालेऽहं यावतश्च श्रयाम्यहम् ।। तस्मिंस्तस्मिन्महाकालं यूयं तत्कर्त्तुमर्हथ

yasminyasmiṃstu kāle'haṃ yāvataśca śrayāmyaham || tasmiṃstasminmahākālaṃ yūyaṃ tatkarttumarhatha

Sanskrit only: no published translation is held for this verse.

विनियोगा मया सूक्ता यथापूर्वं यथाश्रुतम् ।। जाग्रतं वा प्रमत्तं वा यथा कालो न सम्पतेत्

viniyogā mayā sūktā yathāpūrvaṃ yathāśrutam || jāgrataṃ vā pramattaṃ vā yathā kālo na sampatet

Sanskrit only: no published translation is held for this verse.

यत्नात्तथा तु कर्त्तव्यं भवद्भिर्मम शासनात् ।। अभयं चात्र यच्छामि ब्राह्मणेभ्यो न संशयः

yatnāttathā tu karttavyaṃ bhavadbhirmama śāsanāt || abhayaṃ cātra yacchāmi brāhmaṇebhyo na saṃśayaḥ

Sanskrit only: no published translation is held for this verse.

तस्माद्यात ऋषिभ्यश्च स्त्रीभ्यश्चैव महाबलाः ।। यातनाया न भेतव्यमहमाज्ञापयामि वः

tasmādyāta ṛṣibhyaśca strībhyaścaiva mahābalāḥ || yātanāyā na bhetavyamahamājñāpayāmi vaḥ

Sanskrit only: no published translation is held for this verse.

यथावाच्यं च कुरुत यथा कालो न गच्छति ।। यथाकामं प्रकुरुत यच्च दृष्टं यथा तथा

yathāvācyaṃ ca kuruta yathā kālo na gacchati || yathākāmaṃ prakuruta yacca dṛṣṭaṃ yathā tathā

Sanskrit only: no published translation is held for this verse.

मयाज्ञप्ता विशेषेण मृत्युना सह सङ्गतः ।। यथा वीरो महातेजाश्चित्रगुप्तो महायशाः

mayājñaptā viśeṣeṇa mṛtyunā saha saṅgataḥ || yathā vīro mahātejāścitragupto mahāyaśāḥ

Sanskrit only: no published translation is held for this verse.

यथाब्रवीत्स्वयं रुद्रो यथा शक्रः शचीपतिः ।। यथाज्ञापयते ब्रह्मा चित्रगुप्तस्तथा प्रभुः

yathābravītsvayaṃ rudro yathā śakraḥ śacīpatiḥ || yathājñāpayate brahmā citraguptastathā prabhuḥ

Sanskrit only: no published translation is held for this verse.

इति श्रीवराहपुराणे संसारचक्रे दूतप्रेषणं नाम चतुरधिकद्विशततमोऽध्यायः

iti śrīvarāhapurāṇe saṃsāracakre dūtapreṣaṇaṃ nāma caturadhikadviśatatamo'dhyāyaḥ

Sanskrit only: no published translation is held for this verse.