Varāha Purāṇa 213

अथ गोकर्णेश्वरमाहात्म्यम् ।। सूत उवाच ।। पुरा देवैर्विनिहते संग्रामे तारकामये ।। अत्युच्छ्रिते प्रतिबले दानवानां बले तथा

atha gokarṇeśvaramāhātmyam || sūta uvāca || purā devairvinihate saṃgrāme tārakāmaye || atyucchrite pratibale dānavānāṃ bale tathā

Sanskrit only: no published translation is held for this verse.

सहस्राक्षे लब्धपदे क्षीणशत्रौ गतास्पदे ।। सम्यक्प्रसूतिमापन्ने त्रैलोक्ये सचराचरे

sahasrākṣe labdhapade kṣīṇaśatrau gatāspade || samyakprasūtimāpanne trailokye sacarācare

Sanskrit only: no published translation is held for this verse.

शृङ्गे चैवाचलेन्द्रस्य मेरोः सर्वहिरण्यये ।। मणिविद्रुमविद्धे च विपुले पंकजासने

śṛṅge caivācalendrasya meroḥ sarvahiraṇyaye || maṇividrumaviddhe ca vipule paṃkajāsane

Sanskrit only: no published translation is held for this verse.

सुखोपविष्टमेकाग्रं स्थिरचित्तं कृतेक्षणम् ।। निवृत्तकार्यं मुदितं सूर्यवैश्वानरद्युतिम्

sukhopaviṣṭamekāgraṃ sthiracittaṃ kṛtekṣaṇam || nivṛttakāryaṃ muditaṃ sūryavaiśvānaradyutim

Sanskrit only: no published translation is held for this verse.

प्रणम्य मूर्ध्ना चरणावुपगृह्य समाहितः ।। ब्रह्माणं परिपप्रच्छ कुमारो नतिपूर्वकः

praṇamya mūrdhnā caraṇāvupagṛhya samāhitaḥ || brahmāṇaṃ paripapraccha kumāro natipūrvakaḥ

Sanskrit only: no published translation is held for this verse.

सनत्कुमार उवाच ।। भगवञ्छ्रोतुमिच्छामि पुराणमृषिसंस्तुतम् ।। पुराणं तु महाभाग त्वत्तस्तत्त्वविदां वर

sanatkumāra uvāca || bhagavañchrotumicchāmi purāṇamṛṣisaṃstutam || purāṇaṃ tu mahābhāga tvattastattvavidāṃ vara

Sanskrit only: no published translation is held for this verse.

कथमुत्तर गोकर्णं दक्षिणं च कथं विभो।। शृङ्गेश्वरस्य परमं कथं सम्यक्प्रतिष्ठितम्

kathamuttara gokarṇaṃ dakṣiṇaṃ ca kathaṃ vibho|| śṛṅgeśvarasya paramaṃ kathaṃ samyakpratiṣṭhitam

Sanskrit only: no published translation is held for this verse.

क्षेत्रस्य कि प्रमाणं स्यात्किञ्च तीर्थफलं स्मृतम् ।। कथं पशुपतिस्तत्र भगवान्मृगरूपधृक्

kṣetrasya ki pramāṇaṃ syātkiñca tīrthaphalaṃ smṛtam || kathaṃ paśupatistatra bhagavānmṛgarūpadhṛk

Sanskrit only: no published translation is held for this verse.

सर्वैस्त्वत्प्रमुखैर्देवैः कथमासादितं पुनः ।। मृगरूपं कथं चास्य शरीरं क्व प्रतिष्ठितम्

sarvaistvatpramukhairdevaiḥ kathamāsāditaṃ punaḥ || mṛgarūpaṃ kathaṃ cāsya śarīraṃ kva pratiṣṭhitam

Sanskrit only: no published translation is held for this verse.

यथा यत्र च यस्तत्र विधिः सम्यगनुष्ठितः ।। तत्सर्वं निखिलेनाशु ब्रूहि मे वाग्विदां वर

yathā yatra ca yastatra vidhiḥ samyaganuṣṭhitaḥ || tatsarvaṃ nikhilenāśu brūhi me vāgvidāṃ vara

Sanskrit only: no published translation is held for this verse.

एवमुक्तः स भगवान्ब्रह्मा ब्रह्मविदां वरः ।। उवाच तस्मै पुत्राय गुह्यमेतत्पुरातनम्

evamuktaḥ sa bhagavānbrahmā brahmavidāṃ varaḥ || uvāca tasmai putrāya guhyametatpurātanam

Sanskrit only: no published translation is held for this verse.

ब्रह्मोवाच ।। शृणु वत्स महाभाग यथातत्त्वं ब्रवीमि ते ।। पुराणमेतद्ब्रह्मर्षे सरहस्यं यथाश्रुतम्

brahmovāca || śṛṇu vatsa mahābhāga yathātattvaṃ bravīmi te || purāṇametadbrahmarṣe sarahasyaṃ yathāśrutam

Sanskrit only: no published translation is held for this verse.

अस्ति भूधरराजस्य मन्दरस्योत्तरे शुचौ ।। मुञ्जवान्नाम शिखरो नन्दनोपवनद्युतिः

asti bhūdhararājasya mandarasyottare śucau || muñjavānnāma śikharo nandanopavanadyutiḥ

Sanskrit only: no published translation is held for this verse.

वज्रस्फटिकपाषाणः प्रवालांकुरशर्क्करः ।। नीलामलशिलावर्णो गुहानिर्झरकन्दरः

vajrasphaṭikapāṣāṇaḥ pravālāṃkuraśarkkaraḥ || nīlāmalaśilāvarṇo guhānirjharakandaraḥ

Sanskrit only: no published translation is held for this verse.

विचित्रकुसुमोपेतैर्लतामञ्जीरधारिभिः ।। रेजे यः प्रांशुभिः शृङ्गैरुल्लिखद्भिरिवाम्बरम्

vicitrakusumopetairlatāmañjīradhāribhiḥ || reje yaḥ prāṃśubhiḥ śṛṅgairullikhadbhirivāmbaram

Sanskrit only: no published translation is held for this verse.

दर्यस्तत्राधिकं रेजुर्नानाधातुपरिस्रवैः ।। शिलीन्ध्रकुसुमोपेताश्चित्रिता इव सर्वतः

daryastatrādhikaṃ rejurnānādhātuparisravaiḥ || śilīndhrakusumopetāścitritā iva sarvataḥ

Sanskrit only: no published translation is held for this verse.

तेऽत्र केतकिखण्डाश्च कुंदखंडाश्च पुष्पिताः ।। उन्मीलिता इवाभान्ति धातकीवनराजिभिः

te'tra ketakikhaṇḍāśca kuṃdakhaṃḍāśca puṣpitāḥ || unmīlitā ivābhānti dhātakīvanarājibhiḥ

Sanskrit only: no published translation is held for this verse.

भिन्नेन्द्रनीलविमलैर्धौतैः प्रस्रवणाम्बुभिः ।। चित्रैः कुसुमसंछन्नैः शिलाप्रस्तरविस्तरैः

bhinnendranīlavimalairdhautaiḥ prasravaṇāmbubhiḥ || citraiḥ kusumasaṃchannaiḥ śilāprastaravistaraiḥ

Sanskrit only: no published translation is held for this verse.

शक्रचापनिभै रम्यैः कुबेरभवनद्युतौ ।। तस्मिन्नगवरे रम्ये महोरगनिषेविते

śakracāpanibhai ramyaiḥ kuberabhavanadyutau || tasminnagavare ramye mahoraganiṣevite

Sanskrit only: no published translation is held for this verse.

क्रीडद्भिर्देवमिथुनेर्नृत्यद्भिश्चाप्सरोगणैः ।। कूजद्भिः शिखिभिर्मत्तैः सेविते च नगोत्तमे

krīḍadbhirdevamithunernṛtyadbhiścāpsarogaṇaiḥ || kūjadbhiḥ śikhibhirmattaiḥ sevite ca nagottame

Sanskrit only: no published translation is held for this verse.

कल्हारकुसुमोपेते हंससारससेविते।। प्रसन्नसलिलाकीर्णे सरोभिः फुल्लपंकजैः

kalhārakusumopete haṃsasārasasevite|| prasannasalilākīrṇe sarobhiḥ phullapaṃkajaiḥ

Sanskrit only: no published translation is held for this verse.

गजयूथानुकीर्णाभिर्जुष्टाभिर्मृगपक्षिभिः ।। सेविताभिर्मुनिगणैः सरिद्भिरुपशोभिते

gajayūthānukīrṇābhirjuṣṭābhirmṛgapakṣibhiḥ || sevitābhirmunigaṇaiḥ saridbhirupaśobhite

Sanskrit only: no published translation is held for this verse.

किन्नरोद्गीतकुहरे परपुष्टनिनादिते ।। विद्याधरशताकीर्णे देवगन्धर्व सेविते

kinnarodgītakuhare parapuṣṭaninādite || vidyādharaśatākīrṇe devagandharva sevite

Sanskrit only: no published translation is held for this verse.

धारापातैश्च तोयानां विस्फुलिङ्गैः सहस्रशः ।। प्रज्वालितेऽतुले शृङ्गे रम्ये हरितशाद्वले

dhārāpātaiśca toyānāṃ visphuliṅgaiḥ sahasraśaḥ || prajvālite'tule śṛṅge ramye haritaśādvale

Sanskrit only: no published translation is held for this verse.

सर्वर्तुकवनोद्याने पुष्पाकरसुशोभिते ।। यज्ञकिम्पुरुषावासे गुह्यकानामथाश्रये

sarvartukavanodyāne puṣpākarasuśobhite || yajñakimpuruṣāvāse guhyakānāmathāśraye

Sanskrit only: no published translation is held for this verse.

तस्मिन्गिरिवरे रम्ये सेवितव्ये सुशोभने ।। धर्मारण्ये तपःक्षेत्रे मुनिसिद्धनिषेविते

tasmingirivare ramye sevitavye suśobhane || dharmāraṇye tapaḥkṣetre munisiddhaniṣevite

Sanskrit only: no published translation is held for this verse.

वरदस्तत्र भगवान्स्थाणुर्नाम महेश्वरः ।। सर्वामरगुरुर्देवो नित्यं सन्निहितः प्रभुः

varadastatra bhagavānsthāṇurnāma maheśvaraḥ || sarvāmaragururdevo nityaṃ sannihitaḥ prabhuḥ

Sanskrit only: no published translation is held for this verse.

भक्तानुकम्पी स श्रीमान्गिरीन्द्रसुतया सह ।। स ह्यध्यास्ते गिरिवरं पार्षदैश्च गुहेन च

bhaktānukampī sa śrīmāngirīndrasutayā saha || sa hyadhyāste girivaraṃ pārṣadaiśca guhena ca

Sanskrit only: no published translation is held for this verse.

विमानयायिनः सर्वे तं देवमजमव्ययम् ।। आजग्मुः सेवितुं देवा वरेण्यमजमव्ययम्

vimānayāyinaḥ sarve taṃ devamajamavyayam || ājagmuḥ sevituṃ devā vareṇyamajamavyayam

Sanskrit only: no published translation is held for this verse.

अन्ये देवनिकायाश्च सेवितुं प्रपतन्ति तम् ।। ततस्त्रेतायुगे काले नन्दी नाम महामुनिः

anye devanikāyāśca sevituṃ prapatanti tam || tatastretāyuge kāle nandī nāma mahāmuniḥ

Sanskrit only: no published translation is held for this verse.

आरिराधयिषुः शर्वं तपस्तेपे सुदारुणम् ।। ग्रीष्मे पंचतपास्तिष्ठेच्छिशिरे सलिलाश्रयः

ārirādhayiṣuḥ śarvaṃ tapastepe sudāruṇam || grīṣme paṃcatapāstiṣṭhecchiśire salilāśrayaḥ

Sanskrit only: no published translation is held for this verse.

ऊर्ध्वबाहुर्निरालम्बस्तोयाऽनिलहुताशनैः ।। व्रतैश्च विविधैरुग्रै स्तपोभिर्नियमैस्तथा

ūrdhvabāhurnirālambastoyā'nilahutāśanaiḥ || vrataiśca vividhairugrai stapobhirniyamaistathā

Sanskrit only: no published translation is held for this verse.

जपपुष्पोपहारैश्च कालेकाले मुनिः सदा ।। शङ्करं विधिवद्भक्त्या सोऽर्च्चयद्द्विजपुङ्गवः

japapuṣpopahāraiśca kālekāle muniḥ sadā || śaṅkaraṃ vidhivadbhaktyā so'rccayaddvijapuṅgavaḥ

Sanskrit only: no published translation is held for this verse.

उग्रेण तपसात्मानं योजयामास सुव्रतः ।। काष्ठभूतो यदा विप्रः कृशो धर्मसुसन्ततः

ugreṇa tapasātmānaṃ yojayāmāsa suvrataḥ || kāṣṭhabhūto yadā vipraḥ kṛśo dharmasusantataḥ

Sanskrit only: no published translation is held for this verse.

क्षामोऽभूत्कृष्णवर्णश्च ततः प्रीतश्च शङ्करः ।। सम्यगाराधितो भक्त्या नियमेन च तोषितः

kṣāmo'bhūtkṛṣṇavarṇaśca tataḥ prītaśca śaṅkaraḥ || samyagārādhito bhaktyā niyamena ca toṣitaḥ

Sanskrit only: no published translation is held for this verse.

अदृश्यं पश्य मे रूपं वत्स प्रीतोऽस्मि ते मुने ।। यत्पश्यन्तीह विद्वांसो रूपमप्रतिमौजसम्

adṛśyaṃ paśya me rūpaṃ vatsa prīto'smi te mune || yatpaśyantīha vidvāṃso rūpamapratimaujasam

Sanskrit only: no published translation is held for this verse.

सहस्रसूर्यकिरणं ज्वालामालिनमूर्जितम् ।। बालार्क मण्डलाकारं प्रभामण्डलमण्डितम्

sahasrasūryakiraṇaṃ jvālāmālinamūrjitam || bālārka maṇḍalākāraṃ prabhāmaṇḍalamaṇḍitam

Sanskrit only: no published translation is held for this verse.

जटाजूटतटाश्लिष्टं चन्द्रालंकृतशेखरम् ।। जगदालोचनं श्रीमत्प्रदीप्तस्वत्रिलोचनम्

jaṭājūṭataṭāśliṣṭaṃ candrālaṃkṛtaśekharam || jagadālocanaṃ śrīmatpradīptasvatrilocanam

Sanskrit only: no published translation is held for this verse.

प्रादेशमात्रं रुचिरं शतशीर्षं शतोदरम्।। सहस्रबाहुचरणं सहस्राक्षिशिरोमुखम्

prādeśamātraṃ ruciraṃ śataśīrṣaṃ śatodaram|| sahasrabāhucaraṇaṃ sahasrākṣiśiromukham

Sanskrit only: no published translation is held for this verse.

अणीयसामणीयांसं बृहतां तु बृहत्तरम् ।। अक्षमालापवित्राङ्गं कमण्डलु करोद्यतम्

aṇīyasāmaṇīyāṃsaṃ bṛhatāṃ tu bṛhattaram || akṣamālāpavitrāṅgaṃ kamaṇḍalu karodyatam

Sanskrit only: no published translation is held for this verse.

सिंहचर्माम्बरधरं व्यालयज्ञोपवीतिनम् ।। दृष्ट्वा देवं महादेवं हृष्टरोमा महातपाः

siṃhacarmāmbaradharaṃ vyālayajñopavītinam || dṛṣṭvā devaṃ mahādevaṃ hṛṣṭaromā mahātapāḥ

Sanskrit only: no published translation is held for this verse.

प्राञ्जलिः प्रणतो भूत्वाऽगृणाद्ब्रह्म सनातनम् ।। नमो धात्रे विधात्रे च संभवे वरदाय च

prāñjaliḥ praṇato bhūtvā'gṛṇādbrahma sanātanam || namo dhātre vidhātre ca saṃbhave varadāya ca

Sanskrit only: no published translation is held for this verse.

जगद्भोक्त्रे त्रिनेत्राय शंकराय शिवाय च ।। भवाय भवगोप्त्रे च मुनये कृत्तिवाससे

jagadbhoktre trinetrāya śaṃkarāya śivāya ca || bhavāya bhavagoptre ca munaye kṛttivāsase

Sanskrit only: no published translation is held for this verse.

नीलकण्ठाय भीमाय भूतभव्यभवाय च ।। लम्बभ्रुवे करालाय हरिनेत्राय मीढुषे

nīlakaṇṭhāya bhīmāya bhūtabhavyabhavāya ca || lambabhruve karālāya harinetrāya mīḍhuṣe

Sanskrit only: no published translation is held for this verse.

गणानां पतये स्रष्ट्रे संक्षेप्त्रे भीषणाय च ।। सौम्याय सौम्यतपसे भीमाय त्र्यम्बकाय च

gaṇānāṃ pataye sraṣṭre saṃkṣeptre bhīṣaṇāya ca || saumyāya saumyatapase bhīmāya tryambakāya ca

Sanskrit only: no published translation is held for this verse.

प्रेतावासनिवासाय रुद्राय वरदाय च ।। कपालमालिने तस्मै हरिश्मश्रुधराय च

pretāvāsanivāsāya rudrāya varadāya ca || kapālamāline tasmai hariśmaśrudharāya ca

Sanskrit only: no published translation is held for this verse.

भक्तप्रियाय सततं नमोऽस्तु परमात्मने ।। एवं नन्दी भवं स्तुत्वा नमस्कृत्य च सर्वशः

bhaktapriyāya satataṃ namo'stu paramātmane || evaṃ nandī bhavaṃ stutvā namaskṛtya ca sarvaśaḥ

Sanskrit only: no published translation is held for this verse.

प्रणम्य शिरसा देवं पुनः पुनरवन्दत ।। ततस्तु भगवान्प्रीतस्तस्मै विप्राय शंकरः।

praṇamya śirasā devaṃ punaḥ punaravandata || tatastu bhagavānprītastasmai viprāya śaṃkaraḥ|

Sanskrit only: no published translation is held for this verse.

उवाच च वचः साक्षात्तमृषिं वरदः प्रभुः ।। वरान्वृणीष्व विप्रेन्द्र यानिच्छसि महामुने

uvāca ca vacaḥ sākṣāttamṛṣiṃ varadaḥ prabhuḥ || varānvṛṇīṣva viprendra yānicchasi mahāmune

Sanskrit only: no published translation is held for this verse.

तांस्ते सर्वान्प्रयच्छामि दुर्ल्लभानपि मारिष ।। प्रभुत्वममरत्वं वा शक्रत्वमपि वा प्रभो

tāṃste sarvānprayacchāmi durllabhānapi māriṣa || prabhutvamamaratvaṃ vā śakratvamapi vā prabho

Sanskrit only: no published translation is held for this verse.

ब्रह्मत्वं लोकपालत्वमपवर्गमथापि वा ।। अथाष्टगुणमैश्वर्यं गाणपत्यमथापि वा

brahmatvaṃ lokapālatvamapavargamathāpi vā || athāṣṭaguṇamaiśvaryaṃ gāṇapatyamathāpi vā

Sanskrit only: no published translation is held for this verse.

यदिच्छसि मुने शीघ्रं तद्ब्रूहि द्विजपुङ्गव ।। इत्युक्तोऽसौ भगवता शर्वेण मुनिपुङ्गवः

yadicchasi mune śīghraṃ tadbrūhi dvijapuṅgava || ityukto'sau bhagavatā śarveṇa munipuṅgavaḥ

Sanskrit only: no published translation is held for this verse.

प्रोवाच वरदं देवं प्रहृष्टेनान्तरात्मना ।। न प्रभुत्वं न देवत्वं नेन्द्रत्वमपि वा प्रभो

provāca varadaṃ devaṃ prahṛṣṭenāntarātmanā || na prabhutvaṃ na devatvaṃ nendratvamapi vā prabho

Sanskrit only: no published translation is held for this verse.

ब्रह्मत्वं लोकपालत्वं नापवर्गं वरप्रद ।। नैवाष्टगुणमैश्वर्यं गाणपत्यं न च प्रभो

brahmatvaṃ lokapālatvaṃ nāpavargaṃ varaprada || naivāṣṭaguṇamaiśvaryaṃ gāṇapatyaṃ na ca prabho

Sanskrit only: no published translation is held for this verse.

स्पृहये देवदेवेश प्रसन्ने त्वयि शंकर ।। यदि प्रीतोऽसि भगवन्ननुक्रोशतया मम

spṛhaye devadeveśa prasanne tvayi śaṃkara || yadi prīto'si bhagavannanukrośatayā mama

Sanskrit only: no published translation is held for this verse.

अनुग्राह्यो ह्ययं देव त्वयावश्यं सुराधिप ।। यथान्ये न भवेद्भक्तिस्त्वत्तो नित्यं महेश्वर

anugrāhyo hyayaṃ deva tvayāvaśyaṃ surādhipa || yathānye na bhavedbhaktistvatto nityaṃ maheśvara

Sanskrit only: no published translation is held for this verse.

तथाहं भक्तिमिच्छामि सर्वभूताशये त्वयि ।। यथा च न भवेद्विघ्नं तपस्यानिरतस्य मे

tathāhaṃ bhaktimicchāmi sarvabhūtāśaye tvayi || yathā ca na bhavedvighnaṃ tapasyāniratasya me

Sanskrit only: no published translation is held for this verse.

कोटिजप्येन रुद्राणामाराधनपरस्य च ।। एतत्तु वचनं श्रुत्वा नन्दिनः स महेश्वरः

koṭijapyena rudrāṇāmārādhanaparasya ca || etattu vacanaṃ śrutvā nandinaḥ sa maheśvaraḥ

Sanskrit only: no published translation is held for this verse.

प्रहस्योवाच तं प्रीत्या ततो मधुरया गिरा ।। प्रीतोऽस्म्युत्तिष्ठ विप्रर्षे तप्यमानेन सुव्रत

prahasyovāca taṃ prītyā tato madhurayā girā || prīto'smyuttiṣṭha viprarṣe tapyamānena suvrata

Sanskrit only: no published translation is held for this verse.

आराधितश्च भक्त्याहं त्वया शुद्धेन चेतसा ।। पर्याप्तं ते महाभाग तपः कर्तुं तपोधन

ārādhitaśca bhaktyāhaṃ tvayā śuddhena cetasā || paryāptaṃ te mahābhāga tapaḥ kartuṃ tapodhana

Sanskrit only: no published translation is held for this verse.

निवर्त्तयति मां वत्स मत्पादाराधने रतः ।। जप्ता ते त्रिगुणा कोटी रुद्राणां पुरतो मम

nivarttayati māṃ vatsa matpādārādhane rataḥ || japtā te triguṇā koṭī rudrāṇāṃ purato mama

Sanskrit only: no published translation is held for this verse.

पूर्णं वर्षसहस्रं च तपस्तीव्रं महामुने ।। न कृतं यत्पुरा देवैर्नासुरैर्ऋषिभिर्न च

pūrṇaṃ varṣasahasraṃ ca tapastīvraṃ mahāmune || na kṛtaṃ yatpurā devairnāsurairṛṣibhirna ca

Sanskrit only: no published translation is held for this verse.

कृतं सुमहदाश्चर्यं त्वया कर्म सुदुष्करम् ।। संक्षोभितमिदं सर्वं त्रैलोक्यं सचराचरम्

kṛtaṃ sumahadāścaryaṃ tvayā karma suduṣkaram || saṃkṣobhitamidaṃ sarvaṃ trailokyaṃ sacarācaram

Sanskrit only: no published translation is held for this verse.

आगमिष्यन्ति ते द्रष्टुं देवाः सर्वे सवासवाः ।। अक्षयश्चाव्ययश्च त्वमतर्क्यः ससुरासुरैः

āgamiṣyanti te draṣṭuṃ devāḥ sarve savāsavāḥ || akṣayaścāvyayaśca tvamatarkyaḥ sasurāsuraiḥ

Sanskrit only: no published translation is held for this verse.

दिव्यतेजोवपूः श्रीमान्दिव्याभरणभूषितः ।। मत्तुल्यो मत्प्रभावश्च त्वमेकः ससुरासुरैः

divyatejovapūḥ śrīmāndivyābharaṇabhūṣitaḥ || mattulyo matprabhāvaśca tvamekaḥ sasurāsuraiḥ

Sanskrit only: no published translation is held for this verse.

मद्रूपधारी मत्तेजास्त्र्यक्षः सर्वगुणोत्तमः ।। भविष्यसि न सन्देहो देवदानवपूजितः

madrūpadhārī mattejāstryakṣaḥ sarvaguṇottamaḥ || bhaviṣyasi na sandeho devadānavapūjitaḥ

Sanskrit only: no published translation is held for this verse.

अनेनैव शरीरेण जरामरणवर्जितः ।। दुष्प्राप्येयमवाप्ता ते देवैर्गाणेश्वरी गतिः

anenaiva śarīreṇa jarāmaraṇavarjitaḥ || duṣprāpyeyamavāptā te devairgāṇeśvarī gatiḥ

Sanskrit only: no published translation is held for this verse.

पार्षदानां वरिष्ठस्त्वं मामकानां द्विजोत्तम ।। नन्दीश्वर इति ख्यातो भविष्यसि न संशयः

pārṣadānāṃ variṣṭhastvaṃ māmakānāṃ dvijottama || nandīśvara iti khyāto bhaviṣyasi na saṃśayaḥ

Sanskrit only: no published translation is held for this verse.

प्राप्तमष्टगुणं सत्यमैश्वर्यं ते तपोधन ।। द्वितीयां मे तनुं त्वां तु नमस्यन्ति च देवताः

prāptamaṣṭaguṇaṃ satyamaiśvaryaṃ te tapodhana || dvitīyāṃ me tanuṃ tvāṃ tu namasyanti ca devatāḥ

Sanskrit only: no published translation is held for this verse.

अद्यप्रभृति देवाग्र्य देवकार्येषु सर्वतः ।। प्रभुस्त्वं भविता लोके मत्प्रसादान्मुनीश्वर

adyaprabhṛti devāgrya devakāryeṣu sarvataḥ || prabhustvaṃ bhavitā loke matprasādānmunīśvara

Sanskrit only: no published translation is held for this verse.

त्वामेवाभ्यर्च्चयिष्यन्ति सर्वभूतानि सर्वतः ।। मत्तः समभिवाञ्छन्ति प्रसादं पार्षदाधिप

tvāmevābhyarccayiṣyanti sarvabhūtāni sarvataḥ || mattaḥ samabhivāñchanti prasādaṃ pārṣadādhipa

Sanskrit only: no published translation is held for this verse.

वरान्वरार्थिनां दाता विधाता जगतः सदा ।। भविष्यसि च धर्मज्ञ भीतानामभयप्रदः

varānvarārthināṃ dātā vidhātā jagataḥ sadā || bhaviṣyasi ca dharmajña bhītānāmabhayapradaḥ

Sanskrit only: no published translation is held for this verse.

यस्त्वां द्वेष्टि स मां द्वेष्टि यस्त्वामनु स मामनु ।। नावयोरन्तरं किंचिदम्बरानिलयोरिव

yastvāṃ dveṣṭi sa māṃ dveṣṭi yastvāmanu sa māmanu || nāvayorantaraṃ kiṃcidambarānilayoriva

Sanskrit only: no published translation is held for this verse.

द्वारे तु दक्षिणे नित्यं त्वया स्थेयं गणाधिप ।। वामे तु विभुना चापि महाकालेन सर्वदा

dvāre tu dakṣiṇe nityaṃ tvayā stheyaṃ gaṇādhipa || vāme tu vibhunā cāpi mahākālena sarvadā

Sanskrit only: no published translation is held for this verse.

प्रतीहारो भवानद्य सर्वदा त्रिदशोत्तमः ।। शिरो मे रक्षतु भवान्महाकालेऽपि मे गणः

pratīhāro bhavānadya sarvadā tridaśottamaḥ || śiro me rakṣatu bhavānmahākāle'pi me gaṇaḥ

Sanskrit only: no published translation is held for this verse.

न वज्रेण न दण्डेन न चक्रेण न चाग्निना ।। कांचिच्छक्नोति वै बाधां कर्त्तुं वै भुवनत्रये

na vajreṇa na daṇḍena na cakreṇa na cāgninā || kāṃcicchaknoti vai bādhāṃ karttuṃ vai bhuvanatraye

Sanskrit only: no published translation is held for this verse.

देवदानवगन्धर्वा यक्षराक्षसपन्नगाः ।। त्वामेव संश्रयिष्यन्ति मद्भक्ताः पुरुषाश्च ये

devadānavagandharvā yakṣarākṣasapannagāḥ || tvāmeva saṃśrayiṣyanti madbhaktāḥ puruṣāśca ye

Sanskrit only: no published translation is held for this verse.

त्वयि तुष्टे ह्यहं तुष्टः कुपिते कुपितस्त्वहम् ।। त्वत्तः प्रियतरो नास्ति ममान्यो द्विजपुंगव

tvayi tuṣṭe hyahaṃ tuṣṭaḥ kupite kupitastvaham || tvattaḥ priyataro nāsti mamānyo dvijapuṃgava

Sanskrit only: no published translation is held for this verse.

एवं तस्मै वरान्दत्त्वा प्रीतः स्वयमुमापतिः ।। उवाच भूयः स्पष्टेन स्वरेणाम्बरचारिणा

evaṃ tasmai varāndattvā prītaḥ svayamumāpatiḥ || uvāca bhūyaḥ spaṣṭena svareṇāmbaracāriṇā

Sanskrit only: no published translation is held for this verse.

आगतान्विद्धि सर्वान्वै त्रिदशान्समरुद्गणान् ।। दिदृक्षया च भद्रं ते कृतकृत्यश्च साम्प्रतम्

āgatānviddhi sarvānvai tridaśānsamarudgaṇān || didṛkṣayā ca bhadraṃ te kṛtakṛtyaśca sāmpratam

Sanskrit only: no published translation is held for this verse.

यदीरितं मया वत्स वरं प्रतिवचस्त्वयि ।। प्रविष्टं न श्रुतिपथं दिवि सर्वदिवौकसाम्

yadīritaṃ mayā vatsa varaṃ prativacastvayi || praviṣṭaṃ na śrutipathaṃ divi sarvadivaukasām

Sanskrit only: no published translation is held for this verse.

नारायणं पुरस्कृत्य सेन्द्रास्ते समरुद्गणाः ।। प्रेमार्थे चागमिष्यन्ति वरार्थं तपसाऽमराः

nārāyaṇaṃ puraskṛtya sendrāste samarudgaṇāḥ || premārthe cāgamiṣyanti varārthaṃ tapasā'marāḥ

Sanskrit only: no published translation is held for this verse.

यक्षविद्याधरगणाः सिद्धगन्धर्वपन्नगाः ।। मुनयश्च महात्मानस्तपोलब्धाः सहस्रशः

yakṣavidyādharagaṇāḥ siddhagandharvapannagāḥ || munayaśca mahātmānastapolabdhāḥ sahasraśaḥ

Sanskrit only: no published translation is held for this verse.

ते बुद्ध्वा त्वद्गतामृद्धि प्रतप्ताः परमेर्ष्यया ।। तपांसि विविधान्यत्र विविधान्नियमांस्तथा

te buddhvā tvadgatāmṛddhi prataptāḥ paramerṣyayā || tapāṃsi vividhānyatra vividhānniyamāṃstathā

Sanskrit only: no published translation is held for this verse.

चर्तुं समभिवाञ्छन्ति सदाभ्यासे वरार्थिनः ।। वरदं यामभिज्ञाय गिरौ मौञ्जवति स्थितम्

cartuṃ samabhivāñchanti sadābhyāse varārthinaḥ || varadaṃ yāmabhijñāya girau mauñjavati sthitam

Sanskrit only: no published translation is held for this verse.

अत्रैते यावदागम्य न मां पश्यन्ति मानवाः ।। तावदेव त्वितः शीघ्रं गमिष्यामि महामुने

atraite yāvadāgamya na māṃ paśyanti mānavāḥ || tāvadeva tvitaḥ śīghraṃ gamiṣyāmi mahāmune

Sanskrit only: no published translation is held for this verse.

अद्य ते तु मया सर्वे देवा ब्रह्मपुरोगमाः ।। द्रष्टव्याश्चानुमन्तव्या मत्तोऽनुग्रहकांक्षिणः

adya te tu mayā sarve devā brahmapurogamāḥ || draṣṭavyāścānumantavyā matto'nugrahakāṃkṣiṇaḥ

Sanskrit only: no published translation is held for this verse.

अभिप्रायं च सर्वेषां जानामि द्विजसत्तम ।। अनुगुह्य वरैस्तैश्च तत्रैवान्तरधीयत

abhiprāyaṃ ca sarveṣāṃ jānāmi dvijasattama || anuguhya varaistaiśca tatraivāntaradhīyata

Sanskrit only: no published translation is held for this verse.

इति श्रीवराहपुराणे भगवच्छास्त्रे गोकर्णेश्वरमाहात्म्ये त्रयोदशाधिकद्विशततमोऽ ध्यायः

iti śrīvarāhapurāṇe bhagavacchāstre gokarṇeśvaramāhātmye trayodaśādhikadviśatatamo' dhyāyaḥ

Sanskrit only: no published translation is held for this verse.