Visnudharmottara-Purana 3.343

वज्र उवाच अतीव सुमुखाराध्यो देवो विष्णुर् उरुक्रमः । स्तुतेन दर्शयाम् आस विश्वरूपं द्विजन्मनाम्

vajra uvāca atīva sumukhārādhyo devo viṣṇur urukramaḥ / stutena darśayām āsa viśvarūpaṃ dvijanmanām

Sanskrit only: no published translation is held for this verse.

प्रसादं परमं तस्य ब्रूहि भक्तजने मम । तृप्तिं ब्रह्मन् न गच्छामि शृण्वन्न् एतत् कथामृतम्

prasādaṃ paramaṃ tasya brūhi bhaktajane mama / tṛptiṃ brahman na gacchāmi śṛṇvann etat kathāmṛtam

Sanskrit only: no published translation is held for this verse.

मार्कण्डेय उवाच स विधिज्ञो महाराज मातलिः शक्रसारथिः । तस्यास्ति सदृशी कन्या गुणकाशीति विश्रुता

mārkaṇḍeya uvāca sa vidhijño mahārāja mātaliḥ śakrasārathiḥ / tasyāsti sadṛśī kanyā guṇakāśīti viśrutā

Sanskrit only: no published translation is held for this verse.

मातलिर् नारदश् चैव अन्वेष्टुं तद् वनं (?) पुरा । चंक्रम्यमाणौ सकलम् आर्घकस्यात्मजात्मजम्

mātalir nāradaś caiva anveṣṭuṃ tad vanaṃ (?) purā / caṃkramyamāṇau sakalam ārghakasyātmajātmajam

Sanskrit only: no published translation is held for this verse.

सुमुखाख्यं ददृशतुस् तौ गृहीत्वा गताव् उभौ । नागे शक्रं ततः शक्राद् अयाचेतां तु ताव् उभौ

sumukhākhyaṃ dadṛśatus tau gṛhītvā gatāv ubhau / nāge śakraṃ tataḥ śakrād ayācetāṃ tu tāv ubhau

Sanskrit only: no published translation is held for this verse.

सुमुखस्याभयं तार्क्ष्यात् तयोः शक्रो ददौ वरम् । वीर्यज्ञस् तार्क्ष्यवीर्यस्य स ययौ केशवान्तिकम्

sumukhasyābhayaṃ tārkṣyāt tayoḥ śakro dadau varam / vīryajñas tārkṣyavīryasya sa yayau keśavāntikam

Sanskrit only: no published translation is held for this verse.

सुमुखस्याभयं प्रादात् तार्क्ष्यम् मधुनिषूदनः । आजगाम ततस् तार्क्ष्यः सरोषः केशवान्तिकम्

sumukhasyābhayaṃ prādāt tārkṣyam madhuniṣūdanaḥ / ājagāma tatas tārkṣyaḥ saroṣaḥ keśavāntikam

Sanskrit only: no published translation is held for this verse.

गरुड उवाच किम् अवज्ञाय मां कृष्ण सुमुखे दीयते वरः । मम पृष्ठगतः शत्रुंस् त्वं निहंसि च बुद्ध्यसे । कुटुम्बाभरणं शत्रुं पन्नगं मम रक्षसि

garuḍa uvāca kim avajñāya māṃ kṛṣṇa sumukhe dīyate varaḥ / mama pṛṣṭhagataḥ śatruṃs tvaṃ nihaṃsi ca buddhyase / kuṭumbābharaṇaṃ śatruṃ pannagaṃ mama rakṣasi

Sanskrit only: no published translation is held for this verse.

मार्कण्डेय उवाच एवम् उक्तस् तदा तेन विष्णुर् गरुडम् अब्रवीत्

mārkaṇḍeya uvāca evam uktas tadā tena viṣṇur garuḍam abravīt

Sanskrit only: no published translation is held for this verse.

न मे शक्तो जगद् वोढुं सकलं विहगेश्वर । अहम् एवात्मनात्मानं धारयामि रणेरणे

na me śakto jagad voḍhuṃ sakalaṃ vihageśvara / aham evātmanātmānaṃ dhārayāmi raṇeraṇe

Sanskrit only: no published translation is held for this verse.

शक्तिश् चेद् अस्ति वोढुं ते भुजम् एकं वहस्व मे । एवम् उक्त्वा ददौ पृष्ठे तस्य सव्यं भुजं हरिः

śaktiś ced asti voḍhuṃ te bhujam ekaṃ vahasva me / evam uktvā dadau pṛṣṭhe tasya savyaṃ bhujaṃ hariḥ

Sanskrit only: no published translation is held for this verse.

ततो विषण्णवदनः पक्षत्यागात् खगोत्तमः । क्लान्तो दीनश् च तुष्टाव देवेशं मधुसूदनम्

tato viṣaṇṇavadanaḥ pakṣatyāgāt khagottamaḥ / klānto dīnaś ca tuṣṭāva deveśaṃ madhusūdanam

Sanskrit only: no published translation is held for this verse.

गरुड उवाच नमस् ते देवदेवेश सुरासुरनमस्कृत । अजेय पुण्डरीकाक्ष शरणागतवत्सल

garuḍa uvāca namas te devadeveśa surāsuranamaskṛta / ajeya puṇḍarīkākṣa śaraṇāgatavatsala

Sanskrit only: no published translation is held for this verse.

न मया त्वद्बलं ज्ञातम् आत्मसंभावितात्मना । त्वम् एव देव त्रैलोक्यं सदा धारयसे ऽनघ

na mayā tvadbalaṃ jñātam ātmasaṃbhāvitātmanā / tvam eva deva trailokyaṃ sadā dhārayase 'nagha

Sanskrit only: no published translation is held for this verse.

आत्मानम् आत्मना देव त्वम् एव वहसे सदा । यस्य ते देव सकलं देहे त्रिभुवनं स्थितम्

ātmānam ātmanā deva tvam eva vahase sadā / yasya te deva sakalaṃ dehe tribhuvanaṃ sthitam

Sanskrit only: no published translation is held for this verse.

तस्य वोढुं कथं शक्ता मद्विधा हि सहस्रशः । तस्मात् प्रसीद भगवन् मम ध्वजनिवासिनः

tasya voḍhuṃ kathaṃ śaktā madvidhā hi sahasraśaḥ / tasmāt prasīda bhagavan mama dhvajanivāsinaḥ

Sanskrit only: no published translation is held for this verse.

नास्त्य् अन्तस् तव देवेश कर्मणां भुवनत्रये । कस् ते कीर्तयितुं शक्तः कर्माण्य् अनवशेषतः

nāsty antas tava deveśa karmaṇāṃ bhuvanatraye / kas te kīrtayituṃ śaktaḥ karmāṇy anavaśeṣataḥ

Sanskrit only: no published translation is held for this verse.

कर्मणां कीर्तनं वा ते का स्तुतिः परमेश्वर । सर्वत्र सर्वशक्तिस् त्वं प्रसीद मम शत्रुहन्

karmaṇāṃ kīrtanaṃ vā te kā stutiḥ parameśvara / sarvatra sarvaśaktis tvaṃ prasīda mama śatruhan

Sanskrit only: no published translation is held for this verse.

सर्वभूतकृतावास वासुदेव जगत्पते । कल्पान्ताम्भोधिशयन नारायण महाद्युते

sarvabhūtakṛtāvāsa vāsudeva jagatpate / kalpāntāmbhodhiśayana nārāyaṇa mahādyute

Sanskrit only: no published translation is held for this verse.

नाभीकमलकिञ्जल्क- पिञ्जरीकृतविग्रह । प्रसीद मे नमस् ते ऽस्तु पक्षिणो ध्वजवासिनः

nābhīkamalakiñjalka- piñjarīkṛtavigraha / prasīda me namas te 'stu pakṣiṇo dhvajavāsinaḥ

Sanskrit only: no published translation is held for this verse.

श्रीभगवान् उवाच आत्मसंभावना तार्क्ष्य न कार्या ते कदाचन । अहम् एवात्मनात्मानं वहामि त्वां च धारये

śrībhagavān uvāca ātmasaṃbhāvanā tārkṣya na kāryā te kadācana / aham evātmanātmānaṃ vahāmi tvāṃ ca dhāraye

Sanskrit only: no published translation is held for this verse.

प्रीता न च त्वया भार्या यद् अपक्षः कृतो ह्य् असि । मया त्रिभुवनं न्यस्तं त्वदर्थम् अखिलं भुजे

prītā na ca tvayā bhāryā yad apakṣaḥ kṛto hy asi / mayā tribhuvanaṃ nyastaṃ tvadartham akhilaṃ bhuje

Sanskrit only: no published translation is held for this verse.

त्वया तुल्यो हि बलवांल् लोके ऽन्यो नास्ति कश्चन । यस्य दोर्दण्डसंस्पर्शाज् जीवितं न च निर्गतम्

tvayā tulyo hi balavāṃl loke 'nyo nāsti kaścana / yasya dordaṇḍasaṃsparśāj jīvitaṃ na ca nirgatam

Sanskrit only: no published translation is held for this verse.

यद्वश्(?)शरीरजो भूत्वा बलवान् खगसत्तम । विशेषवन्तः पक्षान्ते भविष्यन्ति न संशयः

yadvaś(?)śarīrajo bhūtvā balavān khagasattama / viśeṣavantaḥ pakṣānte bhaviṣyanti na saṃśayaḥ

Sanskrit only: no published translation is held for this verse.

मार्कण्डेय उवाच एवम् उक्तः सुपर्णस् तु सुपर्णान् प्राप्तवान् पुनः । तेजोबलाधिकत्वं वा लेभे देवप्रसादतः

mārkaṇḍeya uvāca evam uktaḥ suparṇas tu suparṇān prāptavān punaḥ / tejobalādhikatvaṃ vā lebhe devaprasādataḥ

Sanskrit only: no published translation is held for this verse.

एवं पुरुषवत् तार्क्ष्यः स्तूयमानश् च शार्ङ्गिणम् । भूय एव सुपर्ण(त्)त्वं गमितो ऽतिबलः कृतः

evaṃ puruṣavat tārkṣyaḥ stūyamānaś ca śārṅgiṇam / bhūya eva suparṇa(t)tvaṃ gamito 'tibalaḥ kṛtaḥ

Sanskrit only: no published translation is held for this verse.

शक्रयाचितमात्रेण सुमुखो ऽप्य् अमरः कृतः । तस्माद् राजन् विजानीहि तस्य दानवविद्विषः

śakrayācitamātreṇa sumukho 'py amaraḥ kṛtaḥ / tasmād rājan vijānīhi tasya dānavavidviṣaḥ

Sanskrit only: no published translation is held for this verse.

नास्त्य् अदेयं हि भक्तेषु देवराज्यम् अपि ध्रुवम् । मृत्युपाशगृहीतानां पतनान्(?) नरके तथा । स्मृतमात्रः स देवेशस् तद्भयाद् विनिवर्तकः

nāsty adeyaṃ hi bhakteṣu devarājyam api dhruvam / mṛtyupāśagṛhītānāṃ patanān(?) narake tathā / smṛtamātraḥ sa deveśas tadbhayād vinivartakaḥ

Sanskrit only: no published translation is held for this verse.

निहतसकलदुःखो भक्तिभाजां नराणां द्विजविबुधवराणां पूजनीयो ऽरिहन्ता । खगपनृपतियायी वीरसंजातवर्णो भवतु मधुरिपुस् ते भक्तिनम्रस्य तुष्टः

nihatasakaladuḥkho bhaktibhājāṃ narāṇāṃ dvijavibudhavarāṇāṃ pūjanīyo 'rihantā / khagapanṛpatiyāyī vīrasaṃjātavarṇo bhavatu madhuripus te bhaktinamrasya tuṣṭaḥ

Sanskrit only: no published translation is held for this verse.