Viṣṇu Purāṇa 5.28

चारुदेष्णं सुदेष्णं च चारुदेहं च वीर्यवान् । सुषेणं चारुगुप्तं च भद्रचारुं तथा परम्

cārudeṣṇaṃ sudeṣṇaṃ ca cārudehaṃ ca vīryavān / suṣeṇaṃ cāruguptaṃ ca bhadracāruṃ tathā param

Sanskrit only: no published translation is held for this verse.

चारुविन्दं सुचारुं च चारुं च बलिनां वरम् । रुक्मिण्य् अजनयत् पुत्रान् कन्यां चारुमतीं तथा

cāruvindaṃ sucāruṃ ca cāruṃ ca balināṃ varam / rukmiṇy ajanayat putrān kanyāṃ cārumatīṃ tathā

Sanskrit only: no published translation is held for this verse.

अन्याश् च भार्याः कृष्णस्य बभूवुः सप्त शोभनाः । कालिन्दी मित्रविन्दा च सत्या नाग्नजिती तथा

anyāś ca bhāryāḥ kṛṣṇasya babhūvuḥ sapta śobhanāḥ / kālindī mitravindā ca satyā nāgnajitī tathā

Sanskrit only: no published translation is held for this verse.

देवी जाम्बवती चापि रोहिणी कामरूपिणी । मद्रराजसुता चान्या सुशीला शीलमण्डना

devī jāmbavatī cāpi rohiṇī kāmarūpiṇī / madrarājasutā cānyā suśīlā śīlamaṇḍanā

Sanskrit only: no published translation is held for this verse.

सात्राजिती सत्यभामा लक्ष्मणा चारुहासिनी । षोडशासन् सहस्राणि स्त्रीणाम् अन्यानि चक्रिणः

sātrājitī satyabhāmā lakṣmaṇā cāruhāsinī / ṣoḍaśāsan sahasrāṇi strīṇām anyāni cakriṇaḥ

Sanskrit only: no published translation is held for this verse.

प्रद्युम्नो ऽपि महावीर्यो रुक्मिणस् तनयां शुभाम् । स्वयंवरस्थां जग्राह सा च तं तनयं हरेः

pradyumno 'pi mahāvīryo rukmiṇas tanayāṃ śubhām / svayaṃvarasthāṃ jagrāha sā ca taṃ tanayaṃ hareḥ

Sanskrit only: no published translation is held for this verse.

तस्याम् अस्याभवत् पुत्रो महाबलपराक्रमः । अनिरुद्धो रणे रुद्धो वीर्योदधिर् अरिंदमः

tasyām asyābhavat putro mahābalaparākramaḥ / aniruddho raṇe ruddho vīryodadhir ariṃdamaḥ

Sanskrit only: no published translation is held for this verse.

तस्यापि रुक्मिणः पौत्रीं वरयाम् आस केशवः । दौहित्राय ददौ रुक्मी तां स्पर्धन्न् अपि शौरिणा

tasyāpi rukmiṇaḥ pautrīṃ varayām āsa keśavaḥ / dauhitrāya dadau rukmī tāṃ spardhann api śauriṇā

Sanskrit only: no published translation is held for this verse.

तस्या विवाहे रामाद्या यादवा हरिणा सह रुक्मिणो नगरं जग्मुर् नाम्ना भोजकटं द्विज

tasyā vivāhe rāmādyā yādavā hariṇā saha rukmiṇo nagaraṃ jagmur nāmnā bhojakaṭaṃ dvija

Sanskrit only: no published translation is held for this verse.

विवाहे तत्र निर्वृत्ते प्राद्युम्नेः सुमहात्मनः । कलिङ्गराजप्रमुखा रुक्मिणं वाक्यम् अब्रुवन्

vivāhe tatra nirvṛtte prādyumneḥ sumahātmanaḥ / kaliṅgarājapramukhā rukmiṇaṃ vākyam abruvan

Sanskrit only: no published translation is held for this verse.

अनक्षज्ञो हली द्यूते तथास्य व्यसनं महत् । न जयामो बलं कस्माद् द्यूते नैनं महाद्युते

anakṣajño halī dyūte tathāsya vyasanaṃ mahat / na jayāmo balaṃ kasmād dyūte nainaṃ mahādyute

Sanskrit only: no published translation is held for this verse.

तथेति तान् आह नृपान् रुक्मी बलसमन्वितः । सभायां सह रामेण चक्रे द्यूतं च वै तदा

tatheti tān āha nṛpān rukmī balasamanvitaḥ / sabhāyāṃ saha rāmeṇa cakre dyūtaṃ ca vai tadā

Sanskrit only: no published translation is held for this verse.

सहस्रम् एकं निष्काणां रुक्मिणा विजितो बलः । द्वितीये ऽपि पणे चान्यत् सहस्रं रुक्मिणा जितः

sahasram ekaṃ niṣkāṇāṃ rukmiṇā vijito balaḥ / dvitīye 'pi paṇe cānyat sahasraṃ rukmiṇā jitaḥ

Sanskrit only: no published translation is held for this verse.

ततो दशसहस्राणि निष्काणां पणम् आददे । बलभद्रो ऽजयत् तानि रुक्मी द्यूतविदां वरः

tato daśasahasrāṇi niṣkāṇāṃ paṇam ādade / balabhadro 'jayat tāni rukmī dyūtavidāṃ varaḥ

Sanskrit only: no published translation is held for this verse.

ततो जहास स्वनवत् कलिङ्गाधिपतिर् द्विज । दन्तान् विदर्शयन् मूढो रुक्मी चाह मदोद्धतः

tato jahāsa svanavat kaliṅgādhipatir dvija / dantān vidarśayan mūḍho rukmī cāha madoddhataḥ

Sanskrit only: no published translation is held for this verse.

अविद्यो ऽयं मया द्यूते बलदेवः पराजितः । मुधैवाक्षावलेपान्धो यो ऽवमेने ऽक्षकोविदान्

avidyo 'yaṃ mayā dyūte baladevaḥ parājitaḥ / mudhaivākṣāvalepāndho yo 'vamene 'kṣakovidān

Sanskrit only: no published translation is held for this verse.

दृष्ट्वा कलिङ्गराजानं प्रकाशदशनाननम् । रुक्मिणं चापि दुर्वाक्यं कोपं चक्रे हलायुधः

dṛṣṭvā kaliṅgarājānaṃ prakāśadaśanānanam / rukmiṇaṃ cāpi durvākyaṃ kopaṃ cakre halāyudhaḥ

Sanskrit only: no published translation is held for this verse.

ततः कोपपरीतात्मा निष्ककोटिं हलायुधः । ग्लहं जग्राह रुक्मी च तदर्थे ऽक्षान् अपातयत्

tataḥ kopaparītātmā niṣkakoṭiṃ halāyudhaḥ / glahaṃ jagrāha rukmī ca tadarthe 'kṣān apātayat

Sanskrit only: no published translation is held for this verse.

अजयद् बलदेवस् तं प्राहोच्चैस् तं जितं मया । मयेति रुक्मी प्राहोच्चैर् अलीकोक्तैर् अलं बल

ajayad baladevas taṃ prāhoccais taṃ jitaṃ mayā / mayeti rukmī prāhoccair alīkoktair alaṃ bala

Sanskrit only: no published translation is held for this verse.

त्वयोक्तो ऽयं ग्लहः सत्यं न मयैषो ऽनुमोदितः । एवं त्वया चेद् विजितं मया न विजितं कथम्

tvayokto 'yaṃ glahaḥ satyaṃ na mayaiṣo 'numoditaḥ / evaṃ tvayā ced vijitaṃ mayā na vijitaṃ katham

Sanskrit only: no published translation is held for this verse.

अथान्तरिक्षे वाग् उच्चैः प्राह गम्भीरनादिनी । बलदेवस्य तं कोपं वर्धयन्ती महात्मनः

athāntarikṣe vāg uccaiḥ prāha gambhīranādinī / baladevasya taṃ kopaṃ vardhayantī mahātmanaḥ

Sanskrit only: no published translation is held for this verse.

जितं बलेन धर्मेण रुक्मिणा भाषितं मृषा । अनुक्त्वापि वचः किंचित् कृतं भवति कर्मणा

jitaṃ balena dharmeṇa rukmiṇā bhāṣitaṃ mṛṣā / anuktvāpi vacaḥ kiṃcit kṛtaṃ bhavati karmaṇā

Sanskrit only: no published translation is held for this verse.

ततो बलः समुत्थाय कोपसंरक्तलोचनः । जघानाष्टापदेनैव रुक्मिणं स महाबलः

tato balaḥ samutthāya kopasaṃraktalocanaḥ / jaghānāṣṭāpadenaiva rukmiṇaṃ sa mahābalaḥ

Sanskrit only: no published translation is held for this verse.

कलिङ्गराजं चादाय विस्फुरन्तं बलाद् बलः । बभञ्ज दन्तान् कुपितो यैः प्रकाशं जहास सः

kaliṅgarājaṃ cādāya visphurantaṃ balād balaḥ / babhañja dantān kupito yaiḥ prakāśaṃ jahāsa saḥ

Sanskrit only: no published translation is held for this verse.

आकृष्य च महास्तम्भं जातरूपमयं बलः । जघान ये ऽन्ये तत्पक्षाः भूभृतः कुपितो बलः

ākṛṣya ca mahāstambhaṃ jātarūpamayaṃ balaḥ / jaghāna ye 'nye tatpakṣāḥ bhūbhṛtaḥ kupito balaḥ

Sanskrit only: no published translation is held for this verse.

ततो हाहाकृतं सर्वं पलायनपरं द्विज । तद् राजमण्डलं सर्वं बभूव कुपिते बले

tato hāhākṛtaṃ sarvaṃ palāyanaparaṃ dvija / tad rājamaṇḍalaṃ sarvaṃ babhūva kupite bale

Sanskrit only: no published translation is held for this verse.

बलेन निहतं श्रुत्वा रुक्मिणं मधुसूदनः । नोवाच किंचिन् मैत्रेय रुक्मिणीबलयोर् भयात्

balena nihataṃ śrutvā rukmiṇaṃ madhusūdanaḥ / novāca kiṃcin maitreya rukmiṇībalayor bhayāt

Sanskrit only: no published translation is held for this verse.

ततो ऽनिरुद्धम् आदाय कृतोद्वाहं द्विजोत्तम । द्वारकाम् आजगामाथ यदुचक्रं स केशवः

tato 'niruddham ādāya kṛtodvāhaṃ dvijottama / dvārakām ājagāmātha yaducakraṃ sa keśavaḥ

Sanskrit only: no published translation is held for this verse.