Section 1.1

In this sitting

1. 1.1.1आत्मा वा इदम् एक एवाग्र आसीत् । नान्यत् किञ्चन मिषत् । स ईक्षत लोकान् नु सृजा इति
2. 1.1.2स इमांल् लोकान् असृजताम्भो मरीचीर् मरम् आपः । अदो ऽम्भः परेण दिवम् । द्यौः प्रतिष्ठा । अन्तरिक्षं मरीचयः । पृथिवी मरः । या अधस्तात् ता आपः
3. 1.1.3स ईक्षतेमे नु लोकाः । लोकपालान् नु सृजा इति । सो ऽद्भ्य एव पुरुषं समुद्धृत्यामूर्च्छयत्
4. 1.1.4तम् अभ्यतपत् । तस्याभितप्तस्य मुखं निरभिद्यत यथाण्डम् । मुखाद् वाक् । वाचो ऽग्निः । नासिके निरभिद्येताम् । नासिकाभ्यां प्राणः । प्राणाद् वायुः । अक्षिणी निरभिद्येताम् । अक्षीभ्यां चक्षुः । चक्षुष आदित्यः । कर्णौ निरभिद्येताम् । कर्णाभ्यां श्रोत्रम् । श्रोत्राद् दिशः । त्वङ् निरभिद्यत । त्वचो लोमानि । लोमभ्य ओषधिवनस्पतयः । हृदयं निरभिद्यत । हृदयान् मनः । मनसश् चन्द्रमाः । नाभिर् निरभिद्यत । नाभ्या अपानः । अपानान् मृत्युः । शिश्नं निरभिद्यत । शिश्नाद् रेतः । रेतस आपः