Section 1.3

In this sitting

1. 1.3.1स ईक्षतेमे नु लोकाश् च लोकपालाश् च । अन्नम् एभ्यः सृजा इति
2. 1.3.2सो ऽपो ऽभ्यतपत् । ताभ्यो ऽभितप्ताभ्यो मूर्तिर् अजायत । या वै सा मूर्तिर् अजायतान्नं वै तत्
3. 1.3.3तद् एनत् सृष्टं पराङ् अत्यजिघांसत् । तद् वाचाजिघृक्षत् । तन् नाशक्नोद् वाचा ग्रहीतुम् । स यद् धैनद् वाचाग्रहैष्यद् अभिव्याहृत्य हैवान्नम् अत्रप्स्यत्
4. 1.3.4तत् प्राणेनाजिघृक्षत् । तन् नाशक्नोत् प्राणेन ग्रहीतुम् । स यद् धैनत् प्राणेनाग्रहैष्यद् अभिप्राण्य हैवान्नम् अत्रप्स्यत्
5. 1.3.5तच् चक्षुषाजिघृक्षत् । तन् नाशक्नोच् चक्षुषा ग्रहीतुम् । स यद् धैनच् चक्षुषाग्रहैष्यद् दृष्ट्वा हैवान्नम् अत्रप्स्यत्
6. 1.3.6तच् छ्रोत्रेणाजिघृक्षत् । तन् नाशक्नोच् छ्रोत्रेण ग्रहीतुम् । स यद् धैनच् छ्रोत्रेणाग्रहैष्यच् छ्रुत्वा हैवान्नम् अत्रप्स्यत्
7. 1.3.7तत् त्वचाजिघृक्षत् । तन् नाशक्नोत् त्वचा ग्रहीतुम् । स यद् धैनत् त्वचाग्रहैष्यत् स्पृष्ट्वा हैवान्नम् अत्रप्स्यत्
8. 1.3.8तन् मनसाजिघृक्षत् । तन् नाशक्नोन् मनसा ग्रहीतुम् । स यद् धैनन् मनसाग्रहैष्यद् ध्यात्वा हैवान्नम् अत्रप्स्यत्
9. 1.3.9तच् छिश्नेनाजिघृक्षत् । तन् नाशक्नोच् छिश्नेन ग्रहीतुम् । स यद् धैनच् छिश्नेनाग्रहैष्यद् विसृज्य हैवान्नम् अत्रप्स्यत्
10. 1.3.10तद् अपानेनाजिघृक्षत् । तद् आवयत् । सैषो ऽन्नस्य ग्रहो यद् वायुः । अन्नायुर् वा एष यद् वायुः
11. 1.3.11स ईक्षत कथं न्व् इदं मद् ऋते स्याद् इति । स ईक्षत कतरेण प्रपद्या इति । स ईक्षत यदि वाचाभिव्याहृतं यदि प्राणेनाभिप्राणितं यदि चक्षुषा दृष्टं यदि श्रोत्रेण श्रुतं यदि त्वचा स्पृष्टं यदि मनसा ध्यातं यद्य् अपानेनाभ्यपानितं यदि शिश्नेन विसृष्टम् अथ को ऽहम् इति
12. 1.3.12स एतम् एव सीमानं विदार्यैतया द्वारा प्रापद्यत । सैषा विदृतिर् नाम द्वाः । तद् एतन् नान्दनम् । तस्य त्रय आवसथास् त्रयः स्वप्ना अयम् आवसथो ऽयम् आवसथो ऽयम् आवसथ इति
13. 1.3.13स जातो भूतान्य् अभिव्यैख्यत् किम् इहान्यं वावदिषद् इति । स एतम् एव पुरुषं ब्रह्म ततमम् अपश्यद् इदम् अदर्शम् इती ३
14. 1.3.14तस्माद् इदन्द्रो नाम । इदन्द्रो ह वै नाम । तम् इदन्द्रं सन्तम् इन्द्र इत्य् आचक्षते परोक्षेण । परोक्षप्रिया इव हि देवाः परोक्षप्रिया इव हि देवाः