Section 1.11

In this sitting

1. 1.11.1अथ हैनं यजमान उवाच । भगवन्तं वा अहं विविदिषाणीति । उषस्तिर् अस्मि चाक्रायण इति होवाच
2. 1.11.2स होवाच । भगवन्तं वा अहम् एभिः सर्वैर् आर्त्विज्यैः पर्यैषिषम् । भगवतो वा अहम् अवित्त्यान्यान् अवृषि
3. 1.11.3भगवांस् त्व् एव मे सर्वैर् आर्त्विज्यैर् इति । तथेति । अथ तर्ह्य् एत एव समतिसृष्टाः स्तुवताम् । यावत् त्व् एभ्यो धनं दद्यास् तावन् मम दद्या इति । तथेति ह यजमान उवाच
4. 1.11.4अथ हैनं प्रस्तोतोपससाद । प्रस्तोतर् या देवता प्रस्तावम् अन्वायत्ता तां चेद् अविद्वान् प्रस्तोष्यसि मूर्धा ते विपतिष्यतीति मा भगवान् अवोचत् । कतमा सा देवतेति
5. 1.11.5प्राण इति होवाच । सर्वाणि ह वा इमानि भूतानि प्राणम् एवाभिसंविशन्ति । प्राणम् अभ्युज्जिहते । सैषा देवता प्रस्तावम् अन्वायत्ता । तां चेद् अविद्वान् प्रास्तोष्यो मूर्धा ते विपतिष्यत् तथोक्तस्य मयेति
6. 1.11.6अथ हैनम् उद्गातोपससाद । उद्गातर् या देवतोद्गीथम् अन्वायत्ता तां चेद् अविद्वान् उद्गास्यसि मूर्धा ते विपतिष्यतीति मा भगवान् अवोचत् । कतमा सा देवता इति
7. 1.11.7आदित्य इति होवाच । सर्वाणि ह वा इमानि भूतान्य् आदित्यम् उच्चैः सन्तं गायन्ति । सैषा देवतोद्गीथम् अन्वायत्ता । तां चेद् अविद्वान् उदगास्यो मूर्धा ते व्यपतिष्यत् तथोक्तस्य मयेति
8. 1.11.8अथ हैनं प्रतिहर्तोपससाद । प्रतिहर्तर् या देवता प्रतिहारम् अन्वायत्ता तां चेद् अविद्वान् प्रतिहरिष्यसि मूर्धा ते विपतिष्यतीति मा भगवान् अवोचत् । कतमा सा देवतेति
9. 1.11.9अन्नम् इति होवाच । सर्वाणि ह वा इमानि भूतन्य् अन्नम् एव प्रतिहरमाणानि जीवन्ति । सैषा देवता प्रतिहारम् अन्वायत्ता । तां चेद् अविद्वान् प्रत्यहरिष्यो मूर्धा ते व्यपतिष्यत् तथोक्तस्य मयेति तथोक्तस्य मयेति