Section 1.10

In this sitting

1. 1.10.1मटचीहतेषु कुरुष्व् आटिक्या सह जाययोषस्तिर् ह चाक्रायण इभ्यग्रामे प्रद्राणक उवास
2. 1.10.2स हेभ्यं कुल्माषान् खादन्तं बिभिक्षे । तं होवाच । नेतो ऽन्ये विद्यन्ते यच् च ये म इम उपनिहिता इति
3. 1.10.3एतेषां मे देहीति होवाच । तान् अस्मै प्रददौ । हन्तानुपानम् इति । उच्छिष्टं वै मे पीतं स्याद् इति होवाच
4. 1.10.4न स्विद् एते ऽप्य् उच्छिष्टा इति । न वा अजीविष्यम् इमान् अखादन्न् इति होवाच । कामो म उदपानम् इति
5. 1.10.5स ह खादित्वातिशेषाञ् जायाया आजहार । साग्र एव सुभिक्षा बभूव । तान् प्रतिगृह्य निदधौ
6. 1.10.6स ह प्रातः संजिहान उवाच । यद् बतान्नस्य लभेमहि लभेमहि धनमात्राम् । राजासौ यक्ष्यते । स मा सर्वैर् आर्त्विज्यैर् वृणीतेति
7. 1.10.7तं जायोवाच । हन्त पत इम एव कुल्माषा इति । तान् खादित्वामुं यज्ञं विततम् एयाय
8. 1.10.8तत्रोद्गात्ःन् आस्तावे स्तोष्यमाणान् उपोपविवेश । स ह प्रस्तोतरम् उवाच
9. 1.10.9प्रस्तोतर् या देवता प्रस्तावम् अन्वायत्ता तां चेद् अविद्वान् प्रस्तोष्यसि मूर्धा ते विपतिष्यतीति
10. 1.10.10एवम् एवोद्गातारम् उवाच । उद्गातर् या देवतोद्गीथम् अन्वायत्ता तां चेद् अविद्वान् उद्गास्यसि मूर्धा ते विपतिष्यतीति
11. 1.10.11एवम् एव प्रतिहर्तारम् उवाच । प्रतिहर्तर् या देवता प्रतिहारम् अन्वायत्ता तां चेद् अविद्वान् प्रतिहरिष्यसि मूर्धा ते विपतिष्यतीति । ते ह समारतास् तूष्णीम् आसां चक्रिरे