Section 2.24

In this sitting

1. 2.24.1ब्रह्मवादिनो वदन्ति । यद् वसूनां प्रातःसवनम् । रुद्राणां माध्यंदिनं सवनम् । आदित्यानां च विश्वेषां च देवानां तृतीयसवनम्
2. 2.24.2क्व तर्हि यजमानस्य लोक इति । स यस् तं न विद्यात् कथं कुर्यात् । अथ विद्वान् कुर्यात्
3. 2.24.3पुरा प्रातरनुवाकस्योपाकरणाज् जघनेन गार्हपत्यस्योदाङ्मुख उपविश्य स वासवं सामाभिगायति
4. 2.24.4लो ३ कद्वारम् अपावा ३ र्णू ३३ । पश्येम त्वा वयं रा ३३३३३ हु ३ म् आ ३३ ज्या ३ यो ३ आ ३२१११ इति
5. 2.24.5अथ जुहोति । नमो ऽग्नये पृथिवीक्षिते लोकक्षिते । लोकं मे यजमानाय विन्द । एष वै यजमानस्य लोकः । एता अस्मि
6. 2.24.6अत्र यजमानः परस्ताद् आयुषः स्वाहा । अपजहि परिघम् इत्य् उक्त्वोत्तिष्ठति । तस्मै वसवः प्रातःसवनं संप्रयच्छन्ति
7. 2.24.7पुरा माध्यन्दिनस्य सवनस्योपाकरणाज् जघनेनाग्नीध्रीयस्योदङ्मुख उपविश्य स रौद्रं सामाभिगायति
8. 2.24.8लो ३ कद्वारमपावार् ३ णू ३३ । पश्येम त्वा वयं वैरा ३३३३३ हु ३ म् आ ३३ ज्या ३ यो ३ आ ३२१११ इति
9. 2.24.9अथ जुहोति । नामो वायवे ऽन्तरिक्षक्षिते लोकक्षिते । लोकं मे यजमानाय विन्द । एष वै यजमानस्य लोकः । एतास्मि
10. 2.24.10अत्र यजमानः परस्ताद् आयुषः स्वाहा । अपजहि परिघम् इत्य् उक्त्वोत्तिष्ठति । तस्मै रुद्रा माध्यन्दिनं सवनं संप्रयच्छन्ति
11. 2.24.11पुरा तृतीयसवनस्योपाकरणाज् जघनेनाहवनीयस्योदङ्मुख उपविश्य स आदित्यं स वैश्वदेवं सामाभिगायति
12. 2.24.13अथ वैश्वदेवम् । लो३कद्वारमपावा३र्णू३३ । पश्येम त्वा वयं साम्रा ३३३३३ हु३म् आ ३३ ज्या ३ यो ३ आ ३२१११ इति
13. 2.24.14अथ जुहोति । नम आदित्येभ्यश् च विश्वेभ्यश् च देवेभ्यो दिविक्षिद्भ्यो लोकक्षिद्भ्यः । लोकं मे यजमानाय विन्दत
14. 2.24.15एष वै यजमानस्य लोकः । एतास्म्य् अत्र यजमानः परस्ताद् आयुषः स्वाहा । अपहत परिघम् इत्य् उक्त्वोत्तिष्ठति
15. 2.24.16तस्मा आदित्याश् च विश्वे च देवास् तृतीयसवनं संप्रयच्छन्ति । एष ह वै यज्ञस्य मात्रां वेद य एवं वेद य एवं वेद