Section 4.4

In this sitting

1. 4.4.1सत्यकामो ह जाबालो जबालां मातरम् आमन्त्रयां चक्रे । ब्रह्मचर्यं भवति विवत्स्यामि किंगोत्रो न्व् अहम् अस्मीति
2. 4.4.2सा हैनम् उवाच । नाहम् एतद् वेद तात यद्गोत्रस् त्वम् असि । बह्व् अहम् चरन्ती परिचारिणी यौवने त्वाम् अलभे । साहम् एतन् न वेद यद्गोत्रस् त्वम् असि । जबाला तु नामाहम् अस्मि । सत्यकामो नाम त्वम् असि । स सत्यकाम एव जाबालो ब्रुवीथा इति
3. 4.4.3स ह हारिद्रुमतं गौतमम् एत्योवाच । ब्रह्मचर्यं भगवति वत्स्यामि । उपेयां भगवन्तम् इति
4. 4.4.4तं होवाच किंगोत्रो नु सोम्यासीति । स होवाच । नाहम् एतद् वेद भो यद्गोत्रो ऽहम् अस्मि । अपृच्छं मातरम् । सा मा प्रत्यब्रवीद् बह्व् अहम् चरन्ती परिचरिणी यौवने त्वाम् अलभे । साहम् एतन् न वेद यद्गोत्रस् त्वम् असि । जबाला तु नामाहम् अस्मि । सत्यकामो नाम त्वम् असीति । सो ऽहं सत्यकामो जाबालो ऽस्मि भो इति
5. 4.4.5तं होवाच । नैतद् अब्रह्मणो विवक्तुम् अर्हति । समिधं सोम्याहर । उप त्वा नेष्ये न सत्याद् अगा इति । तम् उपनीय कृशानाम् अबलानां चतुःशता गा निराकृत्य उवाचेमाः सोम्यानुसंव्रजेति । ता अभिप्रस्थापयन्न् उवाच । नासहस्रेणावर्तेयेति । स ह वर्षगणं प्रोवास । ता यदा सहस्रं सम्पेदुः