Section 5.3

In this sitting

1. 5.3.1श्वेतकेतुर् हारुणेयः पञ्चालानां समितिम् एयाय । तं ह प्रवाहणो जैवलिर् उवाच । कुमारानु त्वा अशिषत् पितेति । अनु हि भगव इति
2. 5.3.2वेत्थ यद् इतो ऽधि प्रजाः प्रयन्तीति । न भगव इति । वेत्थ यथा पुनर् आवर्तन्त ३ इति । न भगव इति । वेत्थ पथोर् देवयानस्य पितृयाणस्य च व्यावर्तना ३ इति । न भगव इति
3. 5.3.3वेत्थ यथासौ लोको न संपूर्यत ३ इति । न भगव इति । वेत्थ यथा पञ्चम्याम् आहुताव् आपः पुरुषवचसो भवन्तीति । नैव भगव इति
4. 5.3.4अथानु किम् अनु शिष्ठो ऽवोचथा यो हीमानि न विद्यात् । कथं सो ऽनुशिष्टो ब्रुवीतेति । स हायस्तः पितुर् अर्धम् एयाय । तं होवाचाननुशिष्य वाव किल मा भगवान् अब्रवीद् अनु त्वाशिषम् इति
5. 5.3.5पञ्च मा राजन्यबन्धुः प्रश्नान् अप्राक्षीत् । तेषां नैकंचनाशकं विवक्तुम् इति । स होवाच यथा मा त्वं तदैतान् अवदो यथाहम् एषां नैकंचन वेद । यद्य् अहम् इमान् अवेदिष्यं कथं ते नावक्ष्यम् इति
6. 5.3.6स ह गौतमो राज्ञो ऽर्धम् एयाय । तस्मै ह प्राप्तायार्हां चकार । स ह प्रातः सभाग उदेयाय । तं होवाच । मानुषस्य भगवन् गौतम वित्तस्य वरं वृणीथा इति । स होवाच । तवैव राजन् मानुषं वित्तम् । याम् एव कुमारस्यान्ते वाचम् अभाषथास् ताम् एव मे ब्रूहीति । स ह कृच्छ्री बभूव
7. 5.3.7तं ह चिरं वसेत्य् आज्ञापयां चकार । तं होवाच । यथा मा त्वं गौतमावदः । यथेयं न प्राक् त्वत्तः पुरा विद्या ब्राह्मणान् गच्छति । तस्माद् उ सर्वेषु लोकेषु क्षत्रस्यैव प्रशासनम् अभूद् इति । तस्मै होवाच