Section 8.7

In this sitting

1. 8.7.1य आत्मा अपहतपाप्मा विजरो विमृत्युर् विशोको विजिघत्सो ऽपिपासः सत्यकामः सत्यसंकल्पः सो ऽन्वेष्टव्यः स विजिज्ञासितव्यः । स सर्वांश् च लोकान् आप्नोति सर्वांश् च कामान् यस् तम् आत्मानम् अनुविद्य विजानातीति ह प्रजापतिर् उवाच
2. 8.7.2तद् धोभये देवासुरा अनुबुबुधिरे । ते होचुर् हन्त तम् आत्मआनम् अन्वेच्छामो यम् आत्मानम् अन्विष्य सर्वांश् च लोकान् आप्नोति सर्वांश् च कामान् इति । इन्द्रो हैव देवानाम् अभिप्रवव्राज विरोचनो ऽसुराणाम् । तौ हासंविदानाव् एव समित्पाणी प्रजापतिसकाशम् आजग्मतुः
3. 8.7.3तौ ह द्वात्रिंशतं वर्षाणि ब्रह्मचर्यम् ऊषतुः । तौ ह प्रजापतिर् उवाच । किम् इच्छन्ताव् अवास्तम् इति । तौ होचतुर् य आत्मा अपहतपाप्मा विजरो विमृत्युर् विशोको विजिघत्सो ऽपिपासः सत्यकामः सत्यसंकल्पः सो ऽन्वेष्टव्यः स विजिज्ञासितव्यः । स सर्वांश् च लोकान् आप्नोति सर्वांश् च कामान् यस् तम् आत्मानम् अनुविद्य विजानातीति भगवतो वचो वेदयन्ते । तम् इच्छन्ताव् अवास्तम् इति
4. 8.7.4तौ ह प्रजापतिर् उवाच य एषो ऽक्षिणि पुरुषो दृष्यत एष आत्मेति होवाच । एतद् अमृतम् अभयम् एतद् ब्रह्मेति । अथ यो ऽयं भगवो ऽप्सु परिख्यायते यश् चायम् आदर्शे कतम एष इति । एष उ एवैषु सर्वेष्वन्न्तेषु परिख्यायत इति होवाच