Section 8.6

In this sitting

1. 8.6.1अथ या एता हृदयस्य नाड्यस् ताः पिङ्गलस्याणिम्नस् तिष्ठन्ति शुक्लस्य नीलस्य पीतस्य लोहितस्येति । असौ वादित्यः पिङ्गल एष शुक्ल एष नील एष पीत एष लोहितः
2. 8.6.2तद् यथा महापथ आतत उभौ ग्रामौ गच्छतीमं चामुं चैवम् एवैता आदित्यस्य रश्मय उभौ लोकौ गच्छन्तीमं चामुं च । अमुष्माद् आदित्यात् प्रतायन्ते ता आसु नाडीषु सृप्ताः । आभ्यो नाडीभ्यः प्रतायन्ते ते ऽमुष्मिन्न् आदित्ये सृप्ताः
3. 8.6.3तद् यत्रैतत् सुप्तः समस्तः संप्रसन्नः स्वप्नं न विजानाति । आसु तदा नाडीषु सृप्तो भवति । तं न कश्चन पाप्मा स्पृशति । तेजसा हि तदा संपन्नो भवति
4. 8.6.4अथ यत्रैतद् अबलिमानं नीतो भवति । तम् अभित आसीना आहुर् जानासि मां जानासि माम् इति । स यावद् अस्माच् छरीराद् अनुत्क्रान्तो भवति । तावज् जानाति
5. 8.6.5अथ यत्रैतद् अस्माच् छरीराद् उत्क्रामति । अथैतैर् एव रश्मिभिर् ऊर्ध्वम् आक्रमते । स ओम् इति वा होद् वा मीयते । स यावत् क्षिप्येन् मनस् तावद् आदित्यं गच्छति । एतद् वै खलु लोकद्वारं विदुषां प्रपदनं निरोधो ऽविदुषाम्
6. 8.6.6तद् एष श्लोकः । शतं चैका च हृदयस्य नाड्यस् तासां मूर्धानम् अभिनिःसृतैका । तयोर्ध्वम् आयन्न् अमृतत्वम् एति विष्वङ्ङ् अन्या उत्क्रमणे भवन्त्य् उत्क्रमणे भवन्ति