पक्षमासादिषण्मासवेधनानि महीतले । क्षिप्तं जले यदा काष्ठं शैलीभूतं च दृश्यते
pakṣamāsādiṣaṇmāsavedhanāni mahītale / kṣiptaṃ jale yadā kāṣṭhaṃ śailībhūtaṃ ca dṛśyate
Sanskrit only: no published translation is held for this verse.
बहिरन्तश्च देवेशि वेधकं तत्प्रकीर्तितम् । हिङ्गुलं हरितालं च गन्धकं च मनःशिलाम्
bahirantaśca deveśi vedhakaṃ tatprakīrtitam / hiṅgulaṃ haritālaṃ ca gandhakaṃ ca manaḥśilām
Sanskrit only: no published translation is held for this verse.
एषां गन्धापहारं तु कुरुते तच्च वेधकम् । अन्यथा चेष्टकं देवि तदग्राह्यं निरर्थकम्
eṣāṃ gandhāpahāraṃ tu kurute tacca vedhakam / anyathā ceṣṭakaṃ devi tadagrāhyaṃ nirarthakam
Sanskrit only: no published translation is held for this verse.
श्रीशैले श्रीवनप्रान्ते पर्यङ्काख्ये शिलातले । तत्रस्थं क्षणवेधि स्यान्नद्यां भगवतीतटे
śrīśaile śrīvanaprānte paryaṅkākhye śilātale / tatrasthaṃ kṣaṇavedhi syānnadyāṃ bhagavatītaṭe
Sanskrit only: no published translation is held for this verse.
एकाहे वेधकं तत्र गोकर्णे तु दिनत्रयम् । भद्राङ्गे दिनवेधि स्यात्त्रिस्थलान्ते त्रिवत्सरम्
ekāhe vedhakaṃ tatra gokarṇe tu dinatrayam / bhadrāṅge dinavedhi syāttristhalānte trivatsaram
Sanskrit only: no published translation is held for this verse.
धारेश्वरे पाक्षिकं स्यात् कर्षापुर्यां दिनैकतः । ब्रह्मेश्वरे मासिकं स्याद्व्याघ्रपुर्यां तु वासरम्
dhāreśvare pākṣikaṃ syāt karṣāpuryāṃ dinaikataḥ / brahmeśvare māsikaṃ syādvyāghrapuryāṃ tu vāsaram
Sanskrit only: no published translation is held for this verse.
अघोरेशे मासिकं स्यात्सिंहद्वीपे तथा पुनः । दिनमेकं ब्रह्मगिरौ विन्ध्ये तु क्षणवेधकम्
aghoreśe māsikaṃ syātsiṃhadvīpe tathā punaḥ / dinamekaṃ brahmagirau vindhye tu kṣaṇavedhakam
Sanskrit only: no published translation is held for this verse.
वासरं माल्यवन्ते तु क्षणवेधी तु तत्र च । किष्किन्धे पर्वते रम्ये पम्पातीरे क्षणोदकम्
vāsaraṃ mālyavante tu kṣaṇavedhī tu tatra ca / kiṣkindhe parvate ramye pampātīre kṣaṇodakam
Sanskrit only: no published translation is held for this verse.
तस्य पश्चिमतो देवि योजनद्वितये पुनः । भूशैलमस्ति तत्रैव त्रिदिनं वेदपर्वते
tasya paścimato devi yojanadvitaye punaḥ / bhūśailamasti tatraiva tridinaṃ vedaparvate
Sanskrit only: no published translation is held for this verse.
अन्यत्र यत्र यत्रापि ब्रह्मविष्णुशिवोद्भवम् । अमृतं तत्र तत्रापि वज्रीकरणम् उत्तमम्
anyatra yatra yatrāpi brahmaviṣṇuśivodbhavam / amṛtaṃ tatra tatrāpi vajrīkaraṇam uttamam
Sanskrit only: no published translation is held for this verse.
तस्योत्पत्तिं प्रवक्ष्यामि यथा जानाति साधकः । महीं समुद्धृतवतो वराहस्य कलेवरात्
tasyotpattiṃ pravakṣyāmi yathā jānāti sādhakaḥ / mahīṃ samuddhṛtavato varāhasya kalevarāt
Sanskrit only: no published translation is held for this verse.
यः स्वेदः पतितस्तस्माज्जातं शैलोदकं परम् । तं मुखे क्षणिकं जातं कर्णदेशे तु वासरम्
yaḥ svedaḥ patitastasmājjātaṃ śailodakaṃ param / taṃ mukhe kṣaṇikaṃ jātaṃ karṇadeśe tu vāsaram
Sanskrit only: no published translation is held for this verse.
बाहुभ्यां त्र्यहवेधी स्यान्मासवेधी तु पार्श्वयोः । षण्मासमपराङ्गे च सर्वं समफलं च तत्
bāhubhyāṃ tryahavedhī syānmāsavedhī tu pārśvayoḥ / ṣaṇmāsamaparāṅge ca sarvaṃ samaphalaṃ ca tat
Sanskrit only: no published translation is held for this verse.
अघोरास्त्रेण तत्क्षेत्रे रक्षां कृत्वा दिशां बलिम् । दत्त्वा लक्षं जपित्वा तु गृह्णीयादमृतं परम्
aghorāstreṇa tatkṣetre rakṣāṃ kṛtvā diśāṃ balim / dattvā lakṣaṃ japitvā tu gṛhṇīyādamṛtaṃ param
Sanskrit only: no published translation is held for this verse.
शरद्ग्रीष्मवसन्तेषु हेमन्ते वा सुरार्चिते । आयसे ताम्रपात्रे वा कान्तलोहमयेऽथवा
śaradgrīṣmavasanteṣu hemante vā surārcite / āyase tāmrapātre vā kāntalohamaye'thavā
Sanskrit only: no published translation is held for this verse.
शिलाम्बुपलमष्टौ तु पलं क्षीरस्य निक्षिपेत् । क्षीरावशेषं संक्वाथ्यं त्रिसप्ताहं पिबेन्नरः
śilāmbupalamaṣṭau tu palaṃ kṣīrasya nikṣipet / kṣīrāvaśeṣaṃ saṃkvāthyaṃ trisaptāhaṃ pibennaraḥ
Sanskrit only: no published translation is held for this verse.
जीवेद्वर्षसहस्रं तु वलीपलितवर्जितः । अथवाष्टपलं क्षीरं पलैकेनाम्बुमिश्रितम्
jīvedvarṣasahasraṃ tu valīpalitavarjitaḥ / athavāṣṭapalaṃ kṣīraṃ palaikenāmbumiśritam
Sanskrit only: no published translation is held for this verse.
क्षीरावशेषं सेवेत पूर्वोक्तं लभते फलम् । कुलुत्थाष्टगुणं वारि पचेदष्टावशेषितम्
kṣīrāvaśeṣaṃ seveta pūrvoktaṃ labhate phalam / kulutthāṣṭaguṇaṃ vāri pacedaṣṭāvaśeṣitam
Sanskrit only: no published translation is held for this verse.
चतुर्गुणेन तेनाज्यं पाचयेद् घृतशेषितम् । लिह्यान्मधुसितोपेतं त्रिसप्ताहाद्बृहस्पतिः
caturguṇena tenājyaṃ pācayed ghṛtaśeṣitam / lihyānmadhusitopetaṃ trisaptāhādbṛhaspatiḥ
Sanskrit only: no published translation is held for this verse.
द्विरष्टवार्षिकाकारः सहस्रायुर् न संशयः । अवशिष्टकुलुत्थं तु पादांशमधुसर्पिषा
dviraṣṭavārṣikākāraḥ sahasrāyur na saṃśayaḥ / avaśiṣṭakulutthaṃ tu pādāṃśamadhusarpiṣā
Sanskrit only: no published translation is held for this verse.
भक्षयेत्कर्षमेकं तु मासेनायुतजीवितः । तत्सिद्धतैलेनाभ्यङ्गं म्रक्षणं चैव कारयेत्
bhakṣayetkarṣamekaṃ tu māsenāyutajīvitaḥ / tatsiddhatailenābhyaṅgaṃ mrakṣaṇaṃ caiva kārayet
Sanskrit only: no published translation is held for this verse.
पामाविचर्चिकादद्रुकुष्ठानि सहसा जयेत् । वलीपलितनिर्मुक्तः सहस्रायुश्च जायते
pāmāvicarcikādadrukuṣṭhāni sahasā jayet / valīpalitanirmuktaḥ sahasrāyuśca jāyate
Sanskrit only: no published translation is held for this verse.
यः पिबेत्प्रातरुत्थाय शैलाम्बु चुलुकं पयः । षण्मासात् स्यात् सहस्रायुर् निर्वलीपलितश्च सः
yaḥ pibetprātarutthāya śailāmbu culukaṃ payaḥ / ṣaṇmāsāt syāt sahasrāyur nirvalīpalitaśca saḥ
Sanskrit only: no published translation is held for this verse.
अथवा सूतकं देवि वारिणा सह मर्दयेत् । मासेनैकेन देवेशि नष्टपिष्टिर्भविष्यति
athavā sūtakaṃ devi vāriṇā saha mardayet / māsenaikena deveśi naṣṭapiṣṭirbhaviṣyati
Sanskrit only: no published translation is held for this verse.
मासमात्रं समश्नीयात्स भवेदजरामरः । अथवा तं रसं हेम्ना धामयेत्खदिराग्निना
māsamātraṃ samaśnīyātsa bhavedajarāmaraḥ / athavā taṃ rasaṃ hemnā dhāmayetkhadirāgninā
Sanskrit only: no published translation is held for this verse.
गुलिका सुन्दरी नाम सर्वायुधनिवारिणी । कर्ता हर्ता स्वयं सिद्धो जीवेच्चन्द्रार्कतारकम्
gulikā sundarī nāma sarvāyudhanivāriṇī / kartā hartā svayaṃ siddho jīveccandrārkatārakam
Sanskrit only: no published translation is held for this verse.
अथ तेनोदकेनैव क्षीरार्धं पायसं पचेत् । मासमात्रप्रयोगेण वलीपलितवर्जितः
atha tenodakenaiva kṣīrārdhaṃ pāyasaṃ pacet / māsamātraprayogeṇa valīpalitavarjitaḥ
Sanskrit only: no published translation is held for this verse.
पक्त्वा तेनाम्भसा पथ्याः षष्टिस्त्रीणि शतानि च । मधु संयोज्य भाण्डस्थं भूमौ सर्वं निधापयेत्
paktvā tenāmbhasā pathyāḥ ṣaṣṭistrīṇi śatāni ca / madhu saṃyojya bhāṇḍasthaṃ bhūmau sarvaṃ nidhāpayet
Sanskrit only: no published translation is held for this verse.
दिने दिने तदेकैकं भक्षयेत्प्रातर् उत्थितः । वलीपलितनिर्मुक्तो जीवेद्वर्षसहस्रकम्
dine dine tadekaikaṃ bhakṣayetprātar utthitaḥ / valīpalitanirmukto jīvedvarṣasahasrakam
Sanskrit only: no published translation is held for this verse.
शैलीभूतं कुलुत्थं वा भक्षयेन्मधुसर्पिषा । षण्मासात्तु प्रयोगेण जीवेद्वर्षसहस्रकम्
śailībhūtaṃ kulutthaṃ vā bhakṣayenmadhusarpiṣā / ṣaṇmāsāttu prayogeṇa jīvedvarṣasahasrakam
Sanskrit only: no published translation is held for this verse.
कूष्माण्डमादितः कृत्वा यानि कानि फलानि च । जले क्षिप्तानि लोहानि शैलभूतानि भक्षयेत्
kūṣmāṇḍamāditaḥ kṛtvā yāni kāni phalāni ca / jale kṣiptāni lohāni śailabhūtāni bhakṣayet
Sanskrit only: no published translation is held for this verse.
क्षीराहारश्च जीर्णान्ते वज्रकायो भवेन्नरः । तेनोदकेन संमर्द्यम् अभ्रकं क्वाथयेत्प्रिये
kṣīrāhāraśca jīrṇānte vajrakāyo bhavennaraḥ / tenodakena saṃmardyam abhrakaṃ kvāthayetpriye
Sanskrit only: no published translation is held for this verse.
कटुत्रययुतं खादेज्जीवेद्वर्षसहस्रकम् । अथवा रसकर्षैकं तज्जलेन तु मर्दितम्
kaṭutrayayutaṃ khādejjīvedvarṣasahasrakam / athavā rasakarṣaikaṃ tajjalena tu marditam
Sanskrit only: no published translation is held for this verse.
इङ्गुदीफलमध्यस्थं तच्छैलोदकमध्यगः । कालेन त्रिगुणेनैव काठिन्यं तस्य जायते
iṅgudīphalamadhyasthaṃ tacchailodakamadhyagaḥ / kālena triguṇenaiva kāṭhinyaṃ tasya jāyate
Sanskrit only: no published translation is held for this verse.
षण्मासं तन्मुखे धार्यं वज्रकायं करोति तत् । दशनागसमप्राणो देवैः सह स मोदते
ṣaṇmāsaṃ tanmukhe dhāryaṃ vajrakāyaṃ karoti tat / daśanāgasamaprāṇo devaiḥ saha sa modate
Sanskrit only: no published translation is held for this verse.
गृहीत्वा त्रिफलां तत्र शैलवारिणि निक्षिपेत् । यदा भवति तच्छैलं गृहीत्वा चूर्णयेत्ततः
gṛhītvā triphalāṃ tatra śailavāriṇi nikṣipet / yadā bhavati tacchailaṃ gṛhītvā cūrṇayettataḥ
Sanskrit only: no published translation is held for this verse.
कान्तजीर्णरसं तेन सार्धं घृतमधुप्लुतम् । भक्षयेद्वर्षमेकं तु ततः क्षीराशनो भवेत्
kāntajīrṇarasaṃ tena sārdhaṃ ghṛtamadhuplutam / bhakṣayedvarṣamekaṃ tu tataḥ kṣīrāśano bhavet
Sanskrit only: no published translation is held for this verse.
उदयादित्यसङ्काशो मेधावी प्रियदर्शनः । नीलकुञ्चितकेशश्च जीवेच्चन्द्रार्कतारकम्
udayādityasaṅkāśo medhāvī priyadarśanaḥ / nīlakuñcitakeśaśca jīveccandrārkatārakam
Sanskrit only: no published translation is held for this verse.
पारदं हरितालं च शिलां माक्षिकमेव च । दरदं च विषं चैव सर्वमेकत्र कारयेत्
pāradaṃ haritālaṃ ca śilāṃ mākṣikameva ca / daradaṃ ca viṣaṃ caiva sarvamekatra kārayet
Sanskrit only: no published translation is held for this verse.
मर्दयेत् खल्वपाषाणे मातुलुङ्गरसेन तु । गोलकं कारयित्वा तु वारिमध्ये विनिक्षिपेत्
mardayet khalvapāṣāṇe mātuluṅgarasena tu / golakaṃ kārayitvā tu vārimadhye vinikṣipet
Sanskrit only: no published translation is held for this verse.
तेन तारं च शुल्बं च कांचनं भवति ध्रुवम् । उपयुञ्जीत मासैकं वलीपलितवर्जितः
tena tāraṃ ca śulbaṃ ca kāṃcanaṃ bhavati dhruvam / upayuñjīta māsaikaṃ valīpalitavarjitaḥ
Sanskrit only: no published translation is held for this verse.
सहस्रं जीवितं तस्य महाबलपराक्रमः । शैलीभूतहरिद्रां तु तच्चूर्णावापमात्रतः
sahasraṃ jīvitaṃ tasya mahābalaparākramaḥ / śailībhūtaharidrāṃ tu taccūrṇāvāpamātrataḥ
Sanskrit only: no published translation is held for this verse.
हेमत्वं लभते नागो बालार्कसदृशप्रभः । शैलोदके विनिक्षिप्य भूशैले कर्दमेऽपि वा
hematvaṃ labhate nāgo bālārkasadṛśaprabhaḥ / śailodake vinikṣipya bhūśaile kardame'pi vā
Sanskrit only: no published translation is held for this verse.
ज्ञात्वा कालप्रमाणेन बन्धयेत्पारदं ततः । रक्तक्षारयुतं ध्मातं सुवर्णसमसारितम्
jñātvā kālapramāṇena bandhayetpāradaṃ tataḥ / raktakṣārayutaṃ dhmātaṃ suvarṇasamasāritam
Sanskrit only: no published translation is held for this verse.
शतांशेन तु लोहानां सर्वेषां हेमकारकम् । द्वितीयसारणां प्राप्य सहस्रांशेन विध्यति
śatāṃśena tu lohānāṃ sarveṣāṃ hemakārakam / dvitīyasāraṇāṃ prāpya sahasrāṃśena vidhyati
Sanskrit only: no published translation is held for this verse.
तं खोटं धारयेद्वक्त्रे दिव्यत्वं लभते ध्रुवम् । <केचन घुटिकायोगाः> निचुले ककुभे चैव किंशुके मधुकेऽपि वा
taṃ khoṭaṃ dhārayedvaktre divyatvaṃ labhate dhruvam / <kecana ghuṭikāyogāḥ> nicule kakubhe caiva kiṃśuke madhuke'pi vā
Sanskrit only: no published translation is held for this verse.
इङ्गुदीफलमध्ये वा रजनीद्वयमार्द्रके । अमृते कन्दके वाथ उक्तकन्दौषधीषु च
iṅgudīphalamadhye vā rajanīdvayamārdrake / amṛte kandake vātha uktakandauṣadhīṣu ca
Sanskrit only: no published translation is held for this verse.
विधाय कोटरं तत्र क्षिप्त्वा तेनैव डोलयेत् । त्रिफलाव्योषकल्केन वेष्टयित्वा प्रयत्नतः
vidhāya koṭaraṃ tatra kṣiptvā tenaiva ḍolayet / triphalāvyoṣakalkena veṣṭayitvā prayatnataḥ
Sanskrit only: no published translation is held for this verse.
पादेन कनकं दत्त्वा पारदं तत्र योजयेत् । शैलोदके क्षिपेत्तत्र गुलिका वज्रवद्भवेत्
pādena kanakaṃ dattvā pāradaṃ tatra yojayet / śailodake kṣipettatra gulikā vajravadbhavet
Sanskrit only: no published translation is held for this verse.
पूर्ववत्सारणा कार्या पूर्ववत्सिद्धिदा भवेत् । धार्यमाणा मुखे सा तु सहस्रायुष्करी भवेत्
pūrvavatsāraṇā kāryā pūrvavatsiddhidā bhavet / dhāryamāṇā mukhe sā tu sahasrāyuṣkarī bhavet
Sanskrit only: no published translation is held for this verse.
द्वितीयसारणायोगादयुतं वेधयेत्तु सा । धार्यमाणा मुखे सैवमयुतायुष्यदा भवेत्
dvitīyasāraṇāyogādayutaṃ vedhayettu sā / dhāryamāṇā mukhe saivamayutāyuṣyadā bhavet
Sanskrit only: no published translation is held for this verse.
तृतीयसारणायोगाज्जायते लक्षवेधिनी । तं खोटं धारयेद्वक्त्रे लक्षायुर्जायते नरः
tṛtīyasāraṇāyogājjāyate lakṣavedhinī / taṃ khoṭaṃ dhārayedvaktre lakṣāyurjāyate naraḥ
Sanskrit only: no published translation is held for this verse.
चतुर्थी सारणा देवि कोटिवेधी न संशयः । कोट्यायुर्जीवितं तस्य खेचरत्वं च लभ्यते
caturthī sāraṇā devi koṭivedhī na saṃśayaḥ / koṭyāyurjīvitaṃ tasya khecaratvaṃ ca labhyate
Sanskrit only: no published translation is held for this verse.
पञ्चभिर्दशकोटिः स्यात्षड्भिः कोटिशतं भवेत् । यावच्चन्द्रार्कजीवित्वम् अनन्तबलवीर्यवान्
pañcabhirdaśakoṭiḥ syātṣaḍbhiḥ koṭiśataṃ bhavet / yāvaccandrārkajīvitvam anantabalavīryavān
Sanskrit only: no published translation is held for this verse.
ददाति सप्तमी चापि सारणा गुलिका परा । खेचरी नाम विख्याता भैरवेण प्रचोदिता
dadāti saptamī cāpi sāraṇā gulikā parā / khecarī nāma vikhyātā bhairaveṇa pracoditā
Sanskrit only: no published translation is held for this verse.
यस्तु तद्राजिकामात्रं मासमेकं तु भक्षयेत् । वज्रदेहः स सिद्धः स्याद् दिव्यस्त्रीजनवल्लभः
yastu tadrājikāmātraṃ māsamekaṃ tu bhakṣayet / vajradehaḥ sa siddhaḥ syād divyastrījanavallabhaḥ
Sanskrit only: no published translation is held for this verse.
क्रीडते खेचरैर् भोगैः स्वेच्छया शिवतां व्रजेत् । नानाविधफलाश्चास्या घुटिकां शृणु सुन्दरि
krīḍate khecarair bhogaiḥ svecchayā śivatāṃ vrajet / nānāvidhaphalāścāsyā ghuṭikāṃ śṛṇu sundari
Sanskrit only: no published translation is held for this verse.
शुद्धबद्धं रसेन्द्रं तु गन्धकं तत्र जारयेत् । त्रिगुणे गन्धके जीर्णे तेन हेम तु कारयेत्
śuddhabaddhaṃ rasendraṃ tu gandhakaṃ tatra jārayet / triguṇe gandhake jīrṇe tena hema tu kārayet
Sanskrit only: no published translation is held for this verse.
कारयेद्भस्म सूतं तु काञ्चनं तेन सूतकम् । तद्भस्म सूतके जार्यं रसेन्द्रस्य समे समम्
kārayedbhasma sūtaṃ tu kāñcanaṃ tena sūtakam / tadbhasma sūtake jāryaṃ rasendrasya same samam
Sanskrit only: no published translation is held for this verse.
तेन सूतकजीर्णेन वज्ररत्नं तु घातयेत् । तद्वज्रं जायते भस्म सिन्दूरारुणसन्निभम्
tena sūtakajīrṇena vajraratnaṃ tu ghātayet / tadvajraṃ jāyate bhasma sindūrāruṇasannibham
Sanskrit only: no published translation is held for this verse.
तद्भस्म जारयेत्सूते त्रिगुणे तु सुरार्चिते । हाटकं सारयेत्तं तु घुटिकां तेन कारयेत्
tadbhasma jārayetsūte triguṇe tu surārcite / hāṭakaṃ sārayettaṃ tu ghuṭikāṃ tena kārayet
Sanskrit only: no published translation is held for this verse.
त्रिलोहावेष्टितं तं तु मुखे प्रक्षिप्य साधकः । नष्टच्छायो भवेत्सोऽयमदृश्यो देवदानवैः
trilohāveṣṭitaṃ taṃ tu mukhe prakṣipya sādhakaḥ / naṣṭacchāyo bhavetso'yamadṛśyo devadānavaiḥ
Sanskrit only: no published translation is held for this verse.
लक्षवर्षसहस्राणि निर्वलीपलितो भवेत् । शूलिनं शक्तिसंयुक्तं रत्नादिगुणभूषितम्
lakṣavarṣasahasrāṇi nirvalīpalito bhavet / śūlinaṃ śaktisaṃyuktaṃ ratnādiguṇabhūṣitam
Sanskrit only: no published translation is held for this verse.
वक्त्रे करे च बिभृयात्सर्वायुधनिवारणम् । व्योम माक्षिकसत्वं च तारं ताम्रं सुरायुधम्
vaktre kare ca bibhṛyātsarvāyudhanivāraṇam / vyoma mākṣikasatvaṃ ca tāraṃ tāmraṃ surāyudham
Sanskrit only: no published translation is held for this verse.
सारलोहं सूतकं च रत्नादिगुणभूषितम् । घुटिका सा वरारोहे मधुरत्रयसंयुता
sāralohaṃ sūtakaṃ ca ratnādiguṇabhūṣitam / ghuṭikā sā varārohe madhuratrayasaṃyutā
Sanskrit only: no published translation is held for this verse.
वक्त्रस्था नाशयेत्साक्षात्पलितं नात्र संशयः । शिवः शक्तिश्च देवेशि रत्नानि सितगोनसा
vaktrasthā nāśayetsākṣātpalitaṃ nātra saṃśayaḥ / śivaḥ śaktiśca deveśi ratnāni sitagonasā
Sanskrit only: no published translation is held for this verse.
हेम तारं तथा भानुः समभागानि कारयेत् । स्त्रीरजो व्याघ्रमध्यस्थं पद्मसूत्रेण वेष्टयेत्
hema tāraṃ tathā bhānuḥ samabhāgāni kārayet / strīrajo vyāghramadhyasthaṃ padmasūtreṇa veṣṭayet
Sanskrit only: no published translation is held for this verse.
सितयेन तथा वेष्ट्यं गुह्यस्थाने निवेशयेत् । रणे राजकुले द्यूते दिव्ये कामे जयो भवेत्
sitayena tathā veṣṭyaṃ guhyasthāne niveśayet / raṇe rājakule dyūte divye kāme jayo bhavet
Sanskrit only: no published translation is held for this verse.
वैक्रान्ताभ्रककान्तं तु सस्यकं तु सुरायुधम् । विभीतकादिसम्भूतकांजिकस्य समं भवेत्
vaikrāntābhrakakāntaṃ tu sasyakaṃ tu surāyudham / vibhītakādisambhūtakāṃjikasya samaṃ bhavet
Sanskrit only: no published translation is held for this verse.
समावर्त्य ततः सूते योजयेत्पादयोगतः । कुमारीरससंघृष्टा कृतैषा घुटिका शुभा
samāvartya tataḥ sūte yojayetpādayogataḥ / kumārīrasasaṃghṛṣṭā kṛtaiṣā ghuṭikā śubhā
Sanskrit only: no published translation is held for this verse.
रोगमृत्युजरा हन्ति वक्त्रस्था नात्र संशयः । पञ्च तारं वरारोहे सूतकद्वयमेव च
rogamṛtyujarā hanti vaktrasthā nātra saṃśayaḥ / pañca tāraṃ varārohe sūtakadvayameva ca
Sanskrit only: no published translation is held for this verse.
त्रयो गगनभागाः स्युरेकैकं हेमकान्तयोः । अर्धं शुल्बं विभागेन गुलिकामरसुन्दरी
trayo gaganabhāgāḥ syurekaikaṃ hemakāntayoḥ / ardhaṃ śulbaṃ vibhāgena gulikāmarasundarī
Sanskrit only: no published translation is held for this verse.
अक्षयो ह्यजरश्चैव भवेत्तेन महाबलः । भस्म सूतपलैकं च मृतकान्तपलं तथा
akṣayo hyajaraścaiva bhavettena mahābalaḥ / bhasma sūtapalaikaṃ ca mṛtakāntapalaṃ tathā
Sanskrit only: no published translation is held for this verse.
माक्षिकस्य पलं चैव शिलाजतु पलं तथा । पलमेकं विडङ्गस्य पथ्याचूर्णपलं तथा
mākṣikasya palaṃ caiva śilājatu palaṃ tathā / palamekaṃ viḍaṅgasya pathyācūrṇapalaṃ tathā
Sanskrit only: no published translation is held for this verse.
एकीकृत्य तु तत्सर्वं मध्वाज्येन तु पेषयेत् । गुलिकाः कारयेत्तेन षष्ट्याधिकशतत्रयम्
ekīkṛtya tu tatsarvaṃ madhvājyena tu peṣayet / gulikāḥ kārayettena ṣaṣṭyādhikaśatatrayam
Sanskrit only: no published translation is held for this verse.
एकैकां भक्षयेन्नित्यं वर्षमेकं निरन्तरम् । जीवेद्वर्षशतायुः स यथा रुद्रो महाबलः
ekaikāṃ bhakṣayennityaṃ varṣamekaṃ nirantaram / jīvedvarṣaśatāyuḥ sa yathā rudro mahābalaḥ
Sanskrit only: no published translation is held for this verse.
<केचन रसायनकल्पाः> अतः परं प्रवक्ष्यामि रसभस्मरसायनम् । विज्ञेयं निष्परिहारं साक्षाद्दिव्यौषधं परम्
<kecana rasāyanakalpāḥ> ataḥ paraṃ pravakṣyāmi rasabhasmarasāyanam / vijñeyaṃ niṣparihāraṃ sākṣāddivyauṣadhaṃ param
Sanskrit only: no published translation is held for this verse.
आमलक्यादि कान्तं च पारदं च मनःशिलाम् । वाकुचीसमभागानि क्षीरिणीरसपेषितम्
āmalakyādi kāntaṃ ca pāradaṃ ca manaḥśilām / vākucīsamabhāgāni kṣīriṇīrasapeṣitam
Sanskrit only: no published translation is held for this verse.
मेघनादरसोपेतं मूकमूषागतं पचेत् । माषं द्विमाषं त्रिगुणं भक्षयेत्तत्क्रमेण तु
meghanādarasopetaṃ mūkamūṣāgataṃ pacet / māṣaṃ dvimāṣaṃ triguṇaṃ bhakṣayettatkrameṇa tu
Sanskrit only: no published translation is held for this verse.
वर्षत्रयं परं देवि पादनिष्कार्धकं क्रमात् । षट् सप्ताष्टौ च वर्षाणि क्रमान्निष्कप्रमाणतः
varṣatrayaṃ paraṃ devi pādaniṣkārdhakaṃ kramāt / ṣaṭ saptāṣṭau ca varṣāṇi kramānniṣkapramāṇataḥ
Sanskrit only: no published translation is held for this verse.
भुञ्जीत स च दिव्यान्नं जरावैरूप्यवर्जितः । किंचित् काञ्चनसंयुक्तं निष्कं निष्कार्धमेव वा
bhuñjīta sa ca divyānnaṃ jarāvairūpyavarjitaḥ / kiṃcit kāñcanasaṃyuktaṃ niṣkaṃ niṣkārdhameva vā
Sanskrit only: no published translation is held for this verse.
यो भक्षयेत् त्रिभिर् वर्षैः सर्वव्याधीञ्जयत्ययम् । अष्टवर्षसहस्रायुर्द्वादशे लक्षवेधकः
yo bhakṣayet tribhir varṣaiḥ sarvavyādhīñjayatyayam / aṣṭavarṣasahasrāyurdvādaśe lakṣavedhakaḥ
Sanskrit only: no published translation is held for this verse.
षोडशे वत्सरे देवि दिव्यरूपः स जायते । उत्तमो मूलबन्धस्तु मध्यमं सारबन्धनम्
ṣoḍaśe vatsare devi divyarūpaḥ sa jāyate / uttamo mūlabandhastu madhyamaṃ sārabandhanam
Sanskrit only: no published translation is held for this verse.
अधमः पाकबन्धस्तु एवं त्रिविधबन्धनम् । शतपलमभयानाम् अक्षधात्र्योस्तथैव क्वथितजलसमाष्टौ भागमष्टावशिष्टम् । घृतमधुसितयाढ्यं व्योषचित्रं दशैव रसपलदशसिद्धं लोहजीर्णं मृतं च
adhamaḥ pākabandhastu evaṃ trividhabandhanam / śatapalamabhayānām akṣadhātryostathaiva kvathitajalasamāṣṭau bhāgamaṣṭāvaśiṣṭam / ghṛtamadhusitayāḍhyaṃ vyoṣacitraṃ daśaiva rasapaladaśasiddhaṃ lohajīrṇaṃ mṛtaṃ ca
Sanskrit only: no published translation is held for this verse.
गिरियुतसमम् अभ्रं कान्तभृङ्गं विडङ्गं रससहितविभाव्यं तण्डुलैर् बिल्वमज्जैः । हिमकरकृतकल्कं लोहपात्रस्थमासं त्रिदिनतनुविशुद्धं कल्कमेनं वरिष्ठम्
giriyutasamam abhraṃ kāntabhṛṅgaṃ viḍaṅgaṃ rasasahitavibhāvyaṃ taṇḍulair bilvamajjaiḥ / himakarakṛtakalkaṃ lohapātrasthamāsaṃ tridinatanuviśuddhaṃ kalkamenaṃ variṣṭham
Sanskrit only: no published translation is held for this verse.
लिहति शयनकाले वामनेत्रार्धसेवी घननिबिडसमाधिर् मत्तमातङ्गदर्पः । विगतसकलदोषः सर्वदृक् दिव्यचक्षुः मदन इव सुकान्तिः कामिनीनां प्रवीरः
lihati śayanakāle vāmanetrārdhasevī ghananibiḍasamādhir mattamātaṅgadarpaḥ / vigatasakaladoṣaḥ sarvadṛk divyacakṣuḥ madana iva sukāntiḥ kāminīnāṃ pravīraḥ
Sanskrit only: no published translation is held for this verse.
जलद इव वपुष्मान्कुञ्चिताग्राग्रकेशः तुरग इव विशुद्धः सत्कविश्चित्रकारी । वृषभगतिविचेष्टो मन्दगम्भीरघोषः सुरगज इव लोके चन्द्रतारार्कजीवी
jalada iva vapuṣmānkuñcitāgrāgrakeśaḥ turaga iva viśuddhaḥ satkaviścitrakārī / vṛṣabhagativiceṣṭo mandagambhīraghoṣaḥ suragaja iva loke candratārārkajīvī
Sanskrit only: no published translation is held for this verse.
कान्तहेमरविचन्द्रम् अभ्रकैर् गोलकं निहितमिङ्गुदीफले । शैलवारिवरिसिद्धगोलकं सुन्दरी ह्यमरसंज्ञिका शुभा
kāntahemaravicandram abhrakair golakaṃ nihitamiṅgudīphale / śailavārivarisiddhagolakaṃ sundarī hyamarasaṃjñikā śubhā
Sanskrit only: no published translation is held for this verse.
कान्तहेमरविचन्द्रम् अभ्रकं वज्ररत्नरसमहिराजगोलकम् । क्षिप्तम् आमलककाष्ठकोदरे भूमिशैलनिहितं समुद्धृतम्
kāntahemaravicandram abhrakaṃ vajraratnarasamahirājagolakam / kṣiptam āmalakakāṣṭhakodare bhūmiśailanihitaṃ samuddhṛtam
Sanskrit only: no published translation is held for this verse.
शैलतां गतमथाहितं मुखे वज्रकायकरकल्पवासरैः । तारहेमवरशुल्बसूतकैर्गोलकं वरणकाष्ठयन्त्रितम्
śailatāṃ gatamathāhitaṃ mukhe vajrakāyakarakalpavāsaraiḥ / tārahemavaraśulbasūtakairgolakaṃ varaṇakāṣṭhayantritam
Sanskrit only: no published translation is held for this verse.
शैलवारिकृतसुन्दरीरसैः खेचरीति गुलिका निगद्यते
śailavārikṛtasundarīrasaiḥ khecarīti gulikā nigadyate
Sanskrit only: no published translation is held for this verse.
शैलाम्बुनिक्षिप्तपलाशबीजं शैलीकृतं क्षौद्रघृतेन खादेत् । त्रिसप्तरात्रं दिनमेकमेकं सहस्रजीवी विदितो नरः स्यात्
śailāmbunikṣiptapalāśabījaṃ śailīkṛtaṃ kṣaudraghṛtena khādet / trisaptarātraṃ dinamekamekaṃ sahasrajīvī vidito naraḥ syāt
Sanskrit only: no published translation is held for this verse.
सूतकं चाभ्रकं चैव वज्रतीक्ष्णसमन्वितम् । हाटकेन समायुक्तं गुलिका खेचरी भवेत्
sūtakaṃ cābhrakaṃ caiva vajratīkṣṇasamanvitam / hāṭakena samāyuktaṃ gulikā khecarī bhavet
Sanskrit only: no published translation is held for this verse.
करञ्जफलमध्यस्थं सूतं तत्रैव निक्षिपेत् । धृतः शैलाम्बुमध्यस्थः सहस्रायुः प्रयच्छति
karañjaphalamadhyasthaṃ sūtaṃ tatraiva nikṣipet / dhṛtaḥ śailāmbumadhyasthaḥ sahasrāyuḥ prayacchati
Sanskrit only: no published translation is held for this verse.
तिन्दुके द्विसहस्रायुर् जम्बीरे त्रिसहस्रकम् । मातुलुंगे च नारङ्गे चतुःपञ्चसहस्रकम्
tinduke dvisahasrāyur jambīre trisahasrakam / mātuluṃge ca nāraṅge catuḥpañcasahasrakam
Sanskrit only: no published translation is held for this verse.
रम्भाफले षट्सहस्रं पनसे सप्तसंख्यकम् । विभीतकफले चैव दशसाहस्रसंख्यकम्
rambhāphale ṣaṭsahasraṃ panase saptasaṃkhyakam / vibhītakaphale caiva daśasāhasrasaṃkhyakam
Sanskrit only: no published translation is held for this verse.
नालिकेरे महाभागे सहस्राणि चतुर्दश । त्रिंशत्सहस्रं पथ्यायां लक्षमामलके पुनः
nālikere mahābhāge sahasrāṇi caturdaśa / triṃśatsahasraṃ pathyāyāṃ lakṣamāmalake punaḥ
Sanskrit only: no published translation is held for this verse.
अभ्रपत्रभवात् क्वाथाद् अहोरात्रं शिलोदके । बध्नाति चोद्धृतं सूतं मृत्युदारिद्र्यनाशनम्
abhrapatrabhavāt kvāthād ahorātraṃ śilodake / badhnāti coddhṛtaṃ sūtaṃ mṛtyudāridryanāśanam
Sanskrit only: no published translation is held for this verse.
सारणाक्रमयोगेन वज्रवज्जायते वपुः । रसे रसायने चैव लक्षवेधी न संशयः
sāraṇākramayogena vajravajjāyate vapuḥ / rase rasāyane caiva lakṣavedhī na saṃśayaḥ
Sanskrit only: no published translation is held for this verse.
कर्दमं तु कुमार्याश्च रसेन कृतपिण्डिकम् । धमनात्पतते सत्त्वं मुखस्थं धारयेन्नरः
kardamaṃ tu kumāryāśca rasena kṛtapiṇḍikam / dhamanātpatate sattvaṃ mukhasthaṃ dhārayennaraḥ
Sanskrit only: no published translation is held for this verse.
षण्मासोपप्रयोगेण ह्यजरामरतां व्रजेत् । स्रोतोञ्जनयुतं ध्मातं सत्त्वं पारदमिश्रितम्
ṣaṇmāsopaprayogeṇa hyajarāmaratāṃ vrajet / srotoñjanayutaṃ dhmātaṃ sattvaṃ pāradamiśritam
Sanskrit only: no published translation is held for this verse.
तत्खोटं धारयेद्वक्त्रे ह्यदृश्यो भवति ध्रुवम् । यस्य यो विधिराम्नात उदकस्य शिवागमे
tatkhoṭaṃ dhārayedvaktre hyadṛśyo bhavati dhruvam / yasya yo vidhirāmnāta udakasya śivāgame
Sanskrit only: no published translation is held for this verse.
शतेन बत कालेन कुर्याद्देहे रसायनम् । <बद्धजारणविधिः> या पूर्वा निर्मिता सेयमधमा बालजारणा
śatena bata kālena kuryāddehe rasāyanam / <baddhajāraṇavidhiḥ> yā pūrvā nirmitā seyamadhamā bālajāraṇā
Sanskrit only: no published translation is held for this verse.
उत्तमा दुर्लभा चैव श्रूयतां बद्धजारणा । अबद्धं जारयेद्यस्तु क्षीयमाणः क्षयं व्रजेत्
uttamā durlabhā caiva śrūyatāṃ baddhajāraṇā / abaddhaṃ jārayedyastu kṣīyamāṇaḥ kṣayaṃ vrajet
Sanskrit only: no published translation is held for this verse.
बद्धस्य जीर्यते ग्रासो जीर्णस्य च मुखं भवेत् । समुखो दुर्मुखं दत्ते सामान्योत्तमलक्षणम्
baddhasya jīryate grāso jīrṇasya ca mukhaṃ bhavet / samukho durmukhaṃ datte sāmānyottamalakṣaṇam
Sanskrit only: no published translation is held for this verse.
<बन्धप्रकाराः> सामान्यो ऽग्निसहत्वेन महारत्नादिजारकः । सामान्यः प्रथमः कार्यः सग्रासस्तु समन्ततः
<bandhaprakārāḥ> sāmānyo 'gnisahatvena mahāratnādijārakaḥ / sāmānyaḥ prathamaḥ kāryaḥ sagrāsastu samantataḥ
Sanskrit only: no published translation is held for this verse.
वसुदेहकरो देवि सामान्यो हि भवेदयम् । ग्रासहीनस्तु यो बद्धो दिव्यसिद्धिकरो भवेत्
vasudehakaro devi sāmānyo hi bhavedayam / grāsahīnastu yo baddho divyasiddhikaro bhavet
Sanskrit only: no published translation is held for this verse.
उत्तमो मूलबन्धस्तु मध्यमं सारबन्धनम् । अधमः पाकबन्धस्तु एवं त्रिविधबन्धनम्
uttamo mūlabandhastu madhyamaṃ sārabandhanam / adhamaḥ pākabandhastu evaṃ trividhabandhanam
Sanskrit only: no published translation is held for this verse.
मूलबन्धस्तु यो बन्धो मूलसंकुचितं महत् । सारबन्धस्तु यो बन्धो वासनाबन्ध उच्यते
mūlabandhastu yo bandho mūlasaṃkucitaṃ mahat / sārabandhastu yo bandho vāsanābandha ucyate
Sanskrit only: no published translation is held for this verse.
स्याच्चतुः षष्टिमूलेभ्यः किंचिन्मूलेन बन्धनम् । प्राण्यङ्गं दैत्यादीनां मूलाङ्गं देवतामयम्
syāccatuḥ ṣaṣṭimūlebhyaḥ kiṃcinmūlena bandhanam / prāṇyaṅgaṃ daityādīnāṃ mūlāṅgaṃ devatāmayam
Sanskrit only: no published translation is held for this verse.
पाषाणं चैव सिद्धानां मानुषाणां च पूजितम् । पीठिकाद्रुतिसंकोचैस् त्रिविधं बन्धनं भवेत्
pāṣāṇaṃ caiva siddhānāṃ mānuṣāṇāṃ ca pūjitam / pīṭhikādrutisaṃkocais trividhaṃ bandhanaṃ bhavet
Sanskrit only: no published translation is held for this verse.
दिव्याभिरौषधीभिः प्रागुक्तं संकोचबन्धनम् । द्रुतिभिर्बध्यते सूतः क्षणबन्ध उदाहृतः
divyābhirauṣadhībhiḥ prāguktaṃ saṃkocabandhanam / drutibhirbadhyate sūtaḥ kṣaṇabandha udāhṛtaḥ
Sanskrit only: no published translation is held for this verse.
अभ्रकं हरबीजं च षोडशांशेन काञ्चनम् । ध्मातं प्रकाशमूषायां शोधयेत्काचटङ्कणैः
abhrakaṃ harabījaṃ ca ṣoḍaśāṃśena kāñcanam / dhmātaṃ prakāśamūṣāyāṃ śodhayetkācaṭaṅkaṇaiḥ
Sanskrit only: no published translation is held for this verse.
दक्षिणावर्तितं ध्मातं हरबीजेन मेलकम् । मूषां त्यक्त्वा वरारोहे तिष्ठते खगबद्धवद्रसः
dakṣiṇāvartitaṃ dhmātaṃ harabījena melakam / mūṣāṃ tyaktvā varārohe tiṣṭhate khagabaddhavadrasaḥ
Sanskrit only: no published translation is held for this verse.
रक्तिकार्धार्धमात्रेण पर्वतानपि वेधयेत् । भक्षणात्तस्य देवेशि रुद्रतुल्यो भवेन्नरः
raktikārdhārdhamātreṇa parvatānapi vedhayet / bhakṣaṇāttasya deveśi rudratulyo bhavennaraḥ
Sanskrit only: no published translation is held for this verse.
क्रीडते सप्तलोकेषु शिवतुल्यपराक्रमः । <द्रुतिमेलनविधिः> वज्रकन्दं गुडूची च उच्चटादिसमन्वितम्
krīḍate saptalokeṣu śivatulyaparākramaḥ / <drutimelanavidhiḥ> vajrakandaṃ guḍūcī ca uccaṭādisamanvitam
Sanskrit only: no published translation is held for this verse.
अभ्रकं क्रमते शीघ्रमन्यथा नास्ति सङ्गमः । कृष्णागरुनाभिसितैः रसोनपितरामठैः
abhrakaṃ kramate śīghramanyathā nāsti saṅgamaḥ / kṛṣṇāgarunābhisitaiḥ rasonapitarāmaṭhaiḥ
Sanskrit only: no published translation is held for this verse.
नारीकुसुमपालाशबीजतैलसमन्वितैः । सोष्णैर्मिलन्ति मृदिता द्रुतयः सकला रसे
nārīkusumapālāśabījatailasamanvitaiḥ / soṣṇairmilanti mṛditā drutayaḥ sakalā rase
Sanskrit only: no published translation is held for this verse.
<वज्रबन्धः; दशसङ्कलिकाविधिसिद्धः> पुनरन्यं प्रवक्ष्यामि वज्रबन्धं सुरार्चिते । गन्धकं भक्षयेन्नारी दिनानामेकविंशतिम्
<vajrabandhaḥ; daśasaṅkalikāvidhisiddhaḥ> punaranyaṃ pravakṣyāmi vajrabandhaṃ surārcite / gandhakaṃ bhakṣayennārī dinānāmekaviṃśatim
Sanskrit only: no published translation is held for this verse.
तद्रजो रसराजस्य बन्धने जारणे हितम् । वज्रभस्म तु भागैकं भागाः शुद्धरसात्त्रयः
tadrajo rasarājasya bandhane jāraṇe hitam / vajrabhasma tu bhāgaikaṃ bhāgāḥ śuddharasāttrayaḥ
Sanskrit only: no published translation is held for this verse.