Library·Ṣaḍviṃśa Brāhmaṇa of the Sāmaveda·1·1.2
अथ यत्र सुब्रह्मण्यः सुब्रह्मण्याम् आह्वयत्य् एतस्मिन् ह काले ऽसुररक्षांसि देवानां यज्ञम् अजिघांसन्
atha yatra subrahmaṇyaḥ subrahmaṇyām āhvayaty etasmin ha kāle 'surarakṣāṃsi devānāṃ yajñam ajighāṃsan
Sanskrit only: no published translation is held for this verse.
ते देवा निहवम् एवाकुर्वत ब्रह्मो३म् सुब्रह्मो३म् इति
te devā nihavam evākurvata brahmo3m subrahmo3m iti
Sanskrit only: no published translation is held for this verse.
तान् आदित्यः पर्जन्यः पुरोबलाको भूत्वाभिप्रैत् तान् वृष्ट्याशन्या विद्युताहन्
tān ādityaḥ parjanyaḥ purobalāko bhūtvābhiprait tān vṛṣṭyāśanyā vidyutāhan
Sanskrit only: no published translation is held for this verse.
तद् आहुः स्त्री सुब्रह्मण्या३ पुमा३न् नपुंसका३म् इति
tad āhuḥ strī subrahmaṇyā3 pumā3n napuṃsakā3m iti
Sanskrit only: no published translation is held for this verse.
सर्वम् एवेति ब्रूयात्
sarvam eveti brūyāt
Sanskrit only: no published translation is held for this verse.
यत् पर्जन्यः पुरोबलाको भूत्वाभिप्रैत् तेन पुमान् यद् वृष्ट्या यद् अशन्या तेन स्त्री यद् विद्युता तेन नपुंसकम् तस्मात् सर्वम् एवेति ब्रूयात्
yat parjanyaḥ purobalāko bhūtvābhiprait tena pumān yad vṛṣṭyā yad aśanyā tena strī yad vidyutā tena napuṃsakam tasmāt sarvam eveti brūyāt
Sanskrit only: no published translation is held for this verse.
तद् आहुर् ऋक् सुब्रह्मण्या३ यजू३स् सामा३ इति सर्वम् एवेति ब्रूयात् ऋच इवास्या नामधेयं सुब्रह्मण्येति तस्माद् ऋक् मन्त्र एवं खल्व् अयं निगदभूतो भवति तस्माद् यजुः सामकारिणः कुर्वन्ति यथान्यैः सामभिः तस्मात् साम तस्मात् सर्वम् एवेति ब्रूयात्
tad āhur ṛk subrahmaṇyā3 yajū3s sāmā3 iti sarvam eveti brūyāt ṛca ivāsyā nāmadheyaṃ subrahmaṇyeti tasmād ṛk mantra evaṃ khalv ayaṃ nigadabhūto bhavati tasmād yajuḥ sāmakāriṇaḥ kurvanti yathānyaiḥ sāmabhiḥ tasmāt sāma tasmāt sarvam eveti brūyāt
Sanskrit only: no published translation is held for this verse.
तद् वा एतत् सुब्रह्मण्याम् आहूय यजमानं वाचयति रक्षसाम् अपहत्यै
tad vā etat subrahmaṇyām āhūya yajamānaṃ vācayati rakṣasām apahatyai
Sanskrit only: no published translation is held for this verse.
सासि सुब्रह्मण्ये तस्यास् ते पृथिवी पाद इत्य् आह यान्य् एव पृथिव्याम् असुररक्षांसि तान्य् एव तेनापहते सासि सुब्रह्मण्ये तस्यास् ते ऽन्तरिक्षं पाद इत्य् आह यान्य् एवान्तरिक्षे ऽसुररक्षांसि तान्य् एव तेनापहते सासि सुब्रह्मण्ये तस्यास् ते द्यौः पाद इत्य् आह यान्य् एव दिव्य् असुररक्षांसि तान्य् एव तेनापहते सासि सुब्रह्मण्ये तस्यास् ते दिशः पाद इत्य् आह यान्य् एव दिक्ष्व् असुररक्षांसि तान्य् एव तेनापहते परोरजास् ते पञ्चमः पाद इत्य् आह परं रजसो वै ब्रह्मणः स्थानम् तद् एतद् आह सा न इषम् ऊर्जं धुक्ष्वेत्य् आह इषम् एवास्मा ऊर्जं दुग्धे वीर्यम् अन्नाद्यं धेहीत्य् आह वीर्यम् एवास्मा अन्नाद्यं दधाति
sāsi subrahmaṇye tasyās te pṛthivī pāda ity āha yāny eva pṛthivyām asurarakṣāṃsi tāny eva tenāpahate sāsi subrahmaṇye tasyās te 'ntarikṣaṃ pāda ity āha yāny evāntarikṣe 'surarakṣāṃsi tāny eva tenāpahate sāsi subrahmaṇye tasyās te dyauḥ pāda ity āha yāny eva divy asurarakṣāṃsi tāny eva tenāpahate sāsi subrahmaṇye tasyās te diśaḥ pāda ity āha yāny eva dikṣv asurarakṣāṃsi tāny eva tenāpahate parorajās te pañcamaḥ pāda ity āha paraṃ rajaso vai brahmaṇaḥ sthānam tad etad āha sā na iṣam ūrjaṃ dhukṣvety āha iṣam evāsmā ūrjaṃ dugdhe vīryam annādyaṃ dhehīty āha vīryam evāsmā annādyaṃ dadhāti
Sanskrit only: no published translation is held for this verse.
ब्रह्मश्री नामैतत् साम यत् सुब्रह्मण्या तस्मात् प्रातरनुवाक उपाकृते विसंस्थिते च यज्ञे सुब्रह्मण्यः सुब्रह्मण्याम् आह्वयति
brahmaśrī nāmaitat sāma yat subrahmaṇyā tasmāt prātaranuvāka upākṛte visaṃsthite ca yajñe subrahmaṇyaḥ subrahmaṇyām āhvayati
Sanskrit only: no published translation is held for this verse.
एष वै ब्रह्म सुब्रह्म चाप्नोति य एतद् अनो युक्तं सुब्रह्मण्याय ददाति
eṣa vai brahma subrahma cāpnoti ya etad ano yuktaṃ subrahmaṇyāya dadāti
Sanskrit only: no published translation is held for this verse.
ब्रह्मणा चैवास्य श्रिया च यज्ञं समर्धयति य एवं वेद
brahmaṇā caivāsya śriyā ca yajñaṃ samardhayati ya evaṃ veda
Sanskrit only: no published translation is held for this verse.
अथो खल्व् आहुर् यच् चावगतं यच् चानवगतं सर्वस्यैषैव प्रायश्चित्तिर् इति तस्माद् एवंविदं सुब्रह्मण्यं कुर्वीत नानेवंविदम्
atho khalv āhur yac cāvagataṃ yac cānavagataṃ sarvasyaiṣaiva prāyaścittir iti tasmād evaṃvidaṃ subrahmaṇyaṃ kurvīta nānevaṃvidam
Sanskrit only: no published translation is held for this verse.