अथ तस्य राज्ञो रूढतरविश्रम्भप्रणयः स्नेहावेगाद् अनपेक्षितोपचारो ऽमात्यमुख्यस् तं राजानम् इत्य् उवाच । मा तावद् भोः । या नाल्पेन तपःसमाधिविधिना संप्राप्यते केन चिद् याम् आसाद्य च भूरिभिर् मखशतैः कीर्तिं दिवं चाप्नुयात् । संप्राप्ताम् अतिपत्य तां नृपतितां शक्रर्द्धिविस्पर्धिनीं किं दृष्ट्वा नयने प्रदित्सति भवान् को ऽयं कुतस्त्यो विधिः
atha tasya rājño rūḍhataraviśrambhapraṇayaḥ snehāvegād anapekṣitopacāro 'mātyamukhyas taṃ rājānam ity uvāca / mā tāvad bhoḥ / yā nālpena tapaḥsamādhividhinā saṃprāpyate kena cid yām āsādya ca bhūribhir makhaśataiḥ kīrtiṃ divaṃ cāpnuyāt / saṃprāptām atipatya tāṃ nṛpatitāṃ śakrarddhivispardhinīṃ kiṃ dṛṣṭvā nayane praditsati bhavān ko 'yaṃ kutastyo vidhiḥ
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.