यमाय सोमः पवते यमाय क्रियते हविः । यमं ह यज्ञो गछत्य् अग्निदूतो अरंकृतः ॥१॥
yamāya somaḥ pavate yamāya kriyate haviḥ | yamaṃ ha yajño gachaty agnidūto araṃkṛtaḥ ||1||
Sanskrit only: no published translation is held for this verse.
Library·Atharvaveda Saṃhitā (Śaunaka)·18·18.2
Atharvaveda Saṃhitā (Śaunaka) 18.2
यमाय मधुमत्तमं जुहोता प्र च तिष्ठत । इदं नम ऋषिभ्यः पूर्वजेभ्यः पूर्वेभ्यः पथिकृद्भ्यः ॥२॥
yamāya madhumattamaṃ juhotā pra ca tiṣṭhata | idaṃ nama ṛṣibhyaḥ pūrvajebhyaḥ pūrvebhyaḥ pathikṛdbhyaḥ ||2||
Sanskrit only: no published translation is held for this verse.
यमाय घृतवत् पयो राज्ञे हविर् जुहोतन । स नो जीवेष्व् आ यमेद् दीर्घम् आयुः प्र जीवसे ॥३॥
yamāya ghṛtavat payo rājñe havir juhotana | sa no jīveṣv ā yamed dīrgham āyuḥ pra jīvase ||3||
Sanskrit only: no published translation is held for this verse.
मैनम् अग्ने वि दहो माभि शूशुचो मास्य त्वचं चिक्षिपो मा शरीरम् । शृतं यदा करसि जातवेदो ऽथेम् एनं प्र हिणुतात् पितॄंर् उप ॥४॥
mainam agne vi daho mābhi śūśuco māsya tvacaṃ cikṣipo mā śarīram | śṛtaṃ yadā karasi jātavedo 'them enaṃ pra hiṇutāt pitṝṃr upa ||4||
Sanskrit only: no published translation is held for this verse.
यदा शृतं कृणवो जातवेदो ऽथेमम् एनं परि दत्तात् पितृभ्यः । यदो गछात्य् असुनीतिम् एताम् अथ देवानां वशनीर् भवाति ॥५॥
yadā śṛtaṃ kṛṇavo jātavedo 'themam enaṃ pari dattāt pitṛbhyaḥ | yado gachāty asunītim etām atha devānāṃ vaśanīr bhavāti ||5||
Sanskrit only: no published translation is held for this verse.
त्रिकद्रुकेभिः पवते षड् उर्वीर् एकम् इद् बृहत् । त्रिष्टुब् गायत्री छन्दांसि सर्वा ता यम आर्पिता ॥६॥
trikadrukebhiḥ pavate ṣaḍ urvīr ekam id bṛhat | triṣṭub gāyatrī chandāṃsi sarvā tā yama ārpitā ||6||
Into the six Expanses flies the Great One in Trkadrukas. The Gayatri, the Trstup, all metres in Yama are contained.
Translated by Ralph T. H. Griffith (1896)This is the translator's rendering of the same verse where it occurs at RV 10.14.16; the wording of this text may differ in places.
सूर्यं चक्षुषा गछ वातम् आत्मना दिवं च गछ पृथिवीं च धर्मभिः । अपो वा गछ यदि तत्र ते हितम् ओषधीषु प्रति तिष्ठा शरीरैः ॥७॥
sūryaṃ cakṣuṣā gacha vātam ātmanā divaṃ ca gacha pṛthivīṃ ca dharmabhiḥ | apo vā gacha yadi tatra te hitam oṣadhīṣu prati tiṣṭhā śarīraiḥ ||7||
Sanskrit only: no published translation is held for this verse.
अजो भागस् तपसस् तं तपस्व तं ते शोचिस् तपतु तं ते अर्चिः । यास् ते शिवास् तन्वो जातवेदस् ताभिर् वहैनं सुकृताम् उ लोकम् ॥८॥
ajo bhāgas tapasas taṃ tapasva taṃ te śocis tapatu taṃ te arciḥ | yās te śivās tanvo jātavedas tābhir vahainaṃ sukṛtām u lokam ||8||
Thy portion is the goat: with heat consume him: let thy fierce flame, thy glowing splendour, burn him With thine auspicious forms, o Jatavedas, bear this man to the region of the pious.
Translated by Ralph T. H. Griffith (1896)This is the translator's rendering of the same verse where it occurs at RV 10.16.4; the wording of this text may differ in places.
यास् ते शोचयो रंहयो जातवेदो याभिर् आपृणासि दिवम् अन्तरिक्षम् । अजं यन्तम् अनु ताः सम् ऋण्वताम् अथेतराभिः शिवतमाभिः शृतं कृधि ॥९॥
yās te śocayo raṃhayo jātavedo yābhir āpṛṇāsi divam antarikṣam | ajaṃ yantam anu tāḥ sam ṛṇvatām athetarābhiḥ śivatamābhiḥ śṛtaṃ kṛdhi ||9||
Sanskrit only: no published translation is held for this verse.
अव सृज पुनर् अग्ने पितृभ्यो यस् त आहुतश् चरति स्वधावान् । आयुर् वसान उप यातु शेषः सं गछतां तन्वा सुवर्चाः ॥१०॥ ७
ava sṛja punar agne pitṛbhyo yas ta āhutaś carati svadhāvān | āyur vasāna upa yātu śeṣaḥ saṃ gachatāṃ tanvā suvarcāḥ ||10|| 7
Sanskrit only: no published translation is held for this verse.
अति द्रव श्वानौ सारमेयौ चतुरक्षौ शबलौ साधुना पथा । अधा पितॄन्त् सुविदत्रां अपीहि यमेन ये सधमादं मदन्ति ॥११॥
ati drava śvānau sārameyau caturakṣau śabalau sādhunā pathā | adhā pitṝnt suvidatrāṃ apīhi yamena ye sadhamādaṃ madanti ||11||
Sanskrit only: no published translation is held for this verse.
यौ ते श्वानौ यम रक्षितारौ चतुरक्षौ पथिषदी नृचक्षसा । ताभ्यां राजन् परि धेह्य् एनं स्वस्त्य् अस्मा अनमीवं च धेहि ॥१२॥
yau te śvānau yama rakṣitārau caturakṣau pathiṣadī nṛcakṣasā | tābhyāṃ rājan pari dhehy enaṃ svasty asmā anamīvaṃ ca dhehi ||12||
Sanskrit only: no published translation is held for this verse.
उरूणसाव् असुतृपाव् उदुम्बलौ यमस्य दूतौ चरतो जनां अनु । ताव् अस्मभ्यं दृशये सूर्याय पुनर् दाताम् असुम् अद्येह भद्रम् ॥१३॥
urūṇasāv asutṛpāv udumbalau yamasya dūtau carato janāṃ anu | tāv asmabhyaṃ dṛśaye sūryāya punar dātām asum adyeha bhadram ||13||
Dark-hued, insatiate, with distended nostrils, Yama's two envoys roam among the People; May they restore to us a fair existence here and to-day, that we may see the sunlight.
Translated by Ralph T. H. Griffith (1896)This is the translator's rendering of the same verse where it occurs at RV 10.14.12; the wording of this text may differ in places.
सोम एकेभ्यः पवते घृतम् एक उपासते । येभ्यो मधु प्रधावति तांश् चिद् एवापि गछतात् ॥१४॥
soma ekebhyaḥ pavate ghṛtam eka upāsate | yebhyo madhu pradhāvati tāṃś cid evāpi gachatāt ||14||
For some is Soma purified, some sit by sacrificial oil: To those for whom the meath flows forth, even to those let him depart.
Translated by Ralph T. H. Griffith (1896)This is the translator's rendering of the same verse where it occurs at RV 10.154.1; the wording of this text may differ in places.
ये चित् पूर्व ऋतसाता ऋतजाता ऋतावृधः । ऋषीन् तपस्वतो यम तपोजां अपि गछतात् ॥१५॥
ye cit pūrva ṛtasātā ṛtajātā ṛtāvṛdhaḥ | ṛṣīn tapasvato yama tapojāṃ api gachatāt ||15||
Sanskrit only: no published translation is held for this verse.
तपसा ये अनाधृष्यास् तपसा ये स्वर् ययुः । तपो ये चक्रिरे महस् तांश् चिद् एवापि गछतात् ॥१६॥
tapasā ye anādhṛṣyās tapasā ye svar yayuḥ | tapo ye cakrire mahas tāṃś cid evāpi gachatāt ||16||
Invincible through Fervour, those whom Fervour hath advanced to heaven, Who showed great Fervour in their lives, even to those let him depart.
Translated by Ralph T. H. Griffith (1896)This is the translator's rendering of the same verse where it occurs at RV 10.154.2; the wording of this text may differ in places.
ये युध्यन्ते प्रधनेषु शूरासो ये स्वर् तनूत्यजः । ये वा सहस्रदक्षिणास् तां चिद् एवापि गछतात् ॥१७॥
ye yudhyante pradhaneṣu śūrāso ye svar tanūtyajaḥ | ye vā sahasradakṣiṇās tāṃ cid evāpi gachatāt ||17||
The heroes who contend in war and boldly cast their lives away, Or who give guerdon thousandfold, even to those let him depart.
Translated by Ralph T. H. Griffith (1896)This is the translator's rendering of the same verse where it occurs at RV 10.154.3; the wording of this text may differ in places.
सहस्रणीथाः कवयो ये गोपायन्ति सूर्यम् । ऋषीन् तपस्वतो यम तपोजां अपि गछतात् ॥१८॥
sahasraṇīthāḥ kavayo ye gopāyanti sūryam | ṛṣīn tapasvato yama tapojāṃ api gachatāt ||18||
Skilled in a thousand ways and means, the sages who protect the Sun, The Rsis, Yama! Fervour-moved, even to those let him depart.
Translated by Ralph T. H. Griffith (1896)This is the translator's rendering of the same verse where it occurs at RV 10.154.5; the wording of this text may differ in places.
स्योनास्मै भव पृथिव्य् अनृक्षरा निवेशनी । यछास्मै शर्म सप्रथाः ॥१९॥
syonāsmai bhava pṛthivy anṛkṣarā niveśanī | yachāsmai śarma saprathāḥ ||19||
Sanskrit only: no published translation is held for this verse.
असंबाधे पृथिव्या उरौ लोके नि धीयस्व । स्वधा याश् चकृषे जीवन् तास् ते सन्तु मधुश्चुतः ॥२०॥ ८
asaṃbādhe pṛthivyā urau loke ni dhīyasva | svadhā yāś cakṛṣe jīvan tās te santu madhuścutaḥ ||20|| 8
Sanskrit only: no published translation is held for this verse.
ह्वयामि ते मनसा मन इहेमान् गृहाम् उप जुजुषाण एहि । सं गछस्व पितृभिः सं यमेन स्योनास् त्वा वाता उप वान्तु शग्माः ॥२१॥
hvayāmi te manasā mana ihemān gṛhām upa jujuṣāṇa ehi | saṃ gachasva pitṛbhiḥ saṃ yamena syonās tvā vātā upa vāntu śagmāḥ ||21||
Sanskrit only: no published translation is held for this verse.
उत् त्वा वहन्तु मरुत उदवाहा उदप्रुतः । अजेन कृण्वन्तः शीतं वर्षेणोक्षन्तु बाल् इति ॥२२॥
ut tvā vahantu maruta udavāhā udaprutaḥ | ajena kṛṇvantaḥ śītaṃ varṣeṇokṣantu bāl iti ||22||
Sanskrit only: no published translation is held for this verse.
उद् अह्वम् आयुर् आयुषे क्रत्वे दक्षाय जीवसे । स्वान् गछतु ते मनो अधा पितॄंर् उप द्रव ॥२३॥
ud ahvam āyur āyuṣe kratve dakṣāya jīvase | svān gachatu te mano adhā pitṝṃr upa drava ||23||
Sanskrit only: no published translation is held for this verse.
मा ते मनो मासोर् माङ्गानां मा रसस्य ते । मा ते हास्त तन्वः किं चनेह ॥२४॥
mā te mano māsor māṅgānāṃ mā rasasya te | mā te hāsta tanvaḥ kiṃ caneha ||24||
Sanskrit only: no published translation is held for this verse.
मा त्वा वृक्षः सं बाधिष्ट मा देवी पृथिवी मही । लोकं पितृषु वित्त्वैधस्व यमराजसु ॥२५॥
mā tvā vṛkṣaḥ saṃ bādhiṣṭa mā devī pṛthivī mahī | lokaṃ pitṛṣu vittvaidhasva yamarājasu ||25||
Sanskrit only: no published translation is held for this verse.
यत् ते अङ्गम् अतिहितं पराचैर् अपानः प्राणो य उ वा ते परेतः । तत् ते संगत्य पितरः सनीडा घासाद् घासं पुनर् आ वेशयन्तु ॥२६॥
yat te aṅgam atihitaṃ parācair apānaḥ prāṇo ya u vā te paretaḥ | tat te saṃgatya pitaraḥ sanīḍā ghāsād ghāsaṃ punar ā veśayantu ||26||
Sanskrit only: no published translation is held for this verse.
अपेमं जीवा अरुधन् गृहेभ्यस् तं निर् वहत परि ग्रामाद् इतः । मृत्युर् यमस्यासीद् दूतः प्रचेता असून् पितृभ्यो गमयां चकार ॥२७॥
apemaṃ jīvā arudhan gṛhebhyas taṃ nir vahata pari grāmād itaḥ | mṛtyur yamasyāsīd dūtaḥ pracetā asūn pitṛbhyo gamayāṃ cakāra ||27||
Sanskrit only: no published translation is held for this verse.
ये दस्यवः पितृषु प्रविष्टा ज्ञातिमुखा अहुतादश् चरन्ति । परापुरो निपुरो ये भरन्त्य् अग्निष् टान् अस्मात् प्र धमाति यज्ञात् ॥२८॥
ye dasyavaḥ pitṛṣu praviṣṭā jñātimukhā ahutādaś caranti | parāpuro nipuro ye bharanty agniṣ ṭān asmāt pra dhamāti yajñāt ||28||
Sanskrit only: no published translation is held for this verse.
सं विशन्त्व् इह पितरः स्वा नः स्योनं कृण्वन्तः प्रतिरन्त आयुः । तेभ्यः शकेम हविषा नक्षमाणा ज्योग् जीवन्तः शरदः पुरूचीः ॥२९॥
saṃ viśantv iha pitaraḥ svā naḥ syonaṃ kṛṇvantaḥ pratiranta āyuḥ | tebhyaḥ śakema haviṣā nakṣamāṇā jyog jīvantaḥ śaradaḥ purūcīḥ ||29||
Sanskrit only: no published translation is held for this verse.
यां ते धेनुं निपृणामि यम् उ क्षीर ओदनम् । तेना जनस्यासो भर्ता यो ऽत्रासद् अजीवनः ॥३०॥ ९
yāṃ te dhenuṃ nipṛṇāmi yam u kṣīra odanam | tenā janasyāso bhartā yo 'trāsad ajīvanaḥ ||30|| 9
Sanskrit only: no published translation is held for this verse.
अश्वावतीं प्र तर या सुशेवा र्क्षाकं वा प्रतरं नवीयः । यस् त्वा जघान वध्यः सो अस्तु मा सो अन्यद् विदत भागधेयम् ॥३१॥
aśvāvatīṃ pra tara yā suśevā rkṣākaṃ vā prataraṃ navīyaḥ | yas tvā jaghāna vadhyaḥ so astu mā so anyad vidata bhāgadheyam ||31||
Sanskrit only: no published translation is held for this verse.
यमः परो ऽवरो विवस्वान् ततः परं नाति पश्यामि किं चन । यमे अध्वरो अधि मे निविष्टो भुवो विवस्वान् अन्वाततान ॥३२॥
yamaḥ paro 'varo vivasvān tataḥ paraṃ nāti paśyāmi kiṃ cana | yame adhvaro adhi me niviṣṭo bhuvo vivasvān anvātatāna ||32||
Sanskrit only: no published translation is held for this verse.
अपागूहन्न् अमृतां मर्त्येभ्यः कृत्वा सवर्णाम् अदधुर् विवस्वते । उताश्विनाव् अभरद् यत् तद् आसीद् अजहाद् उ द्वा मिथुना सरण्यूः ॥३३॥
apāgūhann amṛtāṃ martyebhyaḥ kṛtvā savarṇām adadhur vivasvate | utāśvināv abharad yat tad āsīd ajahād u dvā mithunā saraṇyūḥ ||33||
From mortal men they hid the Immortal Lady, made one like her and gave her to Vivasvan. Saranyu brought to him the Asvin brothers, and then deserted both twinned pairs of children.
Translated by Ralph T. H. Griffith (1896)This is the translator's rendering of the same verse where it occurs at RV 10.17.2; the wording of this text may differ in places.
ये निखाता ये परोप्ता ये दग्धा ये चोद्धिताः । सर्वांस् तान् अग्न आ वह पितॄन् हविषे अत्तवे ॥३४॥
ye nikhātā ye paroptā ye dagdhā ye coddhitāḥ | sarvāṃs tān agna ā vaha pitṝn haviṣe attave ||34||
Sanskrit only: no published translation is held for this verse.
ये अग्निदग्धा ये अनग्निदग्धा मध्ये दिवः स्वधया मादयन्ते । त्वं तान् वेत्थ यदि ते जातवेदः स्वधया यज्ञं स्वधितिं जुषन्ताम् ॥३५॥
ye agnidagdhā ye anagnidagdhā madhye divaḥ svadhayā mādayante | tvaṃ tān vettha yadi te jātavedaḥ svadhayā yajñaṃ svadhitiṃ juṣantām ||35||
Sanskrit only: no published translation is held for this verse.
शं तप माति तपो अग्ने मा तन्वं तपः । वणेषु शुष्मो अस्तु ते पृथिव्याम् अस्तु यद् धरः ॥३६॥
śaṃ tapa māti tapo agne mā tanvaṃ tapaḥ | vaṇeṣu śuṣmo astu te pṛthivyām astu yad dharaḥ ||36||
Sanskrit only: no published translation is held for this verse.
ददाम्य् अस्मा अवसानम् एतद् य एष आगन् मम चेद् अभूद् इह । यमश् चिकित्वान् प्रत्य् एतद् आह ममैष राय उप तिष्ठताम् इह ॥३७॥
dadāmy asmā avasānam etad ya eṣa āgan mama ced abhūd iha | yamaś cikitvān praty etad āha mamaiṣa rāya upa tiṣṭhatām iha ||37||
Sanskrit only: no published translation is held for this verse.
इमां मात्रां मिमीमहे यथापरं न मासातै । शते शरत्सु नो पुरा ॥३८॥
imāṃ mātrāṃ mimīmahe yathāparaṃ na māsātai | śate śaratsu no purā ||38||
Sanskrit only: no published translation is held for this verse.
प्रेमां मात्रां मिमीमहे यथापरं न मासातै । शते शरत्सु नो पुरा ॥३९॥
premāṃ mātrāṃ mimīmahe yathāparaṃ na māsātai | śate śaratsu no purā ||39||
Sanskrit only: no published translation is held for this verse.
अपेमां मात्रां मिमीमहे यथापरं न मासातै । शते शरत्सु नो पुरा ॥४०॥ १०
apemāṃ mātrāṃ mimīmahe yathāparaṃ na māsātai | śate śaratsu no purā ||40|| 10
Sanskrit only: no published translation is held for this verse.
वीमां मात्रां मिमीमहे यथापरं न मासातै । शते शरत्सु नो पुरा ॥४१॥
vīmāṃ mātrāṃ mimīmahe yathāparaṃ na māsātai | śate śaratsu no purā ||41||
Sanskrit only: no published translation is held for this verse.
निर् इमां मात्रां मिमीमहे यथापरं न मासातै । शते शरत्सु नो पुरा ॥४२॥
nir imāṃ mātrāṃ mimīmahe yathāparaṃ na māsātai | śate śaratsu no purā ||42||
Sanskrit only: no published translation is held for this verse.
उद् इमां मात्रां मिमीमहे यथापरं न मासातै । शते शरत्सु नो पुरा ॥४३॥
ud imāṃ mātrāṃ mimīmahe yathāparaṃ na māsātai | śate śaratsu no purā ||43||
Sanskrit only: no published translation is held for this verse.
सम् इमां मात्रां मिमीमहे यथापरं न मासातै । शते शरत्सु नो पुरा ॥४४॥
sam imāṃ mātrāṃ mimīmahe yathāparaṃ na māsātai | śate śaratsu no purā ||44||
Sanskrit only: no published translation is held for this verse.
अमासि मात्रां स्वर् अगाम् आयुष्मान् भूयासम् । यथापरं न मासातै शते शरत्सु नो पुरा ॥४५॥
amāsi mātrāṃ svar agām āyuṣmān bhūyāsam | yathāparaṃ na māsātai śate śaratsu no purā ||45||
Sanskrit only: no published translation is held for this verse.
प्राणो अपानो व्यान आयुश् चक्षुर् दृशये सूर्याय । अपरिपरेण पथा यमराज्ञः पितॄन् गछ ॥४६॥
prāṇo apāno vyāna āyuś cakṣur dṛśaye sūryāya | aparipareṇa pathā yamarājñaḥ pitṝn gacha ||46||
Sanskrit only: no published translation is held for this verse.
ये अग्रवः शशमानाः परेयुर् हित्वा द्वेषांस्य् अनपत्यवन्तः । ते द्याम् उदित्याविदन्त लोकं नाकस्य पृष्ठे अधि दीध्यानाः ॥४७॥
ye agravaḥ śaśamānāḥ pareyur hitvā dveṣāṃsy anapatyavantaḥ | te dyām udityāvidanta lokaṃ nākasya pṛṣṭhe adhi dīdhyānāḥ ||47||
Sanskrit only: no published translation is held for this verse.
उदन्वती द्यौर् अवमा पीलुमतीति मध्यमा । तृतीया ह प्रद्यौर् इति यस्यां पितर आसते ॥४८॥
udanvatī dyaur avamā pīlumatīti madhyamā | tṛtīyā ha pradyaur iti yasyāṃ pitara āsate ||48||
Sanskrit only: no published translation is held for this verse.
ये न पितुः पितरो ये पितामहा य आविविशुर् उर्व् अन्तरिक्षम् । य आक्षियन्ति पृथिवीम् उत द्यां तेभ्यः पितृभ्यो नमसा विधेम ॥४९॥
ye na pituḥ pitaro ye pitāmahā ya āviviśur urv antarikṣam | ya ākṣiyanti pṛthivīm uta dyāṃ tebhyaḥ pitṛbhyo namasā vidhema ||49||
Sanskrit only: no published translation is held for this verse.
इदम् इद् वा उ नापरं दिवि पश्यसि सूर्यम् । माता पुत्रं यथा सिचाभ्य् एनं भूम ऊर्णुहि ॥५०॥ ११
idam id vā u nāparaṃ divi paśyasi sūryam | mātā putraṃ yathā sicābhy enaṃ bhūma ūrṇuhi ||50|| 11
Sanskrit only: no published translation is held for this verse.
इदम् इद् वा उ नापरं जरस्य् अन्यद् इतो ऽपरम् । जाया पतिम् इव वाससाभ्य् एनं भूम ऊर्णुहि ॥५१॥
idam id vā u nāparaṃ jarasy anyad ito 'param | jāyā patim iva vāsasābhy enaṃ bhūma ūrṇuhi ||51||
Sanskrit only: no published translation is held for this verse.
अभि त्वोर्णोमि पृथिव्या मातुर् वस्त्रेण भद्रया । जीवेषु भद्रं तन् मयि स्वधा पितृषु सा त्वयि ॥५२॥
abhi tvorṇomi pṛthivyā mātur vastreṇa bhadrayā | jīveṣu bhadraṃ tan mayi svadhā pitṛṣu sā tvayi ||52||
Sanskrit only: no published translation is held for this verse.
अग्नीषोमा पथिकृता स्योनं देवेभ्यो रत्नं दधथुर् वि लोकम् । उप प्रेष्यन्तं पूषणं यो वहात्य् अञ्जोयानैः पथिभिस् तत्र गछतम् ॥५३॥
agnīṣomā pathikṛtā syonaṃ devebhyo ratnaṃ dadhathur vi lokam | upa preṣyantaṃ pūṣaṇaṃ yo vahāty añjoyānaiḥ pathibhis tatra gachatam ||53||
Sanskrit only: no published translation is held for this verse.
पूषा त्वेतश् च्यावयतु प्र विद्वान् अनष्टपशुर् भुवनस्य गोपाः । स त्वैतेभ्यः परि ददत् पितृभ्यो ऽग्निर् देवेभ्यः सुविदत्रियेभ्यः ॥५४॥
pūṣā tvetaś cyāvayatu pra vidvān anaṣṭapaśur bhuvanasya gopāḥ | sa tvaitebhyaḥ pari dadat pitṛbhyo 'gnir devebhyaḥ suvidatriyebhyaḥ ||54||
Guard of the world, whose cattle ne'er are injured, may Pusan bear thee hence, for he hath knowledge. May he consign thee to these Fathers' keeping, and to the gracious Gods let Agni give thee.
Translated by Ralph T. H. Griffith (1896)This is the translator's rendering of the same verse where it occurs at RV 10.17.3; the wording of this text may differ in places.
आयुर् विश्वायुः परि पातु त्वा पूषा त्वा पातु प्रपथे पुरस्तात् । यत्रासते सुकृतो यत्र त ईयुस् तत्र त्वा देवः सविता दधातु ॥५५॥
āyur viśvāyuḥ pari pātu tvā pūṣā tvā pātu prapathe purastāt | yatrāsate sukṛto yatra ta īyus tatra tvā devaḥ savitā dadhātu ||55||
May Ayu, giver of all life, protect thee, and bear thee forward on the distant pathway. Thither let Savitar the God transport thee, where dwell the pious who have passed-before thee.
Translated by Ralph T. H. Griffith (1896)This is the translator's rendering of the same verse where it occurs at RV 10.17.4; the wording of this text may differ in places.
इमौ युनज्मि ते वह्नी असुनीताय वोढवे । ताभ्यां यमस्य सादनं समितिश् चाव गछतात् ॥५६॥
imau yunajmi te vahnī asunītāya voḍhave | tābhyāṃ yamasya sādanaṃ samitiś cāva gachatāt ||56||
Sanskrit only: no published translation is held for this verse.
एतत् त्वा वासः प्रथमं न्व् आगन्न् अपैतद् ऊह यद् इहाबिभः पुरा । इष्टापूर्तम् अनुसंक्राम विद्वान् यत्र ते दत्तं बहुधा विबन्धुषु ॥५७॥
etat tvā vāsaḥ prathamaṃ nv āgann apaitad ūha yad ihābibhaḥ purā | iṣṭāpūrtam anusaṃkrāma vidvān yatra te dattaṃ bahudhā vibandhuṣu ||57||
Sanskrit only: no published translation is held for this verse.
अग्नेर् वर्म परि गोभिर् व्ययस्व सं प्रोर्णुष्व मेदसा पीवसा च । नेत् त्वा धृष्णुर् हरसा जर्हृषाणो दधृग् विधक्षन् परीङ्खयातै ॥५८॥
agner varma pari gobhir vyayasva saṃ prorṇuṣva medasā pīvasā ca | net tvā dhṛṣṇur harasā jarhṛṣāṇo dadhṛg vidhakṣan parīṅkhayātai ||58||
Shield thee with flesh against the flames of Agni, encompass thee about with fat and marrow, So will the Bold One, eager to attack thee with fierce glow fail to girdle and consume thee.
Translated by Ralph T. H. Griffith (1896)This is the translator's rendering of the same verse where it occurs at RV 10.16.7; the wording of this text may differ in places.
दण्डं हस्ताद् आददानो गतासोः सह श्रोत्रेण वर्चसा बलेन । अत्रैव त्वम् इह वयं सुवीरा विश्वा मृधो अभिमातीर् जयेम ॥५९॥
daṇḍaṃ hastād ādadāno gatāsoḥ saha śrotreṇa varcasā balena | atraiva tvam iha vayaṃ suvīrā viśvā mṛdho abhimātīr jayema ||59||
Sanskrit only: no published translation is held for this verse.
धनुर् हस्ताद् आददानो मृतस्य सह क्षत्रेण वर्चसा बलेन । समागृभाय वसु भूरि पुष्टम् अर्वाङ् त्वम् एह्य् उप जीवलोकम् ॥६०॥ १२
dhanur hastād ādadāno mṛtasya saha kṣatreṇa varcasā balena | samāgṛbhāya vasu bhūri puṣṭam arvāṅ tvam ehy upa jīvalokam ||60|| 12
Sanskrit only: no published translation is held for this verse.