Library·Atharvaveda Saṃhitā (Śaunaka)·3·3.11
मुञ्चामि त्वा हविषा जीवनाय कम् अज्ञातयक्ष्माद् उत राजयक्ष्मात् । ग्राहिर् जग्राह यद्य् एतद् एनं तस्या इन्द्राग्नी प्र मुमुक्तम् एनम् ॥१॥
muñcāmi tvā haviṣā jīvanāya kam ajñātayakṣmād uta rājayakṣmāt | grāhir jagrāha yady etad enaṃ tasyā indrāgnī pra mumuktam enam ||1||
I release thee by oblation, in order to living, from unknown yákṣma and from royal yákṣma; if now seizure (gráhi) hath seized him, from it, O Indra-and-Agni, do ye release him.
Translated by William Dwight Whitney (1905)
यदि क्षितायुर् यदि वा परेतो यदि मृत्योर् अन्तिकं एव । तम् आ हरामि निरृतेर् उपस्थाद् अस्पार्शम् एनं शतशारदाय ॥२॥
yadi kṣitāyur yadi vā pareto yadi mṛtyor antikaṃ eva | tam ā harāmi nirṛter upasthād aspārśam enaṃ śataśāradāya ||2||
If of exhausted life-time, or if deceased, if gone down even to the presence (antiká) of death, him I take from the lap of perdition; I have won (spṛ) him for [life] of a hundred autumns.
Translated by William Dwight Whitney (1905)
सहस्राक्षेण शतवीर्येण शतायुषा हविषाहार्षम् एनम् । इन्द्रो यथैनं शरदो नयात्य् अति विश्वस्य दुरितस्य पारम् ॥३॥
sahasrākṣeṇa śatavīryeṇa śatāyuṣā haviṣāhārṣam enam | indro yathainaṃ śarado nayāty ati viśvasya duritasya pāram ||3||
With an oblation having a thousand eyes, a hundred heroisms, a hundred life-times, have I taken him, in order that Indra may lead him unto autumns, across to the further shore of all difficulty (duritá).
Translated by William Dwight Whitney (1905)
शतं जीव शरदो वर्धमानः शतं हेमन्तान् छतम् उ वसन्तान् । शतं ते इन्द्रो अग्निः सविता बृहस्पतिः शतायुषा हविषाहार्षम् एनम् ॥४॥
śataṃ jīva śarado vardhamānaḥ śataṃ hemantān chatam u vasantān | śataṃ te indro agniḥ savitā bṛhaspatiḥ śatāyuṣā haviṣāhārṣam enam ||4||
Live thou increasing a hundred autumns, a hundred winters, and a hundred springs; a hundred to thee [may] Indra, Agni, Savitar, Brihaspati [give]; with an oblation of a hundred life-times have I taken him.
Translated by William Dwight Whitney (1905)
प्र विशतं प्राणापानाव् अनड्वाहाव् इव व्रजम् । व्य् अन्ये यन्तु मृत्यवो यान् आहुर् इतरान् छतम् ॥५॥
pra viśataṃ prāṇāpānāv anaḍvāhāv iva vrajam | vy anye yantu mṛtyavo yān āhur itarān chatam ||5||
Enter in, O breath-and-expiration, as two draft-oxen a pen (vrajá); let the other deaths go away (ví), which they call the remaining hundred.
Translated by William Dwight Whitney (1905)
इहैव स्तं प्राणापानौ माप गातम् इतो युवम् । शरीरम् अस्याङ्गानि जरसे वहतं पुनः ॥६॥
ihaiva staṃ prāṇāpānau māpa gātam ito yuvam | śarīram asyāṅgāni jarase vahataṃ punaḥ ||6||
Be ye just here, O breath-and-expiration; go ye not away from here; carry his body, his limbs, unto old age again.
Translated by William Dwight Whitney (1905)
जरायै त्वा परि ददामि जरायै नि धुवामि त्वा । जरा त्वा भद्रा नेष्ट व्य् अन्ये यन्तु मृत्यवो यान् आहुर् इतरान् छतम् ॥७॥
jarāyai tvā pari dadāmi jarāyai ni dhuvāmi tvā | jarā tvā bhadrā neṣṭa vy anye yantu mṛtyavo yān āhur itarān chatam ||7||
Unto old age do I commit thee; unto old age do I shake thee down (ni-dhū); may old age, excellent, conduct thee; let the other deaths go away, which they call the remaining hundred.
Translated by William Dwight Whitney (1905)
अभि त्वा जरिमाहित गाम् उक्षणम् इव रज्ज्वा । यस् त्वा मृत्युर् अभ्यधत्त जायमानं सुपाशया । तं ते सत्यस्य हस्ताभ्याम् उद् अमुञ्चद् बृहस्पतिः ॥८॥
abhi tvā jarimāhita gām ukṣaṇam iva rajjvā | yas tvā mṛtyur abhyadhatta jāyamānaṃ supāśayā | taṃ te satyasya hastābhyām ud amuñcad bṛhaspatiḥ ||8||
Old age hath curbed (abhi-dhā) thee, as it were a cow, an ox, with a rope; the death that curbed thee, when born, with easy fetter—that Brihaspati released for thee, with the (two) hands of truth.
Translated by William Dwight Whitney (1905)