Atharvaveda Saṃhitā (Śaunaka) 3.12

इहैव ध्रुवां नि मिनोमि शालां क्षेमे तिष्ठाति घृतम् उक्षमाणा । तां त्वा शाले सर्ववीराः सुवीरा अरिष्टवीरा उप सं चरेम ॥१॥

ihaiva dhruvāṃ ni minomi śālāṃ kṣeme tiṣṭhāti ghṛtam ukṣamāṇā | tāṃ tvā śāle sarvavīrāḥ suvīrā ariṣṭavīrā upa saṃ carema ||1||

Sanskrit only: no published translation is held for this verse.

इहैव ध्रुवा प्रति तिष्ठ शाले ऽश्वावती गोमती सूनृतावती । ऊर्जस्वती घृतवती पयस्वत्य् उच् छ्रयस्व महते सौभगाय ॥२॥

ihaiva dhruvā prati tiṣṭha śāle 'śvāvatī gomatī sūnṛtāvatī | ūrjasvatī ghṛtavatī payasvaty uc chrayasva mahate saubhagāya ||2||

Sanskrit only: no published translation is held for this verse.

धरुण्य् असि शाले बृहछन्दाः पूतिधान्या । आ त्वा वत्सो गमेद् आ कुमार आ धेनवः सायम् आस्पन्दमानाः ॥३॥

dharuṇy asi śāle bṛhachandāḥ pūtidhānyā | ā tvā vatso gamed ā kumāra ā dhenavaḥ sāyam āspandamānāḥ ||3||

Sanskrit only: no published translation is held for this verse.

इमां शालां सविता वायुर् इन्द्रो बृहस्पतिर् नि मिनोतु प्रजानन् । उक्षन्तूद्ना मरुतो घृतेन भगो नो राजा नि कृषिं तनोतु ॥४॥

imāṃ śālāṃ savitā vāyur indro bṛhaspatir ni minotu prajānan | ukṣantūdnā maruto ghṛtena bhago no rājā ni kṛṣiṃ tanotu ||4||

Sanskrit only: no published translation is held for this verse.

मानस्य पत्नि शरणा स्योना देवी देवेभिर् निमितास्य् अग्रे । तृणं वसाना सुमना असस् त्वम् अथास्मभ्यं सहवीरं रयिं दाः ॥५॥

mānasya patni śaraṇā syonā devī devebhir nimitāsy agre | tṛṇaṃ vasānā sumanā asas tvam athāsmabhyaṃ sahavīraṃ rayiṃ dāḥ ||5||

Sanskrit only: no published translation is held for this verse.

ऋतेन स्थूणाम् अधि रोह वंशोग्रो विराजन्न् अप वृङ्क्ष्व शत्रून् । मा ते रिषन्न् उपसत्तारो गृहाणां शाले शतं जीवेम शरदः सर्ववीराः ॥६॥

ṛtena sthūṇām adhi roha vaṃśogro virājann apa vṛṅkṣva śatrūn | mā te riṣann upasattāro gṛhāṇāṃ śāle śataṃ jīvema śaradaḥ sarvavīrāḥ ||6||

Sanskrit only: no published translation is held for this verse.

एमां कुमारस् तरुण आ वत्सो जगता सह । एमाम् परिस्रुतः कुम्भ आ दध्नः कलशैर् अगुः ॥७॥

emāṃ kumāras taruṇa ā vatso jagatā saha | emām parisrutaḥ kumbha ā dadhnaḥ kalaśair aguḥ ||7||

Sanskrit only: no published translation is held for this verse.

पूर्णं नारि प्र भर कुम्भम् एतं घृतस्य धाराम् अमृतेन संभृताम् । इमां पातॄन् अमृतेन सम् अङ्ग्धीष्टापूर्तम् अभि रक्षात्य् एनाम् ॥८॥

pūrṇaṃ nāri pra bhara kumbham etaṃ ghṛtasya dhārām amṛtena saṃbhṛtām | imāṃ pātṝn amṛtena sam aṅgdhīṣṭāpūrtam abhi rakṣāty enām ||8||

Sanskrit only: no published translation is held for this verse.

इमा आपः प्र भराम्य् अयक्ष्मा यक्ष्मनाशनीः । गृहान् उप प्र सीदाम्य् अमृतेन सहाग्निना ॥९॥

imā āpaḥ pra bharāmy ayakṣmā yakṣmanāśanīḥ | gṛhān upa pra sīdāmy amṛtena sahāgninā ||9||

Sanskrit only: no published translation is held for this verse.