Library·Atharvaveda Saṃhitā (Śaunaka)·7·7.97
यद् अद्य त्वा प्रयति यज्ञे अस्मिन् होतश् चिकित्वन्न् अवृणीमहीह । ध्रुवम् अयो ध्रुवम् उता शविष्ठैप्रविद्वान् यज्ञम् उप याहि सोमम् ॥१॥
yad adya tvā prayati yajñe asmin hotaś cikitvann avṛṇīmahīha | dhruvam ayo dhruvam utā śaviṣṭhaipravidvān yajñam upa yāhi somam ||1||
Sanskrit only: no published translation is held for this verse.
सम् इन्द्र नो मनसा नेष गोभिः सं सूरिभिर् हरिवन्त् सं स्वस्त्या । सं ब्रह्मणा देवहितं यद् अस्ति सं देवानां सुमतौ यज्ञियानाम् ॥२॥
sam indra no manasā neṣa gobhiḥ saṃ sūribhir harivant saṃ svastyā | saṃ brahmaṇā devahitaṃ yad asti saṃ devānāṃ sumatau yajñiyānām ||2||
With willing mind, Indra, vouchsafe us cattle, prosperity, Lord of Bays! and pious patrons; And, with the sacred prayer by Gods appointed, give us the holy Deities' lovingkindness.
Translated by Ralph T. H. Griffith (1896)This is the translator's rendering of the same verse where it occurs at RV 5.42.4; the wording of this text may differ in places.
यान् आवह उशतो देव देवांस् तान् प्रेरय स्वे अग्ने सधस्थे । जक्षिवांसः पपिवांसो मधून्य् अस्मै धत्त वसवो वसूनि ॥३॥
yān āvaha uśato deva devāṃs tān preraya sve agne sadhasthe | jakṣivāṃsaḥ papivāṃso madhūny asmai dhatta vasavo vasūni ||3||
Sanskrit only: no published translation is held for this verse.
सुगा वो देवाः सदना अकर्म य आजग्म सवने मा जुषाणाः । वहमाना भरमाणाः स्वा वसूनि वसुं घर्मं दिवम् आ रोहतानु ॥४॥
sugā vo devāḥ sadanā akarma ya ājagma savane mā juṣāṇāḥ | vahamānā bharamāṇāḥ svā vasūni vasuṃ gharmaṃ divam ā rohatānu ||4||
Sanskrit only: no published translation is held for this verse.
यज्ञ यज्ञं गछ यज्ञपतिं गछ । स्वां योनिं गछ स्वाहा ॥५॥
yajña yajñaṃ gacha yajñapatiṃ gacha | svāṃ yoniṃ gacha svāhā ||5||
Sanskrit only: no published translation is held for this verse.
एष ते यज्ञो यज्ञपते सहसूक्तवाकः । सुवीर्यः स्वाहा ॥६॥
eṣa te yajño yajñapate sahasūktavākaḥ | suvīryaḥ svāhā ||6||
Sanskrit only: no published translation is held for this verse.
वषड् धुतेभ्यो वषड् अहुतेभ्यः । देवा गातुविदो गातुं वित्त्वा गातुम् इत ॥७॥
vaṣaḍ dhutebhyo vaṣaḍ ahutebhyaḥ | devā gātuvido gātuṃ vittvā gātum ita ||7||
Sanskrit only: no published translation is held for this verse.
मनसस् पत इमं नो दिवि देवेषु यज्ञम् । स्वाहा दिवि स्वाहा पृथिव्यां स्वाहान्तरिक्षे स्वाहा वाते धां स्वाहा ॥८॥
manasas pata imaṃ no divi deveṣu yajñam | svāhā divi svāhā pṛthivyāṃ svāhāntarikṣe svāhā vāte dhāṃ svāhā ||8||
Sanskrit only: no published translation is held for this verse.