Library·Abhinavagupta: Tantraloka·10
भूततत्त्वाभिधानानां य्ॐ शो धिष्ठेय उच्यते । पिण्डस्थमिति तं प्राहुरिति श्रीमालिनीमते ॥ २४१
bhūtatattvābhidhānānāṃ yoṃ śo dhiṣṭheya ucyate / piṇḍasthamiti taṃ prāhuriti śrīmālinīmate // 241
Sanskrit only: no published translation is held for this verse.
लौकिकी जाग्रदित्येषा संज्ञा पिण्डस्थमित्यपि । योगिनां योगसिद्ध्यर्थं संज्ञेयं परिभाष्यते ॥ २४२
laukikī jāgradityeṣā saṃjñā piṇḍasthamityapi / yogināṃ yogasiddhyarthaṃ saṃjñeyaṃ paribhāṣyate // 242
Sanskrit only: no published translation is held for this verse.
अधिष्ठेयसमापत्तिमध्यासीनस्य योगिनः । तादात्म्यं किल पिण्डस्थं मितं पिण्डं हि पिण्डितम् ॥ २४३
adhiṣṭheyasamāpattimadhyāsīnasya yoginaḥ / tādātmyaṃ kila piṇḍasthaṃ mitaṃ piṇḍaṃ hi piṇḍitam // 243
Sanskrit only: no published translation is held for this verse.
प्रसंख्यानैकरूढानां ज्ञानिनां तु तदुच्यते । सर्वतोभद्रमापूर्णं सर्वतो वेद्यसत्तया ॥ २४४
prasaṃkhyānaikarūḍhānāṃ jñānināṃ tu taducyate / sarvatobhadramāpūrṇaṃ sarvato vedyasattayā // 244
Sanskrit only: no published translation is held for this verse.
सर्वसत्तासमापूर्ण विश्वं पश्येद्यतो यतः । ज्ञानी ततस्ततः संवित्तत्वमस्य प्रकाशते ॥ २४५
sarvasattāsamāpūrṇa viśvaṃ paśyedyato yataḥ / jñānī tatastataḥ saṃvittatvamasya prakāśate // 245
Sanskrit only: no published translation is held for this verse.
लोकयोगप्रसंख्यानत्रैरूप्यवशतः किल । नामानि त्रीणि भण्यन्ते स्वप्नादिष्वप्ययं विधिः ॥ २४६
lokayogaprasaṃkhyānatrairūpyavaśataḥ kila / nāmāni trīṇi bhaṇyante svapnādiṣvapyayaṃ vidhiḥ // 246
Sanskrit only: no published translation is held for this verse.
यत्त्वधिष्ठानकरणभावमध्यास्य वर्तते । वेद्यं सत्पूर्वकथितं भूततत्त्वाभिधामयम् ॥ २४७
yattvadhiṣṭhānakaraṇabhāvamadhyāsya vartate / vedyaṃ satpūrvakathitaṃ bhūtatattvābhidhāmayam // 247
Sanskrit only: no published translation is held for this verse.
तत्स्वप्नो मुख्यतो ज्ञेयं तच्च वैकल्पिके पथि । वैकल्पिकपथारूढवेद्यसाम्यावभासनात् ॥ २४८
tatsvapno mukhyato jñeyaṃ tacca vaikalpike pathi / vaikalpikapathārūḍhavedyasāmyāvabhāsanāt // 248
Sanskrit only: no published translation is held for this verse.
लोकरूढो प्यसौ स्वप्नः साम्यं चाबाह्यरूपता । उत्प्रेक्षास्वप्नसंकल्पस्मृत्युन्मादादिदृष्टिषु ॥ २४९
lokarūḍho pyasau svapnaḥ sāmyaṃ cābāhyarūpatā / utprekṣāsvapnasaṃkalpasmṛtyunmādādidṛṣṭiṣu // 249
Sanskrit only: no published translation is held for this verse.
विस्पष्टं यद्वेद्यजातं जाग्रन्मुख्यतयैव तत् । यत्तु तत्राप्यविस्पष्टं स्पष्टाधिष्ठातृ भासते ॥ २५०
vispaṣṭaṃ yadvedyajātaṃ jāgranmukhyatayaiva tat / yattu tatrāpyavispaṣṭaṃ spaṣṭādhiṣṭhātṛ bhāsate // 250
Sanskrit only: no published translation is held for this verse.
विकल्पान्तरगं वेद्यं तत्स्वप्नपदमुच्यते । तदैव तस्य वेत्त्येव स्वयमेव ह्यबाह्यताम् ॥ २५१
vikalpāntaragaṃ vedyaṃ tatsvapnapadamucyate / tadaiva tasya vettyeva svayameva hyabāhyatām // 251
Sanskrit only: no published translation is held for this verse.
प्रमात्रन्तरसाधारभावहान्यस्थिरात्मते । तत्रापि चातुर्विध्यं तत् प्राग्दिशैव प्रकल्पयेत् ॥ २५२
pramātrantarasādhārabhāvahānyasthirātmate / tatrāpi cāturvidhyaṃ tat prāgdiśaiva prakalpayet // 252
Sanskrit only: no published translation is held for this verse.
गतागतं सुविक्षिप्तं संगतं सुसमाहितम् । अत्रापि पूर्ववन्नाम लौकिकं स्वप्न इत्यदः ॥ २५३
gatāgataṃ suvikṣiptaṃ saṃgataṃ susamāhitam / atrāpi pūrvavannāma laukikaṃ svapna ityadaḥ // 253
Sanskrit only: no published translation is held for this verse.
बाह्याभिमतभावानां स्वापो ह्यग्रहणं मतम् । सर्वाध्वनः पदं प्राणः संकल्पो वगमात्मकः ॥ २५४
bāhyābhimatabhāvānāṃ svāpo hyagrahaṇaṃ matam / sarvādhvanaḥ padaṃ prāṇaḥ saṃkalpo vagamātmakaḥ // 254
Sanskrit only: no published translation is held for this verse.
पदं च तत्समापत्ति पदस्थं योगिनो विदुः । वेद्यसत्तां बहिर्भूतामनपेक्ष्यैव सर्वतः ॥ २५५
padaṃ ca tatsamāpatti padasthaṃ yogino viduḥ / vedyasattāṃ bahirbhūtāmanapekṣyaiva sarvataḥ // 255
Sanskrit only: no published translation is held for this verse.
वेद्ये स्वातन्त्र्यभाग् ज्ञानं स्वप्नं व्याप्तितया भजेत् । मानभूमिरियं मुख्या स्वप्नो ह्यामर्शनात्मकः ॥ २५६
vedye svātantryabhāg jñānaṃ svapnaṃ vyāptitayā bhajet / mānabhūmiriyaṃ mukhyā svapno hyāmarśanātmakaḥ // 256
Sanskrit only: no published translation is held for this verse.
वेद्यच्छायो वभासो हि मेये धिष्ठानमुच्यते । यत्त्वधिष्ठातृभूतादेः पूर्वोक्तस्य वपुर्ध्रुवम् ॥ २५७
vedyacchāyo vabhāso hi meye dhiṣṭhānamucyate / yattvadhiṣṭhātṛbhūtādeḥ pūrvoktasya vapurdhruvam // 257
Sanskrit only: no published translation is held for this verse.
बीजं विश्वस्य तत्तूष्णींभूतं सौषुप्तमुच्यते । अनुभूतौ विकल्पे च यो सौ द्रष्टा स एव हि ॥ २५८
bījaṃ viśvasya tattūṣṇīṃbhūtaṃ sauṣuptamucyate / anubhūtau vikalpe ca yo sau draṣṭā sa eva hi // 258
Sanskrit only: no published translation is held for this verse.
न भावग्रहणं तेन सुष्ठु सुप्तत्वमुच्यते । तत्साम्याल्लौकिकीं निद्रां सुषुप्तं मन्वते बुधाः ॥ २५९
na bhāvagrahaṇaṃ tena suṣṭhu suptatvamucyate / tatsāmyāllaukikīṃ nidrāṃ suṣuptaṃ manvate budhāḥ // 259
Sanskrit only: no published translation is held for this verse.
बीजभावो थाग्रहणं साम्यं तूष्णींस्वभावता । मुख्या मातृदशा सेयं सुषुप्ताख्या निगद्यते ॥ २६०
bījabhāvo thāgrahaṇaṃ sāmyaṃ tūṣṇīṃsvabhāvatā / mukhyā mātṛdaśā seyaṃ suṣuptākhyā nigadyate // 260
Sanskrit only: no published translation is held for this verse.
रूपकत्वाच्च रूपं तत्तादात्म्यं योगिनः पुनः । रूपस्थं तत्समापत्त्यौदासीन्यं रूपिणां विदुः ॥ २६१
rūpakatvācca rūpaṃ tattādātmyaṃ yoginaḥ punaḥ / rūpasthaṃ tatsamāpattyaudāsīnyaṃ rūpiṇāṃ viduḥ // 261
Sanskrit only: no published translation is held for this verse.
प्रसंख्यानवतः कापि वेद्यसंकोचनात्र यत् । नास्ति तेन महाव्याप्तिरियं तदनुसारतः ॥ २६२
prasaṃkhyānavataḥ kāpi vedyasaṃkocanātra yat / nāsti tena mahāvyāptiriyaṃ tadanusārataḥ // 262
Sanskrit only: no published translation is held for this verse.
उदासीनस्य तस्यापि वेद्यं येन चतुर्विधम् । भूतादि तदुपाध्युत्थमत्र भेदचतुष्टयम् ॥ २६३
udāsīnasya tasyāpi vedyaṃ yena caturvidham / bhūtādi tadupādhyutthamatra bhedacatuṣṭayam // 263
Sanskrit only: no published translation is held for this verse.
उदितं विपुलं शान्तं सुप्रसन्नमथापरम् । यत्तु प्रमात्मकं रूपं प्रमातुरुपरि स्थितम् ॥ २६४
uditaṃ vipulaṃ śāntaṃ suprasannamathāparam / yattu pramātmakaṃ rūpaṃ pramāturupari sthitam // 264
Sanskrit only: no published translation is held for this verse.
पूर्णतागमनौन्मुख्यमौदासीन्यात्परिच्युतिः । तत्तुर्यमुच्यते शक्तिसमावेशो ह्यसौ मतः ॥ २६५
pūrṇatāgamanaunmukhyamaudāsīnyātparicyutiḥ / tatturyamucyate śaktisamāveśo hyasau mataḥ // 265
Sanskrit only: no published translation is held for this verse.
सा संवित्स्वप्रकाशा तु कैश्चिदुक्ता प्रमेयतः । मानान्मातुश्च भिन्नैव तदर्थं त्रितयं यतः ॥ २६६
sā saṃvitsvaprakāśā tu kaiściduktā prameyataḥ / mānānmātuśca bhinnaiva tadarthaṃ tritayaṃ yataḥ // 266
Sanskrit only: no published translation is held for this verse.
मेयं माने मातरि तत् सो पि तस्यां मितौ स्फुटम् । विश्राम्यतीति सैवैषा देवी विश्वैकजीवितम् ॥ २६७
meyaṃ māne mātari tat so pi tasyāṃ mitau sphuṭam / viśrāmyatīti saivaiṣā devī viśvaikajīvitam // 267
Sanskrit only: no published translation is held for this verse.
रूपं दृशाहमित्यंशत्रयमुत्तीर्य वर्तते । द्वारमात्राश्रितोपाया पश्यामीत्यनुपायिका ॥ २६८
rūpaṃ dṛśāhamityaṃśatrayamuttīrya vartate / dvāramātrāśritopāyā paśyāmītyanupāyikā // 268
Sanskrit only: no published translation is held for this verse.
प्रमातृता स्वतन्त्रत्वरूपा सेयं प्रकाशते । संवित्तुरीयरूपैवं प्रकाशात्मा स्वयं च सा ॥ २६९
pramātṛtā svatantratvarūpā seyaṃ prakāśate / saṃvitturīyarūpaivaṃ prakāśātmā svayaṃ ca sā // 269
Sanskrit only: no published translation is held for this verse.
तत्समावेशतादात्म्ये मातृत्वं भवति स्फुटम् । तत्समावेशोपरागान्मानत्वं मेयता पुनः ॥ २७०
tatsamāveśatādātmye mātṛtvaṃ bhavati sphuṭam / tatsamāveśoparāgānmānatvaṃ meyatā punaḥ // 270
Sanskrit only: no published translation is held for this verse.
तत्समावेशनैकट्यात्त्रयं तत्तदनुग्रहात् । वेद्यादिभेदगलनादुक्ता सेयमनामया ॥ २७१
tatsamāveśanaikaṭyāttrayaṃ tattadanugrahāt / vedyādibhedagalanāduktā seyamanāmayā // 271
Sanskrit only: no published translation is held for this verse.
मात्राद्यनुग्रहादा(धा)नात्सव्यापारेति भण्यते । जाग्रदाद्यपि देवस्य शक्तित्वेन व्यवस्थितम् ॥ २७२
mātrādyanugrahādā(dhā)nātsavyāpāreti bhaṇyate / jāgradādyapi devasya śaktitvena vyavasthitam // 272
Sanskrit only: no published translation is held for this verse.
अपरं परापरं च द्विधा तत्सा परा त्वियम् । रूपकत्वादुदासीनाच्च्युतेयं पूर्णतोन्मुखी ॥ २७३
aparaṃ parāparaṃ ca dvidhā tatsā parā tviyam / rūpakatvādudāsīnāccyuteyaṃ pūrṇatonmukhī // 273
Sanskrit only: no published translation is held for this verse.
दशा तस्यां समापत्ती रूपातीतं तु योगिनः । पूर्णतौन्मुख्ययोगित्वाद्विश्वं पश्यति तन्मयः ॥ २७४
daśā tasyāṃ samāpattī rūpātītaṃ tu yoginaḥ / pūrṇataunmukhyayogitvādviśvaṃ paśyati tanmayaḥ // 274
Sanskrit only: no published translation is held for this verse.
प्रसंख्याता प्रचयतस्तेनेयं प्रचयो मता । नैतस्यामपरा तुर्यदशा संभाव्यते किल ॥ २७५
prasaṃkhyātā pracayatasteneyaṃ pracayo matā / naitasyāmaparā turyadaśā saṃbhāvyate kila // 275
Sanskrit only: no published translation is held for this verse.
संविन्न किल वेद्या सा वित्त्वेनैव हि भासते । जाग्रदाद्यास्तु संभाव्यास्तिस्रो स्याः प्राग्दशा यतः ॥ २७६
saṃvinna kila vedyā sā vittvenaiva hi bhāsate / jāgradādyāstu saṃbhāvyāstisro syāḥ prāgdaśā yataḥ // 276
Sanskrit only: no published translation is held for this verse.
त्रितयानुग्रहात्सेयं तेनोक्ता त्रिकशासने । मनोन्मनमनन्तं च सर्वार्थमिति भेदतः ॥ २७७
tritayānugrahātseyaṃ tenoktā trikaśāsane / manonmanamanantaṃ ca sarvārthamiti bhedataḥ // 277
Sanskrit only: no published translation is held for this verse.
यत्तु पूर्णानवच्छिन्नवपुरानन्दनिर्भरम् । तुर्यातीतं तु तत्प्राहुस्तदेव परमं पदम् ॥ २७८
yattu pūrṇānavacchinnavapurānandanirbharam / turyātītaṃ tu tatprāhustadeva paramaṃ padam // 278
Sanskrit only: no published translation is held for this verse.
नात्र योगस्य सद्भावो भावनादेरभावतः । अप्रमेये परिच्छिन्ने स्वतन्त्रे भाव्यता कुतः ॥ २७९
nātra yogasya sadbhāvo bhāvanāderabhāvataḥ / aprameye paricchinne svatantre bhāvyatā kutaḥ // 279
Sanskrit only: no published translation is held for this verse.
योगाद्यभावतस्तेन नामास्मिन्नादिशद्विभुः । प्रसंख्यानबलात्त्वेतद्रूपं पूर्णत्वयोगतः ॥ २८०
yogādyabhāvatastena nāmāsminnādiśadvibhuḥ / prasaṃkhyānabalāttvetadrūpaṃ pūrṇatvayogataḥ // 280
Sanskrit only: no published translation is held for this verse.
अनुत्तरादिह प्रोक्तं महाप्रचयसंज्ञितम् । पूर्णत्वादेव भेदानामस्यां संभावना न हि ॥ २८१
anuttarādiha proktaṃ mahāpracayasaṃjñitam / pūrṇatvādeva bhedānāmasyāṃ saṃbhāvanā na hi // 281
Sanskrit only: no published translation is held for this verse.
तन्निरासाय नैतस्यां भेद उक्तो विशेषणम् । सततोदितमित्येतत्सर्वव्यापित्वसूचकम् ॥ २८२
tannirāsāya naitasyāṃ bheda ukto viśeṣaṇam / satatoditamityetatsarvavyāpitvasūcakam // 282
Sanskrit only: no published translation is held for this verse.
न ह्येक एव भवति भेदः क्वचन कश्चन । तुर्यातीते भेद एकः सततोदित इत्ययम् ॥ २८३
na hyeka eva bhavati bhedaḥ kvacana kaścana / turyātīte bheda ekaḥ satatodita ityayam // 283
Sanskrit only: no published translation is held for this verse.
मूढवादस्तेन सिद्धमविभेदित्वमस्य तु । श्रीपूर्वशास्त्रे तेनोक्तं पदस्थमपरं विदुः ॥ २८४
mūḍhavādastena siddhamavibheditvamasya tu / śrīpūrvaśāstre tenoktaṃ padasthamaparaṃ viduḥ // 284
Sanskrit only: no published translation is held for this verse.
मन्त्रास्तत्पतयः सेशा रूपस्थमिति कीर्त्यते । रूपातीतं परा शक्तिः सव्यापाराप्यनामया ॥ २८५
mantrāstatpatayaḥ seśā rūpasthamiti kīrtyate / rūpātītaṃ parā śaktiḥ savyāpārāpyanāmayā // 285
Sanskrit only: no published translation is held for this verse.
निष्प्रपञ्चो निराभासः शुद्धः स्वात्मन्यवस्थितः । सर्वातीतः शिवो ज्ञेयो यं विदित्वा विमुच्यते ॥ २८६
niṣprapañco nirābhāsaḥ śuddhaḥ svātmanyavasthitaḥ / sarvātītaḥ śivo jñeyo yaṃ viditvā vimucyate // 286
Sanskrit only: no published translation is held for this verse.
इति श्रीसुमतिप्रज्ञाचन्द्रिकाशान्ततामसः । श्रीशंभुनाथः सद्भावं जाग्रदादौ न्यरूपयत् ॥ २८७
iti śrīsumatiprajñācandrikāśāntatāmasaḥ / śrīśaṃbhunāthaḥ sadbhāvaṃ jāgradādau nyarūpayat // 287
Sanskrit only: no published translation is held for this verse.
अन्ये तु कथयन्त्येषां भङ्गीमन्यादृशीं श्रिताः । यद्रूपं जाग्रदादीनां तदिदानीं निरूप्यते ॥ २८८
anye tu kathayantyeṣāṃ bhaṅgīmanyādṛśīṃ śritāḥ / yadrūpaṃ jāgradādīnāṃ tadidānīṃ nirūpyate // 288
Sanskrit only: no published translation is held for this verse.
तत्राक्षवृत्तिमाश्रित्य बाह्याकारग्रहो हि यः । तज्जाग्रत्स्फुटमासीनमनुबन्धि पुनः पुनः ॥ २८९
tatrākṣavṛttimāśritya bāhyākāragraho hi yaḥ / tajjāgratsphuṭamāsīnamanubandhi punaḥ punaḥ // 289
Sanskrit only: no published translation is held for this verse.
आत्मसंकल्पनिर्माणं स्वप्नो जाग्रद्विपर्ययः । लयाकलस्य भोगो सौ मलकर्मवशान्नतु ॥ २९०
ātmasaṃkalpanirmāṇaṃ svapno jāgradviparyayaḥ / layākalasya bhogo sau malakarmavaśānnatu // 290
Sanskrit only: no published translation is held for this verse.
स्थिरीभवेन्निशाभावात्सुप्तं सौख्याद्यवेदने । ज्ञानाकलस्य मलतः केवलाद्भोगमात्रतः ॥ २९१
sthirībhavenniśābhāvātsuptaṃ saukhyādyavedane / jñānākalasya malataḥ kevalādbhogamātrataḥ // 291
Sanskrit only: no published translation is held for this verse.
भेदवन्तः स्वतो भिन्नाश्चिकीर्ष्यन्ते जडाजडाः । तुर्ये तत्र स्थिता मन्त्रतन्नाथाधीश्वरास्त्रयः ॥ २९२
bhedavantaḥ svato bhinnāścikīrṣyante jaḍājaḍāḥ / turye tatra sthitā mantratannāthādhīśvarāstrayaḥ // 292
Sanskrit only: no published translation is held for this verse.
यावद्भैरवबोधान्तःप्रवेशनसहिष्णवः । भावा विगलदात्मीयसाराः स्वयमभेदिनः ॥ २९३
yāvadbhairavabodhāntaḥpraveśanasahiṣṇavaḥ / bhāvā vigaladātmīyasārāḥ svayamabhedinaḥ // 293
Sanskrit only: no published translation is held for this verse.
तुर्यातीतपदे संस्युरिति पञ्चदशात्मके । यस्य यद्यत्स्फुटं रूपं तज्जाग्रदिति मन्यताम् ॥ २९४
turyātītapade saṃsyuriti pañcadaśātmake / yasya yadyatsphuṭaṃ rūpaṃ tajjāgraditi manyatām // 294
Sanskrit only: no published translation is held for this verse.
यदेवास्थिरमाभाति सपूर्वं स्वप्न ईदृशः । अस्फुटं तु यदाभाति सुप्तं तत्तत्पुरो पि यत् ॥ २९५
yadevāsthiramābhāti sapūrvaṃ svapna īdṛśaḥ / asphuṭaṃ tu yadābhāti suptaṃ tattatpuro pi yat // 295
Sanskrit only: no published translation is held for this verse.
त्रयस्यास्यानुसंधिस्तु यद्वशादुपजायते । स्रक्सूत्रकल्पं तत्तुर्यं सर्वभेदेषु गृह्यताम् ॥ २९६
trayasyāsyānusaṃdhistu yadvaśādupajāyate / sraksūtrakalpaṃ tatturyaṃ sarvabhedeṣu gṛhyatām // 296
Sanskrit only: no published translation is held for this verse.
यत्त्वद्वैतभरोल्लासद्राविताशेषभेदकम् । तुर्यातीतं तु तत्प्राहुरित्थं सर्वत्र योजयेत् ॥ २९७
yattvadvaitabharollāsadrāvitāśeṣabhedakam / turyātītaṃ tu tatprāhuritthaṃ sarvatra yojayet // 297
Sanskrit only: no published translation is held for this verse.
लयाकले तु स्वं रूपं जाग्रत्तत्पूर्ववृत्ति तु । स्वप्नादीति क्रमं सर्वं सर्वत्रानुसरेद्बुधः ॥ २९८
layākale tu svaṃ rūpaṃ jāgrattatpūrvavṛtti tu / svapnādīti kramaṃ sarvaṃ sarvatrānusaredbudhaḥ // 298
Sanskrit only: no published translation is held for this verse.
एकत्रापि प्रभौ पूर्णे चित्तुर्यातीतमुच्यते । आनन्दस्तुर्यमिच्छैव बीजभूमिः सुषुप्तता ॥ २९९
ekatrāpi prabhau pūrṇe citturyātītamucyate / ānandasturyamicchaiva bījabhūmiḥ suṣuptatā // 299
Sanskrit only: no published translation is held for this verse.
ज्ञानशक्तिः स्वप्न उक्तः क्रियाशक्तिस्तु जागृतिः । न चैवमुपचारः स्यात्सर्वं तत्रैव वस्तुतः ॥ ३००
jñānaśaktiḥ svapna uktaḥ kriyāśaktistu jāgṛtiḥ / na caivamupacāraḥ syātsarvaṃ tatraiva vastutaḥ // 300
Sanskrit only: no published translation is held for this verse.
न चेन्न क्वापि मुख्यत्वं नोपचारो पि तत्क्वचित् । एतच्छ्रीपूर्वशास्त्रे च स्फुटमुक्तं महेशिना ॥ ३०१
na cenna kvāpi mukhyatvaṃ nopacāro pi tatkvacit / etacchrīpūrvaśāstre ca sphuṭamuktaṃ maheśinā // 301
Sanskrit only: no published translation is held for this verse.
तत्र स्वरूपं शक्तिश्च सकलश्चेति तत्त्रयम् । इति जाग्रदवस्थेयं भेदे पञ्चदशात्मके ॥ ३०२
tatra svarūpaṃ śaktiśca sakalaśceti tattrayam / iti jāgradavastheyaṃ bhede pañcadaśātmake // 302
Sanskrit only: no published translation is held for this verse.
अकलौ स्वप्नसौषुप्ते तुर्यं मन्त्रादिवर्गभाक् । तुर्यातीतं शक्तिशंभू त्रयोदशाभिधे पुनः ॥ ३०३
akalau svapnasauṣupte turyaṃ mantrādivargabhāk / turyātītaṃ śaktiśaṃbhū trayodaśābhidhe punaḥ // 303
Sanskrit only: no published translation is held for this verse.
स्वरूपं जाग्रदन्यत्तु प्राग्वत्प्रलयकेवले । स्वं जाग्रत्स्वप्नसुप्ते द्वे तुर्याद्यत्र च पूर्ववत् ॥ ३०४
svarūpaṃ jāgradanyattu prāgvatpralayakevale / svaṃ jāgratsvapnasupte dve turyādyatra ca pūrvavat // 304
Sanskrit only: no published translation is held for this verse.
विज्ञानाकलभेदे पि स्वं मन्त्रा मन्त्रनायकाः । तदीशाः शक्तिशंभ्वित्थं पञ्च स्युर्जाग्रदादयः ॥ ३०५
vijñānākalabhede pi svaṃ mantrā mantranāyakāḥ / tadīśāḥ śaktiśaṃbhvitthaṃ pañca syurjāgradādayaḥ // 305
Sanskrit only: no published translation is held for this verse.
सप्तभेदे तु मन्त्राख्ये स्वं मन्त्रेशा महेश्वराः । शक्तिः शंभुश्च पञ्चोक्ता अवस्था जाग्रदादयः ॥ ३०६
saptabhede tu mantrākhye svaṃ mantreśā maheśvarāḥ / śaktiḥ śaṃbhuśca pañcoktā avasthā jāgradādayaḥ // 306
Sanskrit only: no published translation is held for this verse.
स्वरूपं मन्त्रमाहेशी शक्तिर्मन्त्रमहेश्वरः । शक्तिः शंभुरिमाः पञ्च मन्त्रेशे पञ्चभेदके ॥ ३०७
svarūpaṃ mantramāheśī śaktirmantramaheśvaraḥ / śaktiḥ śaṃbhurimāḥ pañca mantreśe pañcabhedake // 307
Sanskrit only: no published translation is held for this verse.
स्वं क्रिया ज्ञानमिच्छा च शंभुरत्र च पञ्चमी । महेशभेदे त्रिविधे जाग्रदादि निरूपितम् ॥ ३०८
svaṃ kriyā jñānamicchā ca śaṃbhuratra ca pañcamī / maheśabhede trividhe jāgradādi nirūpitam // 308
Sanskrit only: no published translation is held for this verse.
व्यापारादाधिपत्याच्च तद्धान्या प्रेरकत्वतः । इच्छानिवृत्तेः स्वस्थत्वाच्छिव एको पि पञ्चधा ॥ ३०९
vyāpārādādhipatyācca taddhānyā prerakatvataḥ / icchānivṛtteḥ svasthatvācchiva eko pi pañcadhā // 309
Sanskrit only: no published translation is held for this verse.
इत्येष दर्शितो स्माभिस्तत्त्वाध्वा विस्तरादथ ।
ityeṣa darśito smābhistattvādhvā vistarādatha /
Sanskrit only: no published translation is held for this verse.