तदाहुः सूर्यो नातिशस्यो बृहती नातिशस्या यत्सूर्यमतिशंसेद्ब्रह्मवर्चसमतिपद्येत यद्बृहतीमतिशंसेत्प्राणानतिपद्येतेतीन्द्र क्रतुं न आ भरेत्यैन्द्रं प्रगाथं शंसति शिक्षा णो अस्मिन्पुरुहूत यामनि जीवा ज्योतिरशीमहीत्यसौ वाव ज्योतिस्तेन सूर्यं नातिशंसति यदु बार्हतः प्रगाथस्तेन बृहतीं नातिशंसत्यभि त्वा शूर नोनुम इति राथंतरीं योनिं शंसति राथंतरेण वै संधिनाश्विनाय स्तुवते तद्यद्राथंतरीं योनिं शंसति रथंतरस्यैव सयोनित्वायेशानमस्य जगतः स्वर्दृशमित्यसौ वाव स्वर्दृक्तेन सूर्यं नातिशंसति यदु बार्हतः प्रगाथस्तेन बृहतीं नातिशंसति बहवः सूरचक्षस इति मैत्रावरुणम्प्रगाथं शंसत्यहर्वै मित्रो रात्रिर्वरुण उभे वा एषोऽहोरात्रे आरभते योऽतिरात्रमुपैति तद्यन्मैत्रावरुणम्प्रगाथं शंसत्यहोरात्रयोरेवैनं तत्प्रतिष्ठापयति सूरचक्षस इति तेन सूर्यं नातिशंसति यदु बार्हतः प्रगाथस्तेन बृहतीं नातिशंसति मही द्यौः पृथिवी च नस्ते हि द्यावापृथिवि विश्वशम्भुवेति द्यावापृथिवीये शंसति द्यावापृथिवी वै प्रतिष्ठे इयमेवेह प्रतिष्ठासावमुत्र तद्यद्द्यावापृथिवीये शंसति प्रतिष्ठयोरेवैनं तत्प्रतिष्ठापयति देवो देवी धर्मणा सूर्यः शुचिरिति तेन सूर्यं नातिशंसति यदु गायत्री च जगती च ते द्वे बृहत्यौ तेन बृहतीं नातिशंसति विश्वस्य देवी मृचयस्य जन्मनो न या रोषाति न ग्रभदिति द्विपदाम्शंसति चितैधमुक्थमिति ह स्म वा एतदाचक्षते यदेतदाश्विनं निर्ऋतिर्ह स्म पाशिन्युपास्ते यदैव होता परिधा-स्यत्यथ पाशान्प्रतिमोक्ष्यामीति ततो वा एताम्बृहस्पतिर्द्विपदामपश्यन्ना य रोषाति न ग्रभदिति तया निर्ऋत्याः पाशिन्या अधराचः पाशानपास्यत्तद्यदेतं द्विपदां होता शंसति निर्ऋत्या एव तत्पाशिन्या अधराचः पासानपास्यति स्वस्त्येव होतोन्मुच्यते सर्वायुः सर्वायुत्वाय सर्वमायुरेति य एवं वेद मृचयस्य जन्मन इत्यसौ वाव मर्चयतीव तेन सूर्यं नातिशंसति यदु द्विपदा पुरुषछन्दसं सा सर्वाणि च्छन्दांस्यभ्याप्ता तेन बृहतीं नाति शंसति
tadāhuḥ sūryo nātiśasyo bṛhatī nātiśasyā yatsūryamatiśaṃsedbrahmavarcasamatipadyeta yadbṛhatīmatiśaṃsetprāṇānatipadyetetīndra kratuṃ na ā bharetyaindraṃ pragāthaṃ śaṃsati śikṣā ṇo asminpuruhūta yāmani jīvā jyotiraśīmahītyasau vāva jyotistena sūryaṃ nātiśaṃsati yadu bārhataḥ pragāthastena bṛhatīṃ nātiśaṃsatyabhi tvā śūra nonuma iti rāthaṃtarīṃ yoniṃ śaṃsati rāthaṃtareṇa vai saṃdhināśvināya stuvate tadyadrāthaṃtarīṃ yoniṃ śaṃsati rathaṃtarasyaiva sayonitvāyeśānamasya jagataḥ svardṛśamityasau vāva svardṛktena sūryaṃ nātiśaṃsati yadu bārhataḥ pragāthastena bṛhatīṃ nātiśaṃsati bahavaḥ sūracakṣasa iti maitrāvaruṇampragāthaṃ śaṃsatyaharvai mitro rātrirvaruṇa ubhe vā eṣo'horātre ārabhate yo'tirātramupaiti tadyanmaitrāvaruṇampragāthaṃ śaṃsatyahorātrayorevainaṃ tatpratiṣṭhāpayati sūracakṣasa iti tena sūryaṃ nātiśaṃsati yadu bārhataḥ pragāthastena bṛhatīṃ nātiśaṃsati mahī dyauḥ pṛthivī ca naste hi dyāvāpṛthivi viśvaśambhuveti dyāvāpṛthivīye śaṃsati dyāvāpṛthivī vai pratiṣṭhe iyameveha pratiṣṭhāsāvamutra tadyaddyāvāpṛthivīye śaṃsati pratiṣṭhayorevainaṃ tatpratiṣṭhāpayati devo devī dharmaṇā sūryaḥ śuciriti tena sūryaṃ nātiśaṃsati yadu gāyatrī ca jagatī ca te dve bṛhatyau tena bṛhatīṃ nātiśaṃsati viśvasya devī mṛcayasya janmano na yā roṣāti na grabhaditi dvipadāmśaṃsati citaidhamukthamiti ha sma vā etadācakṣate yadetadāśvinaṃ nirṛtirha sma pāśinyupāste yadaiva hotā paridhā-syatyatha pāśānpratimokṣyāmīti tato vā etāmbṛhaspatirdvipadāmapaśyannā ya roṣāti na grabhaditi tayā nirṛtyāḥ pāśinyā adharācaḥ pāśānapāsyattadyadetaṃ dvipadāṃ hotā śaṃsati nirṛtyā eva tatpāśinyā adharācaḥ pāsānapāsyati svastyeva hotonmucyate sarvāyuḥ sarvāyutvāya sarvamāyureti ya evaṃ veda mṛcayasya janmana ityasau vāva marcayatīva tena sūryaṃ nātiśaṃsati yadu dvipadā puruṣachandasaṃ sā sarvāṇi cchandāṃsyabhyāptā tena bṛhatīṃ nāti śaṃsati
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.