स्वरसाम्न उपयन्तीमे वै लोकाः स्वरसामान इमान्वै लोकान्स्वरसामभिरस्पृण्वंस्तत्स्वरसाम्नां स्वरसामत्वं तद्यत्स्वरसाम्न उपयन्त्येष्वेवैनं तल्लोकेष्वाभजन्ति तेषां वै देवाः सप्तदशानां प्रव्लयादबिभयुः समा इव वै स्तोमा अविगूळ्हा इवेमे ह न प्रव्लियेरन्निति तान्सर्वैः स्तोमैरवस्तात्पर्यार्षन्सर्वैः पृष्ठैः परस्तात्तद्यदभिजित्सर्वस्तोमोऽवस्ताद्भवति विश्वजित्सर्वपृष्ठः परस्तात्तत्सप्तदशानुभयतः पर्यृषन्ति धृत्या अप्रव्लयाय तस्य वै देवा आदित्यस्य स्वर्गाल्लोकादवपातादबिभयुस्तं पञ्चभी रश्मिभिरुदवयन्रश्मयो वै [https://sa.wikisource.org/s/1yba दिवाकीर्त्यानि] महादिवाकीर्त्यं पृष्ठं भवति विकर्णं ब्रह्मसाम भासमग्निष्टोमसामोभे बृहद्रथंतरे पवमानयोर्भवतस्तदादित्यं पञ्चभी रश्मिभिरुद्वयन्ति धृत्या अनवपातायोदित आदित्ये प्रातरनुवाकमनुब्रूयात्सर्वं ह्येवैतदहर्दिवाकीर्त्यं भवति सौर्यं पशुमन्यङश्वेतं सवनीयस्योपालम्भ्यमालभेरन्सूर्यदेवत्यं ह्येतदहरेकविंशतिं सामिधेनीरनुब्रूयात्प्रत्यक्षाद्ध्येतदहरेकविंशमेकपञ्चाशतं द्विपञ्चाशतं वा शस्त्वा मध्ये निविदं दधाति तावतीरुत्तराः शंसति शतायुर्वै पुरुषः शतवीर्यः शतेन्द्रिय आयुष्येवैनं तद्वीर्य इन्द्रिये दधाति
svarasāmna upayantīme vai lokāḥ svarasāmāna imānvai lokānsvarasāmabhiraspṛṇvaṃstatsvarasāmnāṃ svarasāmatvaṃ tadyatsvarasāmna upayantyeṣvevainaṃ tallokeṣvābhajanti teṣāṃ vai devāḥ saptadaśānāṃ pravlayādabibhayuḥ samā iva vai stomā avigūl̤hā iveme ha na pravliyeranniti tānsarvaiḥ stomairavastātparyārṣansarvaiḥ pṛṣṭhaiḥ parastāttadyadabhijitsarvastomo'vastādbhavati viśvajitsarvapṛṣṭhaḥ parastāttatsaptadaśānubhayataḥ paryṛṣanti dhṛtyā apravlayāya tasya vai devā ādityasya svargāllokādavapātādabibhayustaṃ pañcabhī raśmibhirudavayanraśmayo vai [https://sa.wikisource.org/s/1yba divākīrtyāni] mahādivākīrtyaṃ pṛṣṭhaṃ bhavati vikarṇaṃ brahmasāma bhāsamagniṣṭomasāmobhe bṛhadrathaṃtare pavamānayorbhavatastadādityaṃ pañcabhī raśmibhirudvayanti dhṛtyā anavapātāyodita āditye prātaranuvākamanubrūyātsarvaṃ hyevaitadahardivākīrtyaṃ bhavati sauryaṃ paśumanyaṅaśvetaṃ savanīyasyopālambhyamālabheransūryadevatyaṃ hyetadaharekaviṃśatiṃ sāmidhenīranubrūyātpratyakṣāddhyetadaharekaviṃśamekapañcāśataṃ dvipañcāśataṃ vā śastvā madhye nividaṃ dadhāti tāvatīruttarāḥ śaṃsati śatāyurvai puruṣaḥ śatavīryaḥ śatendriya āyuṣyevainaṃ tadvīrya indriye dadhāti
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.