उत्पच्यमानायां तु पाल्यां सर्जरसापामार्गपटोलनिम्बनिचुलत्वग्भिरालेपः। उत्पुटन्त्यां शिग्रुशम्याकपूतीकगोवराहपित्तगोधावसासपिर्भिः। श्यावायां गौरीसुगन्धाश्यामानन्तातण्डुलीयकमूलैः। कण्डूमत्यां पाठानन्तातार्क्ष्यशैलेयमाक्षिकैः। दह्यमानायां क्षीरिवृक्षजीवनीयकल्कमधुघृतैः। व्रणितायां क्षौद्रजीवनीयैः। कृशायां गोधावराहवसाभिः। ग्रथितायां ग्रन्थिं पाटयित्वा विलिख्य च कृष्णासैन्धवमधुभिः प्रतिसारयेत्। स्नाववत्यां मधुमधुकमधूकमधुपर्णीभिर्लेपः। एभिरेव च यथास्वं स्नेहानभ्यङ्गार्थं प्रकल्पयेत्॥
utpacyamānāyāṃ tu pālyāṃ sarjarasāpāmārgapaṭolanimbaniculatvagbhirālepaḥ| utpuṭantyāṃ śigruśamyākapūtīkagovarāhapittagodhāvasāsapirbhiḥ| śyāvāyāṃ gaurīsugandhāśyāmānantātaṇḍulīyakamūlaiḥ| kaṇḍūmatyāṃ pāṭhānantātārkṣyaśaileyamākṣikaiḥ| dahyamānāyāṃ kṣīrivṛkṣajīvanīyakalkamadhughṛtaiḥ| vraṇitāyāṃ kṣaudrajīvanīyaiḥ| kṛśāyāṃ godhāvarāhavasābhiḥ| grathitāyāṃ granthiṃ pāṭayitvā vilikhya ca kṛṣṇāsaindhavamadhubhiḥ pratisārayet| snāvavatyāṃ madhumadhukamadhūkamadhuparṇībhirlepaḥ| ebhireva ca yathāsvaṃ snehānabhyaṅgārthaṃ prakalpayet||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.