तत्र तैक्ष्ण्यौष्ण्यात् पित्तं रक्तं च प्रकोपयति। रौक्ष्याद्वायुम्। वैशद्यादसक्तवेगं प्रसरति। सौक्ष्म्याद्व्यवायित्वाच्च दोषधातुमलादीन् समस्तान् शरीरावयवाननुप्रविशति। आशुकारित्वादाशु व्यापादयति। विकाशित्वान्मर्मच्छेदेन मतिं व्यामोहयति। लाघवाद्दुर्निर्हरमव्यक्तरसत्वाच्छ्लेष्मप्रकोपणमन्नरसांश्च सर्वाननुवर्तते। अत एव च प्रयत्नेनान्नानि विषतो रक्षेदित्युक्तम्। अपाकित्वाज्जरां नो याति। तेनाभ्यवहृतमवश्यं मारयति। मन्त्रौषधबलेन चोपशमितमपि प्रत्ययमासाद्य पुनः प्रकृप्यतीति। भवति चात्र॥
tatra taikṣṇyauṣṇyāt pittaṃ raktaṃ ca prakopayati| raukṣyādvāyum| vaiśadyādasaktavegaṃ prasarati| saukṣmyādvyavāyitvācca doṣadhātumalādīn samastān śarīrāvayavānanupraviśati| āśukāritvādāśu vyāpādayati| vikāśitvānmarmacchedena matiṃ vyāmohayati| lāghavāddurnirharamavyaktarasatvācchleṣmaprakopaṇamannarasāṃśca sarvānanuvartate| ata eva ca prayatnenānnāni viṣato rakṣedityuktam| apākitvājjarāṃ no yāti| tenābhyavahṛtamavaśyaṃ mārayati| mantrauṣadhabalena copaśamitamapi pratyayamāsādya punaḥ prakṛpyatīti| bhavati cātra||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.