Bharavi: Kiratarjuniya 3

ततः शरच्चन्द्रकराभिरामैर् उत्सर्पिभिः प्रांशुम् इवांशुजालैः । बिभ्राणम् आनीलरुचं पिशङ्गीर् जटास् तडित्वन्तम् इवाम्बुवाहम्

tataḥ śaraccandrakarābhirāmair utsarpibhiḥ prāṃśum ivāṃśujālaiḥ / bibhrāṇam ānīlarucaṃ piśaṅgīr jaṭās taḍitvantam ivāmbuvāham

Sanskrit only: no published translation is held for this verse.

प्रसादलक्ष्मीं दधतं समग्रां वपुःप्रकर्षेण जनातिगेन । प्रसह्य चेतःसु समासजन्तम् असंस्तुतानाम् अपि भावम् आर्द्रम्

prasādalakṣmīṃ dadhataṃ samagrāṃ vapuḥprakarṣeṇa janātigena / prasahya cetaḥsu samāsajantam asaṃstutānām api bhāvam ārdram

Sanskrit only: no published translation is held for this verse.

अनुद्धताकारतया विविक्तां तन्वन्तम् अन्तःकरणस्य वृत्तिम् । माधुर्यविस्रम्भविशेषभाजा कृतोपसम्भाषम् इवेक्षितेन

anuddhatākāratayā viviktāṃ tanvantam antaḥkaraṇasya vṛttim / mādhuryavisrambhaviśeṣabhājā kṛtopasambhāṣam ivekṣitena

Sanskrit only: no published translation is held for this verse.

धर्मात्मजो धर्मनिबन्धिनीनां प्रसूतिम् एनःप्रणुदां श्रुतीनाम् । हेतुं तदभ्यागमने परीप्सुः सुखोपविष्टं मुनिम् आबभाषे

dharmātmajo dharmanibandhinīnāṃ prasūtim enaḥpraṇudāṃ śrutīnām / hetuṃ tadabhyāgamane parīpsuḥ sukhopaviṣṭaṃ munim ābabhāṣe

Sanskrit only: no published translation is held for this verse.

अनाप्तपुण्योपचरैर् दुरापा फलस्य निर्धूतरजाः सवित्री । तुल्या भवद्दर्शनसम्पद् एषा वृष्टेर् दिवो वीतबलाहकायाः

anāptapuṇyopacarair durāpā phalasya nirdhūtarajāḥ savitrī / tulyā bhavaddarśanasampad eṣā vṛṣṭer divo vītabalāhakāyāḥ

Sanskrit only: no published translation is held for this verse.

अद्य क्रियाः कामदुघाः क्रतूनां सत्याशिषः सम्प्रति भूमिदेवाः । आ संसृतेर् अस्मि जगत्सु जातस् त्वय्य् आगते यद् बहुमानपात्रम्

adya kriyāḥ kāmadughāḥ kratūnāṃ satyāśiṣaḥ samprati bhūmidevāḥ / ā saṃsṛter asmi jagatsu jātas tvayy āgate yad bahumānapātram

Sanskrit only: no published translation is held for this verse.

श्रियं विकर्षत्य् अपहन्त्य् अघानि श्रेयः परिस्नौति तनोति कीर्तिम् । संदर्शनं लोकगुरोर् अमोघम् अमोघं तवात्मयोनेर् इव किं न धत्ते

śriyaṃ vikarṣaty apahanty aghāni śreyaḥ parisnauti tanoti kīrtim / saṃdarśanaṃ lokaguror amogham amoghaṃ tavātmayoner iva kiṃ na dhatte

Sanskrit only: no published translation is held for this verse.

श्च्योतन्मयूखे ऽपि हिमद्युतौ मे ननिर्वृतं निर्वृतिम् एति चक्षुः । समुज्झितज्ञातिवियोगखेदं त्वत्संनिधाव् उच्छ्वसतीव चेतः

ścyotanmayūkhe 'pi himadyutau me nanirvṛtaṃ nirvṛtim eti cakṣuḥ / samujjhitajñātiviyogakhedaṃ tvatsaṃnidhāv ucchvasatīva cetaḥ

Sanskrit only: no published translation is held for this verse.

निरास्पदं प्रश्नकुतूहलित्वम् अस्मास्व् अधीनं किम् उ निःस्पृहाणाम् । तथापि कल्याणकरीं गिरं ते मां श्रोतुम् इच्छा मुखरीकरोति

nirāspadaṃ praśnakutūhalitvam asmāsv adhīnaṃ kim u niḥspṛhāṇām / tathāpi kalyāṇakarīṃ giraṃ te māṃ śrotum icchā mukharīkaroti

Sanskrit only: no published translation is held for this verse.

इत्य् उक्तवान् उक्तिविशेषरम्यं मनः समाधाय जयोपपत्तौ । उदारचेता गिरम् इत्य् उदारां द्वैपायनेनाभिदधे नरेन्द्रः

ity uktavān uktiviśeṣaramyaṃ manaḥ samādhāya jayopapattau / udāracetā giram ity udārāṃ dvaipāyanenābhidadhe narendraḥ

Sanskrit only: no published translation is held for this verse.

चिचीषतां जन्मवताम् अलघ्वीं यशोवतंसाम् उभयत्र भूतिम् । अभ्यर्हिता बन्धुषु तुल्यरूपा वृत्तिर् विशेषेण तपोधनानाम्

cicīṣatāṃ janmavatām alaghvīṃ yaśovataṃsām ubhayatra bhūtim / abhyarhitā bandhuṣu tulyarūpā vṛttir viśeṣeṇa tapodhanānām

Sanskrit only: no published translation is held for this verse.

तथापि निघ्नं नृप तावकीनैः प्रह्वीकृतं मे हृदयं गुणौघैः । वीतस्पृहाणाम् अपि मुक्तिभाजां भवन्ति भव्येषु हि पक्षपाताः

tathāpi nighnaṃ nṛpa tāvakīnaiḥ prahvīkṛtaṃ me hṛdayaṃ guṇaughaiḥ / vītaspṛhāṇām api muktibhājāṃ bhavanti bhavyeṣu hi pakṣapātāḥ

Sanskrit only: no published translation is held for this verse.

सुता न यूयं किम् उ तस्य राज्ञः सुयोधनं वा न गुणैर् अतीताः । यस् त्यक्तवान् वः स वृथा बलाद् वा मोहं विधत्ते विषयाभिलाषः

sutā na yūyaṃ kim u tasya rājñaḥ suyodhanaṃ vā na guṇair atītāḥ / yas tyaktavān vaḥ sa vṛthā balād vā mohaṃ vidhatte viṣayābhilāṣaḥ

Sanskrit only: no published translation is held for this verse.

जहातु नैनं कथम् अर्थसिद्धिः संशय्य कर्णादिषु तिष्ठते यः । असाद्युयोगा हि जयान्तरायाः प्रमाथिनीनां विपदां पदानि

jahātu nainaṃ katham arthasiddhiḥ saṃśayya karṇādiṣu tiṣṭhate yaḥ / asādyuyogā hi jayāntarāyāḥ pramāthinīnāṃ vipadāṃ padāni

Sanskrit only: no published translation is held for this verse.

पथश् च्युतायां समितौ रिपूणां धर्म्यां दधानेन धुरं चिराय । त्वया विपत्स्व् अप्य् अविपत्ति रम्यम् आविष्कृतं प्रेम परं गुणेषु

pathaś cyutāyāṃ samitau ripūṇāṃ dharmyāṃ dadhānena dhuraṃ cirāya / tvayā vipatsv apy avipatti ramyam āviṣkṛtaṃ prema paraṃ guṇeṣu

Sanskrit only: no published translation is held for this verse.

विधाय विध्वंसनम् आत्मनीनं शमैकवृत्तेर् भवतश् छलेन । प्रकाशितत्वन्मतिशीलसाराः कृतोपकारा इव विद्विषस् ते

vidhāya vidhvaṃsanam ātmanīnaṃ śamaikavṛtter bhavataś chalena / prakāśitatvanmatiśīlasārāḥ kṛtopakārā iva vidviṣas te

Sanskrit only: no published translation is held for this verse.

लभ्या धरित्री तव विक्रमेण ज्यायांश् च वीर्यास्त्रबलैर् विपक्षः । अतः प्रकर्षाय विधिर् विधेयः प्रकर्षतन्त्रा हि रणे जयश्रीः

labhyā dharitrī tava vikrameṇa jyāyāṃś ca vīryāstrabalair vipakṣaḥ / ataḥ prakarṣāya vidhir vidheyaḥ prakarṣatantrā hi raṇe jayaśrīḥ

Sanskrit only: no published translation is held for this verse.

त्रिःसप्तकृत्वो जगतीपतीनां हन्ता गुरुर् यस्य स जामदग्न्यः । वीर्यावधूतः स्म तदा विवेद प्रकर्षम् आधारवशं गुणानाम्

triḥsaptakṛtvo jagatīpatīnāṃ hantā gurur yasya sa jāmadagnyaḥ / vīryāvadhūtaḥ sma tadā viveda prakarṣam ādhāravaśaṃ guṇānām

Sanskrit only: no published translation is held for this verse.

यस्मिन्न् अनैश्वर्यकृतव्यलीकः पराभवं प्राप्त इवान्तको ऽपि । धुन्वन् धनुः कस्य रणे न कुर्यान् मनो भयैकप्रवणं स भीष्मः

yasminn anaiśvaryakṛtavyalīkaḥ parābhavaṃ prāpta ivāntako 'pi / dhunvan dhanuḥ kasya raṇe na kuryān mano bhayaikapravaṇaṃ sa bhīṣmaḥ

Sanskrit only: no published translation is held for this verse.

सृजन्तम् आजाविषुसंहतीर् वः सहेत कोपज्वलितं गुरुं कः । परिस्फुरल्लोलशिखाग्रजिह्वं जगज् जिघत्सन्तम् इवान्तवह्निम्

sṛjantam ājāviṣusaṃhatīr vaḥ saheta kopajvalitaṃ guruṃ kaḥ / parisphurallolaśikhāgrajihvaṃ jagaj jighatsantam ivāntavahnim

Sanskrit only: no published translation is held for this verse.

निरीक्ष्य संरम्भनिरस्तधैर्यं राधेयम् आराधितजामदग्न्यम् । असंस्तुतेषु प्रसभं भयेषु जायेत मृत्योर् अपि पक्षपातः

nirīkṣya saṃrambhanirastadhairyaṃ rādheyam ārādhitajāmadagnyam / asaṃstuteṣu prasabhaṃ bhayeṣu jāyeta mṛtyor api pakṣapātaḥ

Sanskrit only: no published translation is held for this verse.

यया समासादितसाधनेन सुदुश्चराम् आचरता तपस्याम् । एते दुरापं समवाप्य वीर्यम् उन्मीलितारः कपिकेतनेन

yayā samāsāditasādhanena suduścarām ācaratā tapasyām / ete durāpaṃ samavāpya vīryam unmīlitāraḥ kapiketanena

Sanskrit only: no published translation is held for this verse.

महत्त्वयोगाय महामहिम्नाम् आराधनीं तां नृप देवतानाम् । दातुं प्रदानोचित भूरिधाम्नीम् उपागतः सिद्धिम् इवास्मि विद्याम्

mahattvayogāya mahāmahimnām ārādhanīṃ tāṃ nṛpa devatānām / dātuṃ pradānocita bhūridhāmnīm upāgataḥ siddhim ivāsmi vidyām

Sanskrit only: no published translation is held for this verse.

इत्य् उक्तवन्तं व्रज साधयेति प्रमाणयन् वाक्यम् अजातशत्रोः । प्रसेदिवांसं तम् उपाससाद वसन्न् इवान्ते विनयेन जिष्णुः

ity uktavantaṃ vraja sādhayeti pramāṇayan vākyam ajātaśatroḥ / prasedivāṃsaṃ tam upāsasāda vasann ivānte vinayena jiṣṇuḥ

Sanskrit only: no published translation is held for this verse.

निर्याय विद्या+थ दिनादिरम्याद् बिम्बाद् इवार्कस्य मुखान् महर्षेः । पार्थाननं वह्निकणावदाता दीप्तिः स्फुरत्पद्मम् इवाभिपेदे

niryāya vidyā+tha dinādiramyād bimbād ivārkasya mukhān maharṣeḥ / pārthānanaṃ vahnikaṇāvadātā dīptiḥ sphuratpadmam ivābhipede

Sanskrit only: no published translation is held for this verse.

योगं च तं योग्यतमाय तस्मै तपःप्रभावाद् विततार सद्यः । येनास्य तत्त्वेषु कृते ऽवभासे समुन्मिमीलेव चिराय चक्षुः

yogaṃ ca taṃ yogyatamāya tasmai tapaḥprabhāvād vitatāra sadyaḥ / yenāsya tattveṣu kṛte 'vabhāse samunmimīleva cirāya cakṣuḥ

Sanskrit only: no published translation is held for this verse.

आकारम् आशंसितभूरिलाभं दधानम् अन्तःकरणानुरूपम् । नियोजयिष्यन् विजयोदये तं तपःसमाधौ मुनिर् इत्य् उवाच

ākāram āśaṃsitabhūrilābhaṃ dadhānam antaḥkaraṇānurūpam / niyojayiṣyan vijayodaye taṃ tapaḥsamādhau munir ity uvāca

Sanskrit only: no published translation is held for this verse.

अनेन योगेन विवृद्धतेजा निजां परस्मै पदवीम् अयच्छन् । समाचराचारम् उपात्तशस्त्रो जपोपवासाभिषवैर् मुनीनाम्

anena yogena vivṛddhatejā nijāṃ parasmai padavīm ayacchan / samācarācāram upāttaśastro japopavāsābhiṣavair munīnām

Sanskrit only: no published translation is held for this verse.

करिष्यसे यत्र सुदुश्चराणि प्रसत्तये गोत्रभिदस् तपांसि । शिलोच्चयं चारुशिलोच्चयं तम् एष क्षणान् नेष्यति गुह्यकस् त्वाम्

kariṣyase yatra suduścarāṇi prasattaye gotrabhidas tapāṃsi / śiloccayaṃ cāruśiloccayaṃ tam eṣa kṣaṇān neṣyati guhyakas tvām

Sanskrit only: no published translation is held for this verse.

इति ब्रुवाणेन महेन्द्रसूनुं महर्षिणा तेन तिरोबभूवे । तं राजराजानुचरो ऽस्य साक्षात् प्रदेशम् आदेशम् इवाधितस्थौ

iti bruvāṇena mahendrasūnuṃ maharṣiṇā tena tirobabhūve / taṃ rājarājānucaro 'sya sākṣāt pradeśam ādeśam ivādhitasthau

Sanskrit only: no published translation is held for this verse.

कृतानतिर् व्याहृतसान्त्ववादे जातस्पृहः पुण्यजनः स जिष्णौ । इयाय सख्याव् इव सम्प्रसादं विश्वासयत्य् आशु सतां हि योगः

kṛtānatir vyāhṛtasāntvavāde jātaspṛhaḥ puṇyajanaḥ sa jiṣṇau / iyāya sakhyāv iva samprasādaṃ viśvāsayaty āśu satāṃ hi yogaḥ

Sanskrit only: no published translation is held for this verse.

अथोष्णभासेव सुमेरुकुञ्जान् विहीयमानान् उदयाय तेन । बृहद्द्युतीन् दुःखकृतात्मलाभं तमः शनैः पाण्डुसुतान् प्रपेदे

athoṣṇabhāseva sumerukuñjān vihīyamānān udayāya tena / bṛhaddyutīn duḥkhakṛtātmalābhaṃ tamaḥ śanaiḥ pāṇḍusutān prapede

Sanskrit only: no published translation is held for this verse.

असंशयालोचितकार्यनुन्नः प्रेम्णा समानीय विभज्यमानः । तुल्याद् विभागाद् इव तन्मनोभिर् दुःखातिभारो ऽपि लघुः स मेने

asaṃśayālocitakāryanunnaḥ premṇā samānīya vibhajyamānaḥ / tulyād vibhāgād iva tanmanobhir duḥkhātibhāro 'pi laghuḥ sa mene

Sanskrit only: no published translation is held for this verse.

धैर्येण विश्वास्यतया महर्षेस् तीव्राद् अरातिप्रभवाच् च मन्योः । वीर्यं च विद्वत्सु सुते मघोनः स तेषु न स्थानम् अवाप शोकः

dhairyeṇa viśvāsyatayā maharṣes tīvrād arātiprabhavāc ca manyoḥ / vīryaṃ ca vidvatsu sute maghonaḥ sa teṣu na sthānam avāpa śokaḥ

Sanskrit only: no published translation is held for this verse.

तान् भूरिधाम्नश् चतुरो ऽपि दूरं विहाय यामान् इव वासरस्य । एकौघभूतं तद् अशर्म कृष्णां विभावरीं ध्वान्तम् इव प्रपेदे

tān bhūridhāmnaś caturo 'pi dūraṃ vihāya yāmān iva vāsarasya / ekaughabhūtaṃ tad aśarma kṛṣṇāṃ vibhāvarīṃ dhvāntam iva prapede

Sanskrit only: no published translation is held for this verse.

तुषारलेखाकुलितोत्पलाभे पर्यश्रुणी मङ्गलभङ्गभीरुः । अगूढभावापि विलोकने सा न लोचने मीलयितुं विषेहे

tuṣāralekhākulitotpalābhe paryaśruṇī maṅgalabhaṅgabhīruḥ / agūḍhabhāvāpi vilokane sā na locane mīlayituṃ viṣehe

Sanskrit only: no published translation is held for this verse.

अकृत्रिमप्रेमरसाभिरामं रामार्पितं दृष्टिविलोभि दृष्टम् । मनःप्रसादाञ्जलिना निकामं जग्राह पाथेयम् इवेन्द्रसूनुः

akṛtrimapremarasābhirāmaṃ rāmārpitaṃ dṛṣṭivilobhi dṛṣṭam / manaḥprasādāñjalinā nikāmaṃ jagrāha pātheyam ivendrasūnuḥ

Sanskrit only: no published translation is held for this verse.

धैर्यावसादेन हृतप्रसादा वन्यद्विपेनेव निदाघसिन्धुः । निरुद्धबाष्पोदयसन्नकण्ठम् उवाच कृच्छ्राद् इति राजपुत्री

dhairyāvasādena hṛtaprasādā vanyadvipeneva nidāghasindhuḥ / niruddhabāṣpodayasannakaṇṭham uvāca kṛcchrād iti rājaputrī

Sanskrit only: no published translation is held for this verse.

मग्नां द्विषच्छद्मनि पङ्कभूते सम्भवानां भूतिम् इवोद्धरिष्यन् । आधिद्विषाम् आ तपसां प्रसिद्धेर् अस्मद् विना मा भृशम् उन्मनीभूः

magnāṃ dviṣacchadmani paṅkabhūte sambhavānāṃ bhūtim ivoddhariṣyan / ādhidviṣām ā tapasāṃ prasiddher asmad vinā mā bhṛśam unmanībhūḥ

Sanskrit only: no published translation is held for this verse.

यशो ऽधिगन्तुं सुखलिप्सया वा मनुष्यसंख्याम् अतिवर्तितुं वा । निरुत्सुकानाम् अभियोग्गभाजां समुत्सुकेवाङ्कम् उपैति सिद्धिः

yaśo 'dhigantuṃ sukhalipsayā vā manuṣyasaṃkhyām ativartituṃ vā / nirutsukānām abhiyoggabhājāṃ samutsukevāṅkam upaiti siddhiḥ

Sanskrit only: no published translation is held for this verse.

लोकं विधात्रा विहितस्य गोप्तुं क्षत्त्रस्य मुष्णन् वसु जैत्रम् ओजः । तेजस्विताया विजयैकवृत्तेर् निघ्नन् प्रियं प्राणम् इवाभिमानम्

lokaṃ vidhātrā vihitasya goptuṃ kṣattrasya muṣṇan vasu jaitram ojaḥ / tejasvitāyā vijayaikavṛtter nighnan priyaṃ prāṇam ivābhimānam

Sanskrit only: no published translation is held for this verse.

व्रीडानतैर् आप्तजनोपनीतः संशय्य कृच्छ्रेण नृपैः प्रपन्नः । वितानभूतं विततं पृथिव्यां यशः समूहन्न् इव दिग्विकीर्णम्

vrīḍānatair āptajanopanītaḥ saṃśayya kṛcchreṇa nṛpaiḥ prapannaḥ / vitānabhūtaṃ vitataṃ pṛthivyāṃ yaśaḥ samūhann iva digvikīrṇam

Sanskrit only: no published translation is held for this verse.

वीर्यावदानेषु कृतावमर्षस् तन्वन्न् अभूताम् इव सम्प्रतीतिम् । कुर्वन् प्रयामक्षयम् आयतीनाम् अर्कत्विषाम् अह्न इवावशेषः

vīryāvadāneṣu kṛtāvamarṣas tanvann abhūtām iva sampratītim / kurvan prayāmakṣayam āyatīnām arkatviṣām ahna ivāvaśeṣaḥ

Sanskrit only: no published translation is held for this verse.

प्रसह्य यो ऽस्मासु परैः प्रयुक्तः स्मर्तुं न शक्यः किम् उताधिकर्तुम् । नवीकरिष्यत्य् उपशुष्यद् आर्द्रः स त्वद् विना मे हृदयं निकारः

prasahya yo 'smāsu paraiḥ prayuktaḥ smartuṃ na śakyaḥ kim utādhikartum / navīkariṣyaty upaśuṣyad ārdraḥ sa tvad vinā me hṛdayaṃ nikāraḥ

Sanskrit only: no published translation is held for this verse.

प्राप्तो ऽभिमानव्यसनाद् असह्यं दन्तीव दन्तव्यसनाद् विकारम् । द्विषत्प्रतापान्तरितोरुतेजाः शरद्घनाकीर्ण इवादिर् अह्नः

prāpto 'bhimānavyasanād asahyaṃ dantīva dantavyasanād vikāram / dviṣatpratāpāntaritorutejāḥ śaradghanākīrṇa ivādir ahnaḥ

Sanskrit only: no published translation is held for this verse.

सव्रीडमन्दैर् इव निष्क्रियत्वान् नात्यर्थम् अस्त्रैर् अवभासमानः । यशःक्षयक्षीणजलार्णवाभस् त्वम् अन्यम् आकारम् इवाभिपन्नः

savrīḍamandair iva niṣkriyatvān nātyartham astrair avabhāsamānaḥ / yaśaḥkṣayakṣīṇajalārṇavābhas tvam anyam ākāram ivābhipannaḥ

Sanskrit only: no published translation is held for this verse.

दुःशासनामर्षरजोविकीर्णैर् एभिर् विनार्थैर् इव भाग्यनाथैः । केशैः कदर्थीकृतवीर्यसारः कच्चित् स एवासि धनंजयस् त्वम्

duḥśāsanāmarṣarajovikīrṇair ebhir vinārthair iva bhāgyanāthaiḥ / keśaiḥ kadarthīkṛtavīryasāraḥ kaccit sa evāsi dhanaṃjayas tvam

Sanskrit only: no published translation is held for this verse.

स क्षत्त्रियस् त्राणसहः सतां यस् तत् कार्मुकं कर्मसु यस्य शक्तिः । वहन् द्वयीं यद्य् अफले ऽर्थजाते करोत्य् असंस्कारहताम् इवोक्तिम्

sa kṣattriyas trāṇasahaḥ satāṃ yas tat kārmukaṃ karmasu yasya śaktiḥ / vahan dvayīṃ yady aphale 'rthajāte karoty asaṃskārahatām ivoktim

Sanskrit only: no published translation is held for this verse.

वीतौजसः सन्निधिमात्रशेषा भवत्कृतां भूतिम् अपेक्षमाणाः । समानदुःखा इव नस् त्वदीयाः सरूपतां पार्थ गुणा भजन्ते

vītaujasaḥ sannidhimātraśeṣā bhavatkṛtāṃ bhūtim apekṣamāṇāḥ / samānaduḥkhā iva nas tvadīyāḥ sarūpatāṃ pārtha guṇā bhajante

Sanskrit only: no published translation is held for this verse.

आक्षिप्यमाणं रिपुभिः प्रमादान् नागैर् इवालूनसटं मृगेन्द्रम् । त्वां धूर् इयं योग्यतयाधिरूढा दीप्त्या दिनश्रीर् इव तिग्मरश्मिम्

ākṣipyamāṇaṃ ripubhiḥ pramādān nāgair ivālūnasaṭaṃ mṛgendram / tvāṃ dhūr iyaṃ yogyatayādhirūḍhā dīptyā dinaśrīr iva tigmaraśmim

Sanskrit only: no published translation is held for this verse.

करोति यो ऽशेषजनातिरिक्तां सम्भावनाम् अर्थवतीं क्रियाभिः । संसत्सु जाते पुरुषाधिकारे न पूरणी तं समुपैति संख्या

karoti yo 'śeṣajanātiriktāṃ sambhāvanām arthavatīṃ kriyābhiḥ / saṃsatsu jāte puruṣādhikāre na pūraṇī taṃ samupaiti saṃkhyā

Sanskrit only: no published translation is held for this verse.

प्रियेषु यैः पार्थ विनोपपत्तेर् विचिन्त्यमानैः क्लमम् एति चेतः । तव प्रयातस्य जयाय तेषां क्रियाद् अघानां मघवा विघातम्

priyeṣu yaiḥ pārtha vinopapatter vicintyamānaiḥ klamam eti cetaḥ / tava prayātasya jayāya teṣāṃ kriyād aghānāṃ maghavā vighātam

Sanskrit only: no published translation is held for this verse.

मा गाश् चिरायैकचरः प्रमादं वसन्न् असम्बाधशिवे ऽपि देशे । मात्सर्यरागोपहतात्मनां हि स्खलन्ति साधुष्व् अपि मानसानि

mā gāś cirāyaikacaraḥ pramādaṃ vasann asambādhaśive 'pi deśe / mātsaryarāgopahatātmanāṃ hi skhalanti sādhuṣv api mānasāni

Sanskrit only: no published translation is held for this verse.

तद् आशु कुर्वन् वचनं महर्षेर् मनोरथान् नः सफलीकुरुष्व । प्रत्यागतं त्वास्मि कृतार्थम् एव स्तनोपपीडं परिरब्धुकामा

tad āśu kurvan vacanaṃ maharṣer manorathān naḥ saphalīkuruṣva / pratyāgataṃ tvāsmi kṛtārtham eva stanopapīḍaṃ parirabdhukāmā

Sanskrit only: no published translation is held for this verse.

उदीरितां ताम् इति याज्ञसेन्या नवीकृतोद्ग्राहितविप्रकाराम् । आसाद्य वाचं स भृशं दिदीपे काष्ठाम् उदीचीम् इव तिग्मरश्मिः

udīritāṃ tām iti yājñasenyā navīkṛtodgrāhitaviprakārām / āsādya vācaṃ sa bhṛśaṃ didīpe kāṣṭhām udīcīm iva tigmaraśmiḥ

Sanskrit only: no published translation is held for this verse.

अथाभिपश्यन्न् इव विद्विषः पुरः पुरोधसारोपितहेतिसंहतिः । बभार रम्यो ऽपि वपुः स भीषणं गतः क्रियां मन्त्र इवाभिचारिकीम्

athābhipaśyann iva vidviṣaḥ puraḥ purodhasāropitahetisaṃhatiḥ / babhāra ramyo 'pi vapuḥ sa bhīṣaṇaṃ gataḥ kriyāṃ mantra ivābhicārikīm

Sanskrit only: no published translation is held for this verse.

अविलङ्घ्यविकर्षणं परैः प्रथितज्यारवकर्म कार्मुकम् । अगताव् अरिदृष्टिगोचरं शितनिस्त्रिंशयुजौ महेषुधी

avilaṅghyavikarṣaṇaṃ paraiḥ prathitajyāravakarma kārmukam / agatāv aridṛṣṭigocaraṃ śitanistriṃśayujau maheṣudhī

Sanskrit only: no published translation is held for this verse.

यशसेव तिरोदधन् मुहुर् महसा गोत्रभिदायुधक्षतीः । कवचं च सरत्नम् उद्वहञ् ज्वलितज्योतिर् इवान्तरं दिवः

yaśaseva tirodadhan muhur mahasā gotrabhidāyudhakṣatīḥ / kavacaṃ ca saratnam udvahañ jvalitajyotir ivāntaraṃ divaḥ

Sanskrit only: no published translation is held for this verse.

अकलाधिपभृत्यदर्शितं शिवम् उर्वीधरवर्त्म सम्प्रयान् । हृदयानि समाविवेश स क्षणम् उद्बाष्पदृशां तपोभृताम्

akalādhipabhṛtyadarśitaṃ śivam urvīdharavartma samprayān / hṛdayāni samāviveśa sa kṣaṇam udbāṣpadṛśāṃ tapobhṛtām

Sanskrit only: no published translation is held for this verse.

अनुजगुर् अथ दिव्यं दुन्दुभिध्वानम् आशाः+ सुरकुसुमनिपातैर् व्योम्नि लक्ष्मीर् वितेने । प्रियम् इव कथयिष्यन्न् आलिलिङ्ग स्फुरन्तीं भुवम् अनिभृतवेलावीचिबाहुः पयोधिः

anujagur atha divyaṃ dundubhidhvānam āśāḥ+ surakusumanipātair vyomni lakṣmīr vitene / priyam iva kathayiṣyann āliliṅga sphurantīṃ bhuvam anibhṛtavelāvīcibāhuḥ payodhiḥ

Sanskrit only: no published translation is held for this verse.