Library·Bhāgavata Purāṇa·10·10.47
श्री-शुक उवाच तं वीक्ष्य कृषानुचरं व्रज-स्त्रियः प्रलम्ब-बाहुं नव-कञ्ज-लोचनम् पीताम्बरं पुष्कर-मालिनं लसन्- मुखारविन्दं परिमृष्ट-कुण्डलम्
śrī-śuka uvāca taṃ vīkṣya kṛṣānucaraṃ vraja-striyaḥ pralamba-bāhuṃ nava-kañja-locanam pītāmbaraṃ puṣkara-mālinaṃ lasan- mukhāravindaṃ parimṛṣṭa-kuṇḍalam
Sanskrit only: no published translation is held for this verse.
सु-विस्मिताः को ऽयम् अपीव्य-दर्शनः कुतश् च कस्याच्युत-वेष-भूषणः इति स्म सर्वाः परिवव्रुर् उत्सुकास् तम् उत्तमः-श्लोक-पदाम्बुजाश्रयम्
su-vismitāḥ ko 'yam apīvya-darśanaḥ kutaś ca kasyācyuta-veṣa-bhūṣaṇaḥ iti sma sarvāḥ parivavrur utsukās tam uttamaḥ-śloka-padāmbujāśrayam
Sanskrit only: no published translation is held for this verse.
तं प्रश्रयेणावनताः सु-सत्-कृतं स-व्रीड-हासेक्षण-सूनृतादिभिः रहस्य् अपृच्छन्न् उपविष्टम् आसने विज्ञाय सन्देश-हरं रमा-पतेः
taṃ praśrayeṇāvanatāḥ su-sat-kṛtaṃ sa-vrīḍa-hāsekṣaṇa-sūnṛtādibhiḥ rahasy apṛcchann upaviṣṭam āsane vijñāya sandeśa-haraṃ ramā-pateḥ
Sanskrit only: no published translation is held for this verse.
जानीमस् त्वां यदु-पतेः पार्षदं समुपागतम् भर्त्रेह प्रेषितः पित्रोर् भवान् प्रिय-चिकीर्षया
jānīmas tvāṃ yadu-pateḥ pārṣadaṃ samupāgatam bhartreha preṣitaḥ pitror bhavān priya-cikīrṣayā
Sanskrit only: no published translation is held for this verse.
अन्यथा गो-व्रजे तस्य स्मरणीयं न चक्ष्महे स्नेहानुबन्धो बन्धूनां मुनेर् अपि सु-दुस्त्यजः
anyathā go-vraje tasya smaraṇīyaṃ na cakṣmahe snehānubandho bandhūnāṃ muner api su-dustyajaḥ
Sanskrit only: no published translation is held for this verse.
अन्येष्व् अर्थ-कृता मैत्री यावद्-अर्थ-विडम्बनम् पुम्भिः स्त्रीषु कृता यद्वत् सुमनःस्व् इव षट्पदैः
anyeṣv artha-kṛtā maitrī yāvad-artha-viḍambanam pumbhiḥ strīṣu kṛtā yadvat sumanaḥsv iva ṣaṭpadaiḥ
Sanskrit only: no published translation is held for this verse.
निःस्वं त्यजन्ति गणिका अकल्पं नृपतिं प्रजाः अधीत-विद्या आचार्यम् ऋत्विजो दत्त-दक्षिणम्
niḥsvaṃ tyajanti gaṇikā akalpaṃ nṛpatiṃ prajāḥ adhīta-vidyā ācāryam ṛtvijo datta-dakṣiṇam
Sanskrit only: no published translation is held for this verse.
खगा वीत-फलं वृक्षं भुक्त्वा चातिथयो गृहम् दग्धं मृगास् तथारण्यं जारा भुक्त्वा रतां स्त्रियम्
khagā vīta-phalaṃ vṛkṣaṃ bhuktvā cātithayo gṛham dagdhaṃ mṛgās tathāraṇyaṃ jārā bhuktvā ratāṃ striyam
Sanskrit only: no published translation is held for this verse.
इति गोप्यो हि गोविन्दे गत-वाक्-काय-मानसाः कृष्ण-दूते समायाते उद्धवे त्यक्त-लौकिकाः
iti gopyo hi govinde gata-vāk-kāya-mānasāḥ kṛṣṇa-dūte samāyāte uddhave tyakta-laukikāḥ
Sanskrit only: no published translation is held for this verse.
गायन्त्यः प्रीय-कर्माणि रुदन्त्यश् च गत-ह्रियः तस्य संस्मृत्य संस्मृत्य यानि कैशोर-बाल्ययोः
gāyantyaḥ prīya-karmāṇi rudantyaś ca gata-hriyaḥ tasya saṃsmṛtya saṃsmṛtya yāni kaiśora-bālyayoḥ
Sanskrit only: no published translation is held for this verse.
काचिन् मधुकरं दृष्ट्वा ध्यायन्ती कृष्ण-सङ्गमम् प्रिय-प्रस्थापितं दूतं कल्पयित्वेदम् अब्रवीत्
kācin madhukaraṃ dṛṣṭvā dhyāyantī kṛṣṇa-saṅgamam priya-prasthāpitaṃ dūtaṃ kalpayitvedam abravīt
Sanskrit only: no published translation is held for this verse.
गोप्य् उवाच मधुप कितव-बन्धो मा स्पृशङ्घ्रिं सपत्न्याः कुच-विलुलित-माला-कुङ्कुम-श्मश्रुभिर् नः वहतु मधु-पतिस् तन्-मानिनीनां प्रसादं यदु-सदसि विडम्ब्यं यस्य दूतस् त्वम् ईदृक्
gopy uvāca madhupa kitava-bandho mā spṛśaṅghriṃ sapatnyāḥ kuca-vilulita-mālā-kuṅkuma-śmaśrubhir naḥ vahatu madhu-patis tan-māninīnāṃ prasādaṃ yadu-sadasi viḍambyaṃ yasya dūtas tvam īdṛk
Sanskrit only: no published translation is held for this verse.
सकृद् अधर-सुधां स्वां मोहिनीं पाययित्वा सुमनस इव सद्यस् तत्यजे ऽस्मान् भवादृक् परिचरति कथं तत्-पाद-पद्मं नु पद्मा ह्य् अपि बत हृत-चेता ह्य् उत्तमः-श्लोक-जल्पैः
sakṛd adhara-sudhāṃ svāṃ mohinīṃ pāyayitvā sumanasa iva sadyas tatyaje 'smān bhavādṛk paricarati kathaṃ tat-pāda-padmaṃ nu padmā hy api bata hṛta-cetā hy uttamaḥ-śloka-jalpaiḥ
Sanskrit only: no published translation is held for this verse.
किम् इह बहु षड्-अङ्घ्रे गायसि त्वं यदूनाम् अधिपतिम् अगृहाणाम् अग्रतो नः पुराणम् विजय-सख-सखीनां गीयतां तत्-प्रसङ्गः क्षपित-कुच-रुजस् ते कल्पयन्तीष्टम् इष्टाः
kim iha bahu ṣaḍ-aṅghre gāyasi tvaṃ yadūnām adhipatim agṛhāṇām agrato naḥ purāṇam vijaya-sakha-sakhīnāṃ gīyatāṃ tat-prasaṅgaḥ kṣapita-kuca-rujas te kalpayantīṣṭam iṣṭāḥ
Sanskrit only: no published translation is held for this verse.
दिवि भुवि च रसायां काः स्त्रियस् तद्-दुरापाः कपट-रुचिर-हास-भ्रू-विजृम्भस्य याः स्युः चरण-रज उपास्ते यस्य भूतिर् वयं का अपि च कृपण-पक्षे ह्य् उत्तमः-श्लोक-शब्दः
divi bhuvi ca rasāyāṃ kāḥ striyas tad-durāpāḥ kapaṭa-rucira-hāsa-bhrū-vijṛmbhasya yāḥ syuḥ caraṇa-raja upāste yasya bhūtir vayaṃ kā api ca kṛpaṇa-pakṣe hy uttamaḥ-śloka-śabdaḥ
Sanskrit only: no published translation is held for this verse.
विसृज शिरसि पादं वेद्म्य् अहं चातु-कारैर् अनुनय-विदुषस् ते ऽभ्येत्य दौत्यैर् मुकुन्दात् स्व-कृत इह विषृष्टापत्य-पत्य्-अन्य-लोका व्यसृजद् अकृत-चेताः किं नु सन्धेयम् अस्मिन्
visṛja śirasi pādaṃ vedmy ahaṃ cātu-kārair anunaya-viduṣas te 'bhyetya dautyair mukundāt sva-kṛta iha viṣṛṣṭāpatya-paty-anya-lokā vyasṛjad akṛta-cetāḥ kiṃ nu sandheyam asmin
Sanskrit only: no published translation is held for this verse.
मृगयुर् इव कपीन्द्रं विव्यधे लुब्ध-धर्मा स्त्रियम् अकृत विरूपां स्त्री-जितः काम-यानाम् बलिम् अपि बलिम् अत्त्वावेष्टयद् ध्वाङ्क्ष-वद् यस् तद् अलम् असित-सख्यैर् दुस्त्यजस् तत्-कथार्थः
mṛgayur iva kapīndraṃ vivyadhe lubdha-dharmā striyam akṛta virūpāṃ strī-jitaḥ kāma-yānām balim api balim attvāveṣṭayad dhvāṅkṣa-vad yas tad alam asita-sakhyair dustyajas tat-kathārthaḥ
Sanskrit only: no published translation is held for this verse.
यद्-अनुचरित-लीला-कर्ण-पीयूष-विप्रुट्- सकृद्-अदन-विधूत-द्वन्द्व-धर्मा विनष्टाः सपदि गृह-कुटुम्बं दीनम् उत्सृज्य दीना बहव इह विहङ्गा भिक्षु-चर्यां चरन्ति
yad-anucarita-līlā-karṇa-pīyūṣa-vipruṭ- sakṛd-adana-vidhūta-dvandva-dharmā vinaṣṭāḥ sapadi gṛha-kuṭumbaṃ dīnam utsṛjya dīnā bahava iha vihaṅgā bhikṣu-caryāṃ caranti
Sanskrit only: no published translation is held for this verse.
वयम् ऋतम् इव जिह्म-व्याहृतं श्रद्दधानाः कुलिक-रुतम् इवाज्ञाः कृष्ण-वध्वो हरिण्यः ददृशुर् असकृद् एतत् तन्-नख-स्पर्श-तीव्र स्मर-रुज उपमन्त्रिन् भण्यताम् अन्य-वार्ता
vayam ṛtam iva jihma-vyāhṛtaṃ śraddadhānāḥ kulika-rutam ivājñāḥ kṛṣṇa-vadhvo hariṇyaḥ dadṛśur asakṛd etat tan-nakha-sparśa-tīvra smara-ruja upamantrin bhaṇyatām anya-vārtā
Sanskrit only: no published translation is held for this verse.
प्रिय-सख पुनर् आगाः प्रेयसा प्रेषितः किं वरय किम् अनुरुन्धे माननीयो ऽसि मे ऽङ्ग नयसि कथम् इहास्मान् दुस्त्यज-द्वन्द्व-पार्श्वं सततम् उरसि सौम्य श्रीर् वधूः साकम् आस्ते
priya-sakha punar āgāḥ preyasā preṣitaḥ kiṃ varaya kim anurundhe mānanīyo 'si me 'ṅga nayasi katham ihāsmān dustyaja-dvandva-pārśvaṃ satatam urasi saumya śrīr vadhūḥ sākam āste
Sanskrit only: no published translation is held for this verse.
अपि बत मधु-पुर्याम् आर्य-पुत्रो ऽधुनास्ते स्मरति स पितृ-गेहान् सौम्य बन्धूंश् च गोपान् क्वचिद् अपि स कथा नः किङ्करीणां गृणीते भुजम् अगुरु-सुगन्धं मूर्ध्न्य् अधास्यत् कदा नु
api bata madhu-puryām ārya-putro 'dhunāste smarati sa pitṛ-gehān saumya bandhūṃś ca gopān kvacid api sa kathā naḥ kiṅkarīṇāṃ gṛṇīte bhujam aguru-sugandhaṃ mūrdhny adhāsyat kadā nu
Sanskrit only: no published translation is held for this verse.
श्री-शुक उवाच अथोद्धवो निशम्यैवं कृष्ण-दर्शन-लालसाः सान्त्वयन् प्रिय-सन्देशैर् गोपीर् इदम् अभाषत
śrī-śuka uvāca athoddhavo niśamyaivaṃ kṛṣṇa-darśana-lālasāḥ sāntvayan priya-sandeśair gopīr idam abhāṣata
Sanskrit only: no published translation is held for this verse.
श्री-उद्धव उवाच अहो यूयं स्म पूर्णार्था भवत्यो लोक-पूजिताः वासुदेवे भगवति यासाम् इत्य् अर्पितं मनः
śrī-uddhava uvāca aho yūyaṃ sma pūrṇārthā bhavatyo loka-pūjitāḥ vāsudeve bhagavati yāsām ity arpitaṃ manaḥ
Sanskrit only: no published translation is held for this verse.
दान-व्रत-तपो-होम जप-स्वाध्याय-संयमैः श्रेयोभिर् विविधैश् चान्यैः कृष्णे भक्तिर् हि साध्यते
dāna-vrata-tapo-homa japa-svādhyāya-saṃyamaiḥ śreyobhir vividhaiś cānyaiḥ kṛṣṇe bhaktir hi sādhyate
Sanskrit only: no published translation is held for this verse.
भगवत्य् उत्तमः-श्लोके भवतीभिर् अनुत्तमा भक्तिः प्रवर्तिता दिष्ट्या मुनीनाम् अपि दुर्लभा
bhagavaty uttamaḥ-śloke bhavatībhir anuttamā bhaktiḥ pravartitā diṣṭyā munīnām api durlabhā
Sanskrit only: no published translation is held for this verse.
दिष्ट्या पुत्रान् पतीन् देहान् स्व-जनान् भवनानि च हित्वावृनीत यूयं यत् कृष्णाख्यं पुरुषं परम्
diṣṭyā putrān patīn dehān sva-janān bhavanāni ca hitvāvṛnīta yūyaṃ yat kṛṣṇākhyaṃ puruṣaṃ param
Sanskrit only: no published translation is held for this verse.
सर्वात्म-भावो ऽधिकृतो भवतीनाम् अधोक्षजे विरहेण महा-भागा महान् मे ऽनुग्रहः कृतः
sarvātma-bhāvo 'dhikṛto bhavatīnām adhokṣaje viraheṇa mahā-bhāgā mahān me 'nugrahaḥ kṛtaḥ
Sanskrit only: no published translation is held for this verse.
श्रूयतां प्रिय-सन्देशो भवतीनां सुखावहः यम् आदायागतो भद्रा अहं भर्तू रहस्-करः
śrūyatāṃ priya-sandeśo bhavatīnāṃ sukhāvahaḥ yam ādāyāgato bhadrā ahaṃ bhartū rahas-karaḥ
Sanskrit only: no published translation is held for this verse.
श्री-भगवान् उवाच भवतीनां वियोगो मे न हि सर्वात्मना क्वचित् यथा भूतानि भूतेषु खं वाय्व्-अग्निर् जलं मही तथाहं च मनः-प्राण- भूतेन्द्रिय-गुणाश्रयः
śrī-bhagavān uvāca bhavatīnāṃ viyogo me na hi sarvātmanā kvacit yathā bhūtāni bhūteṣu khaṃ vāyv-agnir jalaṃ mahī tathāhaṃ ca manaḥ-prāṇa- bhūtendriya-guṇāśrayaḥ
Sanskrit only: no published translation is held for this verse.
आत्मन्य् एवात्मनात्मानं सृजे हन्म्य् अनुपालये आत्म-मायानुभावेन भूतेन्द्रिय-गुणात्मना
ātmany evātmanātmānaṃ sṛje hanmy anupālaye ātma-māyānubhāvena bhūtendriya-guṇātmanā
Sanskrit only: no published translation is held for this verse.
आत्मा ज्ञान-मयः शुद्धो व्यतिरिक्तो ऽगुणान्वयः सुषुप्ति-स्वप्न-जाग्रद्भिर् माया-वृत्तिभिर् ईयते
ātmā jñāna-mayaḥ śuddho vyatirikto 'guṇānvayaḥ suṣupti-svapna-jāgradbhir māyā-vṛttibhir īyate
Sanskrit only: no published translation is held for this verse.
येनेन्द्रियार्थान् ध्यायेत मृषा स्वप्न-वद् उत्थितः तन् निरुन्ध्याद् इन्द्रियाणि विनिद्रः प्रत्यपद्यत
yenendriyārthān dhyāyeta mṛṣā svapna-vad utthitaḥ tan nirundhyād indriyāṇi vinidraḥ pratyapadyata
Sanskrit only: no published translation is held for this verse.
एतद्-अन्तः समाम्नायो योगः साङ्ख्यं मनीषिणाम् त्यागस् तपो दमः सत्यं समुद्रान्ता इवापगाः
etad-antaḥ samāmnāyo yogaḥ sāṅkhyaṃ manīṣiṇām tyāgas tapo damaḥ satyaṃ samudrāntā ivāpagāḥ
Sanskrit only: no published translation is held for this verse.
यत् त्व् अहं भवतीनां वै दूरे वर्ते प्रियो दृशाम् मनसः सन्निकर्षार्थं मद्-अनुध्यान-काम्यया
yat tv ahaṃ bhavatīnāṃ vai dūre varte priyo dṛśām manasaḥ sannikarṣārthaṃ mad-anudhyāna-kāmyayā
Sanskrit only: no published translation is held for this verse.
यथा दूर-चरे प्रेष्ठे मन आविश्य वर्तते स्त्रीणां च न तथा चेतः सन्निकृष्टे ऽक्षि-गोचरे
yathā dūra-care preṣṭhe mana āviśya vartate strīṇāṃ ca na tathā cetaḥ sannikṛṣṭe 'kṣi-gocare
Sanskrit only: no published translation is held for this verse.
मय्य् आवेश्य मनः कृत्स्नं विमुक्ताशेष-वृत्ति यत् अनुस्मरन्त्यो मां नित्यम् अचिरान् माम् उपैष्यथ
mayy āveśya manaḥ kṛtsnaṃ vimuktāśeṣa-vṛtti yat anusmarantyo māṃ nityam acirān mām upaiṣyatha
Sanskrit only: no published translation is held for this verse.
या मया क्रीडता रात्र्यां वने ऽस्मिन् व्रज आस्थिताः अलब्ध-रासाः कल्याण्यो मापुर् मद्-वीर्य-चिन्तया
yā mayā krīḍatā rātryāṃ vane 'smin vraja āsthitāḥ alabdha-rāsāḥ kalyāṇyo māpur mad-vīrya-cintayā
Sanskrit only: no published translation is held for this verse.
श्री-शुक उवाच एवं प्रियतमादिष्टम् आकर्ण्य व्रज-योषितः ता ऊचुर् उद्धवं प्रीतास् तत्-सन्देशागत-स्मृतीः
śrī-śuka uvāca evaṃ priyatamādiṣṭam ākarṇya vraja-yoṣitaḥ tā ūcur uddhavaṃ prītās tat-sandeśāgata-smṛtīḥ
Sanskrit only: no published translation is held for this verse.
गोप्य ऊचुः दिष्ट्याहितो हतः कंसो यदूनां सानुगो ऽघ-कृत् दिष्ट्याप्तैर् लब्ध-सर्वार्थैः कुशल्य् आस्ते ऽच्युतो ऽधुना
gopya ūcuḥ diṣṭyāhito hataḥ kaṃso yadūnāṃ sānugo 'gha-kṛt diṣṭyāptair labdha-sarvārthaiḥ kuśaly āste 'cyuto 'dhunā
Sanskrit only: no published translation is held for this verse.
कच्चिद् गदाग्रजः सौम्य करोति पुर-योषिताम् प्रीतिं नः स्निग्ध-सव्रीड- हासोदारेक्षणार्चितः
kaccid gadāgrajaḥ saumya karoti pura-yoṣitām prītiṃ naḥ snigdha-savrīḍa- hāsodārekṣaṇārcitaḥ
Sanskrit only: no published translation is held for this verse.
कथं रति-विशेष-ज्ञः प्रियश् च पुर-योषिताम् नानुबध्येत तद्-वाक्यैर् विभ्रमैश् चानुभाजितः
kathaṃ rati-viśeṣa-jñaḥ priyaś ca pura-yoṣitām nānubadhyeta tad-vākyair vibhramaiś cānubhājitaḥ
Sanskrit only: no published translation is held for this verse.
अपि स्मरति नः साधो गोविन्दः प्रस्तुते क्वचित् गोष्ठि-मध्ये पुर-स्त्रीणाम् ग्राम्याः स्वैर-कथान्तरे
api smarati naḥ sādho govindaḥ prastute kvacit goṣṭhi-madhye pura-strīṇām grāmyāḥ svaira-kathāntare
Sanskrit only: no published translation is held for this verse.
ताः किं निशाः स्मरति यासु तदा प्रियाभिर् वृन्दावने कुमुद-कुन्द-शशाङ्क-रम्ये रेमे क्वणच्-चरण-नूपुर-रास-गोष्ठ्याम् अस्माभिर् ईडित-मनोज्ञ-कथः कदाचित्
tāḥ kiṃ niśāḥ smarati yāsu tadā priyābhir vṛndāvane kumuda-kunda-śaśāṅka-ramye reme kvaṇac-caraṇa-nūpura-rāsa-goṣṭhyām asmābhir īḍita-manojña-kathaḥ kadācit
Sanskrit only: no published translation is held for this verse.
अप्य् एष्यतीह दाशार्हस् तप्ताः स्व-कृतया शुचा सञ्जीवयन् नु नो गात्रैर् यथेन्द्रो वनम् अम्बुदैः
apy eṣyatīha dāśārhas taptāḥ sva-kṛtayā śucā sañjīvayan nu no gātrair yathendro vanam ambudaiḥ
Sanskrit only: no published translation is held for this verse.
कस्मात् कृष्ण इहायाति प्राप्त-राज्यो हताहितः नरेन्द्र-कन्या उद्वाह्य प्रीतः सर्व-सुहृद्-वृतः
kasmāt kṛṣṇa ihāyāti prāpta-rājyo hatāhitaḥ narendra-kanyā udvāhya prītaḥ sarva-suhṛd-vṛtaḥ
Sanskrit only: no published translation is held for this verse.
किम् अस्माभिर् वनौकोभिर् अन्याभिर् वा महात्मनः श्री-पतेर् आप्त-कामस्य क्रियेतार्थः कृतात्मनः
kim asmābhir vanaukobhir anyābhir vā mahātmanaḥ śrī-pater āpta-kāmasya kriyetārthaḥ kṛtātmanaḥ
Sanskrit only: no published translation is held for this verse.
परं सौख्यं हि नैराश्यं स्वैरिण्य् अप्य् आह पिङ्गला तज् जानतीनां नः कृष्णे तथाप्य् आशा दुरत्यया
paraṃ saukhyaṃ hi nairāśyaṃ svairiṇy apy āha piṅgalā taj jānatīnāṃ naḥ kṛṣṇe tathāpy āśā duratyayā
Sanskrit only: no published translation is held for this verse.
क उत्सहेत सन्त्यक्तुम् उत्तमःश्लोक-संविदम् अनिच्छतो ऽपि यस्य श्रीर् अङ्गान् न च्यवते क्वचित्
ka utsaheta santyaktum uttamaḥśloka-saṃvidam anicchato 'pi yasya śrīr aṅgān na cyavate kvacit
Sanskrit only: no published translation is held for this verse.
सरिच्-छैल-वनोद्देशा गावो वेणु-रवा इमे सङ्कर्षण-सहायेन कृष्णेनाचरिताः प्रभो
saric-chaila-vanoddeśā gāvo veṇu-ravā ime saṅkarṣaṇa-sahāyena kṛṣṇenācaritāḥ prabho
Sanskrit only: no published translation is held for this verse.
पुनः पुनः स्मारयन्ति नन्द-गोप-सुतं बत श्री-निकेतैस् तत्-पदकैर् विस्मर्तुं नैव शक्नुमः
punaḥ punaḥ smārayanti nanda-gopa-sutaṃ bata śrī-niketais tat-padakair vismartuṃ naiva śaknumaḥ
Sanskrit only: no published translation is held for this verse.
गत्या ललितयोदार- हास-लीलावलोकनैः माध्व्या गिरा हृत-धियः कथं तं विस्मराम हे
gatyā lalitayodāra- hāsa-līlāvalokanaiḥ mādhvyā girā hṛta-dhiyaḥ kathaṃ taṃ vismarāma he
Sanskrit only: no published translation is held for this verse.
हे नाथ हे रमा-नाथ व्रज-नाथार्ति-नाशन मग्नम् उद्धर गोविन्द गोकुलं वृजिनार्णवात्
he nātha he ramā-nātha vraja-nāthārti-nāśana magnam uddhara govinda gokulaṃ vṛjinārṇavāt
Sanskrit only: no published translation is held for this verse.
श्री-शुक उवाच ततस् ताः कृष्ण-सन्देशैर् व्यपेत-विरह-ज्वराः उद्धवं पूजयां चक्रुर् ज्ञात्वात्मानम् अधोक्षजम्
śrī-śuka uvāca tatas tāḥ kṛṣṇa-sandeśair vyapeta-viraha-jvarāḥ uddhavaṃ pūjayāṃ cakrur jñātvātmānam adhokṣajam
Sanskrit only: no published translation is held for this verse.
उवास कतिचिन् मासान् गोपीनां विनुदन् शुचः कृष्ण-लीला-कथां गायन् रमयाम् आस गोकुलम्
uvāsa katicin māsān gopīnāṃ vinudan śucaḥ kṛṣṇa-līlā-kathāṃ gāyan ramayām āsa gokulam
Sanskrit only: no published translation is held for this verse.
यावन्त्य् अहानि नन्दस्य व्रजे ऽवात्सीत् स उद्धवः व्रजौकसां क्षण-प्रायाण्य् आसन् कृष्णस्य वार्तया
yāvanty ahāni nandasya vraje 'vātsīt sa uddhavaḥ vrajaukasāṃ kṣaṇa-prāyāṇy āsan kṛṣṇasya vārtayā
Sanskrit only: no published translation is held for this verse.
सरिद्-वन-गिरि-द्रोणीर् वीक्षन् कुसुमितान् द्रुमान् कृष्णं संस्मारयन् रेमे हरि-दासो व्रजौकसाम्
sarid-vana-giri-droṇīr vīkṣan kusumitān drumān kṛṣṇaṃ saṃsmārayan reme hari-dāso vrajaukasām
Sanskrit only: no published translation is held for this verse.
दृष्ट्वैवम्-आदि गोपीनां कृष्णावेशात्म-विक्लवम् उद्धवः परम-प्रीतस् ता नमस्यन्न् इदं जगौ
dṛṣṭvaivam-ādi gopīnāṃ kṛṣṇāveśātma-viklavam uddhavaḥ parama-prītas tā namasyann idaṃ jagau
Sanskrit only: no published translation is held for this verse.
एताः परं तनु-भृतो भुवि गोप-वध्वो गोविन्द एव निखिलात्मनि रूढ-भावाः वाञ्छन्ति यद् भव-भियो मुनयो वयं च किं ब्रह्म-जन्मभिर् अनन्त-कथा-रसस्य
etāḥ paraṃ tanu-bhṛto bhuvi gopa-vadhvo govinda eva nikhilātmani rūḍha-bhāvāḥ vāñchanti yad bhava-bhiyo munayo vayaṃ ca kiṃ brahma-janmabhir ananta-kathā-rasasya
Sanskrit only: no published translation is held for this verse.
क्वेमाः स्त्रियो वन-चरीर् व्यभिचार-दुष्टाः कृष्णे क्व चैष परमात्मनि रूढ-भावः नन्व् ईश्वरो ऽनुभजतो ऽविदुषो ऽपि साक्षाच् छ्रेयस् तनोत्य् अगद-राज इवोपयुक्तः
kvemāḥ striyo vana-carīr vyabhicāra-duṣṭāḥ kṛṣṇe kva caiṣa paramātmani rūḍha-bhāvaḥ nanv īśvaro 'nubhajato 'viduṣo 'pi sākṣāc chreyas tanoty agada-rāja ivopayuktaḥ
Sanskrit only: no published translation is held for this verse.
नायं श्रियो ऽङ्ग उ नितान्त-रतेः प्रसादः स्वर्-योषितां नलिन-गन्ध-रुचां कुतो ऽन्याः रासोत्सवे ऽस्य भुज-दण्ड-गृहीत-कण्ठ- लब्धाशिषां य उदगाद् व्रज-वल्लभीनाम्
nāyaṃ śriyo 'ṅga u nitānta-rateḥ prasādaḥ svar-yoṣitāṃ nalina-gandha-rucāṃ kuto 'nyāḥ rāsotsave 'sya bhuja-daṇḍa-gṛhīta-kaṇṭha- labdhāśiṣāṃ ya udagād vraja-vallabhīnām
Sanskrit only: no published translation is held for this verse.
आसाम् अहो चरण-रेणु-जुषाम् अहं स्यां वृन्दावने किम् अपि गुल्म-लतौषधीनाम् या दुस्त्यजं स्व-जनम् आर्य-पथं च हित्वा भेजुर् मुकुन्द-पदवीं श्रुतिभिर् विमृग्याम्
āsām aho caraṇa-reṇu-juṣām ahaṃ syāṃ vṛndāvane kim api gulma-latauṣadhīnām yā dustyajaṃ sva-janam ārya-pathaṃ ca hitvā bhejur mukunda-padavīṃ śrutibhir vimṛgyām
Sanskrit only: no published translation is held for this verse.
या वै श्रियार्चितम् अजादिभिर् आप्त-कामैर् योगेश्वरैर् अपि यद् आत्मनि रास-गोष्ठ्याम् कृष्णस्य तद् भगवतः चरणारविन्दं न्यस्तं स्तनेषु विजहुः परिरभ्य तापम्
yā vai śriyārcitam ajādibhir āpta-kāmair yogeśvarair api yad ātmani rāsa-goṣṭhyām kṛṣṇasya tad bhagavataḥ caraṇāravindaṃ nyastaṃ staneṣu vijahuḥ parirabhya tāpam
Sanskrit only: no published translation is held for this verse.
वन्दे नन्द-व्रज-स्त्रीणां पाद-रेणुम् अभीक्ष्णशः यासां हरि-कथोद्गीतं पुनाति भुवन-त्रयम्
vande nanda-vraja-strīṇāṃ pāda-reṇum abhīkṣṇaśaḥ yāsāṃ hari-kathodgītaṃ punāti bhuvana-trayam
Sanskrit only: no published translation is held for this verse.
श्री-शुक उवाच अथ गोपीर् अनुज्ञाप्य यशोदां नन्दम् एव च गोपान् आमन्त्र्य दाशार्हो यास्यन्न् आरुरुहे रथम्
śrī-śuka uvāca atha gopīr anujñāpya yaśodāṃ nandam eva ca gopān āmantrya dāśārho yāsyann āruruhe ratham
Sanskrit only: no published translation is held for this verse.
तं निर्गतं समासाद्य नानोपायन-पाणयः नन्दादयो ऽनुरागेण प्रावोचन्न् अश्रु-लोचनाः
taṃ nirgataṃ samāsādya nānopāyana-pāṇayaḥ nandādayo 'nurāgeṇa prāvocann aśru-locanāḥ
Sanskrit only: no published translation is held for this verse.
मनसो वृत्तयो नः स्युः कृष्ण पादाम्बुजाश्रयाः वाचो ऽभिधायिनीर् नाम्नां कायस् तत्-प्रह्वणादिषु
manaso vṛttayo naḥ syuḥ kṛṣṇa pādāmbujāśrayāḥ vāco 'bhidhāyinīr nāmnāṃ kāyas tat-prahvaṇādiṣu
Sanskrit only: no published translation is held for this verse.
कर्मभिर् भ्राम्यमाणानां यत्र क्वापीश्वरेच्छया मङ्गलाचरितैर् दानै रतिर् नः कृष्ण ईश्वरे
karmabhir bhrāmyamāṇānāṃ yatra kvāpīśvarecchayā maṅgalācaritair dānai ratir naḥ kṛṣṇa īśvare
Sanskrit only: no published translation is held for this verse.
एवं सभाजितो गोपैः कृष्ण-भक्त्या नराधिप उद्धवः पुनर् आगच्छन् मथुरां कृष्ण-पालिताम्
evaṃ sabhājito gopaiḥ kṛṣṇa-bhaktyā narādhipa uddhavaḥ punar āgacchan mathurāṃ kṛṣṇa-pālitām
Sanskrit only: no published translation is held for this verse.
कृष्णाय प्रणिपत्याह भक्त्य्-उद्रेकं व्रजौकसाम् वसुदेवाय रामाय राज्ञे चोपायनान्य् अदात्
kṛṣṇāya praṇipatyāha bhakty-udrekaṃ vrajaukasām vasudevāya rāmāya rājñe copāyanāny adāt
Sanskrit only: no published translation is held for this verse.