Ksemendra: Bharatamanjari 19

विद्रुमाग्राङ्गुराकारैश्चञ्चद्रोमाञ्चकञ्चुकैः । क्रूरक्रोधानलोद्भूतैर्विस्फुलिङ्गैरिवावृतः

vidrumāgrāṅgurākāraiścañcadromāñcakañcukaiḥ / krūrakrodhānalodbhūtairvisphuliṅgairivāvṛtaḥ

Sanskrit only: no published translation is held for this verse.

प्रतापमन्दिरागारकनकस्तम्भसंनिभैः । शङ्खचक्रगदापद्मलाञ्छनैर्भूषितो भुजैः

pratāpamandirāgārakanakastambhasaṃnibhaiḥ / śaṅkhacakragadāpadmalāñchanairbhūṣito bhujaiḥ

Sanskrit only: no published translation is held for this verse.

कृतान्तद्विरदोदीर्णकर्णचामरविभ्रमैः । नखरांशुचयैः कुर्वन्साट्टहासमिवाम्बरम्

kṛtāntadviradodīrṇakarṇacāmaravibhramaiḥ / nakharāṃśucayaiḥ kurvansāṭṭahāsamivāmbaram

Sanskrit only: no published translation is held for this verse.

मेरुकूटोन्नतस्कन्धशिखरासक्तकेसरैः । घोरः करालकालाग्निजीवनव्यजनैरिव

merukūṭonnataskandhaśikharāsaktakesaraiḥ / ghoraḥ karālakālāgnijīvanavyajanairiva

Sanskrit only: no published translation is held for this verse.

जृम्भाविस्पष्टदंष्ट्रांशुपटलैरादिशन्मुहुः । चण्डांशुपुण्डरीकस्य विसिनीकाण्डमण्डलम्

jṛmbhāvispaṣṭadaṃṣṭrāṃśupaṭalairādiśanmuhuḥ / caṇḍāṃśupuṇḍarīkasya visinīkāṇḍamaṇḍalam

Sanskrit only: no published translation is held for this verse.

दृप्तदैत्यशतोत्पातशंसिनीं रुधिरारुणाम् । अकालसंध्यां कुर्वाणः पिङ्गोग्रनयनातपैः

dṛptadaityaśatotpātaśaṃsinīṃ rudhirāruṇām / akālasaṃdhyāṃ kurvāṇaḥ piṅgogranayanātapaiḥ

Sanskrit only: no published translation is held for this verse.

बभ्रुभ्रुभङ्गविकटं ललाटतटमुन्नतम् । अदभ्रमिव संध्याभ्रं स्फुरत्तारतडिद्गणम्

babhrubhrubhaṅgavikaṭaṃ lalāṭataṭamunnatam / adabhramiva saṃdhyābhraṃ sphurattārataḍidgaṇam

Sanskrit only: no published translation is held for this verse.

स गत्वा दैतेयनिलयं प्रलयानलसंनिभः । ददर्शार्कसहस्राभां हिरण्यकशिपोः सभाम्

sa gatvā daiteyanilayaṃ pralayānalasaṃnibhaḥ / dadarśārkasahasrābhāṃ hiraṇyakaśipoḥ sabhām

Sanskrit only: no published translation is held for this verse.

स्थितां जगत्त्रयीमूर्ध्नि हेममालामिवोज्ज्वलाम् । दिव्यरत्नफलोदारसर्वर्तुकुसुमद्रुमाम्

sthitāṃ jagattrayīmūrdhni hemamālāmivojjvalām / divyaratnaphalodārasarvartukusumadrumām

Sanskrit only: no published translation is held for this verse.

मणिकुट्टिमसंक्रान्तकान्तकान्तामुखाम्बुजाम् । तस्यां दैत्यपतिः श्रीमान्विरराजोर्जितद्युतिः

maṇikuṭṭimasaṃkrāntakāntakāntāmukhāmbujām / tasyāṃ daityapatiḥ śrīmānvirarājorjitadyutiḥ

Sanskrit only: no published translation is held for this verse.

पृथुरत्नासनोत्सङ्गे सहस्रांशुरिवोदये । शुशुभे हेमपद्मस्रग्विपुले तस्य वक्षसि

pṛthuratnāsanotsaṅge sahasrāṃśurivodaye / śuśubhe hemapadmasragvipule tasya vakṣasi

Sanskrit only: no published translation is held for this verse.

कल्पान्तसूर्यमालेव तटे कनकभूभृतः । निषिद्धा लोकपालानां स्थितिरत्रेति शासनम्

kalpāntasūryamāleva taṭe kanakabhūbhṛtaḥ / niṣiddhā lokapālānāṃ sthitiratreti śāsanam

Sanskrit only: no published translation is held for this verse.

क्षणं दिक्षु लिलेखेव रत्नकुण्डलरश्मिभिः । विटङ्करत्नमुकुटोद्द्योतैरिन्द्रायुधप्रभैः

kṣaṇaṃ dikṣu lilekheva ratnakuṇḍalaraśmibhiḥ / viṭaṅkaratnamukuṭoddyotairindrāyudhaprabhaiḥ

Sanskrit only: no published translation is held for this verse.

मुहुर्व्योममयूरस्य रत्नाभारमिवाकरोत् । सेवितः सिद्धगन्धर्वकिन्नराप्सरसां गणैः

muhurvyomamayūrasya ratnābhāramivākarot / sevitaḥ siddhagandharvakinnarāpsarasāṃ gaṇaiḥ

Sanskrit only: no published translation is held for this verse.

विश्वैश्वर्याब्धिफेनौघं बभारोष्णीषमुज्ज्वलम् । तस्मिन्स्वर्गाङ्गानापाणिमन्दान्दोलितचामरैः । राजलक्ष्मीर्जहासेव तरङ्गितसितांशुके

viśvaiśvaryābdhiphenaughaṃ babhāroṣṇīṣamujjvalam / tasminsvargāṅgānāpāṇimandāndolitacāmaraiḥ / rājalakṣmīrjahāseva taraṅgitasitāṃśuke

Sanskrit only: no published translation is held for this verse.

अथादृश्यत दिग्दाहोद्गारदारुणमम्बरम् । केनापि॥॥॥॥क्षरत्क्षतजनिर्भरम्

athādṛśyata digdāhodgāradāruṇamambaram / kenāpi........kṣaratkṣatajanirbharam

Sanskrit only: no published translation is held for this verse.

प्रादुरासीत्ततः सिंहः श्रीमान्पुरुषविग्रहः । देवो देवारिदलनः कृशानुशतपिङ्गलः

prādurāsīttataḥ siṃhaḥ śrīmānpuruṣavigrahaḥ / devo devāridalanaḥ kṛśānuśatapiṅgalaḥ

Sanskrit only: no published translation is held for this verse.

तं वीक्ष्य हृदयोत्कम्पनवदीक्षाविधायिनम् । मिथोमुखानि दितिजा विस्मयार्ता व्यलोकयन्

taṃ vīkṣya hṛdayotkampanavadīkṣāvidhāyinam / mithomukhāni ditijā vismayārtā vyalokayan

Sanskrit only: no published translation is held for this verse.

को ऽयमित्याकुले क्षिप्रं दैत्यास्थानसभाङ्गणे । धीमानुवाच प्रह्लादो हिरण्यकशिपोः सुतः

ko 'yamityākule kṣipraṃ daityāsthānasabhāṅgaṇe / dhīmānuvāca prahlādo hiraṇyakaśipoḥ sutaḥ

Sanskrit only: no published translation is held for this verse.

सर्वदेवमयः को ऽपि देवो ऽयं महसां निधिः । येन नः स्थगितानीव चेतांसि च वचांसि च

sarvadevamayaḥ ko 'pi devo 'yaṃ mahasāṃ nidhiḥ / yena naḥ sthagitānīva cetāṃsi ca vacāṃsi ca

Sanskrit only: no published translation is held for this verse.

स एवायं हिरण्याक्षो येन नीतः प्रमाथिना । कालकापालिकोत्तलस्कन्धवल्कलकेतुताम्

sa evāyaṃ hiraṇyākṣo yena nītaḥ pramāthinā / kālakāpālikottalaskandhavalkalaketutām

Sanskrit only: no published translation is held for this verse.

इति ब्रुवाणे प्रह्लादे भ्रुकुटीकुटिलाननः । हिरण्यकशिपुर्दैत्यान्गृह्यतामित्यभाषत

iti bruvāṇe prahlāde bhrukuṭīkuṭilānanaḥ / hiraṇyakaśipurdaityāngṛhyatāmityabhāṣata

Sanskrit only: no published translation is held for this verse.

विप्रचितिप्रभृतयस्ततस्ते दानवर्षभाः । प्रदीप्तकङ्कटा घोरास्तं सर्वे पर्यवारयन्

vipracitiprabhṛtayastataste dānavarṣabhāḥ / pradīptakaṅkaṭā ghorāstaṃ sarve paryavārayan

Sanskrit only: no published translation is held for this verse.

शस्त्रवृष्टिं तदुत्सृष्टां ज्वालाजालजटाकुलाम् । जग्राह निश्चलो देवः शोणपुष्पामिव स्रजम्

śastravṛṣṭiṃ tadutsṛṣṭāṃ jvālājālajaṭākulām / jagrāha niścalo devaḥ śoṇapuṣpāmiva srajam

Sanskrit only: no published translation is held for this verse.

स स्वद्योतैरिव व्याप्तः शरैः शिखदिदारुणैः । दृङ्मात्रेणैव तांश्चक्रे वातक्षिप्ततृणोपमान्

sa svadyotairiva vyāptaḥ śaraiḥ śikhadidāruṇaiḥ / dṛṅmātreṇaiva tāṃścakre vātakṣiptatṛṇopamān

Sanskrit only: no published translation is held for this verse.

नदत्प्रलयजीमूतनिःस्वनस्तान्विधूय सः । सभां बभञ्ज संजातजनक्षोभविराविणीम्

nadatpralayajīmūtaniḥsvanastānvidhūya saḥ / sabhāṃ babhañja saṃjātajanakṣobhavirāviṇīm

Sanskrit only: no published translation is held for this verse.

दैत्यचक्रे ऽथ विध्वस्ते सहसा तस्य तेजसा । दष्टौष्ठः स्वयमुत्तस्थौ हिरण्यकशिपुः क्रुधा

daityacakre 'tha vidhvaste sahasā tasya tejasā / daṣṭauṣṭhaḥ svayamuttasthau hiraṇyakaśipuḥ krudhā

Sanskrit only: no published translation is held for this verse.

स क्षिपन्नस्त्रसंघातं दण्डं चिक्षेप भीषणम् । कालचक्रं त्रिशूलं च कङ्कालं मुसलं तथा

sa kṣipannastrasaṃghātaṃ daṇḍaṃ cikṣepa bhīṣaṇam / kālacakraṃ triśūlaṃ ca kaṅkālaṃ musalaṃ tathā

Sanskrit only: no published translation is held for this verse.

ब्रह्मास्त्रमशनिं त्वाष्ट्रं शक्तिं पाशुपतं हलम् । कालमुद्गरमत्युग्रं कृतान्तास्त्रं सविग्रहम्

brahmāstramaśaniṃ tvāṣṭraṃ śaktiṃ pāśupataṃ halam / kālamudgaramatyugraṃ kṛtāntāstraṃ savigraham

Sanskrit only: no published translation is held for this verse.

इत्येतैश्छाद्यमानो ऽपि न चकम्पे नृकेसरी । नानाप्राणिमुखैर्दैत्यैर्घोरामायामयैर्वृतः

ityetaiśchādyamāno 'pi na cakampe nṛkesarī / nānāprāṇimukhairdaityairghorāmāyāmayairvṛtaḥ

Sanskrit only: no published translation is held for this verse.

ततो हिरण्यकशिपुः क्रोधान्धः पृथुविग्रहः । चकार जगतां क्षोभं येन लोकाश्चकम्पिरे

tato hiraṇyakaśipuḥ krodhāndhaḥ pṛthuvigrahaḥ / cakāra jagatāṃ kṣobhaṃ yena lokāścakampire

Sanskrit only: no published translation is held for this verse.

सपत्तनपुरीद्वीपपुरीनगरशासना । मही चचाल तटिनी मालिनी शैलशालिनी

sapattanapurīdvīpapurīnagaraśāsanā / mahī cacāla taṭinī mālinī śailaśālinī

Sanskrit only: no published translation is held for this verse.

अथाकृष्य बालद्दैत्यं कृत्वोत्सङ्गे रणोत्कटम् । वक्षस्यदारयद्देवो वज्रोग्रनखरैः खरैः

athākṛṣya bāladdaityaṃ kṛtvotsaṅge raṇotkaṭam / vakṣasyadārayaddevo vajrogranakharaiḥ kharaiḥ

Sanskrit only: no published translation is held for this verse.

दैत्यहृत्कमलोदीर्णा निर्ययुः शोणितच्छटाः । नखक्रकचनिष्पेषजातवह्निशिखा इव

daityahṛtkamalodīrṇā niryayuḥ śoṇitacchaṭāḥ / nakhakrakacaniṣpeṣajātavahniśikhā iva

Sanskrit only: no published translation is held for this verse.

हते दैत्येश्वरे वीरे प्रवरे दर्पशालिनाम् । देवा नृहरिनिर्दिष्टां निजां लक्ष्मीं प्रपेदिरे

hate daityeśvare vīre pravare darpaśālinām / devā nṛharinirdiṣṭāṃ nijāṃ lakṣmīṃ prapedire

Sanskrit only: no published translation is held for this verse.

स्तुतश्चतुर्मुखमुखैर्ध्येयो मोक्षपथार्थिनाम् । ततः क्षीरोदधेः कूलमुत्तरं प्रययौ हरिः

stutaścaturmukhamukhairdhyeyo mokṣapathārthinām / tataḥ kṣīrodadheḥ kūlamuttaraṃ prayayau hariḥ

Sanskrit only: no published translation is held for this verse.

रक्तच्छटाछुरितदारुणदैत्यवश्रःसंध्याभ्ररन्ध्रविसृता नखशुक्तयस्ताः । देवस्य सिंहवपुषः सुरवैरिनारीवक्त्राब्जपुञ्जशिशिरांशुकला जयन्ति

raktacchaṭāchuritadāruṇadaityavaśraḥsaṃdhyābhrarandhravisṛtā nakhaśuktayastāḥ / devasya siṃhavapuṣaḥ suravairinārīvaktrābjapuñjaśiśirāṃśukalā jayanti

Sanskrit only: no published translation is held for this verse.

हिरण्यकशिपोः सूनुः प्रह्लादो दैत्यशेखरः । प्रल्हादस्य सुतो वीरः सुरवैरी विरोचनः

hiraṇyakaśipoḥ sūnuḥ prahlādo daityaśekharaḥ / pralhādasya suto vīraḥ suravairī virocanaḥ

Sanskrit only: no published translation is held for this verse.

विरोचनस्य तन्यस्त्रैलोक्यविजयी बडिः(लिः) । धृतः शक्रपदे चक्रवर्ती दैत्यगणैः स्वयम्

virocanasya tanyastrailokyavijayī baḍiḥ(liḥ) / dhṛtaḥ śakrapade cakravartī daityagaṇaiḥ svayam

Sanskrit only: no published translation is held for this verse.

प्रययौ त्रिदशाञ्जेतुं त्रिजगद्व्यापिभिर्बलैः । मत्तद्विपघटाघण्टाटाङ्कार्घट्टिताम्बरः

prayayau tridaśāñjetuṃ trijagadvyāpibhirbalaiḥ / mattadvipaghaṭāghaṇṭāṭāṅkārghaṭṭitāmbaraḥ

Sanskrit only: no published translation is held for this verse.

रथैर्नगरनिस्फारैर्गिरिराजनिभैर्गजैः । वातवेगैश्च तुरगैस्तेन खं समपूर्यत

rathairnagaranisphārairgirirājanibhairgajaiḥ / vātavegaiśca turagaistena khaṃ samapūryata

Sanskrit only: no published translation is held for this verse.

स्वर्भानुविन्दनमुचिप्रह्लादबलशम्बरैः । जम्भकुम्भोदरोग्राक्षतारकाक्षविरोचनैः

svarbhānuvindanamuciprahlādabalaśambaraiḥ / jambhakumbhodarogrākṣatārakākṣavirocanaiḥ

Sanskrit only: no published translation is held for this verse.

विप्रचित्तिहयग्रीवमयमुख्यैः सुरारिभिः । प्रदीप्तध्वजसंनाहैः कोटीनां कोटिभिर्वृतः

vipracittihayagrīvamayamukhyaiḥ surāribhiḥ / pradīptadhvajasaṃnāhaiḥ koṭīnāṃ koṭibhirvṛtaḥ

Sanskrit only: no published translation is held for this verse.

चकार धवलोष्णीषच्छत्रचामरमण्डलैः । स्फारफेनावलीस्फीतदुग्धोदधिनिभं नभः

cakāra dhavaloṣṇīṣacchatracāmaramaṇḍalaiḥ / sphāraphenāvalīsphītadugdhodadhinibhaṃ nabhaḥ

Sanskrit only: no published translation is held for this verse.

शक्रो ऽपि सह लोकेशैर्धृतस्त्रिदशकोटिभिः । चक्रे कुटिलदीप्तांशुमण्डलीकपिशा दिशः

śakro 'pi saha lokeśairdhṛtastridaśakoṭibhiḥ / cakre kuṭiladīptāṃśumaṇḍalīkapiśā diśaḥ

Sanskrit only: no published translation is held for this verse.

अताड्यत ततश्चण्डस्त्रिदशासुरसैन्ययोः । प्रलयाम्बुधरध्वानधीरः समरदुन्दुभिः

atāḍyata tataścaṇḍastridaśāsurasainyayoḥ / pralayāmbudharadhvānadhīraḥ samaradundubhiḥ

Sanskrit only: no published translation is held for this verse.

अथ शस्त्रास्त्रसंघट्टज्वालाजटिलविग्रहाः । कोपानले खड्गयूपे रुधिराज्ये धनुःस्रुवे । तस्मिन्रणमहायज्ञे विबभौ दीक्षितो बलिः

atha śastrāstrasaṃghaṭṭajvālājaṭilavigrahāḥ / kopānale khaḍgayūpe rudhirājye dhanuḥsruve / tasminraṇamahāyajñe vibabhau dīkṣito baliḥ

Sanskrit only: no published translation is held for this verse.

इतः शक्रार्कदहनैर्बाणासुरमुखौरितः । शरान्धकारे विहिते घोरो ऽभूत्सैन्ययोः क्षयः

itaḥ śakrārkadahanairbāṇāsuramukhauritaḥ / śarāndhakāre vihite ghoro 'bhūtsainyayoḥ kṣayaḥ

Sanskrit only: no published translation is held for this verse.

ततो दैत्यास्त्रनिस्त्रिंशदारितास्त्रिदशा दिशः । त्रस्ता ययुर्देहमात्रपरित्राणत्रपाकुलाः

tato daityāstranistriṃśadāritāstridaśā diśaḥ / trastā yayurdehamātraparitrāṇatrapākulāḥ

Sanskrit only: no published translation is held for this verse.

भग्नचक्रे गते शक्रे दहने गहनैषणि । विरते मारुते युद्धाद्गृहीतप्रशमे यमे

bhagnacakre gate śakre dahane gahanaiṣaṇi / virate mārute yuddhādgṛhītapraśame yame

Sanskrit only: no published translation is held for this verse.

त्रैलोक्याधिपतिर्वीरः शशास त्रिदशान्बलिः । निःशेषभुवनाधीशमस्तकन्यस्तशासनः

trailokyādhipatirvīraḥ śaśāsa tridaśānbaliḥ / niḥśeṣabhuvanādhīśamastakanyastaśāsanaḥ

Sanskrit only: no published translation is held for this verse.

सुरराज्ये कथाशेषे प्राज्ये राज्ये सुरद्विषाम् । सुराश्चतुर्मुखगिरा त्राणां नारायणं ययुः

surarājye kathāśeṣe prājye rājye suradviṣām / surāścaturmukhagirā trāṇāṃ nārāyaṇaṃ yayuḥ

Sanskrit only: no published translation is held for this verse.

अव्यक्तरूपो भगवन्गीर्वाणैरर्थितो विभुः । विवेश योगाददितेर्गर्भं वार्षसहस्रिकम्

avyaktarūpo bhagavangīrvāṇairarthito vibhuḥ / viveśa yogādaditergarbhaṃ vārṣasahasrikam

Sanskrit only: no published translation is held for this verse.

स काश्यपस्ततो विष्णुः श्यामो वामनविग्रहः । अजायत जगच्च्येष्ठो बालः श्रेष्ठो दिवौकसाम्

sa kāśyapastato viṣṇuḥ śyāmo vāmanavigrahaḥ / ajāyata jagaccyeṣṭho bālaḥ śreṣṭho divaukasām

Sanskrit only: no published translation is held for this verse.

अत्रान्तरे बडि(लिर्)धीमानश्वमेधाय दीक्षितः । बभूव सर्वकामानां दाता कल्पद्रुमो ऽर्थिषु

atrāntare baḍi(lir)dhīmānaśvamedhāya dīkṣitaḥ / babhūva sarvakāmānāṃ dātā kalpadrumo 'rthiṣu

Sanskrit only: no published translation is held for this verse.

तस्य यज्ञभुवं देवो बृहस्पतिसखः स्वयम् । गत्वा विवेश त्रिशिखः किरीटि छत्रदण्डवत्

tasya yajñabhuvaṃ devo bṛhaspatisakhaḥ svayam / gatvā viveśa triśikhaḥ kirīṭi chatradaṇḍavat

Sanskrit only: no published translation is held for this verse.

श्यामं पद्मपलाशाक्षं चलत्कुटिलकुन्तलम् । तं लावण्यमयं वीक्षअय ययौ निश्चलतां बडिः(लिः)

śyāmaṃ padmapalāśākṣaṃ calatkuṭilakuntalam / taṃ lāvaṇyamayaṃ vīkṣaaya yayau niścalatāṃ baḍiḥ(liḥ)

Sanskrit only: no published translation is held for this verse.

दैत्येन्द्रं स समभ्येत्य महात्मा वामनाकृतिः । उवाच मधुरोदारगिरा वर्षन्निवामृतम्

daityendraṃ sa samabhyetya mahātmā vāmanākṛtiḥ / uvāca madhurodāragirā varṣannivāmṛtam

Sanskrit only: no published translation is held for this verse.

महेन्द्रस्य कुबेरस्य चन्द्रस्य वरुमस्य च । ब्रह्मणश्चाभवद्यज्ञस्त्वत्क्रतुश्च विराजते

mahendrasya kuberasya candrasya varumasya ca / brahmaṇaścābhavadyajñastvatkratuśca virājate

Sanskrit only: no published translation is held for this verse.

यज्ञानामश्वमेधो ऽयं वरस्त्वमिव देहिनाम् । श्रुत्वेति वामनवचः पूतात्मा बडि(लि)रभ्यधात्

yajñānāmaśvamedho 'yaṃ varastvamiva dehinām / śrutveti vāmanavacaḥ pūtātmā baḍi(li)rabhyadhāt

Sanskrit only: no published translation is held for this verse.

इदं ते दर्शनं साधो प्रीणाति मम मानसम् । श्रोत्रशुक्तिसुधाधारा वाणी ते कस्य न प्रिया

idaṃ te darśanaṃ sādho prīṇāti mama mānasam / śrotraśuktisudhādhārā vāṇī te kasya na priyā

Sanskrit only: no published translation is held for this verse.

ददानि किं ते ऽभिमतं त्वादृशां हि महात्मनाम् । शरीरमपि नादेयं किं पुनर्बाह्मतश्चिरम्

dadāni kiṃ te 'bhimataṃ tvādṛśāṃ hi mahātmanām / śarīramapi nādeyaṃ kiṃ punarbāhmataściram

Sanskrit only: no published translation is held for this verse.

इत्युक्ते बडि(लि)ना प्रीत्या प्रत्यभाषत वामनः । दन्तत्विषा मुहुः कुर्वन्क्षीरक्षालितमम्बरम्

ityukte baḍi(li)nā prītyā pratyabhāṣata vāmanaḥ / dantatviṣā muhuḥ kurvankṣīrakṣālitamambaram

Sanskrit only: no published translation is held for this verse.

पदत्रयं त्वया मह्यं गुर्वर्थं संप्रदीयताम् । अतः परं भवत्प्रीतिं बहु मन्ये प्रियंवद

padatrayaṃ tvayā mahyaṃ gurvarthaṃ saṃpradīyatām / ataḥ paraṃ bhavatprītiṃ bahu manye priyaṃvada

Sanskrit only: no published translation is held for this verse.

श्रुत्वेति विस्मितमना बडिः(लिः) प्रोवाच सस्मितः । दाता बडि(लिर्)भवानर्थी त्रिपदी दीयतां कथम्

śrutveti vismitamanā baḍiḥ(liḥ) provāca sasmitaḥ / dātā baḍi(lir)bhavānarthī tripadī dīyatāṃ katham

Sanskrit only: no published translation is held for this verse.

दयितं बहुमानं मे यथेष्टं गृह्यतां मुने । ससागरगिरीन्द्रापि स्वल्पा ते रत्नसूर्मही

dayitaṃ bahumānaṃ me yatheṣṭaṃ gṛhyatāṃ mune / sasāgaragirīndrāpi svalpā te ratnasūrmahī

Sanskrit only: no published translation is held for this verse.

इत्युच्छमाने ऽपि यदा ययाचे नाधिकं हरिः । हस्तोदकं तदा प्रादाद्बडि(लिर्)लज्जानताननः

ityucchamāne 'pi yadā yayāce nādhikaṃ hariḥ / hastodakaṃ tadā prādādbaḍi(lir)lajjānatānanaḥ

Sanskrit only: no published translation is held for this verse.

ततः प्रववृधे देवः सर्वदेवमयो विभुः । व्याप पद्भ्यां वसुमतीं शिरसा च दिवं क्षणात्

tataḥ pravavṛdhe devaḥ sarvadevamayo vibhuḥ / vyāpa padbhyāṃ vasumatīṃ śirasā ca divaṃ kṣaṇāt

Sanskrit only: no published translation is held for this verse.

तस्य प्रवर्धमानस्य त्रैलोक्याक्रान्तिकारिणः । ब्रह्मण्डमानदण्डो ऽभूदण्डपादो ऽन्तरिक्षगः

tasya pravardhamānasya trailokyākrāntikāriṇaḥ / brahmaṇḍamānadaṇḍo 'bhūdaṇḍapādo 'ntarikṣagaḥ

Sanskrit only: no published translation is held for this verse.

जगत्पर्याप्तमेतन्मे न संपूर्णे पदद्वये । इतीव कम्पविलुठद्गिरिशब्दैर्जगाद सः

jagatparyāptametanme na saṃpūrṇe padadvaye / itīva kampaviluṭhadgiriśabdairjagāda saḥ

Sanskrit only: no published translation is held for this verse.

यः पूर्वमभवद्रत्नं मुकुटे प्राप्तमौक्तिके । वक्त्रे स्मितांशुचक्रं च शनैः शङ्खो ऽपि वक्षसि

yaḥ pūrvamabhavadratnaṃ mukuṭe prāptamauktike / vaktre smitāṃśucakraṃ ca śanaiḥ śaṅkho 'pi vakṣasi

Sanskrit only: no published translation is held for this verse.

व्योम्नि चन्द्रः स एवास्य परमाक्रन्तिकारिणः । ऊरुमाले जगामाशु स्रग्दाम सितपद्मताम्

vyomni candraḥ sa evāsya paramākrantikāriṇaḥ / ūrumāle jagāmāśu sragdāma sitapadmatām

Sanskrit only: no published translation is held for this verse.

ब्रह्मणा क्षालिते तस्य पादपद्मे इवाम्बुभिः । जाता हरजटाजूटमाला जगति जाह्नवी

brahmaṇā kṣālite tasya pādapadme ivāmbubhiḥ / jātā harajaṭājūṭamālā jagati jāhnavī

Sanskrit only: no published translation is held for this verse.

इति त्रैलोक्यमात्क्रम्य हृत्वा दैत्यपतेः क्षणात् । सुतले नाम्नि पातालतले तस्यादिशत्स्थितिम्

iti trailokyamātkramya hṛtvā daityapateḥ kṣaṇāt / sutale nāmni pātālatale tasyādiśatsthitim

Sanskrit only: no published translation is held for this verse.

अहो महोदधिस्फीतं सत्त्वं बलवतो बलेः । येन स्वकायबन्धेन दानशेषो विशोधितः

aho mahodadhisphītaṃ sattvaṃ balavato baleḥ / yena svakāyabandhena dānaśeṣo viśodhitaḥ

Sanskrit only: no published translation is held for this verse.

विस्मिताश्च प्रहृष्टाश्च लज्जिताः कम्पितास्तथा । बभूवुः सुरगन्धर्वसिद्धचारणकिंनराः

vismitāśca prahṛṣṭāśca lajjitāḥ kampitāstathā / babhūvuḥ suragandharvasiddhacāraṇakiṃnarāḥ

Sanskrit only: no published translation is held for this verse.

हत्वा दितिजसंघातं बडे(लेर्)वृत्तिमकल्पयत् । अश्रद्धया हुतं दत्तं श्राद्धमश्रोत्रियं तथा

hatvā ditijasaṃghātaṃ baḍe(ler)vṛttimakalpayat / aśraddhayā hutaṃ dattaṃ śrāddhamaśrotriyaṃ tathā

Sanskrit only: no published translation is held for this verse.

अमन्त्रमव्रतं यश्च यज्ञादिकमदक्षिणम् । विधिहीनं यदन्यच्च तदस्मै प्रददौ हरिः

amantramavrataṃ yaśca yajñādikamadakṣiṇam / vidhihīnaṃ yadanyacca tadasmai pradadau hariḥ

Sanskrit only: no published translation is held for this verse.

ततो निजपदे देवान्यथास्थानं निवेश्य सः । आदिदेश सुरेन्द्रस्य श्रियं स्रजमिवोज्ज्वलाम्

tato nijapade devānyathāsthānaṃ niveśya saḥ / ādideśa surendrasya śriyaṃ srajamivojjvalām

Sanskrit only: no published translation is held for this verse.

इति ते चरितं पुण्यं देवस्य कमलापतेः । प्रादुर्भावप्रसङ्गेन कथितं किल्बिषापहम्

iti te caritaṃ puṇyaṃ devasya kamalāpateḥ / prādurbhāvaprasaṅgena kathitaṃ kilbiṣāpaham

Sanskrit only: no published translation is held for this verse.

त्रैलोक्याक्रान्तिलीलोदितचरणनखखच्छकान्तिप्रवाहैः कुर्वन्ब्रह्माण्डमूर्ध्नि प्रसृतसुरसरिद्वैजयन्तीविलासम् । प्रोद्भूतब्रह्मपद्मप्रतिमपरिसरन्नाभिलग्नार्कबिम्बं निःशेषातङ्कशान्त्यै भवतु भगवतो रूपमत्यद्भुतं नः

trailokyākrāntilīloditacaraṇanakhakhacchakāntipravāhaiḥ kurvanbrahmāṇḍamūrdhni prasṛtasurasaridvaijayantīvilāsam / prodbhūtabrahmapadmapratimaparisarannābhilagnārkabimbaṃ niḥśeṣātaṅkaśāntyai bhavatu bhagavato rūpamatyadbhutaṃ naḥ

Sanskrit only: no published translation is held for this verse.