Chāndogya Upaniṣad 3.13

तस्य ह वा एतस्य हृदयस्य पञ्च देवसुषयः । स यो ऽस्य प्राङ् सुषिः स प्राणः । तच् चक्षुः । स आदित्यः । तद् एतत् तेजो ऽन्नाद्यम् इत्य् उपासीत । तेजस्व्य् अन्नादो भवति य एवं वेद

tasya ha vā etasya hṛdayasya pañca devasuṣayaḥ | sa yo 'sya prāṅ suṣiḥ sa prāṇaḥ | tac cakṣuḥ | sa ādityaḥ | tad etat tejo 'nnādyam ity upāsīta | tejasvy annādo bhavati ya evaṃ veda

Sanskrit only: no published translation is held for this verse.

अथ यो ऽस्य दक्षिणः सुषिः स व्यानः । तच् छ्रोत्रम् । स चन्द्रमाः । तद् एतच् छ्रीश् च यशश् चेत्य् उपासीत । श्रीमान् यशस्वी भवति य एवं वेद

atha yo 'sya dakṣiṇaḥ suṣiḥ sa vyānaḥ | tac chrotram | sa candramāḥ | tad etac chrīś ca yaśaś cety upāsīta | śrīmān yaśasvī bhavati ya evaṃ veda

Sanskrit only: no published translation is held for this verse.

अथ यो ऽस्य प्रत्यङ् सुषिः सो ऽपानः । सा वाक् । सो ऽग्निः । तद् एतद् ब्रह्मवर्चसम् अन्नाद्यम् इत्य् उपासीत । ब्रह्मवर्चस्य् अन्नादो भवति य एवं वेद

atha yo 'sya pratyaṅ suṣiḥ so 'pānaḥ | sā vāk | so 'gniḥ | tad etad brahmavarcasam annādyam ity upāsīta | brahmavarcasy annādo bhavati ya evaṃ veda

Sanskrit only: no published translation is held for this verse.

अथ यो ऽस्योदङ् सुषिः स समानः । तन् मनः । स पर्जन्यः । तद् एतत् कीर्तिश् च व्युष्टिश् चेत्युपासीत । कीर्तिमान् व्युष्टिमान् भवति य एवं वेद

atha yo 'syodaṅ suṣiḥ sa samānaḥ | tan manaḥ | sa parjanyaḥ | tad etat kīrtiś ca vyuṣṭiś cetyupāsīta | kīrtimān vyuṣṭimān bhavati ya evaṃ veda

Sanskrit only: no published translation is held for this verse.

अथ यो ऽस्योर्ध्वः सुषिः स उदानः । स वायुः । स आकाशः । तद् एतद् ओजश् च महश् चेत्य् उपासीत । ओजस्वी महस्वान् भवति य एवं वेद

atha yo 'syordhvaḥ suṣiḥ sa udānaḥ | sa vāyuḥ | sa ākāśaḥ | tad etad ojaś ca mahaś cety upāsīta | ojasvī mahasvān bhavati ya evaṃ veda

Sanskrit only: no published translation is held for this verse.

ते वा एते पञ्च ब्रह्मपुरुषाः स्वर्गस्य लोकस्य द्वारपाः । स य एतान् एवं पञ्च ब्रह्मपुरुषान् स्वर्गस्य लोकस्य द्वारपान् वेदास्य कुले वीरो जायते । प्रतिपद्यते स्वर्गं लोकं य एतान् एवं पञ्च ब्रह्मपुरुषान् स्वर्गस्य लोकस्य द्वारपान् वेद

te vā ete pañca brahmapuruṣāḥ svargasya lokasya dvārapāḥ | sa ya etān evaṃ pañca brahmapuruṣān svargasya lokasya dvārapān vedāsya kule vīro jāyate | pratipadyate svargaṃ lokaṃ ya etān evaṃ pañca brahmapuruṣān svargasya lokasya dvārapān veda

Sanskrit only: no published translation is held for this verse.

अथ यद् अतः परो दिवो ज्योतिर् दीप्यते विश्वतःपृष्ठेषु सर्वतःपृष्ठेष्व् अनुत्तमेषूत्तमेषु लोकेष्व् इदं वाव तद् यद् इदम् अस्मिन्न् अन्तः पुरुषे ज्योतिः । तस्यैषा दृष्टिर् यत्रैतद् अस्मिञ् छरीरे संस्पर्शेनोष्णिमानं विजानाति । तस्यैषा श्रुतिर् यत्रैतत् कर्णाव् अपिगृह्य निनदम् इव नदथुर् इवाग्नेर् इव ज्वलत उपशृनोति । तद् एतद् दृष्टं च श्रुतं चेत्य् उपासीत । चक्षुष्यः श्रुतो भवति य एवं वेद य एवं वेद

atha yad ataḥ paro divo jyotir dīpyate viśvataḥpṛṣṭheṣu sarvataḥpṛṣṭheṣv anuttameṣūttameṣu lokeṣv idaṃ vāva tad yad idam asminn antaḥ puruṣe jyotiḥ | tasyaiṣā dṛṣṭir yatraitad asmiñ charīre saṃsparśenoṣṇimānaṃ vijānāti | tasyaiṣā śrutir yatraitat karṇāv apigṛhya ninadam iva nadathur ivāgner iva jvalata upaśṛnoti | tad etad dṛṣṭaṃ ca śrutaṃ cety upāsīta | cakṣuṣyaḥ śruto bhavati ya evaṃ veda ya evaṃ veda

Sanskrit only: no published translation is held for this verse.