पञ्च कृत्वो ऽवद्यति पाङ्क्तो यज्ञः पञ्चधा हि ते ताः समवाद्यन्त आपतये त्वा गृह्णामीत्य् आह प्राणो वा आपतिः प्राणम् एव तेन प्रीणाति परिपतये त्वेत्य् आह मनो वै परिपतिः मन एव तेन प्रीणाति तनूनप्त्र इत्य् आह तन्वो हि ते ताः समवाद्यन्त शाक्वरायेत्य् आह शक्त्यै हि ते ताः समवाद्यन्त शक्मन ओजिष्ठायेत्य् आह ओजिष्ठं हि ते तद् आत्मनः समवाद्यन्त अनाधृष्टम् इत्य् आह अनाधृष्टं ह्य् एतत् अनाधृष्यम् इत्य् आह अनाधृष्यं ह्य् एतत् देवानाम् ओज इत्य् आह देवानां ह्य् एतद् ओजः अभिशस्तिपा इत्य् आह अभिशस्तिपा ह्य् एतत् अनभिशस्तेन्यम् इत्य् आह अनभिशस्तेन्यं ह्य् एतत् [एद्। अनभिशस्तेनं, चोर्र्। पत्यल्] अनु मे दीक्षां दीक्षापतिर् मन्यताम् अनु तपस् तपस्पतिर् अञ्जसा सत्यम् उप गेषं स्विते मा धा इत्य् आह यथायजुर् एवैतत् ॥ ३ ॥
pañca kṛtvo 'vadyati pāṅkto yajñaḥ pañcadhā hi te tāḥ samavādyanta āpataye tvā gṛhṇāmīty āha prāṇo vā āpatiḥ prāṇam eva tena prīṇāti paripataye tvety āha mano vai paripatiḥ mana eva tena prīṇāti tanūnaptra ity āha tanvo hi te tāḥ samavādyanta śākvarāyety āha śaktyai hi te tāḥ samavādyanta śakmana ojiṣṭhāyety āha ojiṣṭhaṃ hi te tad ātmanaḥ samavādyanta anādhṛṣṭam ity āha anādhṛṣṭaṃ hy etat anādhṛṣyam ity āha anādhṛṣyaṃ hy etat devānām oja ity āha devānāṃ hy etad ojaḥ abhiśastipā ity āha abhiśastipā hy etat anabhiśastenyam ity āha anabhiśastenyaṃ hy etat [ed. anabhiśastenaṃ, corr. Patyal] anu me dīkṣāṃ dīkṣāpatir manyatām anu tapas tapaspatir añjasā satyam upa geṣaṃ svite mā dhā ity āha yathāyajur evaitat || 3 ||
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.