मित्रावरुणाव् अब्रवीद् युवं न इमं यज्ञस्याङ्गम् अनुसमाहरतं मैत्रावरुणीयाम् तथेत्य् अब्रूताम् तौ सयुजौ सबलौ भूत्वा प्रासहा मृत्युमत्यैताम् तौ ह्य् अस्यैतद् यज्ञस्याङ्गम् अनुसमाहरतां मैत्रावरुणीयाम् तस्मान् मैत्रावरुणः प्रातःसवने मैत्रावरुणानि शंसति तौ ह्य् अस्यैतद् यज्ञस्याङ्गम् अनुसमाहरताम् यद् व् एव मैत्रावरुणानि शंसति <प्रति वां सूर उदिते विधेम नमोभिर् मित्रावरुणोत हव्यैः [ऋव् ७।६३।५]> <उत वाम् उषसो बुधि साकं सूर्यस्य रश्मिभिः [ऋव् १।१३७।२]> इत्य् ऋचाभ्यनूक्तम् <आ नो मित्रावरुणा [ऋव् ३।६२।१६]> <आ नो गन्तं रिशादसा [ऋव् ५।७१।१]> इति मैत्रावरुणस्य स्तोत्रियानुरूपौ <प्र वो मित्राय गायत [ऋव् ५।६८।१]> इत्य् उक्थमुखम् <प्र मित्रयोर् वरुणयोः [ऋव् ७।६६।१]> इति पर्यासः <आ यातं मित्रावरुणा [ऋव् ७।६६।१९]> इति यजति एते एव तद् देवते यथाभागं प्रीणाति वषट्कृत्यानुवषट्करोति प्रत्य् एवाभिमृशन्ते नाप्याययन्ति न ह्य् अनाराशंसाः सीदन्ति ॥ १३ ॥
mitrāvaruṇāv abravīd yuvaṃ na imaṃ yajñasyāṅgam anusamāharataṃ maitrāvaruṇīyām tathety abrūtām tau sayujau sabalau bhūtvā prāsahā mṛtyumatyaitām tau hy asyaitad yajñasyāṅgam anusamāharatāṃ maitrāvaruṇīyām tasmān maitrāvaruṇaḥ prātaḥsavane maitrāvaruṇāni śaṃsati tau hy asyaitad yajñasyāṅgam anusamāharatām yad v eva maitrāvaruṇāni śaṃsati <prati vāṃ sūra udite vidhema namobhir mitrāvaruṇota havyaiḥ [ṚV 7.63.5]> <uta vām uṣaso budhi sākaṃ sūryasya raśmibhiḥ [ṚV 1.137.2]> ity ṛcābhyanūktam <ā no mitrāvaruṇā [ṚV 3.62.16]> <ā no gantaṃ riśādasā [ṚV 5.71.1]> iti maitrāvaruṇasya stotriyānurūpau <pra vo mitrāya gāyata [ṚV 5.68.1]> ity ukthamukham <pra mitrayor varuṇayoḥ [ṚV 7.66.1]> iti paryāsaḥ <ā yātaṃ mitrāvaruṇā [ṚV 7.66.19]> iti yajati ete eva tad devate yathābhāgaṃ prīṇāti vaṣaṭkṛtyānuvaṣaṭkaroti praty evābhimṛśante nāpyāyayanti na hy anārāśaṃsāḥ sīdanti || 13 ||
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.