उभय्यो होत्रकाणां परिधानीया भवन्त्य् अहीनपरिधानयाश् चैकाहिनस्य तत ऐकाहिकीभिर् एव मैत्रावरुणः परिदधाति तेनास्माल् लोकान् न प्रच्यवते आहिनीकीभिर् अच्छावाकः स्वर्गस्य लोकस्याप्त्यै उभयीभिर् ब्राह्मणाच्छंसी एवम् असाव् उभौ व्यन्वारभमाण एतीमं च लोकम् अमुं च अथो ऽहीनं चैकाहं चाथो संवत्सरं चाग्निष्टोमं चाथो मैत्रावरुणं चाच्छावाकं च एवम् असाव् उभौ व्यन्वारभमाण एति अथ तत ऐकाहिकीभिर् एव तृतीयसवने होत्रकाः परिदधति तेनास्माल् लोकान् न प्रच्यवते आहिनीकीभिर् अच्छावाकः स्वर्गस्य लोकस्य समष्ट्यै कामं तद् धोता शंसेद् यद् धोत्रकाः पूर्वेद्युः शंसेयुः यद् वै होता तद् धोत्रकाः प्राणो वै होताङ्गानि होत्रकाः समानो वा अयं प्राणो ऽङ्गान्य् अनुसंचरति तस्मात् तत् कामं होता शंसेद् यद् धोत्रकाः पूर्वेद्युः शंसेयुः यद् वै होता तद् धोत्रकाः आत्मा वै होताङ्गानि होत्रकाः समाना वा इमे ऽङ्गानाम् अन्तास् तस्मात् तत् कामं होता शंसेद् यद् धोत्रकाः पूर्वेद्युः शंसेयुः [एद्। पुर्वेद्युः] यद् वै होता तद् धोत्रकाः सूक्तान्तैर् होता परिदधाति अथ समान्य एव होत्रकाणां परिधानीया भवन्ति ॥ १४ ॥
ubhayyo hotrakāṇāṃ paridhānīyā bhavanty ahīnaparidhānayāś caikāhinasya tata aikāhikībhir eva maitrāvaruṇaḥ paridadhāti tenāsmāl lokān na pracyavate āhinīkībhir acchāvākaḥ svargasya lokasyāptyai ubhayībhir brāhmaṇācchaṃsī evam asāv ubhau vyanvārabhamāṇa etīmaṃ ca lokam amuṃ ca atho 'hīnaṃ caikāhaṃ cātho saṃvatsaraṃ cāgniṣṭomaṃ cātho maitrāvaruṇaṃ cācchāvākaṃ ca evam asāv ubhau vyanvārabhamāṇa eti atha tata aikāhikībhir eva tṛtīyasavane hotrakāḥ paridadhati tenāsmāl lokān na pracyavate āhinīkībhir acchāvākaḥ svargasya lokasya samaṣṭyai kāmaṃ tad dhotā śaṃsed yad dhotrakāḥ pūrvedyuḥ śaṃseyuḥ yad vai hotā tad dhotrakāḥ prāṇo vai hotāṅgāni hotrakāḥ samāno vā ayaṃ prāṇo 'ṅgāny anusaṃcarati tasmāt tat kāmaṃ hotā śaṃsed yad dhotrakāḥ pūrvedyuḥ śaṃseyuḥ yad vai hotā tad dhotrakāḥ ātmā vai hotāṅgāni hotrakāḥ samānā vā ime 'ṅgānām antās tasmāt tat kāmaṃ hotā śaṃsed yad dhotrakāḥ pūrvedyuḥ śaṃseyuḥ [ed. purvedyuḥ] yad vai hotā tad dhotrakāḥ sūktāntair hotā paridadhāti atha samānya eva hotrakāṇāṃ paridhānīyā bhavanti || 14 ||
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.