Jiva Gosvami: Gopalacampu - Uttaracampu 2.2

मातुर् नेत्र-चकोर-चन्द्र-वदनस् तातस्य दृक्-चातक- श्रेणी-वारि-भृद् अन्य-गोकुल-जनस्याप्य् अक्षि-पद्मांशुमान् । सोऽहं तान् परिहृत्य हन्त गमनं कुर्वीय चेत् तर्ह्य् अहो चन्द्रादि-त्रयवन् ममापि भविता धिग् वात-चक्र-भ्रमः

mātur netra-cakora-candra-vadanas tātasya dṛk-cātaka- śreṇī-vāri-bhṛd anya-gokula-janasyāpy akṣi-padmāṃśumān | so'haṃ tān parihṛtya hanta gamanaṃ kurvīya cet tarhy aho candrādi-trayavan mamāpi bhavitā dhig vāta-cakra-bhramaḥ

Sanskrit only: no published translation is held for this verse.

दाम्ना दाम्ना सुर-सुमनसां स्वर्गिभिः पूज्यमानं साम्ना साम्ना द्रुहिण-सदसां वीथिभिः स्तूयमानम् । नाम्ना नाम्ना स-पशु-पशुपां संमुखान् निर्मिमाणं धाम्ना धाम्ना सुखदम् अखिलः प्राप तं दृश्यमानम्

dāmnā dāmnā sura-sumanasāṃ svargibhiḥ pūjyamānaṃ sāmnā sāmnā druhiṇa-sadasāṃ vīthibhiḥ stūyamānam | nāmnā nāmnā sa-paśu-paśupāṃ saṃmukhān nirmimāṇaṃ dhāmnā dhāmnā sukhadam akhilaḥ prāpa taṃ dṛśyamānam

Sanskrit only: no published translation is held for this verse.

इन्दोर् अभ्युदयात् परं विकसति द्राक् कैरवाणां गनः सिन्धुः क्षुभ्यति कान्ति-पानम् अयते दूराच् चकोर-व्रजः । गोपाः पश्य मुदा मुरारि-कलनाद् एषाम् अशेषां दशां गच्छन्तोऽप्य् अति-तृप्तिता-वशतया धावन्ति यावद् गति ॥ग्च् २,२।३॥ इति । तद् एवम्- आलोकः प्रीति-भाजां कृति-बल-निकरः किंकराणां हृद्-अन्तः- सारः सख्य-स्थितानां हृदि लसद् असवस् तात-मात्रादिकानाम् । आत्मा रामान्तराणां हरिर् इह समगात् केशिनं घातयित्वा गेहं यर्ह्य् एष तर्हि प्रति-निजम् अगमंस् ते च देहं प्रसिद्धाः

indor abhyudayāt paraṃ vikasati drāk kairavāṇāṃ ganaḥ sindhuḥ kṣubhyati kānti-pānam ayate dūrāc cakora-vrajaḥ | gopāḥ paśya mudā murāri-kalanād eṣām aśeṣāṃ daśāṃ gacchanto'py ati-tṛptitā-vaśatayā dhāvanti yāvad gati ||GC 2,2.3|| iti | tad evam- ālokaḥ prīti-bhājāṃ kṛti-bala-nikaraḥ kiṃkarāṇāṃ hṛd-antaḥ- sāraḥ sakhya-sthitānāṃ hṛdi lasad asavas tāta-mātrādikānām | ātmā rāmāntarāṇāṃ harir iha samagāt keśinaṃ ghātayitvā gehaṃ yarhy eṣa tarhi prati-nijam agamaṃs te ca dehaṃ prasiddhāḥ

Sanskrit only: no published translation is held for this verse.

स्वेनाम्बा निरमञ्छयत् तम् अथ दृङ्-नीरं व्यमुञ्चत् पिता सर्वेऽन्ये परिफुल्लद् अङ्ग-वलितां रोमाञ्चिताम् आञ्चिषुः । अन्यच् च क्वचन स्फुरद्-वचनतातीतं तद् आसीद् यदा हत्वा केशिनम् आव्रजत् कलकलान्दोलि-व्रजं स प्रभुः

svenāmbā niramañchayat tam atha dṛṅ-nīraṃ vyamuñcat pitā sarve'nye pariphullad aṅga-valitāṃ romāñcitām āñciṣuḥ | anyac ca kvacana sphurad-vacanatātītaṃ tad āsīd yadā hatvā keśinam āvrajat kalakalāndoli-vrajaṃ sa prabhuḥ

Sanskrit only: no published translation is held for this verse.

हुङ्कार-घोष-रचिताखिल-शब्द-मोषः स्राग्-अब्द-कान्तिम् अमुम् आस्तृत-धेनु-सङ्घः । वत्सान् विनापि बलवत् स्नवम् एष तैस् तं सद् वत्सलः सह-बलः शबलं चकार

huṅkāra-ghoṣa-racitākhila-śabda-moṣaḥ srāg-abda-kāntim amum āstṛta-dhenu-saṅghaḥ | vatsān vināpi balavat snavam eṣa tais taṃ sad vatsalaḥ saha-balaḥ śabalaṃ cakāra

Sanskrit only: no published translation is held for this verse.

तत्र तु- सर्वं चकार स हरिः परितः पुरावद् दध्रे सुरर्षि-वचसा तु विदूनमन्तः । यद्य् अप्य् अदस् तद् अपि तस्य निज-व्रजाय प्रत्यागतिर् हृदि कृता स्थिरतां पुपोष

tatra tu- sarvaṃ cakāra sa hariḥ paritaḥ purāvad dadhre surarṣi-vacasā tu vidūnamantaḥ | yady apy adas tad api tasya nija-vrajāya pratyāgatir hṛdi kṛtā sthiratāṃ pupoṣa

Sanskrit only: no published translation is held for this verse.

कंसं हन्तुं प्रयाणि स्फुरति पितृ-मुख-प्रेम तद्-विघ्न-रूपं देवर्षेर् वाङ् न मिथ्या कथम् अथ विरहं हा सहेय व्रजस्य ? निर्णीतेऽप्य् अत्र जाते कृतम् असुखमयेनास्य चिन्तामलेन स्मर्तव्यं तत् तु नित्यं यद् इह सुख-मयं वैभवं भावि-सङ्गे

kaṃsaṃ hantuṃ prayāṇi sphurati pitṛ-mukha-prema tad-vighna-rūpaṃ devarṣer vāṅ na mithyā katham atha virahaṃ hā saheya vrajasya ? nirṇīte'py atra jāte kṛtam asukhamayenāsya cintāmalena smartavyaṃ tat tu nityaṃ yad iha sukha-mayaṃ vaibhavaṃ bhāvi-saṅge

Sanskrit only: no published translation is held for this verse.

इत्य् अचिन्त्यत चानेन रथः कश्चन चैक्ष्यत । महतां हृदये याति प्रतिबिम्बं हि बिम्बताम्

ity acintyata cānena rathaḥ kaścana caikṣyata | mahatāṃ hṛdaye yāti pratibimbaṃ hi bimbatām

Sanskrit only: no published translation is held for this verse.

रथी निरस्त्रः स्याद् दूत इति कृष्णेन तर्कितम् । कंसात् कस्माद् असाव् आगाद् इत्य् अन्यैर् अपि शंकितम्

rathī nirastraḥ syād dūta iti kṛṣṇena tarkitam | kaṃsāt kasmād asāv āgād ity anyair api śaṃkitam

Sanskrit only: no published translation is held for this verse.

सत्यं सूर्यस् तुर्य- प्रहरस्यान्तं ययौ किन्तु । सबल-हरिः प्रतिहरितं हारित-तिमिरं व्यधान् निजं किरणम्

satyaṃ sūryas turya- praharasyāntaṃ yayau kintu | sabala-hariḥ pratiharitaṃ hārita-timiraṃ vyadhān nijaṃ kiraṇam

Sanskrit only: no published translation is held for this verse.

यतः, चक्षुर् एव परिचायकं भवेद् रूप-मात्र इति गीः सतां मता । तादृशाम् अनुभवे तु कर्णयोर् दृष्टि-शक्तिर् अपि कृष्टिम् ऋच्छति

yataḥ, cakṣur eva paricāyakaṃ bhaved rūpa-mātra iti gīḥ satāṃ matā | tādṛśām anubhave tu karṇayor dṛṣṭi-śaktir api kṛṣṭim ṛcchati

Sanskrit only: no published translation is held for this verse.

अस्तु तावद् अनयोह् सुरूपता नील-रत्न-विधु-लोभि-शोभयोः । अङ्घ्रि-चिह्नम् अपि चित्र-संनिभं दूरतोऽपि तम् अमूमुहन् मुहुः

astu tāvad anayoh surūpatā nīla-ratna-vidhu-lobhi-śobhayoḥ | aṅghri-cihnam api citra-saṃnibhaṃ dūrato'pi tam amūmuhan muhuḥ

Sanskrit only: no published translation is held for this verse.

एकः श्याम-द्युतीनाम् अभिमत-विभवस्याधिदेवावतारस् तत् सध्र्यङ् शुभ्र-शोभा-समुदय-सुभगाभोग-सार-प्रसारः । तत्रादिर् वस्त्र-कान्ति-प्रचिति-भगवती-कृष्ट-लक्ष्मी-प्रचारः किं चान्यः कान्त-वासश् छवि-शवलनया सृष्ट-पूर्वानुकारः

ekaḥ śyāma-dyutīnām abhimata-vibhavasyādhidevāvatāras tat sadhryaṅ śubhra-śobhā-samudaya-subhagābhoga-sāra-prasāraḥ | tatrādir vastra-kānti-praciti-bhagavatī-kṛṣṭa-lakṣmī-pracāraḥ kiṃ cānyaḥ kānta-vāsaś chavi-śavalanayā sṛṣṭa-pūrvānukāraḥ

Sanskrit only: no published translation is held for this verse.

तथा- आद्यः कृष्णाम्बुज-श्री-विजयि-मुख-महा-शोभया दत्त-मोदस् तत् सध्र्यङ् पुण्डरीक-द्युति-परिचय-जिद्-वक्त्र-रोचिर्-विनोदः । तत्रादिर् नेत्र-शोभा-विरचित-रुचिमत्-खञ्जन-द्योतनोऽदः किं चान्यश् चक्षुर् अन्तारुण-कुसुम-रजः-पिञ्जरालि-प्रतोदः

tathā- ādyaḥ kṛṣṇāmbuja-śrī-vijayi-mukha-mahā-śobhayā datta-modas tat sadhryaṅ puṇḍarīka-dyuti-paricaya-jid-vaktra-rocir-vinodaḥ | tatrādir netra-śobhā-viracita-rucimat-khañjana-dyotano'daḥ kiṃ cānyaś cakṣur antāruṇa-kusuma-rajaḥ-piñjarāli-pratodaḥ

Sanskrit only: no published translation is held for this verse.

तथा- आद्यः श्री-कुण्डलान्तर्-झष-मुख-सुख-कृद्-द्योत-गण्ड-स्थलीकस् तत् सध्र्यङ् शश्वद् एक-श्रुति-किरण-लसत्-कर्णिकाभावलीकः । तत्रादिश् चाप-वद्-भ्रू-मिल-तिल-कुसुम-घ्राण-वाणच् छवीकः किं चान्यश् तद् द्वितीय-द्युति-जित-विलसत्-काम-चेतो-गवीकः

tathā- ādyaḥ śrī-kuṇḍalāntar-jhaṣa-mukha-sukha-kṛd-dyota-gaṇḍa-sthalīkas tat sadhryaṅ śaśvad eka-śruti-kiraṇa-lasat-karṇikābhāvalīkaḥ | tatrādiś cāpa-vad-bhrū-mila-tila-kusuma-ghrāṇa-vāṇac chavīkaḥ kiṃ cānyaś tad dvitīya-dyuti-jita-vilasat-kāma-ceto-gavīkaḥ

Sanskrit only: no published translation is held for this verse.

तथा- आद्यः स्वर् नाथ-रत्न-द्युति-भुज-भुजग-द्योति-रत्नैर् विचित्रस् तत् सध्र्यङ् पुष्प-रागाभिद-मणि-रचित स्तम्भ-जिद्-बाहु-चित्रः । तत्रादिः श्रील-नीलच्-छवि-निकष-दुरःस्वर्ण-रेखा-पवित्रः किं चान्यश् क्रोड-भासाशिव-गिरि-मणि-भू-कान्ति-सम्पल्-लवित्रः

tathā- ādyaḥ svar nātha-ratna-dyuti-bhuja-bhujaga-dyoti-ratnair vicitras tat sadhryaṅ puṣpa-rāgābhida-maṇi-racita stambha-jid-bāhu-citraḥ | tatrādiḥ śrīla-nīlac-chavi-nikaṣa-duraḥsvarṇa-rekhā-pavitraḥ kiṃ cānyaś kroḍa-bhāsāśiva-giri-maṇi-bhū-kānti-sampal-lavitraḥ

Sanskrit only: no published translation is held for this verse.

तथा- आद्यः साङ्गाधराङ्ग-च्छवि-कवि-कविता-वर्धि-नानर्धि-युक्तस्- तत् सध्र्यङ् तद् वद् एव प्रति-लव-रुचिरः सर्व-विद्वद्भिर् उक्तः । तत्रादिः पद्म-जिद्भ्यां निज-कटक-वरायेव पद्भ्यां प्रयुक्तः किं चान्यस् तत्-सहायाव् इव निज-चरणौ चालयन् भी-प्रयुक्तः

tathā- ādyaḥ sāṅgādharāṅga-cchavi-kavi-kavitā-vardhi-nānardhi-yuktas- tat sadhryaṅ tad vad eva prati-lava-ruciraḥ sarva-vidvadbhir uktaḥ | tatrādiḥ padma-jidbhyāṃ nija-kaṭaka-varāyeva padbhyāṃ prayuktaḥ kiṃ cānyas tat-sahāyāv iva nija-caraṇau cālayan bhī-prayuktaḥ

Sanskrit only: no published translation is held for this verse.

तथा- आद्यः सार्द्राङ्ग-नील-प्रगुण-तरु-लता-हस्तता-शस्त-खेलस्- तत्-सध्र्यङ् कन्दुकार्थं कृतहलतया शाखया लब्ध-मेलः । तत्रादिः सङ्कुचद्-धीर् अवयव-निचय-व्याप्तये क् प्त-चेलः किं चान्यस् तस्य तद्वन् मिलन-कृति-कृते वीक्षितागामि-वेलः ॥ग्च् २,२।१९॥ इति । किं च- शिती स-तडिद्-अंशुकौ सद् अवतंस-वाम-श्रुती पुरु-प्रभव-रोहिणी सुख-सुतौ बलाख्यान्वितौ । स-केलि-मित-धेनुकौ परिहृतान्य-जन्मास्पदौ ददर्श बल-केश्वौ कलभवत् स वत्सान्तरे

tathā- ādyaḥ sārdrāṅga-nīla-praguṇa-taru-latā-hastatā-śasta-khelas- tat-sadhryaṅ kandukārthaṃ kṛtahalatayā śākhayā labdha-melaḥ | tatrādiḥ saṅkucad-dhīr avayava-nicaya-vyāptaye k pta-celaḥ kiṃ cānyas tasya tadvan milana-kṛti-kṛte vīkṣitāgāmi-velaḥ ||GC 2,2.19|| iti | kiṃ ca- śitī sa-taḍid-aṃśukau sad avataṃsa-vāma-śrutī puru-prabhava-rohiṇī sukha-sutau balākhyānvitau | sa-keli-mita-dhenukau parihṛtānya-janmāspadau dadarśa bala-keśvau kalabhavat sa vatsāntare

Sanskrit only: no published translation is held for this verse.

अपि च- असित-मणि-सुवर्ण-वर्ण-वासः कटि-घटितामल-शृङ्ग-वेणु-सङ्गौ । कर-धृत-पटु-पट्ट-शुल्व-यष्ठी मुसलि-हरी हरतः स्म चित्तम् अस्य

api ca- asita-maṇi-suvarṇa-varṇa-vāsaḥ kaṭi-ghaṭitāmala-śṛṅga-veṇu-saṅgau | kara-dhṛta-paṭu-paṭṭa-śulva-yaṣṭhī musali-harī harataḥ sma cittam asya

Sanskrit only: no published translation is held for this verse.

प्रभावानुभवी यः स्यात् प्रभावस् तस्य कारणम् । गुरु-लाघव-भावाय सर्वम् एवान्यथान्यथा

prabhāvānubhavī yaḥ syāt prabhāvas tasya kāraṇam | guru-lāghava-bhāvāya sarvam evānyathānyathā

Sanskrit only: no published translation is held for this verse.

तत्र च- अक्रूरं प्रणतं मिलन् व्रज-पतिः कंसोत्थ-दुःखं स्मरन् सास्राशीर्-वचसाखिल-क्लम-हरं यद् यद् गुणैस् तुष्टुवे । सारल्येऽप्य् अलम् अस्य तादृशि मनः-क्रौर्यं तदीयं स्मरच् चित्तं क्षुभ्यति जाज्वलीति मम हा भष्मीभवत्य् अद्य च

tatra ca- akrūraṃ praṇataṃ milan vraja-patiḥ kaṃsottha-duḥkhaṃ smaran sāsrāśīr-vacasākhila-klama-haraṃ yad yad guṇais tuṣṭuve | sāralye'py alam asya tādṛśi manaḥ-krauryaṃ tadīyaṃ smarac cittaṃ kṣubhyati jājvalīti mama hā bhaṣmībhavaty adya ca

Sanskrit only: no published translation is held for this verse.

सुखाविष्टं पुनस् ताभ्यां कृत-जननी-संभृत-भोजनाभ्यां सह रहसि निविष्टम् अक्रूरं स्वयं कृष्णस् तद् दर्शनतः समुद्बुद्ध-कंस-वधादि-तृष्णस् तद् इदम् इष्टं पप्रच्छ । यत्र च क्रम-चातुरी माधुरीभिर् इयं सर्व-सुख-धुरीणतां वहति- किं तात सौम्य सुखम् आगतम् अत्र शं वः किं तत्र कंस-हतके न हते चिरस्य । तौ जीवतः किम् इव वा पितराव् इदानीं किं वा तवागमन-मङ्गल-बीजम् आसीत्

sukhāviṣṭaṃ punas tābhyāṃ kṛta-jananī-saṃbhṛta-bhojanābhyāṃ saha rahasi niviṣṭam akrūraṃ svayaṃ kṛṣṇas tad darśanataḥ samudbuddha-kaṃsa-vadhādi-tṛṣṇas tad idam iṣṭaṃ papraccha | yatra ca krama-cāturī mādhurībhir iyaṃ sarva-sukha-dhurīṇatāṃ vahati- kiṃ tāta saumya sukham āgatam atra śaṃ vaḥ kiṃ tatra kaṃsa-hatake na hate cirasya | tau jīvataḥ kim iva vā pitarāv idānīṃ kiṃ vā tavāgamana-maṅgala-bījam āsīt

Sanskrit only: no published translation is held for this verse.

तत्र च- बक एकङ्गिलस् तावद् अघः सर्वङ्गिलः स्थितः । इन्द्रः सर्वङ्कषस् तेषु कंसकः कं समीयति ?

tatra ca- baka ekaṅgilas tāvad aghaḥ sarvaṅgilaḥ sthitaḥ | indraḥ sarvaṅkaṣas teṣu kaṃsakaḥ kaṃ samīyati ?

Sanskrit only: no published translation is held for this verse.

कुत्र वा रमतां पुत्रस् तवान्यत्र व्रजाधिप । भक्तानुकम्पा-सम्पाती पश्य ते वश्य एव सः

kutra vā ramatāṃ putras tavānyatra vrajādhipa | bhaktānukampā-sampātī paśya te vaśya eva saḥ

Sanskrit only: no published translation is held for this verse.

स्फूर्जथु-प्रतिमम् ऊर्जितं तदा घोषणं सपदि घोषम् अन्वभूत् यद् बभूवुर् अपराः पराहता हा हता इव च राधिकादिकाः

sphūrjathu-pratimam ūrjitaṃ tadā ghoṣaṇaṃ sapadi ghoṣam anvabhūt yad babhūvur aparāḥ parāhatā hā hatā iva ca rādhikādikāḥ

Sanskrit only: no published translation is held for this verse.

काश्चिन् म्लानाननास् तच्-छ्रवण-दहनज-ज्वालया काश्चनासन् क्षीणाङ्ग-स्रस्त-वेषा जड-निभ-वपुषः काश् च काश्चिद् विचित्ताः । ता एताः केन वर्ण्याः य इह निज-हृदि स्पृष्ट-तद्-भाव-कष्टः किं वा तत्-स्पृष्टि-शून्यः स च स च यद् अलं जाड्यम् एव प्रयाति

kāścin mlānānanās tac-chravaṇa-dahanaja-jvālayā kāścanāsan kṣīṇāṅga-srasta-veṣā jaḍa-nibha-vapuṣaḥ kāś ca kāścid vicittāḥ | tā etāḥ kena varṇyāḥ ya iha nija-hṛdi spṛṣṭa-tad-bhāva-kaṣṭaḥ kiṃ vā tat-spṛṣṭi-śūnyaḥ sa ca sa ca yad alaṃ jāḍyam eva prayāti

Sanskrit only: no published translation is held for this verse.

अथ निशि रमणीनां मूर्च्छनं निर्ममे या चिद्-उदयम् अपि कल्ये घोषणा सैव चक्रे । वपुषि दहन-तप्ते भेषजं तेन तप्तिर् विषम् अपि विष-दुष्टे श्रेष्ठम् इष्टं भिषग्भिः

atha niśi ramaṇīnāṃ mūrcchanaṃ nirmame yā cid-udayam api kalye ghoṣaṇā saiva cakre | vapuṣi dahana-tapte bheṣajaṃ tena taptir viṣam api viṣa-duṣṭe śreṣṭham iṣṭaṃ bhiṣagbhiḥ

Sanskrit only: no published translation is held for this verse.

बकी-रिपोः कंस-जयेऽपि सिद्धे शङ्केमहि स्वार्थ-विनष्टिम् एताम् । भवेद् असौ यादव-राजधान्यां राजेति गोष्ठे कथम् अत्र तिष्ठेत् ?

bakī-ripoḥ kaṃsa-jaye'pi siddhe śaṅkemahi svārtha-vinaṣṭim etām | bhaved asau yādava-rājadhānyāṃ rājeti goṣṭhe katham atra tiṣṭhet ?

Sanskrit only: no published translation is held for this verse.

ग्रामीणा वयम् इह गोप-वर्ग-कन्या नागर्यः पुरम् अनु सन्ति राज-पुत्र्यः कृष्णस् तु ग्रहिल-मना गुणेषु तस्माद् अस्यान्तः कथम् इव नः प्रतिस्मृतिः स्यात् ?

grāmīṇā vayam iha gopa-varga-kanyā nāgaryaḥ puram anu santi rāja-putryaḥ kṛṣṇas tu grahila-manā guṇeṣu tasmād asyāntaḥ katham iva naḥ pratismṛtiḥ syāt ?

Sanskrit only: no published translation is held for this verse.

निमेषः कल्पः स्याद् यद् अपकलने यस्य विपिने गतौ यत् कृच्छ्रं तत् कलयति न आत्मा न तु परः । मधोः पूर्यां तस्य व्रजनम् अथ राज्याय यद् इदं कथं तद् वास्माकं बत किम् अपि धैर्यं कलयतु ?

nimeṣaḥ kalpaḥ syād yad apakalane yasya vipine gatau yat kṛcchraṃ tat kalayati na ātmā na tu paraḥ | madhoḥ pūryāṃ tasya vrajanam atha rājyāya yad idaṃ kathaṃ tad vāsmākaṃ bata kim api dhairyaṃ kalayatu ?

Sanskrit only: no published translation is held for this verse.

अस्माकं राग-जातिर् वत लषति न नः शर्म तस्यापि राज्यं किन्त्व् एकान्त-स्थम् इच्छत्य् अनुलवम् अपि तं सेवितुं प्राण-कान्तम् आत्माप्य् अन्तर्धिया तद्-दृग्-अमृत-विरहं मीनवच् छङ्कमानस् तत् प्राग् एवाति शुष्यन् गणयति न परं नापरं किञ्चनात्र

asmākaṃ rāga-jātir vata laṣati na naḥ śarma tasyāpi rājyaṃ kintv ekānta-stham icchaty anulavam api taṃ sevituṃ prāṇa-kāntam ātmāpy antardhiyā tad-dṛg-amṛta-virahaṃ mīnavac chaṅkamānas tat prāg evāti śuṣyan gaṇayati na paraṃ nāparaṃ kiñcanātra

Sanskrit only: no published translation is held for this verse.

हा तस्य स्मित-चारु-वक्त्र-वलयं खेलाञ्चि-नेत्राञ्चलं चित्तानन्द-विधायि-गीर्-विलसितं लीलाकुलं लोकनम् । साक्षात्-कृत्य न जातु तत् तद् उपमां चासोढ या विघ्न-धीस् त्यागार्तिं यदि सा सहेत गरलं तत्रामृतं वेत्ति न

hā tasya smita-cāru-vaktra-valayaṃ khelāñci-netrāñcalaṃ cittānanda-vidhāyi-gīr-vilasitaṃ līlākulaṃ lokanam | sākṣāt-kṛtya na jātu tat tad upamāṃ cāsoḍha yā vighna-dhīs tyāgārtiṃ yadi sā saheta garalaṃ tatrāmṛtaṃ vetti na

Sanskrit only: no published translation is held for this verse.

राधे पूर्व-कथा सेयं न तु साम्प्रतिकी स्थितिः । पश्य त्वद्-वचनं म्लानं पश्यन् म्लायति सोऽप्य् असौ

rādhe pūrva-kathā seyaṃ na tu sāmpratikī sthitiḥ | paśya tvad-vacanaṃ mlānaṃ paśyan mlāyati so'py asau

Sanskrit only: no published translation is held for this verse.