अदितिर् वै प्रजाकामौदनम् अपचत् तत उच्छिष्टम् अश्नात् सो गर्भम् अधत्त तत आदित्या अजायन्त य एष ओदनः पच्यत आरम्भणम् एवैतत् क्रियते आक्रमणम् एव प्रादेशमात्रीः समिधो भवन्त्य् एतावां ह्य् आत्मा प्रजापतिना संमितो ऽग्नेर् वै या यज्ञिया तनूर् अश्वत्थे तया समगच्छत एषा स्वधृत्या तनूर् यद् घृतं यद् घृतेन समिधो ऽनक्ति ताभ्याम् एवैनं तं तनूभ्यां समर्धयति यन् निर्मार्गस्यादधात्य् अवकूत्या वै वीर्यं क्रियते यन् निर्मार्गस्यादधात्य् अवकूत्या एव संवत्सरो वै प्रजननम् अग्निः प्रजननम् एतत् प्रजननं यत् संवत्सर ऋचाग्नौ समिधम् आदधाति प्रजननाद् एवैनं तत् प्रजनयिता प्रजनयत्य् अवत्य् अत्तुर् वै पुरुषो न हि तद् वेद यद् अत्तुम् अभिजायते यन् नक्षत्रं तद् आप्नोति य एष ओदनः पच्यते योनिर् एवैषा क्रियते यत् समिध आधीयन्ते रेतस् तत् ध्रीयते संवत्सरो वै रेतो हितं प्रजायते ये संवत्सरे पर्य् एते ऽग्निम् आधत्ते प्रजापतिर् एवैनम् आधत्ते द्वादशसु रात्रीषु पुरा संवत्सरस्याधेयात् ता हि संवत्सरस्य प्रतिमा अथो तिसृष्व् अथो द्वयोर् अथो पूर्वेद्युर् आधेयात् ते वा अग्निम् आदधानेनादित्या वा इत उत्तरम् एष मे ऽमुष्मिंल् लोक आयंस् ते पथि रक्षन्त इयन् तद् उ यक्ष्यमाणं प्रतिनुदन्त उच्छेषणभाजा वा आदित्या यद् उच्छिष्टं यद् उच्छिष्टेन समिधो ऽनक्ति तेभ्य एव प्रोवाच तेभ्य एव प्रोच्य स्वर्गं लोकं यन्ति
aditir vai prajākāmaudanam apacat tata ucchiṣṭam aśnāt so garbham adhatta tata ādityā ajāyanta ya eṣa odanaḥ pacyata ārambhaṇam evaitat kriyate ākramaṇam eva prādeśamātrīḥ samidho bhavanty etāvāṃ hy ātmā prajāpatinā saṃmito 'gner vai yā yajñiyā tanūr aśvatthe tayā samagacchata eṣā svadhṛtyā tanūr yad ghṛtaṃ yad ghṛtena samidho 'nakti tābhyām evainaṃ taṃ tanūbhyāṃ samardhayati yan nirmārgasyādadhāty avakūtyā vai vīryaṃ kriyate yan nirmārgasyādadhāty avakūtyā eva saṃvatsaro vai prajananam agniḥ prajananam etat prajananaṃ yat saṃvatsara ṛcāgnau samidham ādadhāti prajananād evainaṃ tat prajanayitā prajanayaty avaty attur vai puruṣo na hi tad veda yad attum abhijāyate yan nakṣatraṃ tad āpnoti ya eṣa odanaḥ pacyate yonir evaiṣā kriyate yat samidha ādhīyante retas tat dhrīyate saṃvatsaro vai reto hitaṃ prajāyate ye saṃvatsare pary ete 'gnim ādhatte prajāpatir evainam ādhatte dvādaśasu rātrīṣu purā saṃvatsarasyādheyāt tā hi saṃvatsarasya pratimā atho tisṛṣv atho dvayor atho pūrvedyur ādheyāt te vā agnim ādadhānenādityā vā ita uttaram eṣa me 'muṣmiṃl loka āyaṃs te pathi rakṣanta iyan tad u yakṣyamāṇaṃ pratinudanta uccheṣaṇabhājā vā ādityā yad ucchiṣṭaṃ yad ucchiṣṭena samidho 'nakti tebhya eva provāca tebhya eva procya svargaṃ lokaṃ yanti
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.