पञ्च ह वा एते ब्रह्मचारिण्य् अग्नयो धीयन्ते द्वौ पृथग्घस्तयोर् मुखे हृदय उपस्थ एव पञ्चमः । स यद् दक्षिणेन पाणिना स्त्रियं न स्पृशति तेनाहरहर् याजिनां लोकम् अवरुन्धे यत् सव्येन तेन प्रव्राजिनां यन् मुखेन तेनाग्निप्रस्कन्दिनां यद्धृदयेन तेन शूराणां यद् उपस्थेन तेन गृहमेधिनां तैश् चेत् स्त्रियं पराहरत्य् अनग्निर् इव शिष्यते । स यद् अहरहर् आचार्याय कुले ऽनुतिष्ठते सो ऽनुष्ठाय ब्रूयाद् धर्मगुप्तो मा गोपायेति धर्मो हैनं गुप्तो गोपायेति तस्य ह प्रजा श्वः श्वः श्रेयसी श्रेयसी ह भवति धाय्यैव प्रतिधीयते स्वर्गे लोके पितॄन् निदधाति तान्तवं न वसीत यस् तान्तवं वस्ते क्षत्रं वर्धते न ब्रह्म तस्मात् तान्तवं न वसीत ब्रह्म वर्धतां मा क्षत्रम् इति नोपर्य् आसीत यद् उपर्य् आस्ते प्राणम् एव तदात्मने ऽधरं कुरुते यद् वातो वहति अध एवासीत अधः शयीत अधस् तिष्ठेद् अधो व्रजेद् एवं ह स्म वैतत् पूर्वे ब्राह्मणा ब्रह्मचर्यं चरन्ति तं ह स्म तत्पुत्रं भ्रातरं वोपतापिनम् आहुर् उपनयेतैनम् इत्य् आसमिद्धारात् स्वरेष्यन्तो ऽन्नम् अद्याद् अथाह जघनम् आहुः स्नापयेतैनम् इत्य् आसमिद्धारान् न ह्य् एतानि व्रतानि भवन्ति तं चेच्छयानम् आचार्यो ऽभिवदेत् स प्रतिसंहाय प्रतिशृणुयात् तं चेच्छयानम् उप्य्ताय तं चेद् उत्थितम् अभिप्रक्रम्य तं चेद् अभिप्रक्रान्तम् अभिपलायमानम् एवं ह स्म वैतत् पूर्वे ब्राह्मणा ब्रह्मचर्यं चरन्ति तेषां ह स्म वैषा पुण्या कीर्तिर् गच्छत्य् आह वा अयं सो ऽद्य गमिष्यतीति
pañca ha vā ete brahmacāriṇy agnayo dhīyante dvau pṛthagghastayor mukhe hṛdaya upastha eva pañcamaḥ / sa yad dakṣiṇena pāṇinā striyaṃ na spṛśati tenāharahar yājināṃ lokam avarundhe yat savyena tena pravrājināṃ yan mukhena tenāgnipraskandināṃ yaddhṛdayena tena śūrāṇāṃ yad upasthena tena gṛhamedhināṃ taiś cet striyaṃ parāharaty anagnir iva śiṣyate / sa yad aharahar ācāryāya kule 'nutiṣṭhate so 'nuṣṭhāya brūyād dharmagupto mā gopāyeti dharmo hainaṃ gupto gopāyeti tasya ha prajā śvaḥ śvaḥ śreyasī śreyasī ha bhavati dhāyyaiva pratidhīyate svarge loke pitṝn nidadhāti tāntavaṃ na vasīta yas tāntavaṃ vaste kṣatraṃ vardhate na brahma tasmāt tāntavaṃ na vasīta brahma vardhatāṃ mā kṣatram iti nopary āsīta yad upary āste prāṇam eva tadātmane 'dharaṃ kurute yad vāto vahati adha evāsīta adhaḥ śayīta adhas tiṣṭhed adho vrajed evaṃ ha sma vaitat pūrve brāhmaṇā brahmacaryaṃ caranti taṃ ha sma tatputraṃ bhrātaraṃ vopatāpinam āhur upanayetainam ity āsamiddhārāt svareṣyanto 'nnam adyād athāha jaghanam āhuḥ snāpayetainam ity āsamiddhārān na hy etāni vratāni bhavanti taṃ cecchayānam ācāryo 'bhivadet sa pratisaṃhāya pratiśṛṇuyāt taṃ cecchayānam upytāya taṃ ced utthitam abhiprakramya taṃ ced abhiprakrāntam abhipalāyamānam evaṃ ha sma vaitat pūrve brāhmaṇā brahmacaryaṃ caranti teṣāṃ ha sma vaiṣā puṇyā kīrtir gacchaty āha vā ayaṃ so 'dya gamiṣyatīti
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.