Guhyasamājamaṇḍalavidhi 1

होमो बाह्यो ऽनुमेयो ऽयं चित्तमात्रात् तु मानसः । अनुत्तरस् त्व् अयं ज्ञानाग्निस्कन्धेन्धनदाहतः

homo bāhyo 'numeyo 'yaṃ cittamātrāt tu mānasaḥ | anuttaras tv ayaṃ jñānāgniskandhendhanadāhataḥ

Sanskrit only: no published translation is held for this verse.

कामैर् एवं समस्तैः स्वं स्वदैवात्मस्वभावजम् । परांश् च पूजयेद् एवं समयः सुगतैर् मतः

kāmair evaṃ samastaiḥ svaṃ svadaivātmasvabhāvajam | parāṃś ca pūjayed evaṃ samayaḥ sugatair mataḥ

Sanskrit only: no published translation is held for this verse.

तत् तत् कायादि यत् कर्म सर्वबुद्धांस् तु पूजयन् । अनुरूपं जगत् कार्यं कुर्यान् नित्यं समाहितः

tat tat kāyādi yat karma sarvabuddhāṃs tu pūjayan | anurūpaṃ jagat kāryaṃ kuryān nityaṃ samāhitaḥ

Sanskrit only: no published translation is held for this verse.

यत् कायवाङ्मयं कर्म मुद्रामन्त्रात्मकं महत् । तत् तत् कर्म समासाद्य सर्वबुद्धांस् तु पूजयेत्

yat kāyavāṅmayaṃ karma mudrāmantrātmakaṃ mahat | tat tat karma samāsādya sarvabuddhāṃs tu pūjayet

Sanskrit only: no published translation is held for this verse.

वस्तुन्य् एकत्र संकल्पा नानाकारावभासिनः । मुक्तिदुःखसुखोत्पादाः कर्माशेषा भवन्ति यत्

vastuny ekatra saṃkalpā nānākārāvabhāsinaḥ | muktiduḥkhasukhotpādāḥ karmāśeṣā bhavanti yat

Sanskrit only: no published translation is held for this verse.

तस्माच् छुभाशुभं कर्म कायाद्यं कल्पनोद्भवम् । सर्वसत्कल्पनिर्मुक्ते ज्ञाने तत्कल्पना कथम्

tasmāc chubhāśubhaṃ karma kāyādyaṃ kalpanodbhavam | sarvasatkalpanirmukte jñāne tatkalpanā katham

Sanskrit only: no published translation is held for this verse.

अमोघवज्रसच्चक्री समयोत्थापनाय तु । हृत्कर्मवज्रखं ध्यात्वा सर्वशुद्ध्याभिषेचयेत्

amoghavajrasaccakrī samayotthāpanāya tu | hṛtkarmavajrakhaṃ dhyātvā sarvaśuddhyābhiṣecayet

Sanskrit only: no published translation is held for this verse.

गुर्ववज्ञादिके दोषे सदानं भोज्यम् आवहेत् । बाह्यस्नानं स्वचक्रस्थः कुर्यात् सेकविधानतः

gurvavajñādike doṣe sadānaṃ bhojyam āvahet | bāhyasnānaṃ svacakrasthaḥ kuryāt sekavidhānataḥ

Sanskrit only: no published translation is held for this verse.

सन्ध्यान्तरे ऽपि पूजादि जपं कृत्वा तु पूर्ववत् । हृद्यन्तर्गतसच्चक्रः सुप्यात् प्रज्ञाकृपान्वितः

sandhyāntare 'pi pūjādi japaṃ kṛtvā tu pūrvavat | hṛdyantargatasaccakraḥ supyāt prajñākṛpānvitaḥ

Sanskrit only: no published translation is held for this verse.

उत्थानसमये श्रीमान् देवीसंगीतिचोदितः । प्रातर् उत्थाय प्राग्वत् तु संजपेद् आदिकर्मिकः

utthānasamaye śrīmān devīsaṃgīticoditaḥ | prātar utthāya prāgvat tu saṃjaped ādikarmikaḥ

Sanskrit only: no published translation is held for this verse.

मन्त्रसीलव्रतैर् युक्तश् चक्षुःकायाद्यधिष्ठितः । ज्ञाने किञ्चित्समावेशी जपेत् सन्ध्यास्व् अतन्द्रितः

mantrasīlavratair yuktaś cakṣuḥkāyādyadhiṣṭhitaḥ | jñāne kiñcitsamāveśī japet sandhyāsv atandritaḥ

Sanskrit only: no published translation is held for this verse.

सर्वाकारसुनिष्पन्नं स्फरत्सम्हारकारकं । प्राप्तज्ञानवशी किञ्चिद् अनिशं योगम् आश्रयेत्

sarvākārasuniṣpannaṃ spharatsamhārakārakaṃ | prāptajñānavaśī kiñcid aniśaṃ yogam āśrayet

Sanskrit only: no published translation is held for this verse.

सम्यग्ज्ञानवशी ध्यायन् कुर्यात् कार्यं जगद्धितम् । धात्वण्वन्तस् त्रिसच्चक्रैः प्रतिबिम्बात्ममूर्तिभिः

samyagjñānavaśī dhyāyan kuryāt kāryaṃ jagaddhitam | dhātvaṇvantas trisaccakraiḥ pratibimbātmamūrtibhiḥ

Sanskrit only: no published translation is held for this verse.

संसिद्धाव् असकृल् लब्ध्वा योगी निमित्तम् एव तु । त्रितत्त्वां विधिवत् पूजां कृत्वा मण्डलम् आलिखेत्

saṃsiddhāv asakṛl labdhvā yogī nimittam eva tu | tritattvāṃ vidhivat pūjāṃ kṛtvā maṇḍalam ālikhet

Sanskrit only: no published translation is held for this verse.

चक्रस्थो विधिवज् जप्त्वा स्वयं वाध्येषितो ऽपि वा । परार्थं घटमानो ऽपि निमित्तं प्राप्य संलिखेत्

cakrastho vidhivaj japtvā svayaṃ vādhyeṣito 'pi vā | parārthaṃ ghaṭamāno 'pi nimittaṃ prāpya saṃlikhet

Sanskrit only: no published translation is held for this verse.

चक्रिमन्त्रं जपेल् लक्षं लक्षम् वा स्वाधिदैवतम् । अन्येषाम् अयुतं सम्यक् चक्रिणां वाज्ञया लिखेत्

cakrimantraṃ japel lakṣaṃ lakṣam vā svādhidaivatam | anyeṣām ayutaṃ samyak cakriṇāṃ vājñayā likhet

Sanskrit only: no published translation is held for this verse.

त्रितत्त्वैर् गर्भितोत्सर्गान् अन्यान् हृद्बीजगर्भितान् । सानुस्वाराद्यवर्णांस् तु नाम्नो मन्त्रान् समुद्धरेत्

tritattvair garbhitotsargān anyān hṛdbījagarbhitān | sānusvārādyavarṇāṃs tu nāmno mantrān samuddharet

Sanskrit only: no published translation is held for this verse.

कायवाक्चित्तगुह्याख्या कर्मधर्ममहात्मिका । त्रिगुह्या समया मुद्रा बीजं हृदयम् उच्यते

kāyavākcittaguhyākhyā karmadharmamahātmikā | triguhyā samayā mudrā bījaṃ hṛdayam ucyate

Sanskrit only: no published translation is held for this verse.

कर्मकर्त्री तु विद्योक्ता शान्त्यादिप्रतिचोदनात् । मालामन्त्राश् च विद्योक्ता सर्वथा तां जपेत् बुधः

karmakartrī tu vidyoktā śāntyādipraticodanāt | mālāmantrāś ca vidyoktā sarvathā tāṃ japet budhaḥ

Sanskrit only: no published translation is held for this verse.

यथायोगं जपं कृत्वा लब्ध्वाज्ञां स्वाधिपादितः । निरोधचक्रम् आभुज्य स्वचित्तशुद्धितो लिखेत्

yathāyogaṃ japaṃ kṛtvā labdhvājñāṃ svādhipāditaḥ | nirodhacakram ābhujya svacittaśuddhito likhet

Sanskrit only: no published translation is held for this verse.

विघ्नान् उत्सार्य संकील्याभ्युक्ष्य क्ष्मां प्रार्थ्य याचयेत् । समाधित्रितयं कृत्वा बुद्धादीन् अधिवास्य च

vighnān utsārya saṃkīlyābhyukṣya kṣmāṃ prārthya yācayet | samādhitritayaṃ kṛtvā buddhādīn adhivāsya ca

Sanskrit only: no published translation is held for this verse.

दत्त्वा बल्यर्घम् आपूज्य होमैर् आप्याय्य खे न्यसेत् । खानयेत् क्ष्मां सुनिर्विघ्नां गर्तापूरे ऽपि अयं क्रमः

dattvā balyargham āpūjya homair āpyāyya khe nyaset | khānayet kṣmāṃ sunirvighnāṃ gartāpūre 'pi ayaṃ kramaḥ

Sanskrit only: no published translation is held for this verse.

आचीर्णपूर्वसंसेवो मञ्जुवज्रात्मयोगवान् । संस्कृत्य मण्डलस्थानं संहार्यैः पूजयान्वितः

ācīrṇapūrvasaṃsevo mañjuvajrātmayogavān | saṃskṛtya maṇḍalasthānaṃ saṃhāryaiḥ pūjayānvitaḥ

Sanskrit only: no published translation is held for this verse.

विघ्नारिचक्रयोगस्थः स्वाभिषेकं समादधेत् । दुष्टान् निकृन्तयेद् एवं योगाद् वा स्वाधिदैवतात् । १४७ ॐ भूः खम् इति मन्त्रेण वियद्भूतां वसुन्धराम् । हूं लं हूं इति वज्रात्म क्ष्मां कृत्वा ताम् अधिष्ठयेत्

vighnāricakrayogasthaḥ svābhiṣekaṃ samādadhet | duṣṭān nikṛntayed evaṃ yogād vā svādhidaivatāt | 147 oṃ bhūḥ kham iti mantreṇa viyadbhūtāṃ vasundharām | hūṃ laṃ hūṃ iti vajrātma kṣmāṃ kṛtvā tām adhiṣṭhayet

Sanskrit only: no published translation is held for this verse.

ॐ मेदिनि वज्रीभव वज्रबन्ध हूम् ॥ प्राग्वद् विघ्नघ्नयोगात्मा सेवाद्यन्तानुरागणः । आदियोगी स्वचक्रं तु प्रोत्सृज्यान्तामृतश् च सः

oṃ medini vajrībhava vajrabandha hūm || prāgvad vighnaghnayogātmā sevādyantānurāgaṇaḥ | ādiyogī svacakraṃ tu protsṛjyāntāmṛtaś ca saḥ

Sanskrit only: no published translation is held for this verse.

चक्रराजाग्रियोगात्मा चक्रकर्मसुकर्मकृत् । कर्मराजाग्रियोगीति समाधित्रयम् उत्तमम्

cakrarājāgriyogātmā cakrakarmasukarmakṛt | karmarājāgriyogīti samādhitrayam uttamam

Sanskrit only: no published translation is held for this verse.

एतद्योगस्थ आचार्यः सर्वबुद्धात्ममूर्तिकः । स्वभावशुद्धवज्रात्मा चक्रभूमध्यसंस्थितः

etadyogastha ācāryaḥ sarvabuddhātmamūrtikaḥ | svabhāvaśuddhavajrātmā cakrabhūmadhyasaṃsthitaḥ

Sanskrit only: no published translation is held for this verse.

वज्रघण्टाधरो वीरो ऽध्येष्यस् त्रिचक्रनिर्मितौ । सहायैर् वज्रघण्टाग्रैः शाश्वताद्यात्ममूर्तिभिः

vajraghaṇṭādharo vīro 'dhyeṣyas tricakranirmitau | sahāyair vajraghaṇṭāgraiḥ śāśvatādyātmamūrtibhiḥ

Sanskrit only: no published translation is held for this verse.

सर्वताथागतं शान्तं सर्वताथागतालयम् । सर्वधर्माग्रनैरात्म्यं देश मण्डलम् उत्तमम्

sarvatāthāgataṃ śāntaṃ sarvatāthāgatālayam | sarvadharmāgranairātmyaṃ deśa maṇḍalam uttamam

Sanskrit only: no published translation is held for this verse.

सर्वलक्षणसंपूर्णं सर्वालक्षणवर्जितम् । समन्तभद्रकायाग्रं भाष मण्डलम् उत्तमम्

sarvalakṣaṇasaṃpūrṇaṃ sarvālakṣaṇavarjitam | samantabhadrakāyāgraṃ bhāṣa maṇḍalam uttamam

Sanskrit only: no published translation is held for this verse.

शान्तधर्माग्रसंभूतं ज्ञानचर्याविशोधकम् । समन्तभद्रवाचाग्रं भाष मण्डलम् उत्तमम्

śāntadharmāgrasaṃbhūtaṃ jñānacaryāviśodhakam | samantabhadravācāgraṃ bhāṣa maṇḍalam uttamam

Sanskrit only: no published translation is held for this verse.

सर्वसत्त्वमहाचित्तं शुद्धं प्रकृतिनिर्मलम् । समन्तभद्रचित्ताग्र्यं घोष मण्डलसारथे

sarvasattvamahācittaṃ śuddhaṃ prakṛtinirmalam | samantabhadracittāgryaṃ ghoṣa maṇḍalasārathe

Sanskrit only: no published translation is held for this verse.

वीक्ष्यातो मञ्जुराड् क्रुद्धः सत्त्वधातुं तमिश्रितम् । हूं वज्रोत्तिष्ठेति स्वक्षश् चक्रम् उत्क्षिप्य निर्मितम्

vīkṣyāto mañjurāḍ kruddhaḥ sattvadhātuṃ tamiśritam | hūṃ vajrottiṣṭheti svakṣaś cakram utkṣipya nirmitam

Sanskrit only: no published translation is held for this verse.

मट्कारचन्द्रशूर्याक्षः सर्वाध्वदिक्षु दीपयन् । जगद् आलोकयन् धीमांश् चक्रभूमौ परिक्रमेत्

maṭkāracandraśūryākṣaḥ sarvādhvadikṣu dīpayan | jagad ālokayan dhīmāṃś cakrabhūmau parikramet

Sanskrit only: no published translation is held for this verse.

पादतलज्वलद्वज्रो वज्रोल्लालनतत्परः । लीलावज्रपदं नृत्यन् सदंष्ट्रोत्कट-हूं-कृतः

pādatalajvaladvajro vajrollālanatatparaḥ | līlāvajrapadaṃ nṛtyan sadaṃṣṭrotkaṭa-hūṃ-kṛtaḥ

Sanskrit only: no published translation is held for this verse.

प्रोत्सारयेत् प्रदुष्टौघान् देवाद्यान् विघ्नमण्डलान् । शृण्वन्तु सर्वविघ्नौघाः कायवाक्चित्तसंस्थिताः

protsārayet praduṣṭaughān devādyān vighnamaṇḍalān | śṛṇvantu sarvavighnaughāḥ kāyavākcittasaṃsthitāḥ

Sanskrit only: no published translation is held for this verse.

अहं मञ्जुरवः श्रीमान् रक्षाचक्रप्रयोजकः । वज्रेणादीप्तवपुषा स्फालयामि त्रिकायजान्

ahaṃ mañjuravaḥ śrīmān rakṣācakraprayojakaḥ | vajreṇādīptavapuṣā sphālayāmi trikāyajān

Sanskrit only: no published translation is held for this verse.

लङ्घयेद् मे विशीर्येतात्र नान्यथा ।९३ भूमेः परिग्रहं कृत्वा निर्विघ्नाय प्रकीलयेत् । १६२ ॐ घ घ घातय २ सर्वदुष्टान् फट् कीलय २ सर्वपापान् फट् हूं हूं हूं वज्रकील वज्रधरो आज्ञापयति सर्वदुष्टकायवाक्चित्तवज्रं कीलय हूं फट् ॥ अधःशूलोर्ध्वविघ्नारिं धिया मध्ये प्रकीलयेत् । विघ्नौघान् घातयेत् सर्वान् दशदिक्संव्यवस्थितान्

laṅghayed me viśīryetātra nānyathā |93 bhūmeḥ parigrahaṃ kṛtvā nirvighnāya prakīlayet | 162 oṃ gha gha ghātaya 2 sarvaduṣṭān phaṭ kīlaya 2 sarvapāpān phaṭ hūṃ hūṃ hūṃ vajrakīla vajradharo ājñāpayati sarvaduṣṭakāyavākcittavajraṃ kīlaya hūṃ phaṭ || adhaḥśūlordhvavighnāriṃ dhiyā madhye prakīlayet | vighnaughān ghātayet sarvān daśadiksaṃvyavasthitān

Sanskrit only: no published translation is held for this verse.

संवीक्ष्य क्ष्मां सुनिर्विघ्नां तीक्ष्णज्वालाकुलप्रभाम् । सीमाप्राकारदिग्बन्धान् धिया कृत्वाधिवासयेत्

saṃvīkṣya kṣmāṃ sunirvighnāṃ tīkṣṇajvālākulaprabhām | sīmāprākāradigbandhān dhiyā kṛtvādhivāsayet

Sanskrit only: no published translation is held for this verse.

त्वं देवि साक्षिभूतासि सर्वबुद्धानां तायिनाम् । चर्यानयविशेषेषु भूमिपारमीतासु च

tvaṃ devi sākṣibhūtāsi sarvabuddhānāṃ tāyinām | caryānayaviśeṣeṣu bhūmipāramītāsu ca

Sanskrit only: no published translation is held for this verse.

यथा मारबलं भग्नं शाक्यसिंहेन तायिना । तथा मारबलं जित्वा मण्डलं लेलिखाम्य् अहम्

yathā mārabalaṃ bhagnaṃ śākyasiṃhena tāyinā | tathā mārabalaṃ jitvā maṇḍalaṃ lelikhāmy aham

Sanskrit only: no published translation is held for this verse.

क्ष्मां संलिप्य सुगन्धद्यैश् चित्रैः पुष्पैः प्रकीर्य च । चन्द्राद्यैश् चक्रिणां स्थाने प्रकुर्यान् मण्डलं बुधः

kṣmāṃ saṃlipya sugandhadyaiś citraiḥ puṣpaiḥ prakīrya ca | candrādyaiś cakriṇāṃ sthāne prakuryān maṇḍalaṃ budhaḥ

Sanskrit only: no published translation is held for this verse.

तत्रावाह्य तु सच्चक्रं कृत्वा सीमादिबन्धनम् । पूजास्तुत्यामृतास्वादं कलशान् अधिवासयेत्

tatrāvāhya tu saccakraṃ kṛtvā sīmādibandhanam | pūjāstutyāmṛtāsvādaṃ kalaśān adhivāsayet

Sanskrit only: no published translation is held for this verse.

वस्त्राच्छादितसद्ग्रीवांश् चूतादिपल्लवान्वितान् । कलशान् माण्डलेयानां तन्मन्त्रैर् अधिवासयेत्

vastrācchāditasadgrīvāṃś cūtādipallavānvitān | kalaśān māṇḍaleyānāṃ tanmantrair adhivāsayet

Sanskrit only: no published translation is held for this verse.

पञ्चव्रीह्यौषधीरत्नगन्धाम्बुचक्रसंचयम् । श्रग्बद्धवज्रमूर्धानं चक्रेशेन जपं जपेत्

pañcavrīhyauṣadhīratnagandhāmbucakrasaṃcayam | śragbaddhavajramūrdhānaṃ cakreśena japaṃ japet

Sanskrit only: no published translation is held for this verse.

अर्घं दत्त्वा समापूज्य प्रक्षिप्य सितपुष्पकम् । धूपाधिवासितं तत्र सद्गन्धाद्यब्जभाजनम्

arghaṃ dattvā samāpūjya prakṣipya sitapuṣpakam | dhūpādhivāsitaṃ tatra sadgandhādyabjabhājanam

Sanskrit only: no published translation is held for this verse.

प्रतिदिनं त्रिसन्ध्यासु बलिं दत्त्वा तथा जपेत् । ते च चक्रबहिष्कोणे जयश् चक्रेशसव्यतः

pratidinaṃ trisandhyāsu baliṃ dattvā tathā japet | te ca cakrabahiṣkoṇe jayaś cakreśasavyataḥ

Sanskrit only: no published translation is held for this verse.

तेभ्यो ऽर्घभाजने तोयं क्षिप्त्वा तेनाभिषेचनात् । आत्मनः सर्वशिष्याणां जलाभिषेचनं भवेत्

tebhyo 'rghabhājane toyaṃ kṣiptvā tenābhiṣecanāt | ātmanaḥ sarvaśiṣyāṇāṃ jalābhiṣecanaṃ bhavet

Sanskrit only: no published translation is held for this verse.

चक्रपूजां पुनः कृत्वा धूपम् उत्क्षिप्य पाणिना । चक्रेशं प्रार्थयेद् धीमान् बुद्धांश् च जानुसंस्थितः

cakrapūjāṃ punaḥ kṛtvā dhūpam utkṣipya pāṇinā | cakreśaṃ prārthayed dhīmān buddhāṃś ca jānusaṃsthitaḥ

Sanskrit only: no published translation is held for this verse.

भगवन् मञ्जुसद्वज्र विद्याराज नमो ऽस्तु ते । इच्छामि लिखितुं नाथ मण्डलं करुणात्मक

bhagavan mañjusadvajra vidyārāja namo 'stu te | icchāmi likhituṃ nātha maṇḍalaṃ karuṇātmaka

Sanskrit only: no published translation is held for this verse.

शिष्याणाम् अनुकम्पायै युष्माकं पूजनाय च । तन् मे भक्तस्य भगवन् प्रसादं कर्तुम् अर्हसि

śiṣyāṇām anukampāyai yuṣmākaṃ pūjanāya ca | tan me bhaktasya bhagavan prasādaṃ kartum arhasi

Sanskrit only: no published translation is held for this verse.

समन्वाहरन्तु मां बुद्धा जगच्चक्रक्रियार्थदाः । फलस्था बोधिसत्त्वाश् च याश् चान्या मन्त्रदेवताः

samanvāharantu māṃ buddhā jagaccakrakriyārthadāḥ | phalasthā bodhisattvāś ca yāś cānyā mantradevatāḥ

Sanskrit only: no published translation is held for this verse.

देवता लोकपालाश् च भूताः सम्बोधिशासिताः । शासनाभिरताः सत्त्वा ये केचिद् वज्रचक्षुषः

devatā lokapālāś ca bhūtāḥ sambodhiśāsitāḥ | śāsanābhiratāḥ sattvā ye kecid vajracakṣuṣaḥ

Sanskrit only: no published translation is held for this verse.

अमुको ऽहं महावज्री मञ्जुश्र्युदयमण्डलम् । लिखिष्यामि जगच्छुद्ध्यै यथाशक्त्युपचारतः

amuko 'haṃ mahāvajrī mañjuśryudayamaṇḍalam | likhiṣyāmi jagacchuddhyai yathāśaktyupacārataḥ

Sanskrit only: no published translation is held for this verse.

अनुकम्पाम् उपादाय सशिष्यस्य तु तन् मम । मण्डले सहिताः सर्वे सांनिध्यं कर्तुम् अर्हथ

anukampām upādāya saśiṣyasya tu tan mama | maṇḍale sahitāḥ sarve sāṃnidhyaṃ kartum arhatha

Sanskrit only: no published translation is held for this verse.

निमन्त्र्यैवं त्रिवारांस् तान् कृत्वा पूजादिकं विभोः । समारक्ष्य बहिर् गत्वा स्वशिष्यान् स्रक्करग्रहान्

nimantryaivaṃ trivārāṃs tān kṛtvā pūjādikaṃ vibhoḥ | samārakṣya bahir gatvā svaśiṣyān srakkaragrahān

Sanskrit only: no published translation is held for this verse.

मनीषिणो महोत्साहान् कृतज्ञनिरहङ्कृतान् । कुलिनो गुणिनः श्राद्धान् रूपवर्णवयोन्वितान्

manīṣiṇo mahotsāhān kṛtajñanirahaṅkṛtān | kulino guṇinaḥ śrāddhān rūpavarṇavayonvitān

Sanskrit only: no published translation is held for this verse.

अर्थिनश् चाभियुक्तांश् च सौगतान् मन्त्रसाधने । विरूपान् निर्गुणांश् चापि हीनान् अप्य् अधिवासयेत्

arthinaś cābhiyuktāṃś ca saugatān mantrasādhane | virūpān nirguṇāṃś cāpi hīnān apy adhivāsayet

Sanskrit only: no published translation is held for this verse.

चतुर्णाम् अप्य् अनुज्ञातः पर्षदां मण्डले विधिः । शिक्षासु स्वासु युक्तानां महायानरतात्मनाम्

caturṇām apy anujñātaḥ parṣadāṃ maṇḍale vidhiḥ | śikṣāsu svāsu yuktānāṃ mahāyānaratātmanām

Sanskrit only: no published translation is held for this verse.

मन्त्रसिद्ध्यर्थिनः केचित् प्रविशन्तीह मण्डले । पुण्यकामास् ततो ऽन्ये च परलोकार्थिनो ऽपरे

mantrasiddhyarthinaḥ kecit praviśantīha maṇḍale | puṇyakāmās tato 'nye ca paralokārthino 'pare

Sanskrit only: no published translation is held for this verse.

परलोकं समुद्दिष्य श्रद्धां कृत्वा च भूयसीम् । प्रविशेन् मण्डलं धीमान् नैहिकम् फलम् ईहयेत्

paralokaṃ samuddiṣya śraddhāṃ kṛtvā ca bhūyasīm | praviśen maṇḍalaṃ dhīmān naihikam phalam īhayet

Sanskrit only: no published translation is held for this verse.

ऐहिकं काङ्क्षमाणस्य न तथा पारलौकिकम् । परलोकार्थिनः पुंसः पुष्कलं त्व् ऐहिकं फलम्

aihikaṃ kāṅkṣamāṇasya na tathā pāralaukikam | paralokārthinaḥ puṃsaḥ puṣkalaṃ tv aihikaṃ phalam

Sanskrit only: no published translation is held for this verse.

एवम् उक्त्वा तु तान् शिष्यान् धिया स्वान्तर् निवेशितान् । प्राग्वद् वज्राब्जसंशुद्धान् इह द्वारे तु याचयेत्

evam uktvā tu tān śiṣyān dhiyā svāntar niveśitān | prāgvad vajrābjasaṃśuddhān iha dvāre tu yācayet

Sanskrit only: no published translation is held for this verse.

त्वम् मे शास्ता महारत इच्छाम्य् अहं महानाथ महाबोधिनयं दृढम्

tvam me śāstā mahārata icchāmy ahaṃ mahānātha mahābodhinayaṃ dṛḍham

Sanskrit only: no published translation is held for this verse.

देहि मे समयं तत्त्वं बोधिचित्तं च देहि मे । बुद्धं धर्मं च संघं च देहि मे शरणत्रयम् प्रवेशयस्व मां नाथ महामोक्षपुरं वरम् । १९० त्रिर् उच्चार्य च तान् शिष्यान् ज्ञात्वा सद्भक्तिवत्सलान् । प्रधानं शिष्यम् एकं तु कृत्वा ब्रूयाद् इदं वचः

dehi me samayaṃ tattvaṃ bodhicittaṃ ca dehi me | buddhaṃ dharmaṃ ca saṃghaṃ ca dehi me śaraṇatrayam praveśayasva māṃ nātha mahāmokṣapuraṃ varam | 190 trir uccārya ca tān śiṣyān jñātvā sadbhaktivatsalān | pradhānaṃ śiṣyam ekaṃ tu kṛtvā brūyād idaṃ vacaḥ

Sanskrit only: no published translation is held for this verse.

एहि वत्स महायानं मन्त्रचर्यानयं विधिम् । देशयिष्यामि ते सम्यक् भाजनस् त्वं महानये

ehi vatsa mahāyānaṃ mantracaryānayaṃ vidhim | deśayiṣyāmi te samyak bhājanas tvaṃ mahānaye

Sanskrit only: no published translation is held for this verse.

बुद्धास् त्रियध्वसंभूताः कायवाक्चित्तवज्रिणः । संप्राप्ता ज्ञानम् अतुलं वज्रमन्त्रप्रभावनैः

buddhās triyadhvasaṃbhūtāḥ kāyavākcittavajriṇaḥ | saṃprāptā jñānam atulaṃ vajramantraprabhāvanaiḥ

Sanskrit only: no published translation is held for this verse.

मन्त्रप्रयोगम् अतुलं येन भग्नं महाबलम् । मारसैन्यं महाघोरं साक्यसिंहादिभिर् वरैः

mantraprayogam atulaṃ yena bhagnaṃ mahābalam | mārasainyaṃ mahāghoraṃ sākyasiṃhādibhir varaiḥ

Sanskrit only: no published translation is held for this verse.

लोकानुवृत्तिम् आगम्य चक्रं प्रवर्त्य निर्वृताः । तस्मान् मतिम् इमां वत्स कुरु सर्वज्ञताप्तये

lokānuvṛttim āgamya cakraṃ pravartya nirvṛtāḥ | tasmān matim imāṃ vatsa kuru sarvajñatāptaye

Sanskrit only: no published translation is held for this verse.

देशनादिंस् त्रिधालाप्या बोधिचित्तं ततो गुरुः । उत्पादयेद् अनुत्पन्नम् उत्पन्नं स्मारयेत् पुनः

deśanādiṃs tridhālāpyā bodhicittaṃ tato guruḥ | utpādayed anutpannam utpannaṃ smārayet punaḥ

Sanskrit only: no published translation is held for this verse.

सर्वकर्मकृतारक्ष्य ध्यायाद् धृत्कण्ठमूर्धसु । वज्रं अब्जं तथा चक्रं हूं आः ॐ तेषु विन्यसेत्

sarvakarmakṛtārakṣya dhyāyād dhṛtkaṇṭhamūrdhasu | vajraṃ abjaṃ tathā cakraṃ hūṃ āḥ oṃ teṣu vinyaset

Sanskrit only: no published translation is held for this verse.

गन्धाम्बुवज्रसन्मुष्ट्या हूं ॐ आः एवं आपठन् । हृच्छिरःकण्ठम् आलभ्य दद्यात् पुष्पादिकं क्रमात्

gandhāmbuvajrasanmuṣṭyā hūṃ oṃ āḥ evaṃ āpaṭhan | hṛcchiraḥkaṇṭham ālabhya dadyāt puṣpādikaṃ kramāt

Sanskrit only: no published translation is held for this verse.

पुष्पं मूर्ध्नि पुरो धूपं दीपं गन्धं पुनर् हृदि । दद्यात् सर्वकृता जप्तं शिष्येभ्यो यतिर् आदरात्

puṣpaṃ mūrdhni puro dhūpaṃ dīpaṃ gandhaṃ punar hṛdi | dadyāt sarvakṛtā japtaṃ śiṣyebhyo yatir ādarāt

Sanskrit only: no published translation is held for this verse.

द्वादशाङ्गुलपुष्पाग्रम् अकीटापाटिताव्रणम् । अश्वत्थोदुम्बुरावक्रं प्रदद्याद् दन्तधावनम्

dvādaśāṅgulapuṣpāgram akīṭāpāṭitāvraṇam | aśvatthodumburāvakraṃ pradadyād dantadhāvanam

Sanskrit only: no published translation is held for this verse.

प्रागुदङ्मुखसंस्थैस् तैः खादयित्वैव प्रक्षिपेत् । गोचर्ममात्रभूलिप्ते सिद्धिं शान्त्यादिकां दिशेत्

prāgudaṅmukhasaṃsthais taiḥ khādayitvaiva prakṣipet | gocarmamātrabhūlipte siddhiṃ śāntyādikāṃ diśet

Sanskrit only: no published translation is held for this verse.

आचम्य त्रिचलुपानं दत्त्वा बाह्ये निवेश्य च । कुशान् शय्योपधानाय बाहुसूत्रैः सुरक्षयेत्

ācamya tricalupānaṃ dattvā bāhye niveśya ca | kuśān śayyopadhānāya bāhusūtraiḥ surakṣayet

Sanskrit only: no published translation is held for this verse.

त्रिचलुपानमन्त्रः ॥ ॐ ह्रीः विशुद्धधर्म सर्वपापानि चास्य शोधय सर्वविकल्पान् अपनय हूम् ॥ सर्वज्ञानां कदा लोके सम्भवो जायते न वा । उदुम्बरस्येव कुसुमं कदाचित् कर्हिचिद् भवेत्

tricalupānamantraḥ || oṃ hrīḥ viśuddhadharma sarvapāpāni cāsya śodhaya sarvavikalpān apanaya hūm || sarvajñānāṃ kadā loke sambhavo jāyate na vā | udumbarasyeva kusumaṃ kadācit karhicid bhavet

Sanskrit only: no published translation is held for this verse.

ततो ऽपि दुर्लभोत्पादो मन्त्रचर्यानयस्य हि । येन सत्त्वार्थम् अतुलं कर्तुं शक्ता ह्य् अनिर्वृताः

tato 'pi durlabhotpādo mantracaryānayasya hi | yena sattvārtham atulaṃ kartuṃ śaktā hy anirvṛtāḥ

Sanskrit only: no published translation is held for this verse.

अनेककल्पकोटीभिर् यत् कृटम् पापकम् पुरा । तत् सर्वं हि क्षयं याति दृष्ट्वा मण्डलम् ईदृशं

anekakalpakoṭībhir yat kṛṭam pāpakam purā | tat sarvaṃ hi kṣayaṃ yāti dṛṣṭvā maṇḍalam īdṛśaṃ

Sanskrit only: no published translation is held for this verse.

किम् उतानन्तयशसां मन्त्रचर्यानये स्थितः । पदं ह्य् अनुत्तरं याति जपन् वै मन्त्र तायिनाम्

kim utānantayaśasāṃ mantracaryānaye sthitaḥ | padaṃ hy anuttaraṃ yāti japan vai mantra tāyinām

Sanskrit only: no published translation is held for this verse.

उच्छिन्ना दुर्गतिस् तेषां सर्वदुःखस्य सम्भवा । येषां चर्यावरे ह्य् अस्मिन् मतिर् अत्यन्तनिर्मला

ucchinnā durgatis teṣāṃ sarvaduḥkhasya sambhavā | yeṣāṃ caryāvare hy asmin matir atyantanirmalā

Sanskrit only: no published translation is held for this verse.

अद्य युष्माभिर् अतुला लाभा लब्धा महात्मभिः । येन यूयं जिनैः सर्वैः सपुत्रैर् इह शासने

adya yuṣmābhir atulā lābhā labdhā mahātmabhiḥ | yena yūyaṃ jinaiḥ sarvaiḥ saputrair iha śāsane

Sanskrit only: no published translation is held for this verse.

सर्वे परिगृहीता स्थ जायमाना महात्मभिः । तेन यूयं महायाने श्वो जाता हि भविष्यथ

sarve parigṛhītā stha jāyamānā mahātmabhiḥ | tena yūyaṃ mahāyāne śvo jātā hi bhaviṣyatha

Sanskrit only: no published translation is held for this verse.

एष मार्गवरः श्रीमान् महायानमहोदयः । येन यूयं गमिष्यन्तो भविष्यथ तथागताः

eṣa mārgavaraḥ śrīmān mahāyānamahodayaḥ | yena yūyaṃ gamiṣyanto bhaviṣyatha tathāgatāḥ

Sanskrit only: no published translation is held for this verse.

कृत्वाथ देशनां रक्षां स्वापयेत् कुशसंस्तरे । यत् किञ्चित् पश्यथ स्वप्ने प्रातर् मे कथयिष्यथ

kṛtvātha deśanāṃ rakṣāṃ svāpayet kuśasaṃstare | yat kiñcit paśyatha svapne prātar me kathayiṣyatha

Sanskrit only: no published translation is held for this verse.

रक्षाधिष्ठादिकं कृत्वा तज् जपेत् सार्वकर्मिकम् । पञ्चकुलत्रिचक्राणां कुण्डलिः सार्वकर्मिकः

rakṣādhiṣṭhādikaṃ kṛtvā taj japet sārvakarmikam | pañcakulatricakrāṇāṃ kuṇḍaliḥ sārvakarmikaḥ

Sanskrit only: no published translation is held for this verse.

पृष्ट्वा शुभाशुभं स्वप्नं हत्वा कुण्डलिनाशुभम् । शिष्यान् संरक्ष्य तान् योग्यान् संवरं ग्राहयेत् ततः

pṛṣṭvā śubhāśubhaṃ svapnaṃ hatvā kuṇḍalināśubham | śiṣyān saṃrakṣya tān yogyān saṃvaraṃ grāhayet tataḥ

Sanskrit only: no published translation is held for this verse.

चक्रे ऽवैवर्त्यसंसेकं दत्त्वा नाथ वदस्व मे । चक्रदेवतयोस् तत्त्वम् आचार्यपरिकर्म च

cakre 'vaivartyasaṃsekaṃ dattvā nātha vadasva me | cakradevatayos tattvam ācāryaparikarma ca

Sanskrit only: no published translation is held for this verse.

समयं सर्वबुद्धानां संवरं गुह्यम् उत्तरम् । आचार्यः स्याम् अहं नित्यं सर्वसत्त्वार्थकारणात्

samayaṃ sarvabuddhānāṃ saṃvaraṃ guhyam uttaram | ācāryaḥ syām ahaṃ nityaṃ sarvasattvārthakāraṇāt

Sanskrit only: no published translation is held for this verse.

आचार्यतार्थिनः शिष्यान् ग्राहयित्वा तु संवरम् । योगम् आधाय सच्चक्रं संपूज्य खे धिया न्यसेत्

ācāryatārthinaḥ śiṣyān grāhayitvā tu saṃvaram | yogam ādhāya saccakraṃ saṃpūjya khe dhiyā nyaset

Sanskrit only: no published translation is held for this verse.

शाश्वतादिस्वरूपाभं तद्वर्णबीजसंभवम् । पञ्चज्ञानान्वितं सूत्रं पञ्चविंशतिभेदितम्

śāśvatādisvarūpābhaṃ tadvarṇabījasaṃbhavam | pañcajñānānvitaṃ sūtraṃ pañcaviṃśatibheditam

Sanskrit only: no published translation is held for this verse.

यःकारसूर्यचन्द्राक्षो मञ्जुवज्रात्मविग्रहः । दीप्तदृष्ट्यङ्कुशाकृष्तं स्ववर्णान्तर् निवेशितम्

yaḥkārasūryacandrākṣo mañjuvajrātmavigrahaḥ | dīptadṛṣṭyaṅkuśākṛṣtaṃ svavarṇāntar niveśitam

Sanskrit only: no published translation is held for this verse.

वैरोचनादिहृज्ज्ञानसूत्रं सर्वकृता सह । प्रयच्छ शाश्वत सूत्रं स्वचक्रसूत्रणाय च

vairocanādihṛjjñānasūtraṃ sarvakṛtā saha | prayaccha śāśvata sūtraṃ svacakrasūtraṇāya ca

Sanskrit only: no published translation is held for this verse.

त्रितत्त्वगर्भितं चैव यावद् अक्षोभ्यम् अर्थयन् । अन्योन्यानुगताः सर्वधर्मा इत्याद्य् अनुस्मरन्

tritattvagarbhitaṃ caiva yāvad akṣobhyam arthayan | anyonyānugatāḥ sarvadharmā ityādy anusmaran

Sanskrit only: no published translation is held for this verse.

चक्रद्विगुणतो दीर्घं द्वारविंशतिभागिकम् । पञ्चामृतसुगन्धेन तेमयित्वापि रक्षितं

cakradviguṇato dīrghaṃ dvāraviṃśatibhāgikam | pañcāmṛtasugandhena temayitvāpi rakṣitaṃ

Sanskrit only: no published translation is held for this verse.

त्र्यक्षरान्तर्गतं योगी चालयेत् सूत्रधारिणा । त्रिर् ज्जःकारैस् तम् आप्रेष्य ज्जः ज्जः ज्जः इत्य् अपि स्वयं पुनः

tryakṣarāntargataṃ yogī cālayet sūtradhāriṇā | trir jjaḥkārais tam āpreṣya jjaḥ jjaḥ jjaḥ ity api svayaṃ punaḥ

Sanskrit only: no published translation is held for this verse.

वाममुष्टिग्रहो नाभौ प्रतीच्यवाग्दिशि स्थितः । खसूत्रं पातयेच् छ्रीमांस् तथैवाधः प्रसूत्रयेत्

vāmamuṣṭigraho nābhau pratīcyavāgdiśi sthitaḥ | khasūtraṃ pātayec chrīmāṃs tathaivādhaḥ prasūtrayet

Sanskrit only: no published translation is held for this verse.

ॐ वज्रसमयसूत्रं मातिक्रम हूं ॥ सत्त्वार्थे भवतां कालो वियद्व्यापितथागतान् । चोदयेत् सूत्रध्वनिना तद् इहागमनाय तु

oṃ vajrasamayasūtraṃ mātikrama hūṃ || sattvārthe bhavatāṃ kālo viyadvyāpitathāgatān | codayet sūtradhvaninā tad ihāgamanāya tu

Sanskrit only: no published translation is held for this verse.

यक्षप्रेतेन्द्रनागेशदिङ्मुखो ऽग्न्यनिलाश्रितः । प्राक्प्रतीच्युत्तरावाक्चतुर्दिग्बहिः प्रसूत्र्य च

yakṣapretendranāgeśadiṅmukho 'gnyanilāśritaḥ | prākpratīcyuttarāvākcaturdigbahiḥ prasūtrya ca

Sanskrit only: no published translation is held for this verse.

कोणसूत्रं समासूत्र्य चाग्नेयनैरृतिस्थितः । प्राक्प्रतीच्युत्तरावाग्दिक् तथैवाष्टकमण्डलम्

koṇasūtraṃ samāsūtrya cāgneyanairṛtisthitaḥ | prākpratīcyuttarāvāgdik tathaivāṣṭakamaṇḍalam

Sanskrit only: no published translation is held for this verse.

द्विगुणीकृत्य तत् सूत्रं चक्रमध्ये विधार्य च । चक्राकारं ततो बाह्यं वज्रसूत्रद्वयं पुनः

dviguṇīkṛtya tat sūtraṃ cakramadhye vidhārya ca | cakrākāraṃ tato bāhyaṃ vajrasūtradvayaṃ punaḥ

Sanskrit only: no published translation is held for this verse.

ऐशान्यां चक्रवाडं च स्वानुपूर्व्या प्रदक्षिणात् । सूत्रेण सूत्रयेत् प्राज्ञः सर्वदिक्समतां वहन्

aiśānyāṃ cakravāḍaṃ ca svānupūrvyā pradakṣiṇāt | sūtreṇa sūtrayet prājñaḥ sarvadiksamatāṃ vahan

Sanskrit only: no published translation is held for this verse.

अनिमित्तैर् असिद्धिः स्यात् सूत्रच्छेदे गुरोः क्षयः । हीनाभिरिक्ततो रोगा दिङ्मोहे शिष्यविभ्रमः

animittair asiddhiḥ syāt sūtracchede guroḥ kṣayaḥ | hīnābhiriktato rogā diṅmohe śiṣyavibhramaḥ

Sanskrit only: no published translation is held for this verse.

चतुरस्रं चतुर्द्वारं चतुस्तोरणभूषितम् । चतुःसूत्रसमायुक्तं पट्टस्रग्दामभूषितम्

caturasraṃ caturdvāraṃ catustoraṇabhūṣitam | catuḥsūtrasamāyuktaṃ paṭṭasragdāmabhūṣitam

Sanskrit only: no published translation is held for this verse.

कोणभागेषु सर्वेषु द्वारनिर्यूहसन्धिषु । खचितं वज्ररत्नैस् तु सूत्रयेद् बाह्यमण्डलम्

koṇabhāgeṣu sarveṣu dvāraniryūhasandhiṣu | khacitaṃ vajraratnais tu sūtrayed bāhyamaṇḍalam

Sanskrit only: no published translation is held for this verse.

तस्याभ्यन्तरतश् चक्रम् अष्टमण्डलकोपमम् । अर्धेन बाह्यचक्रस्य समन्तात् परिमण्डलम्

tasyābhyantarataś cakram aṣṭamaṇḍalakopamam | ardhena bāhyacakrasya samantāt parimaṇḍalam

Sanskrit only: no published translation is held for this verse.

चक्रस्तम्भाद्यरचितं वज्रावल्यावृतं शुभम् । विभजेच् च ततो द्वारं ह्रीःकारक्रोधदृष्टितः

cakrastambhādyaracitaṃ vajrāvalyāvṛtaṃ śubham | vibhajec ca tato dvāraṃ hrīḥkārakrodhadṛṣṭitaḥ

Sanskrit only: no published translation is held for this verse.

चक्राष्टभागिकं द्वारं वेदिकारहितं मतम् । द्वारप्रमाणा निर्यूहा देवतापट्टिकास् तथा

cakrāṣṭabhāgikaṃ dvāraṃ vedikārahitaṃ matam | dvārapramāṇā niryūhā devatāpaṭṭikās tathā

Sanskrit only: no published translation is held for this verse.

द्वारार्धा सर्वतो वेदी कपोलः पक्षकस् तथा । हरार्धहारचन्द्रार्का पट्टस्रग्दामपट्टिकाः

dvārārdhā sarvato vedī kapolaḥ pakṣakas tathā | harārdhahāracandrārkā paṭṭasragdāmapaṭṭikāḥ

Sanskrit only: no published translation is held for this verse.

रजोभूमिस् तदर्धेन मूलसूत्रभुवो बहिः । चक्राद्यस्तम्भसूत्राणां भूमिस् तुल्या रजोभुवा

rajobhūmis tadardhena mūlasūtrabhuvo bahiḥ | cakrādyastambhasūtrāṇāṃ bhūmis tulyā rajobhuvā

Sanskrit only: no published translation is held for this verse.

तोरणं त्रिगुणं द्वारात् पताकाघण्टयान्वितम् । सघण्टा मारुतोद्धूटा पताका बाह्यकोणतः

toraṇaṃ triguṇaṃ dvārāt patākāghaṇṭayānvitam | saghaṇṭā mārutoddhūṭā patākā bāhyakoṇataḥ

Sanskrit only: no published translation is held for this verse.

चक्रानुरूपतो ऽन्येषां यथाशोभं प्रकल्पना । संबुद्धज्ञानकायत्वाद् वाग्मी वज्रकुले स्मृतः

cakrānurūpato 'nyeṣāṃ yathāśobhaṃ prakalpanā | saṃbuddhajñānakāyatvād vāgmī vajrakule smṛtaḥ

Sanskrit only: no published translation is held for this verse.

धर्मकायात्मसंशुद्धौ चित्तमण्डलम् अस्य तु । सत्त्वाशयं समासाद्य मानादिनियमः कृतः । प्रज्ञोपायोद्भवा सिद्धिर् जात्यादिनियमेन किम्

dharmakāyātmasaṃśuddhau cittamaṇḍalam asya tu | sattvāśayaṃ samāsādya mānādiniyamaḥ kṛtaḥ | prajñopāyodbhavā siddhir jātyādiniyamena kim

Sanskrit only: no published translation is held for this verse.

तद् एकहस्तम् आरभ्य यावद् धस्तसहस्रकम् । एवम् आसूत्र्य तच् चक्रं दीप्तदृष्ट्या रजांसि तु । प्राक्क्रमज्ञानसद्दीप्त्या समुत्तेज्याभिमन्त्रयेत्

tad ekahastam ārabhya yāvad dhastasahasrakam | evam āsūtrya tac cakraṃ dīptadṛṣṭyā rajāṃsi tu | prākkramajñānasaddīptyā samuttejyābhimantrayet

Sanskrit only: no published translation is held for this verse.

ॐ वज्रचित्र समय हूम् ॥ धर्मधातुर् अयं शुद्धः सत्त्वधातुप्रमोचकः । स्वयं मञ्जुरवो राजा सर्वतथागतालयः

oṃ vajracitra samaya hūm || dharmadhātur ayaṃ śuddhaḥ sattvadhātupramocakaḥ | svayaṃ mañjuravo rājā sarvatathāgatālayaḥ

Sanskrit only: no published translation is held for this verse.

सर्वदोषविनिर्मुक्तश् चक्राभ्यन्तरसंस्थितः । ऐशानीं दिशम् आश्रित्य गुरुर् वामेन मुष्टिना

sarvadoṣavinirmuktaś cakrābhyantarasaṃsthitaḥ | aiśānīṃ diśam āśritya gurur vāmena muṣṭinā

Sanskrit only: no published translation is held for this verse.

श्वेतं पीतं तथा रक्तं हरितं कृष्णम् एव च । समप्रदक्षिणाच्छिन्नावक्रां रेखां प्रपातयेत्

śvetaṃ pītaṃ tathā raktaṃ haritaṃ kṛṣṇam eva ca | samapradakṣiṇācchinnāvakrāṃ rekhāṃ prapātayet

Sanskrit only: no published translation is held for this verse.

समां च पातयेद् रेखां द्वारविंशतिभागिकाम् । स्थूलपाते भवेद् व्याधिः कृशया धननाशनम्

samāṃ ca pātayed rekhāṃ dvāraviṃśatibhāgikām | sthūlapāte bhaved vyādhiḥ kṛśayā dhananāśanam

Sanskrit only: no published translation is held for this verse.

विद्वेषो वक्रया मृत्युश् छिन्नया गुरुशिष्ययोः । अप्रदक्षिणपाते तु रजसां कीलनं भवेत्

vidveṣo vakrayā mṛtyuś chinnayā guruśiṣyayoḥ | apradakṣiṇapāte tu rajasāṃ kīlanaṃ bhavet

Sanskrit only: no published translation is held for this verse.

श्वेतवज्रमयी सूची सौवर्णालम्बनापरा । पद्मरागमयी सूची तथा मरकतापरा

śvetavajramayī sūcī sauvarṇālambanāparā | padmarāgamayī sūcī tathā marakatāparā

Sanskrit only: no published translation is held for this verse.