सङ्ख्या वि साय इत्य् एवंपूर्वस्य अह्नशब्दस्य स्थाने अहन् इत्य् अयम् आदेशो भवत्य् अन्यतरस्यां ङौ परतः । द्वयोर् अह्नोर् भवः द्व्यह्नः । त्र्यह्नः । द्व्यह्नि, द्व्यहनि । त्र्यह्नि, त्र्यहनि । द्व्यह्ने । त्र्यह्ने । व्यपगतमहः व्यह्नः । व्यह्नि, व्यहनि, व्यह्ने । सायमह्नः सायाह्नः । सायाह्नि, सायाहनि, सायाह्ने । एकदेशिसमासः पूर्वादिभ्यो ऽन्यस्य अपि भवति इत्य् एतद् एव विसायपूर्वस्य अह्नस्य ग्रहणं ज्ञापकम् । तेन मध्यमह्नः मध्याह्नः इत्य् अपि भवति । सङ्ख्याविसायपूर्वस्य इति किम् ? पूर्वाह्णे । अपराह्णे ॥ ढ्रलोपे पूर्वस्य दीर्घो ऽणः
saṅkhyā vi sāya ity evaṃpūrvasya ahnaśabdasya sthāne ahan ity ayam ādeśo bhavaty anyatarasyāṃ ṅau parataḥ / dvayor ahnor bhavaḥ dvyahnaḥ / tryahnaḥ / dvyahni, dvyahani / tryahni, tryahani / dvyahne / tryahne / vyapagatamahaḥ vyahnaḥ / vyahni, vyahani, vyahne / sāyamahnaḥ sāyāhnaḥ / sāyāhni, sāyāhani, sāyāhne / ekadeśisamāsaḥ pūrvādibhyo 'nyasya api bhavati ity etad eva visāyapūrvasya ahnasya grahaṇaṃ jñāpakam / tena madhyamahnaḥ madhyāhnaḥ ity api bhavati / saṅkhyāvisāyapūrvasya iti kim ? pūrvāhṇe / aparāhṇe // ḍhralope pūrvasya dīrgho 'ṇaḥ
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.