Ksemendra: Avadanakalpalata 64

इति काननकुञ्जेषु तस्योन्मादप्रलापिनः । शोकाद् इव विवर्णेन्दुवदना रजनी ययौ

iti kānanakuñjeṣu tasyonmādapralāpinaḥ / śokād iva vivarṇenduvadanā rajanī yayau

Sanskrit only: no published translation is held for this verse.

स नागभवनासन्नतीरोपान्ततपोवनम् । शनैः प्रविश्य पप्रच्छ महर्षिं वल्कलायनं

sa nāgabhavanāsannatīropāntatapovanam / śanaiḥ praviśya papraccha maharṣiṃ valkalāyanaṃ

Sanskrit only: no published translation is held for this verse.

इहविरहविचिन्ताशोकनिश्वासमूर्च्छन्मदनदहनधूमश्यामसक्तैकवेणी । अपि शमितशशाङ्कोद्दामसौन्दर्यदर्पा मुनिवर हरिणाक्षी किन्नरी कापि दृष्टा

ihavirahavicintāśokaniśvāsamūrcchanmadanadahanadhūmaśyāmasaktaikaveṇī / api śamitaśaśāṅkoddāmasaundaryadarpā munivara hariṇākṣī kinnarī kāpi dṛṣṭā

Sanskrit only: no published translation is held for this verse.

इति कान्तावियुक्तस्य प्राप्तस्योन्मादिनीं दशाम् । मुनिः श्रुत्वा वचस् तस्य परिज्ञाय तम् अब्रवीत्

iti kāntāviyuktasya prāptasyonmādinīṃ daśām / muniḥ śrutvā vacas tasya parijñāya tam abravīt

Sanskrit only: no published translation is held for this verse.

समाश्वसिहि विश्रम्य संतापस् त्यज्यताम् अयम् । दृष्टा सा तव कल्याणी मया मानसचन्द्रिका

samāśvasihi viśramya saṃtāpas tyajyatām ayam / dṛṣṭā sā tava kalyāṇī mayā mānasacandrikā

Sanskrit only: no published translation is held for this verse.

यूथभ्रष्टेव हरिणी निरपेक्षापि जीविते । पाशाकृष्टेव करिणी धार्यते सा त्वदाशया

yūthabhraṣṭeva hariṇī nirapekṣāpi jīvite / pāśākṛṣṭeva kariṇī dhāryate sā tvadāśayā

Sanskrit only: no published translation is held for this verse.

पाणौ शेते वदनकमलं प्रस्तरे पल्लवानां तापक्लान्ता तरलवलनस्रंसिनी गात्रलेखा । आशाबन्धे धृतिर् इव मतेस् त्वद्वियोगाकुलायास् तस्या नैव क्व चिद् अपि मनः किं तु विश्रान्तिम् एति

pāṇau śete vadanakamalaṃ prastare pallavānāṃ tāpaklāntā taralavalanasraṃsinī gātralekhā / āśābandhe dhṛtir iva mates tvadviyogākulāyās tasyā naiva kva cid api manaḥ kiṃ tu viśrāntim eti

Sanskrit only: no published translation is held for this verse.

द्रुमस्य किन्नरपतेः स्थिताहं भवने पितुः । आगन्तव्यं त्वया तूर्णम् इति त्वां संदिदेश सा

drumasya kinnarapateḥ sthitāhaṃ bhavane pituḥ / āgantavyaṃ tvayā tūrṇam iti tvāṃ saṃdideśa sā

Sanskrit only: no published translation is held for this verse.

वीर्यसत्त्वबलोपायधैर्योत्साहवताम् अपि । अगम्ये किन्नरपुरे क्रमाद् वर्त्म शशंस च

vīryasattvabalopāyadhairyotsāhavatām api / agamye kinnarapure kramād vartma śaśaṃsa ca

Sanskrit only: no published translation is held for this verse.

इदं च त्वत्कृते दत्तं तया रत्नाङ्गुलीयकम् । यस्य स्निग्धप्रभाभ्यङ्गैर् दिशो यान्ति पिशङ्गताम्

idaṃ ca tvatkṛte dattaṃ tayā ratnāṅgulīyakam / yasya snigdhaprabhābhyaṅgair diśo yānti piśaṅgatām

Sanskrit only: no published translation is held for this verse.

इत्य् आनन्दसुधासिक्तम् उक्त्वा धैर्यावलम्बनम् । अङ्गुलीयं ददौ तस्मै मार्गं चाकथयन् मुनिः

ity ānandasudhāsiktam uktvā dhairyāvalambanam / aṅgulīyaṃ dadau tasmai mārgaṃ cākathayan muniḥ

Sanskrit only: no published translation is held for this verse.

पथा तदुपदिष्टेन सोपायेन नृपात्मजः । धीरः प्रचक्रमे गन्तुं धनदाध्युषितां दिशम्

pathā tadupadiṣṭena sopāyena nṛpātmajaḥ / dhīraḥ pracakrame gantuṃ dhanadādhyuṣitāṃ diśam

Sanskrit only: no published translation is held for this verse.

ऋद्ध्या संनिहितं तस्य सर्वोपकरणं पथि । अभूत् सत्त्वसहायानां स्वाधीनाः सर्वसंपदः

ṛddhyā saṃnihitaṃ tasya sarvopakaraṇaṃ pathi / abhūt sattvasahāyānāṃ svādhīnāḥ sarvasaṃpadaḥ

Sanskrit only: no published translation is held for this verse.

अथ विद्याधरवधूविलासहसितद्युतिम् । हिमवन्तम् अतिक्रम्य कुकूलाद्रिम् अवाप सः

atha vidyādharavadhūvilāsahasitadyutim / himavantam atikramya kukūlādrim avāpa saḥ

Sanskrit only: no published translation is held for this verse.

फलोपहारैः स्वीकृत्य तत्र वानरयूथपम् । वायुवेगाख्यम् आरुह्य स तं शैलम् अलङ्घयत्

phalopahāraiḥ svīkṛtya tatra vānarayūthapam / vāyuvegākhyam āruhya sa taṃ śailam alaṅghayat

Sanskrit only: no published translation is held for this verse.

अथाजपथनामानम् अतिचक्राम भूधरम् । निहत्याजगरं घोरं विघ्नसंघम् इवेषुना

athājapathanāmānam aticakrāma bhūdharam / nihatyājagaraṃ ghoraṃ vighnasaṃgham iveṣunā

Sanskrit only: no published translation is held for this verse.

वीणास्वनैर् वशीकृत्य राक्षसीं कामरूपिणीम् । कामरूपाद्रिम् उल्लङ्घ्य प्रययौ किन्नरीप्रियः

vīṇāsvanair vaśīkṛtya rākṣasīṃ kāmarūpiṇīm / kāmarūpādrim ullaṅghya prayayau kinnarīpriyaḥ

Sanskrit only: no published translation is held for this verse.

बलवान् मुद्गराघातनिखातैः शस्त्रशङ्कुभिः । एकधारं ततः शैलम् आरुरोहातिसाहसः

balavān mudgarāghātanikhātaiḥ śastraśaṅkubhiḥ / ekadhāraṃ tataḥ śailam ārurohātisāhasaḥ

Sanskrit only: no published translation is held for this verse.

अथोग्रतरम् आरुह्य वज्रकाख्यं स पर्वतम् । गृध्ररूपां समालोक्य राक्षसीं पिशितैषिणीम्

athogrataram āruhya vajrakākhyaṃ sa parvatam / gṛdhrarūpāṃ samālokya rākṣasīṃ piśitaiṣiṇīm

Sanskrit only: no published translation is held for this verse.

परिवृत्तेन संच्छन्नः समांसमृगचर्मणा । स पादमूले तस्याद्रेस् तस्थौ निश्चलविग्रहः

parivṛttena saṃcchannaḥ samāṃsamṛgacarmaṇā / sa pādamūle tasyādres tasthau niścalavigrahaḥ

Sanskrit only: no published translation is held for this verse.

मांसलुब्धा तम् उत्क्षिप्य गृध्ररूपा निशाचरी । निदधे शिखरस्याग्रे भोक्तुं भीषणविग्रहा

māṃsalubdhā tam utkṣipya gṛdhrarūpā niśācarī / nidadhe śikharasyāgre bhoktuṃ bhīṣaṇavigrahā

Sanskrit only: no published translation is held for this verse.

मृगचर्म समुत्सृज्य तां निहत्य स वीर्यवान् । नीरन्ध्रखदिराकीर्णम् प्राप खादिरभूधरम्

mṛgacarma samutsṛjya tāṃ nihatya sa vīryavān / nīrandhrakhadirākīrṇam prāpa khādirabhūdharam

Sanskrit only: no published translation is held for this verse.

प्रविश्य तद्गुहां लेभे शिलां व्यस्य महौषधिम् । शीतातपतमःसर्पराक्षसादिभयापहाम्

praviśya tadguhāṃ lebhe śilāṃ vyasya mahauṣadhim / śītātapatamaḥsarparākṣasādibhayāpahām

Sanskrit only: no published translation is held for this verse.

स यन्त्रपर्वतौ प्राप्य संघट्तैः प्राणहारिणौ । यन्त्रकीलं शराग्रेण छित्त्वा चक्रे विनिश्चलौ

sa yantraparvatau prāpya saṃghaṭtaiḥ prāṇahāriṇau / yantrakīlaṃ śarāgreṇa chittvā cakre viniścalau

Sanskrit only: no published translation is held for this verse.

यन्त्रकीलसमुच्छेदैर् यन्त्रद्वारं विदार्य सः । छेदनम् यन्त्रचक्रं च यन्त्रयुक्तौ तथायसौ

yantrakīlasamucchedair yantradvāraṃ vidārya saḥ / chedanam yantracakraṃ ca yantrayuktau tathāyasau

Sanskrit only: no published translation is held for this verse.

तीव्रप्रहारौ पुरुषौ यन्त्रमेषौ च दुःसहौ । यन्त्रोग्रदन्तनिष्पेषौ तथा मकरराक्षसौ

tīvraprahārau puruṣau yantrameṣau ca duḥsahau / yantrogradantaniṣpeṣau tathā makararākṣasau

Sanskrit only: no published translation is held for this verse.

घोरान्धकारगम्भीरं गुहाकूपं विलङ्घ्य च । तुङ्गां सरितम् उत्तीर्य हत्वा तत्कूलराक्षसान्

ghorāndhakāragambhīraṃ guhākūpaṃ vilaṅghya ca / tuṅgāṃ saritam uttīrya hatvā tatkūlarākṣasān

Sanskrit only: no published translation is held for this verse.

आशीविषावृतजलां पतंगाख्यां च निम्नगाम् । रोदिनीं च नदीं तीरे यस्याः किन्नरचेटिकाः

āśīviṣāvṛtajalāṃ pataṃgākhyāṃ ca nimnagām / rodinīṃ ca nadīṃ tīre yasyāḥ kinnaraceṭikāḥ

Sanskrit only: no published translation is held for this verse.

कुर्वन्ति रोदनरवैर् विघ्नं तद्गतचेतसाम् । तद्विधां हासिनीं नाम हासापःर्तचेतसाम्

kurvanti rodanaravair vighnaṃ tadgatacetasām / tadvidhāṃ hāsinīṃ nāma hāsāpaḥrtacetasām

Sanskrit only: no published translation is held for this verse.

दिशन्ति पुलिने यस्या व्यसनं किन्नराङ्गनाः । लङ्घयित्वापगाश् चान्या वेत्रां प्राप्य नदीं ततः

diśanti puline yasyā vyasanaṃ kinnarāṅganāḥ / laṅghayitvāpagāś cānyā vetrāṃ prāpya nadīṃ tataḥ

Sanskrit only: no published translation is held for this verse.

कूलवेत्रलतालम्बी तस्याम् अथ तितीर्षया । पवनप्रेरितां पारवेत्रवल्लीम् अवाप सः

kūlavetralatālambī tasyām atha titīrṣayā / pavanapreritāṃ pāravetravallīm avāpa saḥ

Sanskrit only: no published translation is held for this verse.

तया प्राप्य परं पारम् आशयेवातिदीर्घया । ददर्श किन्नरपुरं स्फारस्फटिकमन्दिरम्

tayā prāpya paraṃ pāram āśayevātidīrghayā / dadarśa kinnarapuraṃ sphārasphaṭikamandiram

Sanskrit only: no published translation is held for this verse.

प्रविश्य स शनैः प्रप्य कान्तां कनकपद्मिनीम् । तत्तीरतरुम् आरुह्य तस्थौ रत्नलतावृतः

praviśya sa śanaiḥ prapya kāntāṃ kanakapadminīm / tattīratarum āruhya tasthau ratnalatāvṛtaḥ

Sanskrit only: no published translation is held for this verse.

स ददर्शाम्बुजरजःपुञ्जैः सुरभिपिञ्जरम् । हेमकुम्भैर् जलं तत्र नयन्तीः किन्नराङ्गनाः

sa dadarśāmbujarajaḥpuñjaiḥ surabhipiñjaram / hemakumbhair jalaṃ tatra nayantīḥ kinnarāṅganāḥ

Sanskrit only: no published translation is held for this verse.

कुम्भोत्क्षेपे श्रमार्तायास् तत्रैकस्याः समेत्य सः । हस्तालम्बेन साहाय्यं कृत्वा पप्रच्छ तार्न् शनैः

kumbhotkṣepe śramārtāyās tatraikasyāḥ sametya saḥ / hastālambena sāhāyyaṃ kṛtvā papraccha tārn śanaiḥ

Sanskrit only: no published translation is held for this verse.

मातः कस्य कृते तोयं इदं यत्नेन नीयते । यद्भक्त्या गण्यते नायं भवतीभिः परिश्रमः

mātaḥ kasya kṛte toyaṃ idaṃ yatnena nīyate / yadbhaktyā gaṇyate nāyaṃ bhavatībhiḥ pariśramaḥ

Sanskrit only: no published translation is held for this verse.

इति तेन प्रियगिरा सा पृष्टा तम् अभाषत । माधुर्यधुर्यसौन्दर्ये पक्षपातवती क्षणात्

iti tena priyagirā sā pṛṣṭā tam abhāṣata / mādhuryadhuryasaundarye pakṣapātavatī kṣaṇāt

Sanskrit only: no published translation is held for this verse.

मर्त्यामोदापनोदाय सदा सुरभिवारिभिः । पितुः किन्नरराजस्य गिरा स्नाति मनोहरा

martyāmodāpanodāya sadā surabhivāribhiḥ / pituḥ kinnararājasya girā snāti manoharā

Sanskrit only: no published translation is held for this verse.

तयेति कथितं श्रुत्वा सुधासिक्त इव क्षणात् । स हेमकुम्भे चिक्षेप तदभिज्ञाङ्गुलीयकम्

tayeti kathitaṃ śrutvā sudhāsikta iva kṣaṇāt / sa hemakumbhe cikṣepa tadabhijñāṅgulīyakam

Sanskrit only: no published translation is held for this verse.

स्नान्त्यास् ततस् तद् अभिहारि मनोहरायाः कुम्भात् पपात कुचकुम्भयुगे ऽङ्गुलीयम् । यस्यांशुमत्प्रतिमरत्नमयूखलेखाः क्षिप्रं नखक्षतविलासतुलाम् अवापुः

snāntyās tatas tad abhihāri manoharāyāḥ kumbhāt papāta kucakumbhayuge 'ṅgulīyam / yasyāṃśumatpratimaratnamayūkhalekhāḥ kṣipraṃ nakhakṣatavilāsatulām avāpuḥ

Sanskrit only: no published translation is held for this verse.

मूर्तं ततः स्वं अनुरागम् इवाकलय्य रत्नाङ्गुलीयकम् अनङ्गकथान्तरङ्गम् । सा कान्तम् आगतम् अवेत्य कुतस् त्वयेदं संप्राप्तम् इत्य् अवदद् उच्छलितेव दासीम्

mūrtaṃ tataḥ svaṃ anurāgam ivākalayya ratnāṅgulīyakam anaṅgakathāntaraṅgam / sā kāntam āgatam avetya kutas tvayedaṃ saṃprāptam ity avadad ucchaliteva dāsīm

Sanskrit only: no published translation is held for this verse.

ततस् ताम् अवदद् दासी देवि पुष्करिणीतटे । स्थितः को ऽपि युवा कान्तः प्रत्यक्ष इव मन्मथः

tatas tām avadad dāsī devi puṣkariṇītaṭe / sthitaḥ ko 'pi yuvā kāntaḥ pratyakṣa iva manmathaḥ

Sanskrit only: no published translation is held for this verse.

निक्षिप्तं हेमकुम्भे ऽस्मिन्न् इदं तेनाङ्गुलीयकम् । भजते यत्प्रभागर्भम् पयः कुङ्कुमकान्तताम्

nikṣiptaṃ hemakumbhe 'sminn idaṃ tenāṅgulīyakam / bhajate yatprabhāgarbham payaḥ kuṅkumakāntatām

Sanskrit only: no published translation is held for this verse.

इति तद्वचनं तन्वी प्रियं श्रुत्वा मनोहरा । निश्चित्य दयितं प्राप्तम् आनिनाय तयैव तम्

iti tadvacanaṃ tanvī priyaṃ śrutvā manoharā / niścitya dayitaṃ prāptam ānināya tayaiva tam

Sanskrit only: no published translation is held for this verse.

तया गुप्ततरे न्यस्तं कान्तम् उद्यानमन्दिरे । कुमुद्वतीव शशिनं गत्वापश्यन् मनोहरा

tayā guptatare nyastaṃ kāntam udyānamandire / kumudvatīva śaśinaṃ gatvāpaśyan manoharā

Sanskrit only: no published translation is held for this verse.

परस्परालोकनविभ्रमेण वियोगसंतापनिवेदनेन । तयोः प्रहर्षानुभवेन लेभे शोभाम् अशेषाङ्गवतीम् अनङ्गः

parasparālokanavibhrameṇa viyogasaṃtāpanivedanena / tayoḥ praharṣānubhavena lebhe śobhām aśeṣāṅgavatīm anaṅgaḥ

Sanskrit only: no published translation is held for this verse.

यद् यत् किं चिद् विरहसमये चिन्तयाभ्यस्तम् अन्तर् यद् यत् प्रौढप्रमदसुहृदा मन्मथेनोपदिष्टम् । यद् यत् प्रेम्णः सदृशम् उचितं यद् यद् औत्सुक्यराशेस् तत् तत् सर्वं प्रणयसुभगं दम्पती चक्रतुस् तौ

yad yat kiṃ cid virahasamaye cintayābhyastam antar yad yat prauḍhapramadasuhṛdā manmathenopadiṣṭam / yad yat premṇaḥ sadṛśam ucitaṃ yad yad autsukyarāśes tat tat sarvaṃ praṇayasubhagaṃ dampatī cakratus tau

Sanskrit only: no published translation is held for this verse.

ततः प्रच्छन्नवृत्तान्तं लज्जमाना मनोहरा । निवेद्यादर्शयत् पित्रोः पतिं भूमिमनोभवम्

tataḥ pracchannavṛttāntaṃ lajjamānā manoharā / nivedyādarśayat pitroḥ patiṃ bhūmimanobhavam

Sanskrit only: no published translation is held for this verse.

ततः किन्नरराजस् तां कोपप्रस्फुरिताधरः । उवाच दर्शनपथं परिहृत्यात्मजापतेः

tataḥ kinnararājas tāṃ kopaprasphuritādharaḥ / uvāca darśanapathaṃ parihṛtyātmajāpateḥ

Sanskrit only: no published translation is held for this verse.

अहो प्रमादपतिता दैवाद् अनुचिते जने । न विमुञ्चसि दुर्वृत्ते क्षाल्यमानापि रक्तताम्

aho pramādapatitā daivād anucite jane / na vimuñcasi durvṛtte kṣālyamānāpi raktatām

Sanskrit only: no published translation is held for this verse.

यौवनावनिलावण्यं स्पृहणीयं दिवौकसाम् । बत प्रयातम् एतत् ते मर्त्यस्नेहेन शोच्यतां

yauvanāvanilāvaṇyaṃ spṛhaṇīyaṃ divaukasām / bata prayātam etat te martyasnehena śocyatāṃ

Sanskrit only: no published translation is held for this verse.

उदग्रगोत्रप्रभवा घनयौवननिर्भरा । निम्नगे क्षोभविभ्रष्टा यातासि सुतराम् अधः

udagragotraprabhavā ghanayauvananirbharā / nimnage kṣobhavibhraṣṭā yātāsi sutarām adhaḥ

Sanskrit only: no published translation is held for this verse.

विद्वदुद्वेगजननी कुलवैलक्ष्यकारिणी । मलिना खलविद्येव संमतासि न कस्य चित्

vidvadudvegajananī kulavailakṣyakāriṇī / malinā khalavidyeva saṃmatāsi na kasya cit

Sanskrit only: no published translation is held for this verse.

रूपमात्रेण तुष्टा त्वं यदि मर्त्यवशं गता । तत् किं न रमसे हेमनिर्माणपुरुषत्विषा

rūpamātreṇa tuṣṭā tvaṃ yadi martyavaśaṃ gatā / tat kiṃ na ramase hemanirmāṇapuruṣatviṣā

Sanskrit only: no published translation is held for this verse.

प्रभावगुणहीनस्य पुंसश् चारुतराकृतेः । आलेख्यपुरुषस्येव सौन्दर्यं भित्तिरञ्जनम्

prabhāvaguṇahīnasya puṃsaś cārutarākṛteḥ / ālekhyapuruṣasyeva saundaryaṃ bhittirañjanam

Sanskrit only: no published translation is held for this verse.

वध्यो मे त्वत्पतिः पापे हीनसंबन्धलज्जया । मुखं द्रष्टुं न शक्नोमि त्वद्याच्ञाप्तदिवौकसाम्

vadhyo me tvatpatiḥ pāpe hīnasaṃbandhalajjayā / mukhaṃ draṣṭuṃ na śaknomi tvadyācñāptadivaukasām

Sanskrit only: no published translation is held for this verse.

सत्यं उत्साहयुक्तस्य कुलस्योन्नतिशालिनः । जरेव किल कायस्य कन्या संकोचकारिणी

satyaṃ utsāhayuktasya kulasyonnatiśālinaḥ / jareva kila kāyasya kanyā saṃkocakāriṇī

Sanskrit only: no published translation is held for this verse.

इति सा भर्त्सिता पित्रा तम् उवाच नतानना । असूत्रहारं कुर्वाणा कुचयोर् बाष्पबिन्धुभिः

iti sā bhartsitā pitrā tam uvāca natānanā / asūtrahāraṃ kurvāṇā kucayor bāṣpabindhubhiḥ

Sanskrit only: no published translation is held for this verse.

कोपाद् अनुचितं तात नैतन् मां वक्तुम् अर्हसि । न श्रूयन्ते प्रभावेण किं नराः किन्नराधिकाः

kopād anucitaṃ tāta naitan māṃ vaktum arhasi / na śrūyante prabhāveṇa kiṃ narāḥ kinnarādhikāḥ

Sanskrit only: no published translation is held for this verse.

गरुडस्यापि दुर्लङ्घ्याम् इमाम् उल्लङ्घ्य यः क्षितिम् । प्रभावभूमिर् आयाति मनुष्यः स कथं भवेत्

garuḍasyāpi durlaṅghyām imām ullaṅghya yaḥ kṣitim / prabhāvabhūmir āyāti manuṣyaḥ sa kathaṃ bhavet

Sanskrit only: no published translation is held for this verse.

गुणसंवादिनी मूर्तिर् भवत्य् एव शरिरिणाम् । करोत्य् आनन्द संवादं द्युतिर् एव हिमत्विषः

guṇasaṃvādinī mūrtir bhavaty eva śaririṇām / karoty ānanda saṃvādaṃ dyutir eva himatviṣaḥ

Sanskrit only: no published translation is held for this verse.

जात्या किं क्रियते तात स्वभावानुगुणा गुणाः । पूर्णेन्दुर् अमृतस्यन्दी कालकूटस्य सोदरः

jātyā kiṃ kriyate tāta svabhāvānuguṇā guṇāḥ / pūrṇendur amṛtasyandī kālakūṭasya sodaraḥ

Sanskrit only: no published translation is held for this verse.

भवन्त्य् अन्तर्गुणाः के चिच् छन्नदोषास् तथापरे । अपरीक्ष्य न कर्तव्या मणीनां मूल्यलङ्घना

bhavanty antarguṇāḥ ke cic channadoṣās tathāpare / aparīkṣya na kartavyā maṇīnāṃ mūlyalaṅghanā

Sanskrit only: no published translation is held for this verse.

श्रुत्वैतत् किन्नरपतिस् तत् तथेति विचिन्त्य च । जामातरं समाहूय गुणजिज्ञासयाब्रवीत्

śrutvaitat kinnarapatis tat tatheti vicintya ca / jāmātaraṃ samāhūya guṇajijñāsayābravīt

Sanskrit only: no published translation is held for this verse.

त्वया कान्त्या जितास् तावद् एते किन्नरदारकाः । संदर्शितप्रभावस् तु दिव्यसंबन्धम् अर्हसि

tvayā kāntyā jitās tāvad ete kinnaradārakāḥ / saṃdarśitaprabhāvas tu divyasaṃbandham arhasi

Sanskrit only: no published translation is held for this verse.

अत्यायतं शरवनं कृत्वोद्धृतशरं क्षणात् । व्युप्तम् अन्यूनम् उच्चित्य पुनर् देहि तिलाधकम्

atyāyataṃ śaravanaṃ kṛtvoddhṛtaśaraṃ kṣaṇāt / vyuptam anyūnam uccitya punar dehi tilādhakam

Sanskrit only: no published translation is held for this verse.

संदर्शय धनुर्वेदे दृढलक्ष्यादिकौशलम् । ततः कीर्तिपताकेयं तवायत्ता मनोहरा

saṃdarśaya dhanurvede dṛḍhalakṣyādikauśalam / tataḥ kīrtipatākeyaṃ tavāyattā manoharā

Sanskrit only: no published translation is held for this verse.

इत्य् अशक्ये ऽपि कौटिल्यात् प्रेरितस् तेन कर्मणि । सर्वं कान्तानुरागेण कुमारः कर्तुम् उद्ययौ

ity aśakye 'pi kauṭilyāt preritas tena karmaṇi / sarvaṃ kāntānurāgeṇa kumāraḥ kartum udyayau

Sanskrit only: no published translation is held for this verse.

मिथ्याश्रमक्लेशफले प्रवृत्तं शरपाटने । तं विज्ञाय सहस्राक्षः पक्षपाताद् अचिन्तयत्

mithyāśramakleśaphale pravṛttaṃ śarapāṭane / taṃ vijñāya sahasrākṣaḥ pakṣapātād acintayat

Sanskrit only: no published translation is held for this verse.

किं भाद्रकल्पिको बोधिसत्त्वो ऽयं पार्थिवात्मजः । नियुक्तः किन्नरेन्द्रेण निष्फले क्लेशकर्मणि

kiṃ bhādrakalpiko bodhisattvo 'yaṃ pārthivātmajaḥ / niyuktaḥ kinnarendreṇa niṣphale kleśakarmaṇi

Sanskrit only: no published translation is held for this verse.

अस्यास्मिन् समयायासे कार्यं साहाय्यकं मया । इति संचिन्त्य शक्रो ऽस्य कर्मनिष्पत्तिम् आदधे

asyāsmin samayāyāse kāryaṃ sāhāyyakaṃ mayā / iti saṃcintya śakro 'sya karmaniṣpattim ādadhe

Sanskrit only: no published translation is held for this verse.

शतक्रतुसमादिष्टैर् यक्षैः सूकररूपिभिः । उत्पाटिते शरवने समे व्युप्तं तिलाधकम्

śatakratusamādiṣṭair yakṣaiḥ sūkararūpibhiḥ / utpāṭite śaravane same vyuptaṃ tilādhakam

Sanskrit only: no published translation is held for this verse.

एकीकृतं समुच्चित्य शक्रसृष्टैः पिपीलकैः । कुमारः किन्नरेन्द्राय विस्मिताय न्यवेदयत्

ekīkṛtaṃ samuccitya śakrasṛṣṭaiḥ pipīlakaiḥ / kumāraḥ kinnarendrāya vismitāya nyavedayat

Sanskrit only: no published translation is held for this verse.

स सप्तकनकस्तम्भान् सप्ततालान् बलोर्जितः । सूकरीचक्रसंयुक्तान् विद्ध्वा निशितपत्त्रिणा

sa saptakanakastambhān saptatālān balorjitaḥ / sūkarīcakrasaṃyuktān viddhvā niśitapattriṇā

Sanskrit only: no published translation is held for this verse.

शस्त्रास्त्रविक्रमकलाशिल्पशक्तिम् अदर्शयत् । ययास्य पेतुर् मुकुटे दिव्याः कुसुमवृष्टयः

śastrāstravikramakalāśilpaśaktim adarśayat / yayāsya petur mukuṭe divyāḥ kusumavṛṣṭayaḥ

Sanskrit only: no published translation is held for this verse.

विस्मितो ऽपि प्रभावेण तस्य किन्नरभूपतिः । पुनस् तद्वञ्चनायैव तां तां युक्तिम् अचिन्तयत्

vismito 'pi prabhāveṇa tasya kinnarabhūpatiḥ / punas tadvañcanāyaiva tāṃ tāṃ yuktim acintayat

Sanskrit only: no published translation is held for this verse.

दधति विपुलाश्चर्ये मौनं हसन्ति सतां स्तुतौ मलिनवदनाः कीर्त्युत्कर्षे व्रजन्ति विवादिताम् । अपि गुणशतैर् नाराध्यन्ते विरुद्धधियः परं परपरिभवक्षोभारम्भस्थिराभिनिवेशिनः

dadhati vipulāścarye maunaṃ hasanti satāṃ stutau malinavadanāḥ kīrtyutkarṣe vrajanti vivāditām / api guṇaśatair nārādhyante viruddhadhiyaḥ paraṃ paraparibhavakṣobhārambhasthirābhiniveśinaḥ

Sanskrit only: no published translation is held for this verse.

स तम् ऊचे प्रभावो ऽयं दिव्यः प्रकटितस् त्वया । प्रज्ञाप्रकर्षम् अधुना संदर्शयितुम् अर्हसि

sa tam ūce prabhāvo 'yaṃ divyaḥ prakaṭitas tvayā / prajñāprakarṣam adhunā saṃdarśayitum arhasi

Sanskrit only: no published translation is held for this verse.

अभिन्नवर्णरूपाणां तुल्याभरणवाससाम् । किन्नरीणां स्थितां मध्ये गृहाण निजवल्लभाम्

abhinnavarṇarūpāṇāṃ tulyābharaṇavāsasām / kinnarīṇāṃ sthitāṃ madhye gṛhāṇa nijavallabhām

Sanskrit only: no published translation is held for this verse.

इत्य् उक्तस् तेन स पुनः किन्नरीशतपञ्चकम् । तुल्यवर्णवयोवेशं ददर्शाव्यग्रम् अग्रतः

ity uktas tena sa punaḥ kinnarīśatapañcakam / tulyavarṇavayoveśaṃ dadarśāvyagram agrataḥ

Sanskrit only: no published translation is held for this verse.

तासां मध्ये परिज्ञाय स जग्राह मनोहराम् । वल्लरीवनसंच्छन्नां भ्र्ङ्गश् चूतलताम् इव

tāsāṃ madhye parijñāya sa jagrāha manoharām / vallarīvanasaṃcchannāṃ bhrṅgaś cūtalatām iva

Sanskrit only: no published translation is held for this verse.

देवो ऽयम् इति निश्चित्य ततस् तं किन्नरेश्वरः । तुष्टस् तस्मै ददौ दिव्यरत्नैः सह मनोहराम्

devo 'yam iti niścitya tatas taṃ kinnareśvaraḥ / tuṣṭas tasmai dadau divyaratnaiḥ saha manoharām

Sanskrit only: no published translation is held for this verse.

श्लाघ्योपभोगविभवैः पूजितस् तेन सादरम् । जायासखस् तम् आमन्त्र्य कुमारः स्वपुरं ययौ

ślāghyopabhogavibhavaiḥ pūjitas tena sādaram / jāyāsakhas tam āmantrya kumāraḥ svapuraṃ yayau

Sanskrit only: no published translation is held for this verse.

मनोहराग्रगं पुत्रं प्राप्तम् आलोक्य भूपतिः । राकेन्दुदर्शनोद्भूतः सुधाम्बुधिर् इवाबभौ

manoharāgragaṃ putraṃ prāptam ālokya bhūpatiḥ / rākendudarśanodbhūtaḥ sudhāmbudhir ivābabhau

Sanskrit only: no published translation is held for this verse.

पुत्रं ततश् चरितचन्द्रसितातपत्रे राज्ये ऽभिषिच्य परितापहरं प्रजानां । संतोषशीतलविवेकसुखाभिरामां छायाम् असेवत नृपः प्रशमद्रुमस्य

putraṃ tataś caritacandrasitātapatre rājye 'bhiṣicya paritāpaharaṃ prajānāṃ / saṃtoṣaśītalavivekasukhābhirāmāṃ chāyām asevata nṛpaḥ praśamadrumasya

Sanskrit only: no published translation is held for this verse.

प्राप्ताभिषेकं सुधनम् प्रभाते तं सप्तरत्नानि पृथुप्रतापम् । नवप्रभावप्रभुभावभीत्या सेवानिवासार्थम् इवोपजग्मुः

prāptābhiṣekaṃ sudhanam prabhāte taṃ saptaratnāni pṛthupratāpam / navaprabhāvaprabhubhāvabhītyā sevānivāsārtham ivopajagmuḥ

Sanskrit only: no published translation is held for this verse.

स बोधिसत्त्वः सुधनो ऽहम् एव यशोधरा सापि मनोहराभूत् तद्विप्रयोगव्यसनानलार्तिः कामानुबन्धाद् इयती मयाप्ता

sa bodhisattvaḥ sudhano 'ham eva yaśodharā sāpi manoharābhūt tadviprayogavyasanānalārtiḥ kāmānubandhād iyatī mayāptā

Sanskrit only: no published translation is held for this verse.

तस्मात् कामः कमलवदनानेत्रपर्यन्तवासी वर्ज्यः सद्भिः शमंर्गवधूबन्धकेलिः किरातः । स्फूर्जत्पुष्पप्रसरजरजःपुञ्जहालाहलाग्रैर् लोकः शोकव्यसनविशिखैर् मोहनैर् येन विद्धः

tasmāt kāmaḥ kamalavadanānetraparyantavāsī varjyaḥ sadbhiḥ śamaṃrgavadhūbandhakeliḥ kirātaḥ / sphūrjatpuṣpaprasarajarajaḥpuñjahālāhalāgrair lokaḥ śokavyasanaviśikhair mohanair yena viddhaḥ

Sanskrit only: no published translation is held for this verse.

इति भिक्षुगणः स्वयं जिनेन स्वकथां तां विनिवेदितां निशम्य । सरसं पृथुमूलम् एव मेने शतशाखस्य मनोभवम् भवस्य

iti bhikṣugaṇaḥ svayaṃ jinena svakathāṃ tāṃ viniveditāṃ niśamya / sarasaṃ pṛthumūlam eva mene śataśākhasya manobhavam bhavasya

Sanskrit only: no published translation is held for this verse.