तत् पारमात्मिकम् परमात्मसम्बन्धि । रूपं भवति । किं तत् । यतः यस्मात् । जगद् उदेतीव उदयं यातीव । भासमानत्वात् । कथम्भूतम् अपि । नित्यानुदितरूप्य् अपि नित्यम् अनुदितं । परमार्थतः चिन्मात्ररूपतया जगद्रूपेणाप्रादुर्भूतं रूपम् अस्यास्तीति । तादृशम् अपि । पुनः कथम्भूतम् । अभिन्नं तन्मयं । पुनः कथम्भूतं । स्थितम् इति शेषः । स्थितं वर्तमानं । कथं । विभिन्नवत् विभिन्नम् इव । परमार्थतः भिन्नत्वनिरासाय वतिशब्दोपादानम् । अयं भावः । यतः सूक्ष्मतराद् वस्तुन इदं जगत् पयस इव वीचिकदम्बकं निर्याति । तद् एव परमात्मनो रूपम् इति । तत्र योगिना सावधानेन भाव्यम् इति
tat pāramātmikam paramātmasambandhi | rūpaṃ bhavati | kiṃ tat | yataḥ yasmāt | jagad udetīva udayaṃ yātīva | bhāsamānatvāt | kathambhūtam api | nityānuditarūpy api nityam anuditaṃ | paramārthataḥ cinmātrarūpatayā jagadrūpeṇāprādurbhūtaṃ rūpam asyāstīti | tādṛśam api | punaḥ kathambhūtam | abhinnaṃ tanmayaṃ | punaḥ kathambhūtaṃ | sthitam iti śeṣaḥ | sthitaṃ vartamānaṃ | kathaṃ | vibhinnavat vibhinnam iva | paramārthataḥ bhinnatvanirāsāya vatiśabdopādānam | ayaṃ bhāvaḥ | yataḥ sūkṣmatarād vastuna idaṃ jagat payasa iva vīcikadambakaṃ niryāti | tad eva paramātmano rūpam iti | tatra yoginā sāvadhānena bhāvyam iti
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.