अग्ने वेर् होत्रं वेर् दूत्यम् ऊर्ध्वो अध्वरो अस्थाद् अवतां नो द्यावापृथिवी स्विष्टकृद् इन्द्राय देवेभ्यो भवास्य घृतस्य हविषो जुषाणो वीहि स्वाहा ॥ प्रघास्यान् हवामहे मरुतो यज्ञवाहसः । करम्भेण सजोषसः ॥ मो षू ण इन्द्रात्र पृत्सु देवास्तु स्म ते शुष्मिन्न् अवयाः । मही चिद्यस्य मीढुषो यव्या हविष्मतो मरुतो वन्दते गीः ॥ यद् ग्रामे यद् अरण्ये यत् सभायां यद् इन्द्रिये । यद् एनश् चकृमा वयं यद् अप्सश् चकृमा वयम् । तद् एकस्यापि चेतसि तद् एकस्यापि धर्मणि । तस्य सर्वस्यांहसो ऽवयजनम् असि ॥ अक्रन् कर्म कर्मकृतः सह वाचा मयोभ्वा । देवेभ्यः कम्र कृत्वास्तं प्रेत सुदानवः ॥ पूर्णा दर्वे परा पत सुपूर्णा पुनर् आपत । वस्नेव विक्रीणावहा इषम् ऊर्जं शतक्रतो ॥ देहि मे ददामि ते नि मे धेहि नि ते दधौ । अपामित्यम् इव संभर को अम्बाददते ददत्
agne ver hotraṃ ver dūtyam ūrdhvo adhvaro asthād avatāṃ no dyāvāpṛthivī sviṣṭakṛd indrāya devebhyo bhavāsya ghṛtasya haviṣo juṣāṇo vīhi svāhā // praghāsyān havāmahe maruto yajñavāhasaḥ / karambheṇa sajoṣasaḥ // mo ṣū ṇa indrātra pṛtsu devāstu sma te śuṣminn avayāḥ / mahī cidyasya mīḍhuṣo yavyā haviṣmato maruto vandate gīḥ // yad grāme yad araṇye yat sabhāyāṃ yad indriye / yad enaś cakṛmā vayaṃ yad apsaś cakṛmā vayam / tad ekasyāpi cetasi tad ekasyāpi dharmaṇi / tasya sarvasyāṃhaso 'vayajanam asi // akran karma karmakṛtaḥ saha vācā mayobhvā / devebhyaḥ kamra kṛtvāstaṃ preta sudānavaḥ // pūrṇā darve parā pata supūrṇā punar āpata / vasneva vikrīṇāvahā iṣam ūrjaṃ śatakrato // dehi me dadāmi te ni me dhehi ni te dadhau / apāmityam iva saṃbhara ko ambādadate dadat
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.