आपो मा मातरः सूदयन्तु घृतेन मा घृतप्वः पुनन्तु । विश्वं हि रिप्रं प्रवहन्तु देवीर् उद् इद् आभ्यः शुचिर् आ पूत एमि ॥ विष्णोः शर्मासि शर्म मे यच्छोर्जे त्वा महीनां पयो ऽस्य् अपाम् ओषधीनां रसो वर्चोधा असि वर्चो मे धेहि ॥ वृत्रस्यासि कनीनिका चक्षुषो मे वयोधा अन्तर् अहं त्वया द्वेषो अन्तर् अरातीर् दधे महता पर्वतेन चक्षुष्पा असि चक्षुर् मे पाहि ॥ चित्पतिस् त्वा पुनातु वाचस्पतिस् त्वा पुनातु ॥ देवस् त्वा सविता पुनात्व् अछिद्रेण पवित्रेण । वसोः सूर्यस्य रश्मिभिः ॥ तस्य ते पवित्रपते पवित्रेण यस्मै कं पुने तञ् शकेयम्
āpo mā mātaraḥ sūdayantu ghṛtena mā ghṛtapvaḥ punantu / viśvaṃ hi ripraṃ pravahantu devīr ud id ābhyaḥ śucir ā pūta emi // viṣṇoḥ śarmāsi śarma me yacchorje tvā mahīnāṃ payo 'sy apām oṣadhīnāṃ raso varcodhā asi varco me dhehi // vṛtrasyāsi kanīnikā cakṣuṣo me vayodhā antar ahaṃ tvayā dveṣo antar arātīr dadhe mahatā parvatena cakṣuṣpā asi cakṣur me pāhi // citpatis tvā punātu vācaspatis tvā punātu // devas tvā savitā punātv achidreṇa pavitreṇa / vasoḥ sūryasya raśmibhiḥ // tasya te pavitrapate pavitreṇa yasmai kaṃ pune tañ śakeyam
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.