देवश्रुतौ देवेष्व् आघोषेथाम् ॥ युञ्जते मन उत युञ्जते धियो विप्रा विप्रस्य बृहतो विपश्चितः । वि होत्रा दधे वयुनाविद् एका इन् मही देवस्य सवितुः परिष्टुतिः ॥ अप जन्यं भयं नुद मा चक्रा आवृत्सत । गृहं सोमस्य गछतं गछद् इन्द्रस्य निष्कृतम् ॥ इदं विष्णुर् विचक्रमे त्रेधा निदधे पदा । समूढम् अस्य पांसुरे ॥ इरावती धेनुमती हि भूतं सूयवसिनी मनवे यशस्ये । व्यष्कभ्ना रोदसी विष्ण एते दाधर्थ पृथिवीम् अभितो मयूखैः ॥ सुवाग् आवद देव दुर्यं अरिष्यन्न् अरिष्यतः ॥ आ नो वीरो जायतां कर्मण्यो ऽभिशस्तिपा अनभिशस्तेन्यः । यं बहवो ऽनुजीवान् यो बहूनाम् असद् वशी ॥ वैष्णवम् असि विष्णुस् त्वोत्तभ्नातु ॥ दिवो विष्ण उत वा पृथिव्या उरोर् वा विष्णो बृहतो अन्तरिक्षात् । हस्तौ पृणस्व बहुभिर् वसव्यैर् आ प्रयछ दक्षिणाद् ओत सव्यात् ॥ विष्णोर् नु कं वीर्याणि प्रवोचं यः पार्थिवानि विममे रजांसि । यो अस्कभायद् उत्तरं सधस्थं विचक्रमाणस् त्रेधोरुगायः ॥ विष्णोः पृष्ठम् असि विष्णो रराटम् असि विष्णोः शिप्रे स्थो विष्णोः स्यूर् असि विष्णोर् ध्रुवो ऽसि वैष्णवम् असि विष्णवे त्वा ॥ प्र तद् विष्णुः स्तवते वीर्येण मृगो न भीमः कुचरो गिरिष्ठाः । यस्योरुषु त्रिषु विक्रमणेष्व् अधिक्षियन्ति भुवनानि विश्वा
devaśrutau deveṣv āghoṣethām // yuñjate mana uta yuñjate dhiyo viprā viprasya bṛhato vipaścitaḥ / vi hotrā dadhe vayunāvid ekā in mahī devasya savituḥ pariṣṭutiḥ // apa janyaṃ bhayaṃ nuda mā cakrā āvṛtsata / gṛhaṃ somasya gachataṃ gachad indrasya niṣkṛtam // idaṃ viṣṇur vicakrame tredhā nidadhe padā / samūḍham asya pāṃsure // irāvatī dhenumatī hi bhūtaṃ sūyavasinī manave yaśasye / vyaṣkabhnā rodasī viṣṇa ete dādhartha pṛthivīm abhito mayūkhaiḥ // suvāg āvada deva duryaṃ ariṣyann ariṣyataḥ // ā no vīro jāyatāṃ karmaṇyo 'bhiśastipā anabhiśastenyaḥ / yaṃ bahavo 'nujīvān yo bahūnām asad vaśī // vaiṣṇavam asi viṣṇus tvottabhnātu // divo viṣṇa uta vā pṛthivyā uror vā viṣṇo bṛhato antarikṣāt / hastau pṛṇasva bahubhir vasavyair ā prayacha dakṣiṇād ota savyāt // viṣṇor nu kaṃ vīryāṇi pravocaṃ yaḥ pārthivāni vimame rajāṃsi / yo askabhāyad uttaraṃ sadhasthaṃ vicakramāṇas tredhorugāyaḥ // viṣṇoḥ pṛṣṭham asi viṣṇo rarāṭam asi viṣṇoḥ śipre stho viṣṇoḥ syūr asi viṣṇor dhruvo 'si vaiṣṇavam asi viṣṇave tvā // pra tad viṣṇuḥ stavate vīryeṇa mṛgo na bhīmaḥ kucaro giriṣṭhāḥ / yasyoruṣu triṣu vikramaṇeṣv adhikṣiyanti bhuvanāni viśvā
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.