कदा चन स्तरीर् असि नेन्द्र सश्चसि दाशुषे । उपोपेन् नु मघवन् भूया इन् नु ते दानं देवस्य पृच्यते ॥ उपयामगृहीतो ऽस्य् आदित्येभ्यस् त्वा ॥ कदा चन प्रयुछस्य् उभे निपासि जन्मनी । तुरीयादित्य सवनं त इन्द्रियम् आतस्था अमृतं दिवि ॥ उपयामगृहीतो ऽस्य् आदित्येभ्यस् त्वा ॥ यज्ञो देवानां प्रत्येतु सुम्नम् आदित्यासो भवता मृडयन्तः । आ वो ऽर्वाची सुमतिर् ववृत्याद् अंहोश् चिद् या वरिवोवित्तरासत् ॥ अहं परस्ताद् अहम् अवस्ताद् अहं विश्वस्य भुवनस्य राजा । अहं सूर्यम् उभयतो ददर्श यद् अन्तरिक्षं तद् उ नः पिताभूत् ॥ उन्नम्भय पृथिवीं भिन्ध्य् अदो दिव्यं नभः । उद्नो दिव्यस्य नो धातर् ईशानो विष्या दृतिम्
kadā cana starīr asi nendra saścasi dāśuṣe / upopen nu maghavan bhūyā in nu te dānaṃ devasya pṛcyate // upayāmagṛhīto 'sy ādityebhyas tvā // kadā cana prayuchasy ubhe nipāsi janmanī / turīyāditya savanaṃ ta indriyam ātasthā amṛtaṃ divi // upayāmagṛhīto 'sy ādityebhyas tvā // yajño devānāṃ pratyetu sumnam ādityāso bhavatā mṛḍayantaḥ / ā vo 'rvācī sumatir vavṛtyād aṃhoś cid yā varivovittarāsat // ahaṃ parastād aham avastād ahaṃ viśvasya bhuvanasya rājā / ahaṃ sūryam ubhayato dadarśa yad antarikṣaṃ tad u naḥ pitābhūt // unnambhaya pṛthivīṃ bhindhy ado divyaṃ nabhaḥ / udno divyasya no dhātar īśāno viṣyā dṛtim
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.