धाता रातिः सवितेदं जुषन्तां प्रजापतिर् वरुणो मित्रो अग्निः । विष्णुस् त्वष्टा प्रजया संरराणो यजमानाय द्रविणं दधातु ॥ सम् इन्द्र नो मनसा नेषि गोभिः सं सूरिभिर् हरिवः सं स्वस्त्या । सं ब्रह्मणा देवकृतं यद् अस्ति सं देवानां सुमतौ यज्ञियानाम् ॥ सं वर्चसा पयसा सं तनूभिर् अगन्महि मनसा सं शिवेन । त्वष्टा सुदत्रो विदधातु रायो ऽनु नो मार्ष्टु तन्वो यद् विरिष्टम् ॥ सुगा वो देवाः सदना कृणोमि य आजग्मेदं सवनं जुषाणाः । जक्षिवांसः पपिवांसश् च विश्वे ऽस्मे धत्त वसवो वसूनि ॥ यान् आवह उशतो देव देवांस् तान् प्रेरय स्वे अग्ने सधस्थे । वहमाना भरमाणा हवींष्य् असुं घर्मं दिवम् आतिष्ठतानु ॥ यद् अद्य त्वा प्रयति यज्ञे अस्मिन्न् अग्ने होतारम् अवृणीमहीह । ऋधग् अयाड् ऋधग् उताशमिष्ट विद्वान् प्रजानन्न् उपयाहि यज्ञम् ॥ यज्ञ यज्ञं गछ यज्ञपतिं गछ स्वं योनिं गछ स्वाहैष ते यज्ञो यज्ञपते सहसूक्तवाकः सुवीरस् तेन संभव भ्राजं गछ देवा गातुविदो गातुं वित्त्वा गातुम् इत मनसस्पते सुधात्व् इमं यज्ञं दिवि देवेषु वाते धाः स्वाहा
dhātā rātiḥ savitedaṃ juṣantāṃ prajāpatir varuṇo mitro agniḥ / viṣṇus tvaṣṭā prajayā saṃrarāṇo yajamānāya draviṇaṃ dadhātu // sam indra no manasā neṣi gobhiḥ saṃ sūribhir harivaḥ saṃ svastyā / saṃ brahmaṇā devakṛtaṃ yad asti saṃ devānāṃ sumatau yajñiyānām // saṃ varcasā payasā saṃ tanūbhir aganmahi manasā saṃ śivena / tvaṣṭā sudatro vidadhātu rāyo 'nu no mārṣṭu tanvo yad viriṣṭam // sugā vo devāḥ sadanā kṛṇomi ya ājagmedaṃ savanaṃ juṣāṇāḥ / jakṣivāṃsaḥ papivāṃsaś ca viśve 'sme dhatta vasavo vasūni // yān āvaha uśato deva devāṃs tān preraya sve agne sadhasthe / vahamānā bharamāṇā havīṃṣy asuṃ gharmaṃ divam ātiṣṭhatānu // yad adya tvā prayati yajñe asminn agne hotāram avṛṇīmahīha / ṛdhag ayāḍ ṛdhag utāśamiṣṭa vidvān prajānann upayāhi yajñam // yajña yajñaṃ gacha yajñapatiṃ gacha svaṃ yoniṃ gacha svāhaiṣa te yajño yajñapate sahasūktavākaḥ suvīras tena saṃbhava bhrājaṃ gacha devā gātuvido gātuṃ vittvā gātum ita manasaspate sudhātv imaṃ yajñaṃ divi deveṣu vāte dhāḥ svāhā
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.