उप त्वा जुह्वो मम घृताचीर् यन्तु हर्यत । अग्ने हव्या जुषस्व नः ॥ उद् अग्ने तव तद् घृताद् अर्ची रोचता आहुतम् । निंसानं जुह्वो मुखे ॥ प्रजा अग्ने संवासयेहाशाश् च पशुभिः सह । राष्ट्राण्य् अस्मिन् धेहि यान्य् आसन्त् सवितुः सवे ॥ अयं ते योनिर् ऋत्वियो यतो जातो अरोचथाः । तं जानन्न् अग्ना आरोह ततो नो वर्धया रयिम् ॥ आयं गौः पृश्निर् अक्रमीद् असदन् मातरं पुरः । पितरं च प्रयन्त् स्वः ॥ त्रिंशद्धामा विराजति वाक् पतंगाय हूयते । व्यक्शन् महिषो दिवम् ॥ अन्तश् चरत्य् अर्णवे अस्य प्राणाद् अपानतः । प्रति वां सूरो अहभिः ॥ इतो जज्ञे प्रथमं स्वाद् योनेर् अधि जातवेदाः । स गायत्र्या त्रिष्टुभा जगत्यानुष्टुभा च देवेभ्यो हव्या वहतु प्रजानन् ॥ यो नो अग्निः पितरो हृत्स्व् अन्तर् अमर्त्यो मर्त्यं आविवेश । तम् आत्मनि परिगृह्णीमसीह नेद् एषो अस्मान् अवहाय परायत् ॥ दोह्या च ते दुग्धभृच् चोर्वरी ते ते भागधेयं प्रयच्छामि ताभ्यां त्वादधे घर्मः शिरस् तद् अयम् अग्निः संप्रियः पशुभिर् भव पुरीषम् असि यत् ते शुक्र शुक्रं ज्योतिस् तेन रुचा रुचम् अशीथाः ॥ मयि गृह्णाम्य् अहम् अग्रे अग्निं सह प्रजया वर्चसा धनेन । मयि क्षत्रं मयि रायो दधामि मदेम शतहिमाः सुवीराः ॥ भूर् भुवो ऽङ्गिरसां त्वा देवानां व्रतेनादधे ऽग्नेष् ट्वा देवस्य व्रतेनादध इन्द्रस्य त्वा मरुत्वतो व्रतेनादधे मनोष् ट्वा ग्रामण्यो व्रतेनादधे ॥ आछदि त्वा छन्दो दधे द्यौर् मह्नासि भूमिर् भूना । तस्यास् ते देव्य् अदित उपस्थे ऽन्नादम् अग्निम् अन्नपत्यायादधे ॥ अग्ना आयूंषि पवसे ऽग्निर् ऋषिर् अग्ने पवस्व
upa tvā juhvo mama ghṛtācīr yantu haryata / agne havyā juṣasva naḥ // ud agne tava tad ghṛtād arcī rocatā āhutam / niṃsānaṃ juhvo mukhe // prajā agne saṃvāsayehāśāś ca paśubhiḥ saha / rāṣṭrāṇy asmin dhehi yāny āsant savituḥ save // ayaṃ te yonir ṛtviyo yato jāto arocathāḥ / taṃ jānann agnā āroha tato no vardhayā rayim // āyaṃ gauḥ pṛśnir akramīd asadan mātaraṃ puraḥ / pitaraṃ ca prayant svaḥ // triṃśaddhāmā virājati vāk pataṃgāya hūyate / vyakśan mahiṣo divam // antaś caraty arṇave asya prāṇād apānataḥ / prati vāṃ sūro ahabhiḥ // ito jajñe prathamaṃ svād yoner adhi jātavedāḥ / sa gāyatryā triṣṭubhā jagatyānuṣṭubhā ca devebhyo havyā vahatu prajānan // yo no agniḥ pitaro hṛtsv antar amartyo martyaṃ āviveśa / tam ātmani parigṛhṇīmasīha ned eṣo asmān avahāya parāyat // dohyā ca te dugdhabhṛc corvarī te te bhāgadheyaṃ prayacchāmi tābhyāṃ tvādadhe gharmaḥ śiras tad ayam agniḥ saṃpriyaḥ paśubhir bhava purīṣam asi yat te śukra śukraṃ jyotis tena rucā rucam aśīthāḥ // mayi gṛhṇāmy aham agre agniṃ saha prajayā varcasā dhanena / mayi kṣatraṃ mayi rāyo dadhāmi madema śatahimāḥ suvīrāḥ // bhūr bhuvo 'ṅgirasāṃ tvā devānāṃ vratenādadhe 'gneṣ ṭvā devasya vratenādadha indrasya tvā marutvato vratenādadhe manoṣ ṭvā grāmaṇyo vratenādadhe // āchadi tvā chando dadhe dyaur mahnāsi bhūmir bhūnā / tasyās te devy adita upasthe 'nnādam agnim annapatyāyādadhe // agnā āyūṃṣi pavase 'gnir ṛṣir agne pavasva
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.