समास् त्वाग्न ऋतवो वर्धयन्तु संवत्सरा ऋषयो यानि सत्या । सं दिव्येन दीदिहि रोचनेन विश्वा आभाहि प्रदिशश् चतस्रः ॥ सं चेध्यस्वाग्ने प्र च बोधयैनम् उच् च तिष्ठ महते सौभगाय । मा च रिषद् उपसत्ता ते अग्ने ब्रह्माणस् ते यशसः सन्तु मान्ये ॥ त्वाम् अग्ने वृणते ब्राह्मणा इमे शिवो अग्ने संवरणे भवा नः । सपत्नहाग्ने अभिमातिजिद् भव स्वे गये जागृह्य् अप्रयुछन् ॥ इहैवाग्ने अधिधारया रयिं मा त्वा निक्रन् पूर्वचित्तौ निकारिणः । क्षत्रम् अग्ने सुयमम् अस्तु तुभ्यम् उपसत्ता वर्धतां ते अनिष्टृतः ॥ क्षत्रेणाग्ने स्वेन संरभस्व मित्रेणाग्ने मित्रधेये यतस्व । सजातानां मध्यमेष्ठेयाय राज्ञाम् अग्ने विहष्यो दीदिहीह ॥ अति निहो अति सृधो अत्य् अचित्तिम् अति निरृतिम् अद्य । विश्वा ह्य् अग्ने दुरिता तर त्वम् अथास्मभ्यं सहवीरं रयिं दाः ॥ अनाधृष्यो जातवेदा अनिष्टृतो विराड् अग्ने क्षत्रभृद् दीदिहीह । व्य् अमीवाः प्रमुञ्चन् मानुषाणां शिवेभिर् अद्य परिपाहि नो वृधे ॥ बृहस्पते सवितर् बोधयैनं संशितं चित् संतरं संशिशाधि । वर्धयैनं महते सौभगाय विश्वे चैनम् अनुमदन्तु देवाः ॥ अमुत्रभूयाद् अध यद् यमस्य बृहस्पते अभिशस्तेर् अमुञ्चः । प्रत्यूहताम् अश्विना मृत्युम् अस्माद् देवानाम् अग्ने भिषजा शचीभिः ॥ उद् वयं तमसस् परि ज्योतिः पश्यन्ता उत्तरम् । देवं देवत्रा सूर्यम् अगन्म ज्योतिर् उत्तमम्
samās tvāgna ṛtavo vardhayantu saṃvatsarā ṛṣayo yāni satyā / saṃ divyena dīdihi rocanena viśvā ābhāhi pradiśaś catasraḥ // saṃ cedhyasvāgne pra ca bodhayainam uc ca tiṣṭha mahate saubhagāya / mā ca riṣad upasattā te agne brahmāṇas te yaśasaḥ santu mānye // tvām agne vṛṇate brāhmaṇā ime śivo agne saṃvaraṇe bhavā naḥ / sapatnahāgne abhimātijid bhava sve gaye jāgṛhy aprayuchan // ihaivāgne adhidhārayā rayiṃ mā tvā nikran pūrvacittau nikāriṇaḥ / kṣatram agne suyamam astu tubhyam upasattā vardhatāṃ te aniṣṭṛtaḥ // kṣatreṇāgne svena saṃrabhasva mitreṇāgne mitradheye yatasva / sajātānāṃ madhyameṣṭheyāya rājñām agne vihaṣyo dīdihīha // ati niho ati sṛdho aty acittim ati nirṛtim adya / viśvā hy agne duritā tara tvam athāsmabhyaṃ sahavīraṃ rayiṃ dāḥ // anādhṛṣyo jātavedā aniṣṭṛto virāḍ agne kṣatrabhṛd dīdihīha / vy amīvāḥ pramuñcan mānuṣāṇāṃ śivebhir adya paripāhi no vṛdhe // bṛhaspate savitar bodhayainaṃ saṃśitaṃ cit saṃtaraṃ saṃśiśādhi / vardhayainaṃ mahate saubhagāya viśve cainam anumadantu devāḥ // amutrabhūyād adha yad yamasya bṛhaspate abhiśaster amuñcaḥ / pratyūhatām aśvinā mṛtyum asmād devānām agne bhiṣajā śacībhiḥ // ud vayaṃ tamasas pari jyotiḥ paśyantā uttaram / devaṃ devatrā sūryam aganma jyotir uttamam
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.