यो अप्स्व् अन्तर् अग्निर् यो वृत्रे यः पुरुषे यो अश्मनि । य आविवेशौषधीर् यो वनस्पतींस् तेभ्यो अग्निभ्यो हुतम् अस्त्व् एतत् ॥ यः सोमे अन्तर् यो गोष्व् अन्तर् वयांसि य आविवेश यो मृगेषु । य आविवेश द्विपदो यश् चतुष्पदस् तेभ्यो अग्निभ्यो हुतम् अस्त्व् एतत् ॥ येनेन्द्रस्य रथं संबभूवुर् यो वैश्वानर उत विश्वदाव्यः । धीरो यः शक्रः परिभूर् अदाभ्यस् तेभ्यो अग्निभ्यो हुतम् अस्त्व् एतत् ॥ विश्वादम् अग्निं यम् उ कामम् आहुर् यं दातारं प्रतिग्रहीतारम् आहुः । यं जोहवीमि पृतनासु सासहिं तेभ्यो अग्निभ्यो हुतम् अस्त्व् एतत् ॥ उक्षान्नाय वशान्नाय सोमपृष्ठाय वेधसे । स्तोमैर् विधेमाग्नये ॥ वैश्वानरज्येष्ठेभ्यस् तेभ्यो अग्निभ्यो हुतम् अस्त्व् एतत्
yo apsv antar agnir yo vṛtre yaḥ puruṣe yo aśmani / ya āviveśauṣadhīr yo vanaspatīṃs tebhyo agnibhyo hutam astv etat // yaḥ some antar yo goṣv antar vayāṃsi ya āviveśa yo mṛgeṣu / ya āviveśa dvipado yaś catuṣpadas tebhyo agnibhyo hutam astv etat // yenendrasya rathaṃ saṃbabhūvur yo vaiśvānara uta viśvadāvyaḥ / dhīro yaḥ śakraḥ paribhūr adābhyas tebhyo agnibhyo hutam astv etat // viśvādam agniṃ yam u kāmam āhur yaṃ dātāraṃ pratigrahītāram āhuḥ / yaṃ johavīmi pṛtanāsu sāsahiṃ tebhyo agnibhyo hutam astv etat // ukṣānnāya vaśānnāya somapṛṣṭhāya vedhase / stomair vidhemāgnaye // vaiśvānarajyeṣṭhebhyas tebhyo agnibhyo hutam astv etat
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.