यन् नवम् ऐत् तन् नवनीतम् अभवद् यद् असर्पत् तत् सर्पिः । यद् अघ्रियत तद् घृतम् ॥ घृतस्य पन्थाम् अमृतस्य नाभिम् इन्द्रेण दत्तं प्रयतं मरुद्भिः । तत् त्वा विष्णुर् अन्वपश्यत् तत् त्वेडा गव्य् ऐरयत् ॥ पावमानस्य त्वा स्तोमेन गायत्रस्य वर्तन्योपांशोस् त्वा वीर्येणोत्सृजे बृहता त्वा रथंतरेण त्रैष्टुभ्या वर्तन्या शुक्रस्य त्वा वीर्येणोद्धरे ऽग्नेष् ट्वा मात्रया जागत्या वर्तन्या देवस् त्वा सवितोन्नयतु जीवात्वै जी वनस्यायै ॥ इदं वर्चो अग्निना दत्तम् आगान् महि राधः सह ओजो बलं यत् । दीर्घायुत्वाय शतशारदाय प्रतिगृभ्णामि महत इन्द्रियाय ॥ इमम् अग्ना आयुषे वर्चसे कृधि तिग्मम् ओजो वरुण सोम राजन् । मातेवास्मा अदिते शर्म यछ विश्वे देवा जरदष्टिर् यथासत् ॥ अग्निर् आयुस् तस्य मनुष्या आयुष्कृतस् तेनायुषायुष्मान् एधि ब्रह्मायुस् तस्य ब्राह्मणा आयुष्कृतस् तेनायुषायुष्मान् एधि यज्ञ आयुस् तस्य दक्षिणा आयुष्कृतस् तेनायुषायुष्मान् एध्य् अमृतम् आयुस् तस्य देवा आयुष्कृतस् तेनायुषायुष्मान् एध्य् अश्विनोः प्राणो ऽसि तौ ते प्राणं दत्तां तेन जीव मित्रावरुणयोः प्राणो ऽसि तौ ते प्राणं दत्तां तेन जीव बृहस्पतेः प्राणो ऽसि स ते प्राणं ददातु तेन जीव प्रजापतेः परमेष्ठिनः प्राणो ऽसि स ते प्राणं ददातु तेन जीव
yan navam ait tan navanītam abhavad yad asarpat tat sarpiḥ / yad aghriyata tad ghṛtam // ghṛtasya panthām amṛtasya nābhim indreṇa dattaṃ prayataṃ marudbhiḥ / tat tvā viṣṇur anvapaśyat tat tveḍā gavy airayat // pāvamānasya tvā stomena gāyatrasya vartanyopāṃśos tvā vīryeṇotsṛje bṛhatā tvā rathaṃtareṇa traiṣṭubhyā vartanyā śukrasya tvā vīryeṇoddhare 'gneṣ ṭvā mātrayā jāgatyā vartanyā devas tvā savitonnayatu jīvātvai jī vanasyāyai // idaṃ varco agninā dattam āgān mahi rādhaḥ saha ojo balaṃ yat / dīrghāyutvāya śataśāradāya pratigṛbhṇāmi mahata indriyāya // imam agnā āyuṣe varcase kṛdhi tigmam ojo varuṇa soma rājan / mātevāsmā adite śarma yacha viśve devā jaradaṣṭir yathāsat // agnir āyus tasya manuṣyā āyuṣkṛtas tenāyuṣāyuṣmān edhi brahmāyus tasya brāhmaṇā āyuṣkṛtas tenāyuṣāyuṣmān edhi yajña āyus tasya dakṣiṇā āyuṣkṛtas tenāyuṣāyuṣmān edhy amṛtam āyus tasya devā āyuṣkṛtas tenāyuṣāyuṣmān edhy aśvinoḥ prāṇo 'si tau te prāṇaṃ dattāṃ tena jīva mitrāvaruṇayoḥ prāṇo 'si tau te prāṇaṃ dattāṃ tena jīva bṛhaspateḥ prāṇo 'si sa te prāṇaṃ dadātu tena jīva prajāpateḥ parameṣṭhinaḥ prāṇo 'si sa te prāṇaṃ dadātu tena jīva
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.